Na cava soti na noqu itavi vaka lewe ni Matabete i Eroni?

A kaya na Turaga ni o ira kece era sa tabaki oti ki na matabete sa dodonu mera “vulica ka kila na nona itavi” ka “vakayacora … ena yalodina” (V&V 107:99). Vakalewe ni Matabete i Eroni, eda dau vakayacora na veicakacaka tabu ni matabete, ka sureti ira na tamata kece sara mera lako mai vei Karisito.

Mo vakarautaki iko vakayalo

Vakasamataka mada na ka o a vakila ena imatai ni gauna o ciqoma kina na Matabete i Eroni. Na cava e kena ibalebale vei iko na lewa oqo? E vakayarayarataka vakacava na nomu vakanananu kei na ivalavala na ciqomi ni matabete?

E levu vei ira na lewe ni Matabete i Eroni era sa kila tiko na nodra itavi ni kena dau qaravi na sakaramede ia era na sega beka ni kila na nodra itavi mera qaravi ira kina na tani ka sureti ira mera lako mai vei Karisito. Na cava o rawa ni cakava mo vukei ira tiko kina na cauravou mera dau nanuma tiko, ka vakayacora na nodra itavi vakamatabete?

Vulica ena yalomasumasu na veiivolanikalou kei na ivurevure oqo. Na cava o rawa ni wasea kei ira na cauravou me vukei ira mera kila deivaki kina na nodra itavi?

V&V 20:46–59; 84:111 (Era dau vakayacora na cakacaka vakalotu na lewe ni Matabete i Eroni ka dau sureti ira kece sara na tamata vei Karisito)

V&V 84:33–34; 107:99 (E dodonu vei ira na lewe ni Matabete i Eroni mera vulica na nodra itavi ka yalodina ena kena vakayacori vakaoti)

V&V 107:68 (Era dau qaravi ira na tani o ira na lewe ni Matabete i Eroni ena nodra dau vukei bisopi ena qaravi ni veitavi vakayago)

Gérald Caussé, “Vakarautaka na Sala,” Ensign se Liaona, Me 2017, 75–77

Henry B. Eyring, “Matavuvale Tawamudu,” Ensign se Liaona, Me 2016, 81–84

Henry B. Eyring, “Ko Na Sega ni Galili ena Cakacaka,” Ensign se Liaona, Nove. 2015, 80–83

Henry B. Eyring, “Na Matabete Tagane, ” Ensign se Liaona, Me 2014

Qarava Noqu iTavi Vua na Kalou (2010), 14–15, 38–39, 62–63

Vidio: “Fulfilling Your Duty to God,” “Faith in the Priesthood”

4:56

1:58

Veivakavulici ena ivakarau ni iVakabula

Ena veituvaki kecega, e a ivakaraitaki ka qasenivuli vei iratou na Nona tisaipeli na iVakabula. A vakavulica vei ira mera masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina o Koya. A vakavulica vei ira na sala me vakavulici kina na Nona kosipeli ena ivakarau a veivakavulici kina o Koya. Vukei ira na cauravou mera vakayacora vakavinaka na nodra itavi ena vakatavulici ni kosipeli me vaka a vakatavulica na iVakabula.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga na nomu vakaiiko mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na cauravou mera wasea e so na ka era nanuma mai na lesoni ni macawa sa oti. Na cava beka era lomatarotarotaka tiko? Era a bulataka vakacava na ka era vulica ena macawa sa oti?
Vola ena vava ni volavola na tolu na iwasewase ni itavi ni matabete ka vakaturi tiko ena iTavi Vua na Kalou: “Liutaka na Cakacaka Vakalotu ni Matabete,” “Veiqaravi vei ira na Tani,” kei na “Sureta na Tamata Kecega Mera Lako mai vei Karisito.” Sureti ira na cauravou mera vola ena vava ni volavola na levu ga ni nodra itavi vakamatabete era rawata ena iwasewase yadua. Railesuva na ituvatuva oqo ena gauna taucoko ni lesoni, ka vakuria tiko ena gauna era kunea kina na cauravou e so tale na nodra itavi.

