E rawa ni vukei au vakacava e veisiga na veivutuni?

Sa mai sotava ko Jisu Karisito na itotogi ni noda ivalavala ca me rawa kina ni da veivutuni. Na veivutuni sai koya na veisau ni yalo kei na vakasama ka na kauti keda vakavoleka yani vua na Kalou. E oka kina na vuki tani mai na ivalavala ca ka gole yani vua na Kalou mo vosoti. E veivakauqeti meda lomana na Kalou kei na gagadre dina meda talairawarawa ki na Nona ivakaro.

Mo vakarautaki iko vakayalo

Na cava soti o sa sotava me baleta na veivutuni? Me kakua ni veivosakitaki na ivalavala ca sa yaco oti, e rawa ni o wasea vakacava na sala sa vukei iko kina na veivutuni mo voleka cake yani vei Tamada Vakalomalagi?

Eso beka na goneyalewa era sotava tiko na dredre ni bula tawakilikili se na kilaiyalona ena nona cala. E rawa vakacava mo dau vakila na ka baleti ira ka sureta na Yalotabu me vukei ira me ra gadreva me ra veivutuni?

Wilika ena yalomasumasu na veivolanikalou kei na ivurevure oqo. Na cava a vakauqeti iko mo veivutuni?

Aisea 1:18; Alama 34:15–16; 36:6–24; V&V 1:32 (Ena veivutuni sa rawa ni da vosoti kina mai na noda ivalavala ca)

Alama 19:33 (Na veivutuni e kauta mai na veisau ni yalo)

Mosaia 27:35; V&V 58:42–43 (Me da veivutuni, sa dodonu me da vakatusa ka biuta sara na ivalavala ca)

Dale G. Renlund, “Na iVakatawa Vinaka,” Ensign se Liaona, Me 2017, 29–32

Dale G. Renlund, “Veivutuni: Dua na Digidigi Rekitaki,” Ensign se Liaona, Nove. 2016, 121-24

Linda S. Reeves, “Na Yavu Levu ni Veivueti,” Ensign se Liaona, Nove. 2016, 88-90

Dieter F. Uchtdorf, “Ena Colati Iko e Tabana ka Kauti Iko i Vale,” Ensign or Liaona, Me 2016, 101–4

“Veivutuni,” Me iSakisaki ni iTabagone (2011), 29–30

“Veivutuni,” Tudei ena Vakabauta (2004), 192–196

“iValavala Dodonu,” Torocake Yadudua ni Goneyalewa (2009), veika sotavi ena yavunilewa 4

Vidio: “Not a One-Time Thing,” “A Change of Heart”

Veivakavulici ena ivakarau ni Turaga

A sureti ira na tani na iVakabula me ra cakacaka ena vakabauta ka bulataka na dina a vakavuvulitaka o Koya. A kunea na madigi eso vei ira me ra vuli mai na veika qaqa eso a sotavi. Na cava e rawa ni o cakava mo vukei ira na goneyalewa me ra raica na kaukauwa ni veivutuni e veisiga yadua ena nodra bula?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Vakaraitaka na vidio “A Change of Heart.” Na cava era sa vulica na goneyalewa me baleta na veivutuni mai na veika e sotava na cauravou oqo?
Sureti ira na goneyalewa me ra vola vuni ena veitikinipepa na taro eso e tu vei ira me baleta na veivutuni, ka kumuna vata na pepa. Sureta na bisopi me lako mai ki na kalasi ka mai sauma na taro eso oqo.

