A vakalesui mai vakacava na matabete?

A vakalesui mai na matabete vei Josefa Simici ena veitabaki ni ligadra o ira era a taura tu ena gauna e liu. Ena Me ni 1829, a vakalesuya mai kina o Joni na Dauveipapitaisotaki na Matabete i Eroni, ni oti ga vakalailai, eratou sa vakalesuya tale mai na Matabete i Melikiseteki o Pita, Jemesa, kei Joni, e tolu na nona iApositolo taumada na iVakabula. Ena ika 3 ni Epereli, 1836, eratou a vakalesuya mai kina o Mosese, Ilaija, kei Ilaisa na ikuri eso ni idola vakamatabete.

Mo vakarautaki iko vakayalo

Eda duatani vakacava na Yalododonu Edaidai mai na noda boletaka na dodonu ni matabete? Sa vakalougatataka vakacava na nomu bula na matabete?

Na cava era sa kila oti tu na goneyalewa me baleta na vakalesuimai ni matabete? E rawa vakacava ni o vukei ira mera kila deivaki na veivakalougatataki era sa ciqoma me baleta na kena vakalesui mai na matabete?

Ni o vakavakarau, vulica ena masumasu na ivolanikalou kei na ivurevure eso oqo. Na cava o sa vakauqeti mo wasea kivei ira na goneyalewa?

Iperiu 5:4 (Na Kalou ena kaciva taumada na tamata me ciqoma na matabete)

V&V 2 (O Ilaija me na vakatakila na matabete; na yalayala kivei ira na tama e sa teivaki ena lomadra na gone)

V&V 13; Josefa Simici—Ai Tukutuku 1:66–72 (A vakalesuya mai o Joni na Dauveipapitaisotaki na Matabete i Eroni)

V&V 27:12–13 (Eratou vakalesuya mai o Pita, Jemesa, kei Joni na Matabete i Melikiseteki)

V&V 110:13–16 (A lesu mai o Ilaija ka solia na idola eso ni itabagauna oqo me vaka a yalataka o Malakai)

Yavu ni Vakabauta 1:5 (Sa dau soli na matabete ena veitabaki ni liga mai vua e dua ka tu vua na kena dodonu)

Jeffrey R. Holland, “Noda iVakatakilakila Cecere Duadua,” Ensign seLiaona, Me 2005, 43–45

Vidio: “Restoration of the Priesthood”

Veivakavulici ena ivakarau ni Turaga

A vakavulici ira na dau muri Koya na iVakabula ena nona vukei ira mera raica na ivakaraitaki ni Nona ivakavuvuli ena nodra bula e veisiga. A wasea na italanoa rawarawa eso, vosa vakatautauvata, kei na ivakaraitaki bula e vakaibalebale cake vei ira. E rawa vakacava ni o vakayagataka na ivakaraitaki eso mo vakavulici ira kina na goneyalewa me baleta na vakalesuimai ni matabete kei na ivakarau e cakacaka kina na matabete ena nodra bula?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Vakaraitaka vei ira na goneyalewa e dua na iyaloyalo kei Mosese ena nona tabaki Eroni (raica na Gospel Art Book, 15) kei na iyaloyalo ni nona tabaki e dua na cauravou ki na matabete (raica na Gospel Art Book, 106)? Na cava soti eso na ka vakatautauvata era raica ena iyaloyalo? Na dina cava soti vakosipeli era vakaraitaka?
Sureti ira na goneyalewa mera wasea na veika era sa kila me baleta na kena vakalesui mai na matabete. Sa vakalougatataka vakacava na nodra bula na matabete?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Vosa vua e dua na itokani se lewe ni matavuvale e tu vua na matabete ka taroga me baleta na veika e sa sotava ena nona ciqoma na matabete.
Vakavulica e dua na lesoni ni lotu vakamatavuvale me baleta na vakalesui mai ni matabete.

Vulica vata

Na itaviqaravi yadua e ra e rawa ni vukei ira na goneyalewa mera vulica na vakalesui mai ni matabete. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vola ena vava ni volavola e vica vata na idusidusi vakaivolanikalou me baleta na ivakarau kei na vuna a vakalesui mai kina na matabete (me vaka na V&V 13; 27:12–13; Josefa Simici—Ai Tukutuku 1:66–72; Yavu ni Vakabauta 1:5). Sureti ira na goneyalewa mera wilika na ivolanikalou yadua se vakaiwasewase lalai, ka vola ena vava ni volavola e dua na ivakaleka ni veitukutuku yadua. Na cava e vakavulica vei ira na goneyalewa na ivolanikalou eso oqo me baleta na vakalesui mai ni matabete? Sa vakauqeta vakacava na nodra bula na vakalesui mai ni matabete?
Wasewasea na vosa nei Elder Jeffrey R. Holland “Noda iVakatakilakila Cecere Duadua” vei ira na goneyalewa. Kerei ira na goneyalewa mera vakasaqaqara ena nodra iwasewase ni vosa, ka vaqara na isaunitaro “E dau soli vakacava na matabete?” kei “Na cava na vuna e dau soli kina vakaoqo na matabete?” Me tiki ni veivosaki oqo, sureti ira na goneyalewa mera wilika na Iperiu 5:4 kei na Yavu ni Vakabauta 1:5. Na cava e bibi kina vei ira na goneyalewa mera kila me baleta na vakalesui mai ni matabete?
Vakaraitaka na iyaloyalo e vakaraitaki kina na veika eso a yaco ena kena vakalesui mai na matabete (raica na Gospel Art Book 93–95), se sarava na vidio “Restoration of the Priesthood.” Kerei ira na goneyalewa mera raici ira ka kilai ira na vakaitavi vakabibi ena veika oqo (me vakataki Josefa Simici, Joni na Dauveipapitaisotaki, kei Ilaija) ka wilika na ivolanikalou e semati ki na veika oqo (me vaka na kena era vakaturi ena ituvatuva oqo). Sureti ira na goneyalewa mera veivosakitaka na sala e rawa ni vakalougatataki kina na nodra bula ena vakalesui mai ni matabete ena gauna oqo kei na veigauna ni mataka. E vakalougatataki ira vakacava na marama kei na tina na matabete?
Ena nona veivakadonui na bisopi, sureta na tama ni dua na goneyalewa se dua tale na matabete me sikova mai na kalasi ka wasea na nona laini ni dodonu ni lewa ni matabete kivei ira na goneyalewa ka vakamacalataka se cava na laini ni dodonu ni lewa. Na cava e vakavulica vei ira na goneyalewa me baleta na vakalesui mai ni matabete na laini ni dodonu ni lewa? Wasea na nomu ivakadinadina me baleta na vakalesui mai ni matabete, ka sureti ira na goneyalewa mera wasea na nodra ivakadinadina.

Kerei ira na goneyalewa mera wasea na veika era sa vulica nikua. Era sa kila deivaki beka na vakalesui mai ni matabete? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Kevaka e vica era via vosa me baleta e dua na ulutaga, o na gadreva beka mo kaya vaqo, ‘Me da rogoca mada e liu na nomu nanuma qai muri o iko.’ Era na vakarorogo vinaka toka ga kina o ira o vakavulica tiko baleta ni ra kila ni na donumaki ira na madigi me ra vosa” (Veituberi, Me iLutua ni Noda Bula [1999], 69).