Vulica vata

Ena vukei ira na lewe ni kuoramu na veiitaviqaravi yadua e ra mera kila deivaki kina na nodra ilesilesi ena Matabete i Eroni. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Sureta e dua na lewe ni kuoramu me vakarau tiko mai me mai tukuna na italanoa ena itekitekivu ni vosa nei Bisopi Gérald Caussé “Vakarautaka na Sala.” A vakarautaki Bisopi Caussé vakacava na nona itavi ena Lotu ki na kena soli vua e dua na cakacaka? Vola na Joni na Dauveipapitaisotaki kei na Matabete i Eroni ena vava ni volavola. Sureti ira na cauravou mera vakasaqara ena vosa nei Bisopi Caussé na veika era sa vulica baleti Joni na Dauveipapitaisotaki kei ira na lewe ni Matabete i Eroni na sala era a “vakarautaka kina na sala.” Na cava era rawa ni cakava mera vakasaqara kina na madigi eso mera vukei ira kina na lewe ni Matabete i Melikiseteki. Na veika cava era sa bau cakava ena nodra veiqaravi kei ira na Matabete i Melikiseteki?
Sureti ira na cauravou mera vola ena dua na tikini pepa na veika era sotava e vukei ira kina na Tamada Vakalomalagi. Biuta kece na tikini pepa ena dua na koniteina ka kerei ira na cauravou mera digia edua ka wilika kina kalasi. Sa rawa mo biuta talega na italanoa eso mai na vosa nei Peresitedi Henry B. Eyring “Ko Na Sega ni Galili ena Cakacaka” ena loma ni koniteina. Na cava era vakavulica na italanoa kei na veika sotavi oqo me baleta na nona vukei ira na cauravou na Turaga ena nodra veiqaravi vakaleweni matabete?
Sureti ira na cauravou mera wilika na veika me baleta na nodra itavi vakamatabete ena V&V 20:46–59 kei na iTavi Vua na Kalou (tabana e 23, 46–47, se 70–71). Kerei ira mera vakatakila na itavi vakamatabete ka tuvai ira ena papa ni volavola. Tarogi ira na cauravou ena veiitavi cava era sa vulica ka ra sega tu ni kila ni nodra. Na cava e rawa ni ra cakava mera vakayacora vakavinaka kina na veitavi oqo?
Sureti ira na cauravou mera vakasaqaqara ena ivolanikalou ka vakatakila na ivakaraitaki ni tamata ka ra vakayacora vakavinaka na nodra itavi vakamatabete (me ivakaraitaki, Maciu 3:1–6, 13–17; Jekope 1:18–19; Alama 15:16–18; 3 Nifai 18:1–5). Kerei ira mera wasea na nodra ivakaraitaki ka vakatakila se iwasewase cava mai na iTavi Vua na Kalou e wili kina na ivakaraitaki yadua (“Liutaka na Cakacaka Vakalotu ni Matabete,” “Veiqaravi vei ira na Tani,”se “Sureta na Tamata Kecega Mera Lako mai vei Karisito”). Era a vakalougatataki vakacava na tamata mai na ivolanikalou oqo ena veiqaravi ni matabete?
Kerei ira na cauravou mera wilika vakatikina na vosa nei Peresitedi Henry B. Eyring “Matavuvale Tawamudu” se “Na Matabete Tagane” (se sarava na vidio “Faith in the Priesthood”) ka wasea na veika era sa vakauqeti kina mera cakava kina na nodra itavi ni matabete, ena nodra matavuvale se veivanua tale eso. Sureti ira na cauravou mera vola e dua na ka era a sotava ni ra cakacakataka na nodra matabete se vulica mai na ivakaraitaki ni dua tale na lewe ni matabete. E veivakalougatataki vakacava vei ira na cauravou kei na nodra matavuvale ni ra taura tu na matabete?

1:58

Kerei ira na cauravou mera wasea na veika era sa vulica nikua. Era sa kila deivaki cake beka na nodra itavi vakamatabete? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me na tauri vakalevu cake na gauna ena ulutaga oqo?

Veisureti me caka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Sureti ira na cauravou mera navunavu ena dua na iwase ni nodra ivola iTavi Vua na Kalou ka veiwaseitaka kei ira tale eso na ka era sa navuca mera na vakayacora.
Bolei ira na lewe ni kuoramu mera wasea kei na dua na lewe ni matavuvale eso na ka era a vulica me baleta na nodra itavi vakamatabete.