Meu na vakayacora vakacava me vakaibalebale cake na noqu masu?

E lomani keda na Tamada Vakalomalagi ka gadreva me da veivosaki vata kei Koya ena noda masu. Ni da sa masu, e dodonu meda tukuna vua na Tamada Vakalomalagi na nanuma ni lomada. Meda kakua ni tokaruataka tikoga na vosa se malanivosa e sega ni vakaibalebale. Mai na noda masu vakaidina, ka yaloda dina, eda na vakila ni sa tiko volekati keda na Tamada Vakalomalagi.

Mo vakarautaki iko vakayalo

Na veika vakaibalebale cava soti ni bula ni masumasu o a sa bau sotava? Na cava o sa vulica mai na veika oqo me baleta na veivosaki kei na Tamada Vakalomalagi? Na cava o sa vakayacora me vakaibalebale cake kina na nomu masu?

Na gauna cava o sa bau rogoci ira kina na cauravou ni nomu kuoramu mera masu? O na vukei ira vakacava me vakaibalebale cake kina na nodra masu? Ena vukei ira vakacava ena gauna oqo kei na veisiga ni mataka na nodra kila vakavinaka na sala mera veivosaki kina kei na Tamada Vakalomalagi?

Ni ko vakavakarau, vulica ena masumasu na ivurevure oqo. Na veika cava o gadreva mera kila na cauravou baleta na masu?

Luke 22:41–42; Ilamani 10:5; V&V 46:30–31 (E dodonu meda vakasaqara na lewa ni Kalou ni da masu)

3 Nifai 14:7; V&V 9:7–8 (Na masu e salavata ga kei na kena sasaga yalodina)

3 Nifai 17–19 (A masu o Jisu Karisito vata kei ira na Nifai ka vakavulica na masu)

Moronai 10:3–5 (Masu ena vakabauta, ena yalodina, kei na inaki dina)

Carol F. McConkie, “Na Gagadre Vakaidina ni Yalo,” Ensign or Liaona, Nove. 2016, 25–26

Juan A. Uceda, “Na Turaga o Jisu Karisito e Vakavulica vei Keda Meda Masu,” Ensign se Liaona, Nove. 2016, 30–32

Henry B. Eyring, “Matabete kei na Masu Yadua,” Ensign se Liaona, Me 2015, 84-87

Qarava Vinaka na Noqu iTavi Vua na Kalou (2010), 38

“ Masu ”,Tudei e na Vakabauta (2004), 70–75

Vidio: “Daily Bread: Experience”, “Face to Face with President Eyring and Elder Holland: How can I improve my prayers?” “Face to Face with President Eyring and Elder Holland: What does the phrase ‘nothing wavering’ mean in James 1:6?”

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Wasea na italanoa mai na vosa nei Elder Juan A. Uceda “Na Turaga o Jisu Karisito sa Vakavulica vei Keda Meda Masu.” Na cava e tarai ira na cauravou me baleta na italanoa oqo? Na cava era sa sotava oti na cauravou me baleta na masu era rawa ni wasea?
Kerei ira na cauravou mera droinitaka e dua na iyaloyalo e vakatakarakarataka tiko e dua na ka era vulica ena lesoni ena macawa sa oti, ka kerei ira mera wasea na nodra iyaloyalo. Na cava beka era sa cakava mera vakayagataka kina na veika era sa vakavulica? E tiko beka e dua na nodra taro se ikuri ni veivakararamataki me baleta na veika era sa vulica?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Veisureti me caka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na nona ituvatuva metauyavutaki kina e dua na ivakarau tudei ni vakayaco masu.
Wasea na veika sa sotava a vakavulici koya me baleta na kaukauwa ni masu.

