Cava na vuna eda gadreva kina na iVola i Momani?

Na iVola i Momani a volai me baleta na noda gauna. E vakadinadinataki Jisu Karisito, tiko kina na taucoko ni Nona kosipeli, ka vakalesuya mai na dina sa mai yali ena Vukitani. E vakavuvulitaka o Josefa Simici ni iVola i Momani na “vatu ivakadei ni noda lotu, ka na toro voleka vua na Kalou na tamata e bulamuria na kena ivakavuvuli, mai na veivola kece tale” (ivakamacala taumada ni iVola i Momani).

Mo vakarautaki iko vakayalo

Vakasamataka mada na veika o nanuma me baleta na iVola i Momani. Na sala cava beka e sa kauti iko vakavoleka cake kina kivei Jisu Karisito? O sa rawata vakacava na nomu ivakadinadina me baleta na iVola i Momani? Sa vukei iko vakacava ena nomu bula na kilaka oqori?

Vakasamataki ira mada na goneyalewa ena nomu kalasi. Na cava soti era sa bau kila tu me baleta na iVola i Momani? Ena kauta mai vakacava na igu ki na nodra gauna vakaitabagone vakakina ki na nodra veisiga ni mataka na ivakadinadina ni kedra dina?

Ni o vakavakarau, vulica ena masumasu na ivolanikalou kei na ivurevure eso oqo. Na cava e rawa ni o vakayagataka mo vukei ira kina na goneyalewa mera vulica eso tale na ka me baleta na iVola i Momani?

1 Nifai 13:40; 2 Nifai 3:12; Yavu ni Vakabauta 1:8 (Na iVola i Momani e tokona na iVolatabu, vakalesuya mai na dina talei, ka vakamaduataka na ivunau lasu eso)

2 Nifai 25:23, 26; 33:10–11 (Era vakadinadinataki Jisu Karisito na dauvolavola ni iVola i Momani)

2 Nifai 29:7–11 (E vakaraitaki ena iVola i Momani ni dauvosa vei ira na Luvena ena vuqa na veimatanitu na Kalou)

V&V 20:8–16 (E tu ena iVola i Momani na taucoko ni kosipeli i Jisu Karisito)

Thomas S. Monson, “Na Kaukauwa ni iVola i Momani,” Ensign se Liaona, Me 2017, 86–87

Gary E. Stevenson, “Raica na iVola, Raica na TuragaEnsign se Liaona, Nove. 2016, 44–47

LeGrand R. Curtis Jr., “E Tiko na Kaukauwa ena iVola Oqo,” Ensign se Liaona, Nove. 2016, 68–71

iVola i Momani tabana ni ulutaga kei na ivakamacala taumada

Kevin W. Pearson, “Tu e Yasa ni Vunikau,” Ensign se Liaona, Me 2015, 114–16

“Na iToko Kaukamea,” Sere ni Lotu, naba 167

Veivakavulici ena ivakarau ni Turaga

E vakadinadinataka na dina na iVakabula ka sureti ira era dau muri Koya mera vakayacora vakakina. E vakayagataka na doudou kei na ka rawarawa me rawa ni vakadinadinataka kina na dina ni Yalotabu. E rawa ni vukei ira vakacava na goneyalewa na nomu ivakadinadina mera kila na bibi ni iVola i Momani ena nodra bula ka vaqaqacotaka na nodra ivakadinadina me baleta na dina e tu kina?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga na nomu vakaiiko mo vakamacalataka kina na lesoni ni macawa oqo:

Me ra tara se droinitaka vakalasi e dua na ivatuvakadei wirini veimama (raica ena vosa nei Elder Gary E. Stevenson “Raica na iVola, Raica na Turaga”). Kerei ira na goneyalewa me ra raica mai ena vosa nei Elder Stevenson na inaki e vatuivakadei ni noda Lotu na iVola i Momani.
Kerei ira na goneyalewa mera vakasamataka na nodra taro na nodra itokani me baleta na iVola i Momani. Era na sauma vakacava kivei ira? Vakasamataka mo talevalesu na itaviqaravi oqo ni oti na kalasi mo raica na cava era na vakuria ki na nodra isaunitaro.

