A cava meu kaulotu kina?

A kaya o Peresitedi Thomas S. Monson: “O ira kece na cauravou bula kilikili ka rawa vei ira mera laki kaulotu, sa dodonu mera vakavakarau yani kina. Sa itavi ni matabete na veiqaravi vakadaukaulotu—e dua na veinuitaki sa namaka vei keda na Turaga, o ikeda ka sa soli vakalevu sara vei keda. Kemuni na cauravou, au vakasalataki kemuni mo ni vakavakarau mo ni veiqaravi vakadaukaulotu” (“Ena Noda Mai Sota Vata Tale,” Ensign se Liaona, Nove. 2010, 5–6).

Mo vakarautaki iko vakayalo

Vakasamataka mada na reki o a sotakaya se dua tale o kila ena veiqaravi vakaulotu tudei. Na veivakalougatataki cava soti era sa yaco mai ki na nomu bula ena vuku ni cakacaka vakaulotu?

Na cava soti era sotakaya na cauravou ena nodra wasea tiko na kosipeli vei ira tale eso? Na cava o rawa ni cakava mo vakalevutaka kina na nodra gagadre ni veiqaravi vakaulotu na lewe ni Matabete i Eroni?

Vulica ena yalomasumasu na veiivolanikalou kei na ivurevure oqo. Na cava o vakila ni na vakauqeti ira na cauravou mera vakavakarau ki na veiqaravi vakaulotu?

Maciu 28:19–20; V&V 50:13–14; 88:81 (Sa noda na itavi ni wasei ni kosipeli)

V&V 4 (Veivakarau ka vakatarai keda meda qarava na Turaga)

V&V 18:9–16 (Sa ka levu dina ena mata ni Kalou na yalo ni dua na tamata)

Neil L. Andersen, “Vakarautaki ni Vuravura me baleta na iKarua ni Lako Mai,” Ensign se Liaona, Me 2011, 49–52; raica talega na vidio “Your Day for a Mission”

W. Christopher Waddell, “Na Madigi ni Bula Taucoko” Ensign se Liaona, Nove. 2011, 50–52

Vidio: “Missionary Work: A Priesthood Duty”

Veivakavulici ena ivakarau ni Turaga

A sureti ira na Nona tisaipeli na Turaga mera cakacaka ena vakabauta ka bulataka na dina kece a vakatavulica o Koya. A kunea na veimadigi eso mera vuli kina ena veika era sotakaya (raica naLuke 5:1–11). Na cava e rawa ni ra cakava qo na cauravou ka na vakauqeta vei ira e dua na gagadre mera veiqaravi kina vakaulotu tudei?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga na nomu vakaiiko mo raicalesu kina na lesoni ni macawa sa oti ka vakatakila na lesoni ni macawa oqo:

Tarogi ira yadua na cauravou mera vakayagataka e dua na miniti ena nodra vola na levu ga ni ka era nanuma rawa mai na lesoni ni macawa sa oti. Sureti ira na cauravou mera wasea na nodra ituvatuva.
Wasei ira vakailawalawa na cauravou, ka sureti ira mera veivosakitaka na veika ka rawa me isau ni taro “A cava meu kaulotu tudei kina” Sureta e dua na cauravou mai na ilawalawa yadua me vola e vica na nodratou isaunitaro ena vava ni volavola.

Vulica vata

Na veiitaviqaravi yadua e ra ena vukei ira na lewe ni kuoramu mera kila deivaki na vuna e dodonu kina mera laki kaulotu. Muria na veivakauqeti ni Yalotabu ena nomu digitaka e dua se vica ka na ganita na nomu kalasi:

