Meu na vaqaqacotaka vakacava na noqu ivakadinadina?

Na ivakadinadina sa ikoya na ivakadinadina vakayalo ni ka dina e solia mai na Yalo Tabu. Sa soli tu vei keda na lewe ni Lotu, na madigi tabu vata kei na itavi meda rawata vakaikeda yadua na noda ivakadinadina. Kevaka eda na vakasaqara na ivakadinadina ena vuli ivolanikalou, masumasu, ka bulataka na kosipeli, ena vukei keda na Yalo Tabu meda kila vakai keda ni sa dina sara na kosipeli.

Mo vakarautaki iko vakayalo

O sa mai rawata vakacava na nomu ivakadinadina? Sa veivakauqeti vakacava na nomu ivakadinadina ki na nomu bula vakawati, tama, lewe ni matabete, ka tisaipeli i Karisito?

Na cava o sa kila tu me baleta na nodra ivakadinadina na cauravou ena nomu kuoramu? Ena veivakauqeti vakacava na ivakadinadina kaukauwa ki na nodra bula ena gauna oqo kei na veisiga ni mataka? Na cava o rawa ni cakava mo vakayaloqaqataki ira kina na lewe ni kuoramu mera vaqaqacotaka na nodra ivakadinadina?

Vulica ena masumasu na ivolanikalou kei na ivurevure oqo. Na cava o raica ni rawa mera vakauqeti kina na cauravou mera rawata e dua na ivakadinadina?

Joni 7:16–17 (Kevaka eda na cakava na lewa ni Turaga, eda na rawata rawa e dua na ivakadinadina)

1 Korinica 2:9–13; Alama 5:45–46; V&V 8:2–3 (Na Yalo Tabu e dau vakatakila na ka dina)

Jemesa 1:5; 1 Nifai 10:17–19; 15:11; 3 Nifai 18:20; Moronai 10:3–5 (Me rawati e dua na ivakadinadina, e dodonu meda kerea ka vakasaqara)

Mosaia 26:3; Alama 12:11 (Na veivakataotaki ni kena rawati e dua na ivakadinadina)

V&V 9:7–9 (Meda vuli vakaikeda ni bera ni da kerea)

Ronald A. Rasband, “De Ko ni Guilecava,” Ensign se Liaona, Nove. 2016, 113–15.

Dieter F. Uchtdorf, “Na kena Ciqomi e Dua na iVakadinadina ni Rarama kei na Dina” Ensign se Liaona, Nove. 2014, 20--23

Jeffrey R. Holland, “Kemuni na Turaga, Au Sa Vakabauta,” Ensign se Liaona, Me 2013

Quentin L. Cook, “A Cava Dou sa Nanuma Ena Gauna Oqo?” Ensign se Liaona, Nove. 2012, 6--9.

“iVakadinadina,” Tudei ena Vakabauta (2004), 30–32

Vidio: “Waiting on Our Road to Damascus”

3:45

Veisemati ni iTaviqaravi ni iTabagone

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo, se vakasamataka ga na nomu vakai iko, mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na cauravou me ra wasea na nodra nanuma ena ka na yaco ena so na ivakatovotovo rawarawa. Kena ivakaraitaki, rawa ni o taroga, “Kevaka o vakalutuma e dua na ka, na cava ena yaco?” se “Keavaka o waqaca na cina na cava ena yaco?” Taroga vei ira era kila vakacava na ka ena yaco na gauna o cakava tiko kina na ivakatovotovo bera niko cakava. Vakamacalataka na kena vakaukauwataki na noda ivakadinadina eda na vakatovolea eso na vosa (raica naAlama 32:27), na gauna eda na vuki cakava tiko kina, eda na vulica meda vakabauta na macala ni noda ivakatovotovo.
Sureti ira na cauravou mera wasea na veika era sa sotava ena nodra a vakayagataka e dua na ivakavuvuli mai na lesoni ni macawa sa oti. Sa rawa ni o wasea na nomu me vukea na kena tekivutaki na veivosaki.

