Na cava na ibalebale ni vakabauti Jisu Karisito?

Me rawa ni kauti keda ki na veivakabulai na noda vakabauta, sa dodonu me kena iyaqa na Turaga o Jisu Karisito. Me da vakabauti Jisu Karisito e kena ibalebale me da nuitaki Koya ka talairawarawa ki na Nona ivakaro. Na vakabauta e levu cake sara mai na noda nanuma walega. Eda vakaraitaka na noda vakabauta ena noda ivalavala—ena ivakarau ni noda bula.

Mo vakarautaki iko vakayalo

Na cava na ibalebale ni vakabauti Jisu Karisito? Na cava soti na ivakaraitaki ni vakabauti Jisu Karisito o sa bau raica? Ena vakauqeta vakacava na nomu vakanuinui ki na veisiga ni mataka na nomu vakabauti Jisu Karisito?

Vakasamataki ira mada na goneyalewa ena nomu kalasi. Na ivakaraitaki cava soti ni vakabauta o sa bau raica ena nodra bula? Na veitiki cava soti ni nodra bula e rawa ni ra vakararavi vakalevu cake kina vua na Turaga?

Ni o vakavakarau, vulica ena masumasu na ivolanikalou kei na ivurevure eso oqo. Na ivakaraitaki cava ni vakabauta mai na ivolanikalou kei na nodra bula na tani e rawa ni o wasea vei ira na goneyalewa?

Jemesa 1:5–6; 2:14–20 (Na vakabauta sai koya na vakanuinui kei na cakacaka)

Alama 32:21, 26–43 (Na vakabauta sai koya na vakanuinuitaki ni veika dina ia e sega ni rairai)

Moronai 7:33–41 (Dau yaco na cakamana ena vakabauta)

Esiteri 4–5; Iperiu 11:4–9, 17–29; Alama 19; 56:45–48; 57:21; Ica 12:6–22; Josefa Simici—Ai Tukutuku 1:11–19 (iVakaraitaki ni Vakabauta)

Quentin L. Cook, “Tabana kei na Wakana,” Ensign se Liaona, Me 2017, 127-31

Bonnie H. Cordon, “Vakararavi vua na Turaga ka Kakua ni Vakararavi Tani,” Ensign se Liaona, Me 2017, 6–9

Dieter F. Uchtdorf, “iKava ni Tabavale, iOtioti ni Katuba,” Ensign se Liaona, Nove. 2016, 15–18

Neil L. Andersen, “Na Vakabauta e Sega ni Ka Vakacalaka, ia Sa ka ni Digidigi,” Ensign se Liaona, Nove. 2015, 65–68

“Vakabauta,” Torocake Yadudua ni Goneyalewa (2009), 13–20

“Vakabauta,” Tudei ena Vakabauta (2004), 132–134

Vidio: “Pure and Simple Faith” “Courage”, “Mo Muri Koya—E Dua na iTukutuku ni Siganisucu baleti Jisu Karisito”

5:30

3:19

NaN:NaN

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Droinitaka e dua na waqa voce rawarawa ga, ka vakayacana ena “Vakabauta.” Tomana ena dua na ivoce me yacana na “Nuitaka ni Dina” kei na dua tale me yacana na “Cakacaka.” Tarogi ira na goneyalewa se cava ena yaco ki na waqa oqo kevaka e dua ga na kena ivoce. Na cava ena yacova na noda vakabauta kevaka eda sega ni cakacakataka na veika eda kila ni dina? Vakayagataka na ivolanikalou, Tudei ena Vakabauta (tabana e 132–135), se na Bible Dictionary me vukei ira na goneyalewa me ra kila se cava na vakabauta kei na sala e veiwekani kina ki na droini oqo.
Kerei ira na goneyalewa me ra vola na yacana e dua na marama ena ivolanikalou ka vakaraitaka na vakabauta cecere. Kumuna na nodra pepa. Wilika i cake na yaca, ka sureti ira na goneyalewa me ra tukuna na kedra italanoa na marama oqori.

Vulica vata

Na itaviqaravi yadua e ra e rawa ni vukei ira na goneyalewa me ra kila na kena ibalebale me da vakabauti Jisu Karisito. Muria na veivakauqeti ni Yalotabu, ena nomu digitaka e dua se sivia ka na ganita na nomu kalasi:

