Na cava na itavi nei Josefa Simici ena Veivakalesui mai?

Ni mai cava e vica vata na senitiuri ni vukitani, a vakalesuya mai na Turaga Nona Lotu kei na taucoko ni kosipeli mai vua na Parofita o Josefa Simici. A tekivu na Veivakalesui mai oqo ena iMatai ni Raivotu nei Josefa Simici, ka rau rairai mai kina na Tamada Vakalomalagi kei Jisu Karisito. Mai vua na Parofita o Josefa, sa kauta mai kina na Turaga na iVola i Momani kei na ivolanikalou tale eso, vakalesuya mai na dodonu ni matabete, ka tauyavutaka na Nona Lotu.

Mo vakarautaki iko vakayalo

Sa vakalougatataki vakacava na nomu bula mai na veika dina sa vakalesui mai vei Josefa Simici? O rawata vakacava na nomu ivakadinadina kei Josefa Simici? E rawa vakacava ni o vakauqeti ira na goneyalewa me ra rawata na nodra ivakadinadina?

Ena rawa vakacava ni vakatitobutaka na nodra dui ivakadinadina na goneyalewa yadua ena nomu kalasi na nodra vulica me baleta na bula, ivakadinadina, kei na solibula nei Josefa Simici? E rawa ni veivuke vakacava na noda rogoca na nodra ivakadinadina na tani?

Ni o vakavakarau, vulica ena masumasu na ivolanikalou kei na ivurevure eso oqo. Na cava o nanuma ni na vakaibalebale vakalevu duadua vei ira na goneyalewa o vakavulica?

V&V 35:17–18 (Sa vakalesuya mai na Turaga mai vua na Parofita o Josefa Simici, na taucoko ni kosipeli)

V&V 76:22–24 (iVakadinadina nei Josefa Simici me baleti Jisu Karisito)

V&V 135:3 (Sa solia mai vei keda na Turaga mai vua na Parofita o Josefa Simici, na ikuri ni ivolanikalou)

Josefa Simici—Ai Tukutuku 1:1–25 (Erau rairai na Kalou na Tamada kei Jisu Karisito vei Josefa Simici me isau ni nona masu)

Craig C. Christensen, “Au na Vakatubura e Dua na Parofita Digitaki,” Ensign se Liaona, Nove. 2016, 27–30

Neil L. Andersen, “Na Vakabauta e Sega ni Ka Vakacala Ka, Ia Sa Ka ni Digidigi,” Ensign se Liaona, Nove. 2015, 65–68

Neil L. Andersen, “Josefa Simici,” Ensign se Liaona, Nove. 2014, 28–31

“Na Vakalesui Mai ni Kosipeli i Jisu Karisito ki vei Josefa Simici,” Vunautaka na Noqu Kosipeli (2004), 39–41

“Josefa Simici,” Tudei ena Vakabauta (2004), 49–50

Vidio: “Josefa Simici: Na Parofita ni Veivakalesui mai,”

“Dokai Koya,” Sere ni Lotu, naba 15

Veivakavulici ena ivakarau ni iVakabula

E sureti ira era dau muri Koya na iVakabula me ra vakadinadinataka vei ira tale eso na dina ni Nona ivakavuvuli. E yalataka o Koya ni na vukei ira na Yalotabu me ra kila na gauna me ra vakadinadina kina kei na ka me ra tukuna. Ena rawa ni o vukei ira vakacava na goneyalewa me ra vakila ni ra sa vakauqeti mai na Yalotabu me ra wasea na nodra ivakadinadina?

Vidio: “Help Us Discover the Gospel”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se na nomu nanuma eso mo vakamacalataka kina na lesoni ni macawa oqo:

• Taumada, ni se vo beka e rua se tolu na macawa me caka na kalasi, sureti ira na goneyalewa me ra ciqoma na bolebole nei Elder Neil L. Andersen: “Rawata e dua na ivakadinadina me baleta na Parofita o Josefa Simici. Me veivuke na domomu ena kena vakataucokotaki na veimalanivosa vakaparofita nei Moronai me da vosavinakataki ira na Parofita.” Vakayaloqaqataki ira na goneyalewa me ra muria na ivakasala nei Elder Andersen me ra wasea na ivolanikalou ena iVola i Momani vei ira na nodra itokani kei na matavuvale, “ka vakadinadinataka ni o Josefa e dua na iyaya ni cakacaka ena liga ni Kalou,” ka me ra wilika na nona ivakadinadina na Parofita. (Raica na“Josefa Simici,” Ensign se Liaona, Nove. 2014, 30.) Ena itekivu ni kalasi, kerei ira me ra wasea na ivolanikalou era sa digitaka kei na vakasama kece era vakauqeti kina ni ra wilika na ivakadinadina nei Josefa Simici.

