Na cava na loloma soliwale?

Na loloma soliwale sai koya na veivuke kei na igu vakalou eda ciqoma mai na Veisorovaki i Jisu Karisito. Ena loloma soliwale, eda sa vakabulai kina mai na ivalavala ca kei na mate. Kena ikuri na loloma soliwale sai koya na kaukauwa veivakayavalati ka na vaqaqacotaki keda e veisiga yadua ka vukei keda me da vosota ki na ivakataotioti. Ena gadrevi na noda sasaga me rawa ni da ciqoma kina na taucoko ni nona loloma soliwale na Turaga.

Mo vakarautaki iko vakayalo

Na cava na ibalebale ni ka oqo vei iko? Sa veisautaka vakacava na nomu bula na nomu vakila na kaukauwa i Jisu Karisito?

Na cava era kila na goneyalewa me baleta na loloma soliwale? E rawa vakacava ni o vukei ira me ra kila na kaukauwa ni loloma soliwale ena nodra dui bula?

Na ivolanikalou kei na ivurevure tale eso cava soti sa vukei iko mo kila na loloma soliwale? Na cava o vakauqeti kina mo wasea vei ira na goneyalewa me rawa ni ra kila na loloma soliwale?

Efeso 2:8–9; 2 Nifai 25:23 (Ena loloma soliwale ga eda sa vakabulai kina)

Filipai 4:13; Jekope 4:6–7 (Na loloma soliwale i Jisu Karisito sa vaqaqacotaki au)

Moronai 10:32–33 (Sa rawa ni vakavinakataki keda sara vei Karisito na loloma soliwale)

J. Devn Cornish, “Au sa Vinaka Li? Au na Rawata Li?” Ensign se Liaona, Nov. 2016, 32–34

Dieter F. Uchtdorf, “Na iSolisoli ni Loloma Vakalou” Ensign se Liaona Me 2015 107--10

David A. Bednar, “Colata na Nodra iColacola ena Loloma,” Ensign se Liaona, Me 2014

“Loloma,” Tudei ena Vakabauta (2004), 60

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Droinitaka ena papa ni volavola e dua na droini rawarawa ni dua na tamata ena loma ni qara, kei na dua na tamata e tucake tu ena dela ni qara, ka biuta sobu tiko e dua na ikabakaba. Taroga vei ira na goneyalewa na cava e gadrevi me rawa ni vakabulai kina na tamata ena loma ni qara? Na cava na nona itavi na tamata ena dela ni qara? Na cava na nona itavi na tamata ena loma ni qara? Na cava e vakavuvulitaka vei ira na goneyalewa na droini oqo me baleta na sala e vakabulai keda kina na loloma soliwale ni iVakabula?
Taroga vei ira na goneyalewa na veika era kila me baleta na loloma soliwale. Na cava era nanuma ni ibalebale ni loloma soliwale? E vakacava na ivakarau ni nodra raica na loloma soliwale ena nodra bula? Era vakabauta li ni ra na vakabulai ena loloma soliwale? Na taro cava e tu vei ira me baleta na loloma soliwale?