Sureta e dua na cauravou me gole mai cake. Kerea e dua na goneyalewa me tucake ena veimataqali walewale ni tucake (me vaka na duri tu me veiyawaki na yavana ruarua se ravi tu) ka me dua tale na goneyalewa me biligi koya ga vakamalua ena veiwalewale ni tucake e cakava. Na iwalewale cava e vukei goneyalewa me kua ni toso? Na iwalewale cava e vakavuna me lutu? Sureti ira na goneyalewa me ra wilika na vosa nei Sister Bonnie H. Cordon “Vakararavi vua na Turaga ka Kakua ni Vakararavi Tani,” me da vakaraica na nona ivakatutu me baleta na rawa vakacava meda vakatoroicaketaka na noda nuitaki Jisu Karisito ka me muataki tiko ga Vua na noda vakabauta. E rawa ni ra wasea na goneyalewa eso na ka era sa sotava me baleta na gauna era vakararavi ga kina nodra kila ka ra qai sotava na kena isau? se ena gauna era nuitaka kina na iVakabula kei na veivakalougatataki era ciqoma?
Sureti ira na goneyalewa me ra wilika na Alama 32:21 kei na Ilamani 5:12. Kerea e vica vei ira me ra vakalekalekataka ena nodra vosa na veika era vulica me baleta na vakabauta. Sureti ira na goneyalewa me vaqara na ivakaraitaki ni tamata e kaukauwa na nodra yavu ni vakabauta ena vosa nei Elder Quentin L. Cook “Yavu ni Vakabauta” se na vosa nei Elder Neil L. Andersen “Na Vakabauta e Sega ni Ka Vakacalaka, ia sa Ka ni Digidigi.” Kerei ira me ra wasea na veika era sa raica. Na cava era rawa ni cakava me ra tara e dua na yavu kaukauwa ni vakabauta?
Sureti ira na goneyalewa yadua me ra vakavakarau mai me ra mai wasea e dua na ka era a gugumatuataka ka sega ni guce me ra rawata e dua na ka vinaka. Sa rawa talega mo wasea vakakina na ka o sotava ena nomu bula. Sureti ira na goneyalewa me ra wilika na italanoa baleti rau na kaulotu ena vosa nei Peresitedi Dieter F. Uchtdorf “Kava ni Tabavale, iOtioti ni Katuba.” Na cava era rawa ni vulica mai vei rau na kaulotu ena italanoa oqo? E veisemati vakacava na italanoa oqo ena so na ka era sa sotava? E rawa talega ni ra sureti na goneyalewa me ra raica na nona vosa, ka vakaraica na veika e vakavulica o Peresitedi Uchtdorf me baleta na vakabauta ka wirina na veika e matalia vei ira. Na cava tale era vulica na goneyalewa me baleta na vakabauta? (E rawa ni ra vakayagataka na goneyalewa na vosa oqo kei na dua tale ena idusidusi oqo me ra vakacavara kina na veika sotavi ena vakabauta naba 1 ena nodra ivola ni Torocake Yadudua.)
Sureti ira na goneyalewa me ra vola e vica na isau ni taro a taroga o Elder Neil L. Andersen: “E vakaivei beka na nona raica na iVakabula na noqu vakabauta?” (raica “Na Vakabauta e Sega ni Ka Vakacalaka, ia sa ka ga ni Digidigi”). Vakayaloqaqataki ira me ra wasea na sala e rawa ni ra vakaraitaka kina vua na iVakabula na nodra vakabauta. Na cava era vulica mai na vosa nei Elder Andersen e vakauqeti ira me ra vakaraitaka ka taracake nodra vakabauta? Vaka beka qo, sureti ira me ra railesuva na italanoa a talanoataka o koya me baleti ira na daukaulotu era a vakaraitaka na nodra vakabauta. E rawa talega ni o kauta mai ena dua na kateni ka ra olo tu me vaka na iloloma na iyaya e rawa ni taracake noda vakabauta (raica na ivakaraitaki ena iwasewase ka kena ulutaga “Na iLoloma e Tara Cake Noda Vakabauta”).
Kerei ira na goneyalewa yadua me ra raica ka wasea e dua na italanoa mai na ivolanikalou ka cakacakataka kina e dua na nona vakabauti Jisu Karisito (raica, me kena ivakaraitaki, Esiteri 4; Marika 5:25–34; Iperiu 11:4–9, 17–29; 1 Nifai 4; Alama 19:16–29; Ica 12:11–22). Sureti ira na goneyalewa me ra vola talega me baleta e dua na ka era sotava ka ra a cakacakataka kina o ira se dua era kila na nona vakabauti Jisu Karisito. Kerei ira na goneyalewa yadua me ra wasea na italanoa era kunea ena ivolanikalou kei na veika sotavi e vola. Sa rawa mo vakaraitaka na vidio “Courage” me tiki ni itaviqaravi oqo.

3:19
Sureti ira na goneyalewa me ra wilika na Maciu 17:20, ka taroga vei ira se cava era nanuma ni kena ibalebale me tosoi na ulunivanua mai na noda vakabauta. Wasea na veimalanivosa oqo mai vei Bisopi Richard C. Edgley: “Au se bera mada ni vakadinadinataka vakadua na kau laivi ni dua na ulunivanua dina. Ia ena vuku ni vakabauta au sa raica na kena kau laivi e dua na ulunivanua ni lomalomarua kei na yaluma ka vakaisosomitaki ena inuinui kei na nanamaki. Ena vuku ni vakabauta au sa vakadinadinataka kina vakataki au e dua na ulunivanua ni ivalavala ca ka sa vakaisosomitaki ena veivutuni kei na veivosoti. Ia ena vuku ni vakabauta au sa vakadinadinataka kina vakataki au e dua na ulunivanua ni mosi ka sa vakaisosomitaki ena vakacegu, inuinui, kei na vakavinavinaka. Io, au sa raica na kena kau tani eso na ulunivanua” (“Vakabauta— e Nomu Na Digidigi,” Ensign se Liaona, Nove. 2010, 33). Vakaraitaka na vidio “Pure and Simple Faith,” ka kerei ira na goneyalewa me ra vaqara eso na ulunivanua a kau tani ena vuku ni vakabauta (se wasea e dua na ka o sa sotava vakataki iko).

5:30

Kerei ira na goneyalewa me ra wasea na veika era sa vulica nikua. Era kila beka na kena ibalebale me da vakabauti Jisu Karisito? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakavulica e dua tale me baleta na vakabauta (me vaka na tacimu gone se ganemu se dua na itokani).
Vakaraica na ivakaraitaki eso ni vakabauta ena ivolanikalou ni ra vulica vakataki ira na kosipeli ka muria na ivakaraitaki eso oqo ena nodra dui bula.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.