Cava na vuna e gadrevi kina meu vosoti ira na tani?

Me rawa ni da vosoti ena noda ivalavala ca, sa gadrevi me da vosoti ira na tani. Na noda vosoti ira na tani ena rawa kina vei keda me da vakamalumalumutaka na yalocudrucudru, na yaloca, se na via sosomitaka na ca. Na veivosoti e rawa ni vakabula na mavoa vakayalo ka kauta mai na vakacegu kei na loloma e rawa duadua ga ni solia na Kalou.

Mo vakarautaki iko vakayalo

Na cava o sa bau vulica ena nomu vosoti ira na tani? E rawa beka ni o vakasamataka e dua na gauna sa vukei iko kina ena nomu vakila na vakacegu kei na loloma na nomu vosoti koya e dua?

Na cava soti era sotava tiko na goneyalewa ka ra gadreva kina me ra veivosoti vakataki ira? Na cava era gadreva me ra vulica me baleta na nodra vosoti ira vakai ira? Na sala cava e rawa ni o vukei ira kina na goneyalewa me ra vulica na veivosoti me rawa ni ra kunea na vakacegu?

Me Kilai: Kevaka eso na nodra taro na goneyalewa me baleta na veivosoti ena gauna ni veivakalolomataki, vakatura me ra taro ivakasala mai vua na bisopi se peresitedi ni tabana.

Na ivolanikalou cava ena vukei ira na goneyalewa me ra kila na veivakalougatataki ena yaco mai ki na nodra bula ni ra vosoti ira na tani?

Maciu 5:44; V&V 64:9–10 (Eda sa vakaroti me da vosota na tamata kecega)

Maciu 6:14–15; 18:21–35 se na vidio “Forgive 70 Times 7” (Me ciqomi na veivosoti, sa dodonu meda vosoti ira na tani)

Luke 23:34 (A vosoti ira era a vakamatei koya ena kauveilatai o Jisu Karisito)

Kevin R. Duncan, “Na iLumu Veivakabulai ni Veivosoti,” Ensign se Liaona, Me 2016, 33–35

Gordon B. Hinckley, “Na Veivosoti,” Ensign se Liaona, Nove. 2005, 81–84

Dieter F. Uchtdorf, “Ko Ira e Dauloloma Era na Lomani,” Ensign se Liaona, Me 2012, 70–76

Vidio: “Forgiveness: My Burden Was Made Light”

8:24

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Wasea na italanoa ni taki cevata ena vosa nei Peresitedi Gordon B. Hinckley “Veivosoti.” Na cava e vakauqeti ira na goneyalewa me baleta na italanoa oqo ? Sureti ira na goneyalewa me ra vakasamataka se vola na yacana e dua a dredre toka me ra vosota. Vakayaloqaqataki ira me ra vakasamataka na tamata oqo ena gauna taucoko ni lesoni oqo.
Kerei ira na goneyalewa me ra vakasamataka mada e dua na gauna a gadrevi kina me ra vosota e dua na tamata. Sureti ira me ra wasea na veika era a sotava, kevaka era logavinaka kina. Na cava a yaco kina? Ena duidui beka vakacava na veika ena yaco kevaka era a sega ni vosota?

Vulica vata

Na itaviqaravi yadua e ra e rawa ni vukei ira na goneyalewa me ra kila na bibi ni nodra vosoti ira na tani. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kalasi:

Wasei ira vakailawalawa na goneyalewa, ka solia ki na ilawalawa yadua na ilavelave eso ni vosa era vakarautaki tu ena ituvatuva oqo (se dua tale na vosa o digitaka me baleta na veivosoti). Sureti ira me ra taura e vica na miniti me ra wilika na vosa ka vakatakilakilataka na itukutuku e vakauqeti ira (tukuna vei ira me ra kakua ni leqataka na vosa taucoko; ia mo vakabibitaka toka na kena vakananumi vakatitobu na kena itukutuku). Kerei ira me ra wasea ena kalasi na veika era raica ka vakamacalataka na vuna e vakaibalebale kina vei ira.
Ni wilika vata na italanoa vakaibalebale ni tamata cakacaka sega ni loloma ena Maciu 18:23–35 (se vakaraitaka na vidio “Forgive 70 Times 7”),, ka kerei ira na goneyalewa me ra soqona vata ka veidutaitaka na nona dinau na tamata cakacaka kei ira na nona itokani vakacakacaka (raica na “Weights and Measures” ena Bible Dictionary). Na cava era vulica na goneyalewa mai na italanoa vakaibalebale oqo me baleta na veivosoti? Sureti ira na goneyalewa me ra raica ka wasea eso tale na ivolanikalou ka vakavuvulitaka na bibi ni noda vosoti ira na tani (me vaka e vakaturi ena ivolanikalou ena ituvatuva oqo).
Kerei ira na goneyalewa mera vakatauvatataka na nodra ivakaraitaki ni veivosoti na tamata ena ivolanikalou. E rawa ni o railesuva na ivakaraitaki nei Josefa mai Ijipita (raica Na iVakatekivu 45:1–7), Nifai kei iratou na tacina (raica na 1 Nifai 7:21), o Jisu Karisito ena kauveilatai (raica na Luke 23:34), se so tale. Na cava e sa rui bibi sara kina me da vosoti ira na lewe ni matavuvale? Vakaraitaka e dua na vidio e vakaturi tiko ena ituvatuva oqo, ka kerei ira na goneyalewa mera wasea na nodra nanuma. Na cava eso tale na ivakaraitaki ni veivosoti e rawa ni ra wasea?
Kerei ira na goneyalewa me ra raica e dua na ka ena ivolanikalou e vakavuvulitaka na iVakabula me baleta na vosoti ira na tani ka wasea ki na kalasina veika era kunea (raica na Maciu 5:44; 6:14–15; 18:22–23). Kerei ira me ra wasea na veika era sa sotava oti me baleta na vakacegu e dau yaco mai ena nodra vosoti ira na tani.
Vola na taro eso oqo ena tikinipepa duidui eso, ka solia e dua vei ira yadua na lewe ni kalasi: Na cava me da vosota kina na tamata kecega, oka kina oi keda yadua? Na cava na vuna e tu duadua ga kina vua na Turaga na lewa me baleta na nona vosoti se sega e dua na tamata? Na cava sa rui ivalavala ca bibi kina na noda sega ni rawa ni veivosoti? Sureti ira na goneyalewa me ra vakananuma vakatitobu na nodra taro ni ra wilika na Vunau kei na Veiyalayalati 64:9–11 ka wasea na nodra vakasama kei na nanuma ni lomadra.

Kerei ira na goneyalewa me ra wasea na veika era sa vulica nikua. Era kila li na kena bibi ni noda vosoti ira na tani? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vola ena nodra ivolaniveisiga e dua na veivakauqeti e yaco mai vei ira me baleta na vosoti ira na tani. O cei e dodonu me ra vosota? Ena vakalougatataka vakacava na nodra bula na nodra vosoti ira na tani?
Mo rawa ni cavuqaqataka e dua na serenilotu se dua na ivolanikalou me baleta na veivosoti.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.