Vulica vata

Na itaviqaravi yadua e ra e rawa ni vukei ira na goneyalewa me ra kila na ivunau ni loloma soliwale. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa me ra wilika eso na tikina mai na vosa nei Elder J. Devn Conish “Au sa Vinaka Li? Au sa Rawata li? Kerei ira me ra vakaraica mai eso na sau ni taro oqo: “Na cava na loloma soliwale? Au na ciqoma vakacava ena noqu bula na loloma soliwale? Au na bulakilikili kaya vakacava meu rawata na nona loloma soliwale na iVakabula? Ena rawa beka vei au meu lesu tale ki lomalagi?” Ni ra vakasamataka vakatitobu na veitaro oqo na goneyalewa, sureti ira me ra vakasamataka e dua na nodra itokani ena sotava tiko na dredre ena nona vakabauta kei na nuidei ena kosipeli. Ena vukea vakacava na nodra itokani na vosa oqo?
Vakasamataka mo droinitaka e dua na matamata dola kei na katubaleka era dola tu ena papa, ka kerea vei ira na goneyalewa me ra vakasaqaqara mai na itekivu ni vosa nei Peresitedi Dieter F. Uchtdorf “Na iSolisoli ni Loloma Vakalou” me ra kunea na ivakatautauvata e cakava o koya ni loloma vakalou ki na veiyaya oqo. Wasewasea na iwase ni vosa e vo vei ira na goneyalewa ka kerei ira me ra vola ka wasea e dua na ivakaleka dua na iyatuvosa ena ka era sa vulica baleta na loloma vakalou mai na nodra iwasewase. Na cava era na cakava me ra rawata kina eso na ka mai na loloma vakalou ni iVakabula?
Ni se vo toka e vica na siga, kerea e dua na goneyalewa me vulica na ibalebale meda vakataqara vei keda na ivua ni iVakabula, mai na Maciu 11:28–30 kei na vosa nei Elder David A. Bednar “Colata na Nodra iColacola ena Loloma.” Kerei goneyalewa me gole vakavakarau mai ki na kalasi me mai liutaka na veivosakitaki ni noda ivua sa matataka tiko na noda veimaliwai kei Jisu Karisito. Vakayaloqaqataki koya me wasea na itukutuku mai na vosa nei Elder Bednar e nanuma ni na vukei ira na goneyalewa mera kila vakavinaka na loloma soliwale ni iVakabula.
Vola na ivakaleleka eso ni ivolanikalou mai na ituvatuva oqo ka biuta e dua ena lalaga kece ni rumu. Lesia na goneyalewa me ra wilika e dua na ivolanikalou, me qai raica ka lai tucake tu ena yasa ni ivakaleka ka veisotari kei na nona ivolanikalou. Kerei ira na goneyalewa me ra wasea na veika era sa vulica mai na nodra ivolanikalou me baleta na loloma soliwale. Na ivakadinadina cava ni loloma soliwale era raica ena nodra bula? Na ivakaraitaki cava e rawa ni ra vakasamataka mai na nodra ivolanikalou (me vaka na Nifai, Amoni, kei Alama Lailai)?
Sureti ira yadua na goneyalewa me ra tuvalaka na veika eso sa vulica ena nona wiliwili me baleta na loloma soliwale ena Bible Dictionary ka vakakina ena Tudei ena Vakabauta. Kerei ira na goneyalewa me ra wasea e dua na ka mai na nodra ituvatuva ka vakamacalataka na vuna e vakaibalebale kina vei ira. Sureti ira me ra raica na iyaloyalo (ena Gospel Art Book se dua na mekasini ni Lotu) ka vakaraitaki ira na tamata era ciqoma na loloma soliwale mai vua na Kalou, ka kerei ira me ra wasea na veika era raica ni ra le yarua se vakaiwasewase lalai. Eso tale beka na veika vata oqori e rawa ni ra wasea mai na nodra bula?
Kauta mai e dua na tabanikau ki na kalasi, ka sureti ira na goneyalewa me ra raica na sala e vakayagataka kina na iVakabula na tabanikau me vakavuvulitaka na loloma soliwale ena Joni 15:1–10. Na vakasama cava soti era rawata me baleta na loloma soliwale mai na veitikina oqo? Sureta e dua na goneyalewa me vakayagataka na tabanikau o kauta mai me ivakaleka vei ira na vo ni kalasi na veika sa vulica me baleta na loloma soliwale.

Kerei ira na goneyalewa me ra wasea na veika era sa vulica nikua. Era sa kila beka na ivunau ni loloma soliwale? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Vukei ira na goneyalewa me ra cakava na ituvatuva ni veika eso e rawa ni ra cakava me ra vakayagataka kina na veika era vulica nikua. Sureti ira me ra digitaka na veika me ra cakava ena macawa lako mai.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.