Na cava na tucaketale?

Ena Veisorovaki i Jisu Karisiro, ena tucaketale na tamata kecega. Ena vakaduavatataki tale na yagoda kei na yaloda ena dua na ituvaki vinaka sara, ka tawamate rawa. E rawa ni solia vei keda na inuinui kei na ivakarau ni rai na kilai deivaki kei na ivakadinadina ni tucake tale ni da sotava na bolebole kei na qaqa ni bula eso.

Mo vakarautaki iko vakayalo

Na cava o kila me baleta na tucaketale? Na vakasama cava e tu vei keda mai na ivolanikalou ena gauna oqo me baleta na tucaketale?

Na cava era kila na goneyalewa me baleta na tucaketale? Ena vakayarayarataka vakacava na nodra nanuma me baleta na yagodra vakayago na kilai deivaki levu ni tucaketale?

Na ivolanikalou se ivurevure cava tale eso e rawa ni o vakayagataka me vukea na nodra vakatavulici na goneyalewa me baleta na tucaketale? Na cava o vakauqeti mo wasea?

Luke 24 (Na Tucaketale nei Jisu Karisito)

1 Korinica 15 (Ni sa vakadrukai mate na iVakabula, eda na vakaturi kece tale)

Alama 11:41–45 (Ni da sa tucaketale, sa vakaduavatataki na yaloda kei na yagoda, ka da qai lewai)

Alama 40–41 (Vakamacalataka o Alama na tucaketale vua na luvena o Korianitoni)

Paul V. Johnson, “Ia ena Sega Tale na Ciba,” Ensign se Liaona, Me 2016, 121–23

Thomas S. Monson, “Sa Tucake Tale ko Koya!” Ensign se Liaona, Me 2010, 87–90

D. Todd Christofferson, “Na Tucaketale nei Jisu Karisito,” Ensign se Liaona, Me 2014

Vidio: “He Is Risen”

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Vakaraitaka e dua na kena iyaloyalo na iVakabula sa tucaketale (me vakaoqo, Gospel Art Book, 59–60). Tarogi ira na goneyalewa se ra na vakamacalataka vakacava vua e dua e sega tu ni kila na tucaketale.
Tarogi ira na goneyalewa se cava era a marautaka ena Siganimate. Na cava eso na ivakatakarakara ni Siganimate? Na cava era vakavuvulitaka na ivakatakarakara eso oqo me baleta na tucaketale?

Vulica vata

Na veitaviqaravi e ra e rawa ni vukei ira na goneyalewa me ra kila na tucaketale. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Digitaka eso na malanivosa mai na 1 Korinica 15 me baleta na tucaketale. Sureti ira na goneyalewa me ra wilika na veimalanivosa, vakailawalawa lalai se yadudua, ka cakava e dua na ivakaleka ni itukutuku ena veika era sa vulica me baleta na tucake tale (me vakaoqo, na tikina 1–8 e rawa ni vakalekalekataki vaqo “Era tu na ivakadinadina ni tucaketale”). Na cava era nanuma kina na goneyalewa ni sa ka bibi vei ira me ra kila na dina oqo ni tucaketale?
Kerei ira na goneyalewa me ra raitayaloyalotaka mada ni takali e dua na nona daulomani e dua na itokani ka sega ni lewena na Lotu. Sureti ira na veimama ni goneyalewa me ra wilika na Alama 40 kei na ikarua ni veimama me ra wilika na Alama 41. Kerei ira me ra tuvalaka e dua na ituvatuva ni ivakavuvuli me baleta na tucaketale ena wase eso oqo ka rawa ni ra wasea kei ira na nodra itokani. Me ra qai wasea na nodra ituvatuva vei ira na vo ni kalasi.
Cakava va-kalasi, e dua na ituvatuva ni tamata ena ivolanikalou ka ra a ivakadinadina ena Tucaketale ni iVakabula. Sureti ira na goneyalewa mera vakasaqara na vosa nei Elder D. Todd Christofferson “Na Tucaketale nei Jisu Karisito” mera raica na ivakaraitaki tale eso. Vakayaloqaqataki ira mera vakaraica na nodra ivakadinadina o ira oqo ena ivolanikalou (eso na ivakaraitaki sa vakarautaki tu ena vosa nei Elder Christofferson). Na cava eda vulica mai vei ira na ivakadinadina oqo me baleta na iVakabula kei na Nona Tucaketale? Wasea na nomu ivakadinadina me baleta na Tucaketale ni iVakabula, ka sureta e vica na goneyalewa mera wasea na nodra ivakadinadina.
Sureti ira na goneyalewa mera wilika na italanoa era tiko ena vosa nei Peresitedi Thomas S. Monson “Sa Tucake Tale ko Koya!” kei na vosa nei Elder Paul V. Johnson “Ia ena Sega Tale na Ciba.” Kerei ira mera vakalekalekataka vakai ira na italanoa oqo ka wasea na veika e vakatavulica vei ira na italanoa oqo me baleta na tucake tale. Na cava tale e vakauqeti ira mai na italanoa eso oqo?
Solia yani e vica na ivola ni Nodra iVakavuvuli na Peresitedi ni Lotu (se cakava eso na ilavelave ni wase digitaki), ka sureti ira na goneyalewa me ra raica na ivakavuvuli mai vei ira na parofita ni gauna oqo me baleta na tucaketale. Kerei ira me ra wasea na veika era raica ena kalasi.
Sureti ira na goneyalewa me ra raica na serenilotu me baleta na tucaketale. Ni lagata vata vakalasi e vica vei ira oqori. Vakayaloqaqataki ira na goneyalewa me ra wilika na ivolanikalou ena mua ni serenilotu yadua, ka veivosakitaka na veika era vulica mai na serenilotu kei na ivolanikalou. Sureti ira me ra wasea na nodra ivakadinadina kei na nodra nanuma me baleta na tucaketale.

Kerei ira na goneyalewa me ra wasea na veika era sa vulica nikua. Era sa kila vakavinaka cake beka na tucaketale? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa:

Me ra wasea na nodra ivakadinadina ni tucaketale. O cei e rawa ni ra wasea kina na nodra ivakadinadina ena veisiga se na macawa ka lako mai? E rawa vakacava ni ra vakavulica vua tale e dua na veika era sa kila?
Vakasaqara na isau ni taro e se vo tu vei ira me baleta na tucaketale.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.