Vulica vata

Na itaviqaravi yadua e ra ena vukei ira na lewe ni kuoramu mera vulica na sala mera rawata kina na nodra ivakadinadina. Muria na veivakauqeti ni Yalotabu, digitaka e dua se sivia ka na ganita na nomu kuoramu:

Sureta e dua na lewe ni kuoramu me vakavulica e dua na iwase ni lesoni oqo. Sa rawa me cakava oqo o koya me tiki tiko ni nona ituvatuva ni iTavi Vua na Kalou me vulica ka vakavulica kina na veika e baleta na masu kei na ivakatakila ki na tamata yadua (raica na “Kila na iVunau” draunipepa 18, 42, se 66).
Kerea e vica na cauravou mera wilika na 1 Nifai 10:17–19, ka kerea eso tale mera wilika na Alama 5:45–47. Na cava e rau a cakava o Nifai kei Alama me rau rawata kina na nodrau dui ivakadinadina? Na veika cava tale era sa vulica na cauravou mai na ivakaraitaki oqo? Na ivakaraitaki cava tale eso era rawa ni raica mai na ivolanikalou? Sureti ira mera wasea na veika era a sotava ka a vaqaqacotaki kina na nodra ivakadinadina. Na cava e rawa ni ra cakava me ra vakasaqara kina e vuqa na veika vakaoqo?
Lesia na cauravou yadua me vulica e dua na iwasewase ni vosa nei Peresitedi Dieter F. Uchtdorf “Na kena Ciqomi E Dua na iVakadinadina ni Rarama kei na Dina.” Sureti ira na cauravou mera vakasaqara na veika e vakavulica o Peresitedi Uchtdorf me baleta na kena rawati e dua na ivakadinadina, ka kerei ira mera wasea na veika era sa raica. Vola ena papa ni volavola, “Na rawati ni dua na ivakadinadina sa vaka__________.” Sureta e vica na cauravou mera gole mai ki na papa ni volavola ka wasea na sala mera vakacavara kina na itukutuku oqo.
Kerei ira yadua na cauravou mera wilika e dua na ivolanikalou ena ituvatuva oqo ka raica na sala mera rawata ka vaqaqacotaka kina na nodra ivakadinadina se na veika e dau vakataotaki keda meda rawata na noda ivakadinadina. Ni oti na nodra wasea na vakasama eso, kerei ira mera vakasamataka na sala mera vukea kina na lewe ni kuoramu ena vaqaqacotaki ni nodra ivakadinadina. Era na vukei ira vakacava na lewe ni matavuvale? itokani e koronivuli?
Sureti ira yadua na cauravou me vola na veika e rawa ni vakaluluqataka e dua na ivakaidinadina kei na sala me na vakaukauwataka tiko ka ve ra wilika na vosa nei Elder Ronald A. Rasband “De Ko Ni Guilecava” se na ika 9 kei na ika 10 ni parakaravu ni yatu vosa nei Elder Quentine L. Cook “A Cava Dou sa Nanuma Ena Gauna Oqo?” Kerei ira na cauravou me ra wasea na ivakaraitaki eso era sa raica e vakaraitaka tiko e dua na ka era sa vola.

Kerei ira na cauravou me ra wasea na veika era sa vulica nikua. Era sa kila vakavinaka tiko beka na sala mera rawata kina na nodra dui ivakadinadina? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me veivuke ena veivakavulici

“E levu na gauna e tiko e na lesoni e levu sara na iyaragi se ka ni veivakavulici e na rawa ni o vakavulica taucoko e na gauna sa lavaki vei iko e na veilesoni. Ena kena ituvaki vakaoqo, e dodonu ga mo digitaka na uto ni lesoni ena vukei ira vakalevu duadua na lewe ni nomu kalasi” (Veituberi, Me iLutua ni Noda Bula [1999], 121).

Veisureti me cakacakataki

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina ni sa ka bibi ki na tamata yadua me rawata na nona ivakadinadina ga vakai koya me baleta na kosipeli.
Sureti ira na vo ni lewe ni kuoramu mera wasea na nodra ivakadinadina.
Sureti ira na lewe ni kuoramu mera vakasamataka na veika eso era rawa ni cakava mera vaqaqacotaka kina na nodra ivakadinadina.