Vulica vata

Na itaviqaravi yadua e ra e rawa ni vukei ira na goneyalewa me ra kila na bibi ni veivutuni ena nodra bula ni veisiga yadua. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureta e dua na goneyalewa me wasea na veika e a sotava ena gauna se qai bula tiko mai ena tauvimate se mavoa. E vakacava na iwalewale ni veika a lako curuma ni vakatauvatatani ena iwalewale ni veivakabulai vakayalo? Na ivakavuvuli cava e kune ena vosa nei Elder Dale G. Renlund “Na iVakatawa Vinaka” e vakauqeti ira me ra vakasaqara na veivakabulai mai vua na iVakatawa Vinaka? Na cava eda rawa ni cakava meda vakaraitaka na mataqali loloma vata oqo vei ira era tu wavoliti keda?
Sureta e dua na goneyalewa me vakarau me mai wasea e dua na italanoa e vakaturi tiko ena idusidusi. E rawa talega ni o vakaraitaka e dua na vidio nei koya e talanoataka tiko na italanoa . Na cava eda vulica ena italanoa eso oqo baleta na veivutuni? Vola na malanivosa baleta na veivutuni mai na rua na vosa oqo ena tiki ni pepa eso. Sureti ira na goneyalewa me ra digitaka e dua na malanivosa ka wasea na ka era vulica—taumada vua e dua na kena isa oti qai wasea vei ira na kalasi. Solia vei ira na gauna me ra vakasamataka na veisau era nanuma me ra vakayacora baleta na veika era sa vulica.
Kerea e dua na goneyalewa me vunia e dua na iyaya ni ra rai tu mai na vo ni lewe ni kalasi. Kerea e dua tale na goneyalewa me tovolea me vaqara na iyaya oqori. Na cava e vakavuvulitaka na ivakaraitaki oqo me baleta na kena tovolei me vunitaki na ivalavala ca mai vua na Kalou? (raica na Alama 39:8). Na italanoa cava ena ivolanikalou era rawa ni wasea na goneyalewa ka vakavulica vei keda ni sega ni rawa ni da vunia na noda ivalavala ca mai vua na Kalou? raica, me kena ivakaraitaki, Jona 1–2; 2 Samuela 11–12 Cakacaka 5:1–11 E rawa ni ra railesuva e dua na vosa nei Sisita Linda S. Reeves “Na iTuvatuva Cecere ni Veivakabulai.” Sureti ira na goneyalewa me ra veivosakitaka na taro eso oqo ena veiwasewase lalai: Na cava eso na sala era tovolea kina na tamata me ra vunitaka na nodra ivalavala ca? Na cava e rawa ni o tukuna mo vukea kina e dua me kila ni sega ni rawa ni da vunitaka na noda ivalavala ca?
Sureti ira na goneyalewa me ra vakasaqara (yadua se vakalasi) na ivurevure eso me vaka na iwasewase ni “Veivutuni” ena Tudei ena Vakabauta kei na Me iSakisaki ni iTabagone se Alama 36:11–20. Kerei ira me ra wasea na nodra iyatuvosa taleitaki se vakasama mai na ivurevure eso oqo ka vakamacalataka na vuna era vakaibalebale kina vei ira.
Sureti ira na goneyalewa me ra digitaka e dua na malanivosa ni ivolanikalou me baleta na veivutuni (me vaka na kena era vakaturi ena ituvatuva oqo) ka vakalekalekataka ena nodra vosa ga na veika era vulica mai na nodra ivolanikalou. Na sala cava e rawa ni ra vakayagataka kina na ivolanikalou eso oqo me ra vukea kina e dua e nanuma tu ni sega ni rawa ni vosoti?
Solia vei ira na goneyalewa eso na gauna ena kalasi me ra cakacaka kina ena veika sotavi ni yavunilewa ena iValavala Dodonu 4 mai na ivola ni Torocake Yadudua. Kevaka era sa cakava oti na veika sotavi ni yavunilewa oqo, kerei ira me ra wasea na veika era sa vulica mai kina.

Kerei ira na goneyalewa me ra wasea na veika era sa vulica nikua. Era sa kila vakavinaka cake beka na ivunau ni veivutuni? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Dikeva nodra bula ka raica na veivanua eso e rawa ni ra veivutuni ka vakavinakataka cake.
Vola ena nodra ivolaniveisiga na veika e rawa ni ra cakava me ra veivutuni, vakavinakataka cake nodra bula, se ra tomana nodra bulataka na ivakavuvuli ni kosipeli.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.