Sureti ira na cauravou mera wilika yadua na Vunau kei na Veiyalayalati 18:9–16 ka vaqara na isau ni taro “Na cava e solia kina na Turaga vei ira na lewe ni matabete na itavi ni kena wasei ni kosipeli” Sureta e vica vei ira mera wasea ki na kuoramu na nodra isau ni taro. Na cava e sa rui bibi kina vua na Kalou e dua na yalo? Na veika cava soti era sa sotava na cauravou ena nodra wasea tiko na kosipeli e rawa ni ra wasea ki na kuoramu?
Vakaraitaka na vidio “Missionary Work: A Priesthood Duty.” Sureta e vica na cauravou mera wasea na lomadra me baleta na vosa nei Peresitedi Monson. Vakayaloqaqataki ira na cauravou mera vola na vuni nodra vinakata mera laki veiqaravi kina vakadaukaulotu tudei, ka sureti ira mera vakaraitaka na ka era sa vola tu ena dua na vanua ka na vakananuma vei ira na nodra gagadre ni veiqaravi oqo.
Wilika vata e dua se vica na ivolanikalou ka ra vakaturi tiko ena idusidusi oqo, ka qai tarogi ira na cauravou se cava nodra nanuma ena rawa ni duidui kina na vuravura kevaka mera a kila ka bulataka na kosipeli na tamata kece sara. Na veileqa kei na bolebole cava soti ena vuravura nikua e sa wali ni da bulataka na kosipeli? E duatani vakacava na nomu bula ena vuku ni kosipeli?
Vakaraitaka na vidio “Your Day for a Mission” (se wilika vata vakuoramu na veika a yaco vei Sid Going ena vosa nei Elder Neil L. Andersen “Vakarautaki ni Vuravura me baleta na iKarua ni Lako Mai”). Kerei ira na lewe ni kuoramu mera tuva e so na ka e rawa ni vakalatilati ki na nodra laki kaulotu. Vukei ira ena nodra veidutaitaka na ituvatuva oqo ki na veivakalougatataki levu ena rawa mai ena veiqaravi vakadaukaulotu.
Vola ena vava ni volavola na ulutaga ni lesoni oqo. Sureti ira na lewe ni kuoramu mera raica na veiisau ni taro oqo ni ra wilika tiko na Vunau kei na Veiyalayalati 4:2–4 se na vosa oqo mai vei Peresitedi Russell M. Nelson: “Na vakataulewa ni laki kaulotu tudei ena vakataudeitaka na icavacava vakayalo ni dua na daukaulotu, koya kei watina, kei ira na nodrau kawa ena veitabayabaki muri mai. Na gagadre ni veiqaravi sa ivatuka ni nona saumaki mai, bula kilikili, kei na nona tu vakarau e dua na tamata” (“(Tarogi Ira na Daukaulotu! E Rawa ni ra Vukei Iko!” Ensign se Liaona, Nove. 2012, 18). Ena nona veivakadonui na bisopi, sureta edua sa lesu mai na kaulotu me wasea kei ira na lewe ni kuoramu na sala sa vakalougatataki kina na nona bula ena nona veiqaravi vakadaukaulotu.

Kerei ira na cauravou mera wasea na veika era sa vulica nikua. Era sa kila deivaki beka na vuna e dodonu mera laki kaulotu tudei kina? Na cava era sa bau vakila se vakanananu kina? E tiko tale beka eso na nodra vakatataro? Ena yaga li me na tauri vakalevu cake na gauna ena ulutaga oqo?

Me Veivuke ena Veivakavulici

“Na qasenivuli uasivi ena sega ni nanuma vaqo, ‘Na cava beka meu cakava ena kalasi nikua?’ ia ena taroga, ‘Na cava beka mera cakava na noqu gonevuli ena kalasi nikua?’; sega ni, ‘Na cava meu na vakavulica nikua?’ ia me, ‘Au na vukei ira vakacava na noqu gonevuli mera vulica na ka mera kila?’” (Virginia H. Pearce, e Na Veituberi, Me iLutua Ni Noda Bula [1999], 69).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na ka sa vakayacora tiko oqo ena nona vakavakarau me laki kaulotu tudei.
Sureta na kuoramu mera vakarautaka e dua na navunavu me wiligusutaki kina na Vunau kei na Veiyalayalati wase 4 ena vica na vula mai oqo.
Sureti ira na lewe ni kuoramu mera vakacavara e dua na itaviqaravi ni vakavakarau ki na veiqaravi vakaulotu tudei ena ivolaiTavi Vua na Kalou tabana (e 87–88).