• Vola ena papa ni volavola, “E bibi o Josefa Simici baleta ni __________.” Sureti ira na goneyalewa me ra vakalewena na vanua e lala tu. Ni sa tini na kalasi, kerei ira na goneyalewa me ra vakalewena tale na vanua e lala tu ena dua na ka era vulica ena gauna ni lesoni.

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra e rawa ni vukei ira na goneyalewa me ra vulica me baleta na nona itavi vakalou o Josefa Simici. Muria na veivakauqeti ni Yalotabu, ena nomu digitaka e dua se sivia ka na ganita na nomu kalasi:

• Sureti ira na goneyalewa me ra wilika na vosa nei Elder Craig C. Christensen “Au na Vakatubura e Dua na Parofita Digitaki,” ka vakasaqara kina na veivakalougatataki e sa tu vei keda baleta na Parofita o Josefa Simici. Kerei ira me ra vola na ka era kunea ena papanivolavola. Na eso tale na veivakalougatataki era rawa ni vakasamataka na goneyalewa e sa tiko vei ira baleti Josefa Simici? Navuca mo wasea na nomu a rawata na ivakadinadina baleti Josefa Simici ka sa kalougata vakacava na nomu bula baleta na Vakalesuimai ni Kosipeli. 

• Sureti ira yadua na goneyalewa mera tuva eso na ka era sa vulica me baleti Josefa Simici ena Tudei ena Vakabauta (tabana e 49–50) se Vunau kei na Veiyalayalati 135:3. Kerei ira yadua na goneyalewa mera wasea e dua na ka mai na nodra ituvatuva ka vakamacalataka na vuna e vakaibalebale kina vua.

• Ni lagata vakalasi, e dua na serenilotu me baleti Josefa Simici (vakayagataka na idusidusi vakaiulutaga ena daku ni sere ni lotu mo raica e dua na serenilotu). Na cava e vakavuvulitaka na serenilotu oqo vei ira na goneyalewa me baleti Josefa Simici kei na Veivakalesui Mai? Me ra wasea na lewe ni kalasi na veika era vakila kei na ivakadinadina ni Parofita.

• Sureti ira na goneyalewa mera wilika na iMatai ni Raivotu nei Josefa Simici ena Josefa Simici—Ai Tukutuku 1:7–25, ka vaqara na dina vakosipeli era na kunea ena itukutuku (me vaka na dina ni kena ituvaki na Kalou, na mana ni masu, se na Vukitani Levu). Ena tara vakacava na noda bula na dina eso oqo?

• Kerei ira na goneyalewa me ra raitayalotaka ni taroga e dua na nodra itokani mai na dua tale na vakabauta, “Na cava sa rui bibi kina o Josefa Simici ena nomu Lotu?” Sureti ira me ra vaqara na ka e rawa ni saumi kina na taro oqo ena vidio “Josefa Simici: Na Parofita ni Veivakalesui mai,” se ena vosa nei Elder Lawrence E. Corbridge “Na Parofita o Josefa Simici.”E rawa talega ni o wilika na iwasewase ka kena ulutaga “Taro ena Yalodina” mai na vosa nei Elder Neil L. Andersen “Na Vakabauta e Sega ni Ka Vakacala Ka, ia Sa Ka ni Digidigi” me vukei ira ena nodra vulica na ivakarau e rawa ni ra sauma kina na veivakacacani me baleti Josefa Simici.

• Vakaraitaka e vica na iyaloyalo ka vakaraitaki kina na veika eso a yaco ena bula nei Josefa Simici (raica na Gospel Art Book, 89–97). Kerei ira na goneyalewa mera vakamacalataka na veika e vakaraitaki kina. Kevaka e rawa, vukei ira me ra raica na ivolanikalou ka vakamacalataka na veika a yaco (eso na iyaloyalo e vakaturi tu ena itekivu ni Gospel Art Book). Sureta e vica vei ira mera wasea na nodra ivakadinadina kei Josefa Simici.

Kerei ira na goneyalewa me ra wasea na veika era sa vulica nikua. Era sa  kila deivaki beka na itavi nei Josefa Simici ena Vakalesui mai ni kosipeli? Na cava era sa vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Na taro e dau volai tu ena vava ni volavola ni bera ni dau tekivu na lesoni e dau vukei ira na vuli tiko mera vakasamataka kina na lesoni ni bera ni tekivu na kalasi” (Veituberi, Me iLutua ni Bula, 114).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vola na ivakadinadina kei Josefa Simici ena nodra ivolaniveisiga.

• Wasea na nodra ivakadinadina kei ira na nodra matavuvale.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.