Vulica vata

Na itaviqaravi yadua e ra e rawa ni vukei ira na goneyalewa mera vulica na bibi ni iVola i Momani. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa cavuta eso na ka e bulia na kaukauwa, me vaka na bateri, jenereita, qaqi ni cagi, kei na gacagaca ni sola. Sureti ira na goneyalewa me ra vola na sala eso e kauta mai kina na iVola i Momani na kaukauwa ki na noda bula. Kerei ira na goneyalewa me ra vakasaqara ena vosa nei Peresitedi Thomas S. Monson “Na Kaukauwa ni iVola i Momani,” na veivakararamataki eso me ra vola talega. Solia na gauna vei ira na goneyalewa me ra vakasamataka vakatitobu na sala me ra cokonaka kina na bolebole nei Peresitedi Monson me wiliki na iVola i Momani ena veisiga. Kerea me ra wasea na nodra nanuma.
Sureti ira na goneyalewa me ra digia nodra italanoa taleitaki ena vosa nei Elder LeGrand R. Curtis Jr. “E Tiko na Kaukauwa ena iVola Oqo” me droinitaki ena dua na iwasewase ni talanoa buli. Na cava e veivakauqeti kina vei ira na italanoa eso oqo? Na cava e sa rui bibi kina me da wasea na iVola i Momani vei ira noda daulomani? Yadudua se vakailawalawa, wasea mai e so na sala e rawa ni o wasea kina na Vola i Momani. Sureti ira na goneyalewa me ra vola na nodra ivakadinadina ena dua na ilavelave ni Vola i Momani era na wasea.
Sureti ira na goneyalewa me ra vakasaqaqara ena vosa nei Elder Gary E. Stevenson “ se vosa nei Elder Kevin W. Pearson “Tu e Yasa ni Vunikau,” ka vaqara na vakasama eso baleta na iVola i Momani kei na vuna sa rui bibi kina. E rawa ni o sureti ira na goneyalewa me ra wasea eso na vosacavuti mai na vosa se ivolanikalou taleitaki ena iVola i Momani. E rawa talega ni o vakayaloqaqataki ira me ra vola ka wasea na nodra ivakadinadina ni iVola i Momani.
Sureti ira na goneyalewa mera vakasaqara na ivolanikalou e vakaturi tiko ena ituvatuva oqo kei na tabana ni ulutaga ni iVola i Momani mera kunea kina na isau ni taro “Cava na vuna eda gadreva kina na iVola i Momani?” Wasea na nomu ivakadinadina me baleta na iVola i Momani. Sureti ira na goneyalewa mera wasea na sala era sa rawata kina na nodra ivakadinadina.
Tarogi ira na goneyalewa se cava na vuna e ulutaga lailai vinaka kina ni iVola i Momani na “E Dua Tale na iVakadinadina kei Jisu Karisito.” Sureti ira mera wasea e dua na ivolanikalou mai na iVola i Momani e vakavuvulitaka se vakadinadinataki Karisito (me vaka na 1 Nifai 10:4–6; Mosaia 3:5–10; 3 Nifai 11:7–11). Sa vaqaqacotaki beka vakacava na nodra ivakadinadina mai na iVola i Momani?
Sureti ira na goneyalewa mera wasea e dua na ivolanikalou mai na iVola i Momani e sa vakauqeti ira se vukei ira mera vakamalumalumutaka e dua na dredre (se wasea e dua na iyaloyalo e vakaibalebale vei iko). Na cava e vakaibalebale kina vei ira? Na veika cava soti era sa sotava oti e rawa ni ra wasea kina na kena vakauqeti ira na ivolanikalou? Na cava beka era vakavulica vei keda na ivolanikalou oqo me baleta na bibi ni iVola i Momani?

Kerei ira na goneyalewa mera wasea na veika era sa vulica nikua. Era sa kila deivaki beka na bibi ni iVola i Momani? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Cakava e dua na nomu ituvatuva mo wilika na iVola i Momani ka vaqara na isau ni taro “Cava na vuna eda gadreva kina na iVola i Momani?” E rawa ni ra wasea na veika era kunea ena veikalasi mai muri.
Vakacavara na cakacaka ni yavunilewa ni iValavala Dodonu ena Torocake Yadudua.
Wasea na nodra ivakadinadina ni iVola i Momani kivua e dua na itokani se lewe ni matavuvale.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.