Cava na vuna e bibi kina na iMatai ni Raivotu?

Ena vulaitubutubu ni 1820, erau a rairai na Kalou na Tamada kei na Luvena, o Jisu Karisito, vua na Parofita o Josefa Simici. Na raivotu oqo, ka vakatakilakilataka na itekitekivu ni kena vakalesui mai na Kosipeli, sai koya na ka bibi duadua a yaco me tekivu mai na Tucaketale nei Jisu Karisito. Na nona masu malumalumu o Josefa Simici a yaco mai kina na vakalesui mai ni dina ni kosipeli, na dodonu ni matabete, kei na cakacaka vakalotu ni veivakabulai. “Na ivakatakila e duabau oqori e sauma [na taro] kece sara me baleta na Kalou kei na kena ituvaki vakalou. ... Na nona kauwai me baleta na kawatamata mai na dodonu e lesi ki na tamata. Sa vakadeitaki kina na vunilagi ni cakacaka. Oqo kei na veidina lagilagi tale eso era sa vakamatatataki mai ena imatai ni raivotu lagilagi” (Nodra iVakavuvuli na Peresitedi ni Lotu: David O. McKay [2003], 93).

Mo vakarautaki iko vakayalo

O a rawata vakacava e dua na ivakadinadina bula ni a raica o Josefa Simici na Kalou na Tamada kei na Luvena o Jisu Karisito? Sa vakalougatataki beka vakacava na nomu bula ena vuku ni ivakadinadina oqo? Na cava na kena bibi vei iko na iMatai ni Raivotu?Ena vakatitobutaka beka vakacava na nodra ivakadinadina yadua na goneyalewa ena nomu kalasi na nodra vulica na iMatai ni Raivotu? E rawa vakacava ni o vukei ira na goneyalewa mera kila na bibi ni cakacaka cecere oqo?

Ni o vakavakarau, vulica ena masumasu na ivolanikalou kei na ivurevure eso oqo kei na so tale na ka o digitaka. Na cava o nanuma ena vakaibalebale vakalevu duadua kivei ira na goneyalewa o vakavulica?

Josefa Simici—Ai Tukutuku 1:11–19, 24–25

Vidio: “The Restoration”, “Ask of God: Joseph Smith’s First Vision,” “Face to Face with President Eyring and Elder Holland: What do we learn about the nature of God from the First Vision?”

Dieter F. Uchtdorf, “Na Vua ni iMatai ni Raivotu,” Ensign se Liaona, Me 2005, 36–38

Veivakavulici ena ivakarau ni Turaga

A sureti ira na daumuri Koya na iVakabula mera vakadinadinataka vei ira na tani na dina ni Nona ivakavuvuli. Ni ra cakava vakakina, e tara na yalodra na Yalotabu. E rawa vakacava ni o vakauqeti ira na goneyalewa mera veiwasei ivakadinadina?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga na nomu vakaiiko mo vakamacalataka kina na lesoni ni macawa oqo:

Vakaraitaka e dua na iyaloyalo ni iMatai ni Raivotu. Kerea e dua ena kalasi me vakamacalataka vakalekaleka na ka e yaco tiko ena iyaloyalo. Sureti ira na goneyalewa mera vakasamataka mada vakalailai na bibi ni ka e yaco oqo. Kerei ira mera vakaraica na vakasama eso ena gauna ni lesoni ka na vukea mera kila na bibi ni iMatai ni Raivotu.
Ni lagata vakalasi na serenilotu “Matai ni Masu nei Josefa Simici” (Sere ni Lotu, naba 14). Sureti ira na goneyalewa mera wasea na nodra nanuma me baleti Josefa Simici kei na veika a sotava ena nona raica ka vosa vua na Kalou na Tamada kei Jisu Karisito.

Vulica vata

Na itaviqaravi yadua e ra ena rawa ni vukei ira na goneyalewa mera vulica na veika e baleta na iMatai ni Raivotu nei Josefa Simici. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa mera vola eso na veivakalougatataki era sa ciqoma ka vakavuna na iMatai ni Raivotu. Kerei ira mera vakaraica eso tale na veivakalougatataki ni iMatai ni Raivotu ni ra wilika na iotioti ni 10 na parakaravu ni vosa nei Peresitedi Dieter F. Uchtdorf “Na Vua ni iMatai ni Raivotu.” Sureti ira mera wasea na veika era sa kunea kei na nodra nanuma me baleta na bibi ni iMatai ni Raivotu.
Ni wilika vata vakalasi me baleta na iMatai ni Raivotu nei Josefa Simici ena Josefa Simici—Ai Tukutuku 1:7–20. Sureti ira na goneyalewa mera vaqara na dina e rawa ni da vulica mai na veika a sotava o Josefa Simici (me vaka beka oqo, erau tiko dina na Tamada kei na Luvena, ka rau lerua na tamata duidui; e tiko dina o Setani kei na nona kaukauwa, ia e cecere cake na kaukauwa ni Kalou; na Kalou e dau rogoca ka sauma mai na noda masu; ka se bera ni mudu na ivakatakila). Sureta e dua na goneyalewa me vola na dina eso oqo ena vava ni volavola. E duatani vakacava na dina eso oqo mai na veika era vakabauta eso tale na matalotu? Ena duatani vakacava na noda bula kevaka eda sega ni kila na veika oqo?
Sureti ira na goneyalewa mera wilika lo ka vakasamataka na iMatai ni Raivotu nei Josefa Simici kei na nona ivakadinadina ena Josefa Simici—Ai Tukutuku 1:11–19, 24–25 (se sarava na vidio “The Restoration”). Kerei ira mera vakasamataka na vuna e sa rui ka bibi kina ena itukutuku ni Lotu na iMatai ni Raivotu. Na cava e bibi kina vei keda yadua? Wasea na nomu ivakadinadina me baleta na bibi ni iMatai ni Raivotu, ka sureti ira na gone mera wasea na nodra nanuma kei na nodra ivakadinadina.
Sureti ira na goneyalewa mera railesuva na itukutuku eso vakaivolanikalou ni Kalou na Tamada kei Jisu Karisito ena nodrau vakatakilai Rau vei ira na tamata e vuravura (me vaka na Maciu 3:13–17; Cakacaka 7:54–60; 3 Nifai 11:3–10). E rawa talega ni o vakaraitaka na iyaloyalo eso ni veika oqo (raica na Gospel Art Book,35, 63, kei na 82). Kerei ira mera vakalekalekataka na itukutuku yadua. Qai sureti ira mera wilika na Josefa Simici Ai Tukutuku 1:17 (raica na Gospel Art Book,90). E tautauvata vakacava na iMatai ni Raivotu nei Josefa Simici ki na veivakatakilai tale eso oqo? E duatani vakacava? Sureti ira na goneyalewa mera wasea na vuna e bibi kina vei ira na iMatai ni Raivotu.

Kerei ira na goneyalewa mera wasea na veika era sa vulica nikua. Era sa kila vakavinaka cake beka na iMatai ni Raivotu nei Josefa Simici? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Vola na nodra ivakadinadina ni iMatai ni Raivotu nei Josefa Simici ena nodra ivolaniveisiga.
Wasea na nodra ivakadinadina ni iMatai ni Raivotu kivei ira na nodra matavuvale.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.