Vulica vata

Na itaviqaravi yadua e ra ena vukei ira na lewe ni kuoramu mera kila vakavinaka na sala me vakaibalebale cake kina na nodra masu. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Vola ena papanivolavola na yacadratou na Lewe Tolu Vakalou. Sureti ira na cauravou me ra vakayagataka na vosa nei Sisita Carol F. McConkie “Na Gagadre Vakaidina ni Yalo” me ra tuva ena nodra yaga o ratou na lewe tolu vakalou ena masu. Kerei ira na cauravou me ra vakaraica na isaunitaro ena vosa nei Sister McConkie ena taro oqo “Na cava e da masu kina vua na Tamada Vakalomalagi? Na cava na kena ibalebale meda masu kina ena yaca i Jisu Karisito? E rawa vakacava mena vakaukauwa taka na noda masu na Yalo Tabu?” Sureti ira me ra vola e vica na ka ena rawa ni vakaibalebale vakalevu cake kina na nodra masu. Era na rawa ni vakabira tu e lomani nodra vale me ra qai digia e dua me ra na vakanamata kina ena lomani dua na macawa.
Digitaka na italanoa eso kei na vica na malanivosa leleka mai na vosa nei Peresitedi Henry B. Eyring “Matabete kei na Masu Yadua” o nanuma ena vakaibalebale cake vakalevu vei ira na cauravou ena kuoramu. Vola na italanoa oqo se malanivosa ena veitiki ni pepa. Sureti ira na cauravou mera digitaka e dua na tiki ni pepa, ka wilika ki na kuoramu, ka liutaka na veivosakitaki ni ka e vakavulici tiko kina. Ena vukei ira vakacava na masu ena nodra veiqaravi ni matabete? Navuca mo wasea na gauna a vakalougatataki kina ena masu na nomu veiqaravi ni matabete, se sureti ira na cauravou mera wasea vakakina
Sureti ira na cauravou mera vakaraica ena ivolanikalou e dua na ivakaraitaki ni masu e veivakauqeti kivei ira (ke ganita, vakatututaka mera wilika na ivolanikalou e lisitaki tiko ena idusidusi oqo), se vakaraitaka na vidio “Daily Bread: Experience.” Kerei ira mera wasea na veika era sa raica kei na ka era sa vulica me baleta na masu mai na ivakaraitaki o ya.
Sureti ira na cauravou mera wilika e dua na ivolanikalou me baleta na masu (me vakataka na kena era sa vakaturi tiko ena ituvatuva oqo) Kerei ira mera vola e dua na ivakavuvuli me baleta na masu era vulica mai na ivolanikalou kei na ivakaraitaki ni ivakavuvuli o ya mai na nodra bula se nodra bula tale eso. Sureti ira mera wasea ki na dua tale na lewe ni kuoramu na veika era sa vola. Na cava era sa vulica na cauravou vakai ira ka na rawa ni vukei ira mera cakava me vakaibalebale cake na nodra masu? Ena rawa ni vakuri na nodra vakararamataki na cauravou ni ra sarava na vidio oqo “Face to Face with President Eyring and Elder Holland: How can I improve my prayers?” kei na “Face to Face with President Eyring and Elder Holland: What does the phrase ‘nothing wavering’ mean in James 1:6?”
Kerei ira yadua na cauravou mera vulica e dua vei ira na ivakarau ni masu e vakamacalataki tiko ena Tudei ena Vakabauta,draunipepa 71–73, se ena ivakamacala ni masu e tiko ena Bible Dictionary. Sureti koya me vakavulica na kuoramu ena veika sa vulica rawa. Vakayaloqaqataki ira na cauravou mera wasea na nodra dui ivakaraitaki eso ni nodra veivakavulici.
Me cakacaka na kuoramu, ena imatai ni itaviqaravi ni vuli ena draunipepa 38 ni ivola iTavi Vua na Kalou. Solia vei ira na cauravou e dua na gauna ena soqoni ni kuoramu mera vola se talemuria na nodra ituvatuva mera tauyavutaka kina e dua na ivakarau tudei ni masu (raica na draunipepa 15, 39, se 63).

Kerei ira na cauravou mera wasea na veika era sa vulica nikua. Era sa kila vakavinaka tiko beka na sala mera cakava na nodra masu me vakaibalebale cake kina? Na cava era sa bau vakila se vakanananu kina? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Ni sa oti na nona sauma mai na taro se solia na nona vakasama e dua e vuli tiko, sureti ira na kena vo me ra tomana mai na vakasama o ya se vakaraitaka mai na nodra dui nanuma vakataki ira. Ni sa dua e taro tiko, solia na gauna mera sauma mai o ira na vakarorogo tiko ka mo se kua mada ni se sauma o iko. Me kena ivakaraitaki oqo, e dodonu mo taroga, ‘E dua beka ena via sauma mai na taro o ya?” (Na Veituberi, Me iLutua ni Noda Bula (1999), 77).