Meu tara cake vakacava na loloma va-Karisito?

Na loloma savasava i Karisito, ka vakatokai me loloma cecere, sa ikoya e cecere duadua, vakaturaga duadua, ka mataqali loloma qaqa duadua ka rekitaki duadua ki yaloda (raica 1 Nifai 11:23). Sa ivakaraitaki uasivi duadua ni loloma cecere o Jisu Karisito. Ena Nona veiqaravi ena bula oqo, sa “lako voli [ko Koya] ka daucaka vinaka,” sa vakaraitaka na yalololoma vei ira na dravudravua, vei ira na kune rarawa, kei na yaluma (raica Maciu 4:23; Cakacaka 10:38). Me tarai cake na loloma va-Karisito, sa dodonu me da sasagataka, masulaka, ka muria na nona ivakaraitaki na iVakabula ena noda vakanananu, vosa, kei na ivalavala.

Mo vakarautaki iko vakayalo

Ena gauna cava era sa vakaraitaka kina vei iko na tani na loloma va-Karisito? E vakaevei beka na kena vakayaco-ka vei iko na ka oqo? Na gauna cava o vakila kina na loloma va-karisito? Ko na vakatorocaketaka vakacava na loloma va-Karisito vei ira na tani?

Na madigi cava soti e tu vei ira na goneyalewa me ra vakaraitaka kina na loloma va-Karisito? Na cava e bibi kina me ra vulica na ivakarau me ra lomani ira kina na tani me vaka e dau vakayacora na Karisito?

Na ivolanikalou kei na ivurevure cava tale ena vukei ira na goneyalewa me ra tara cake na ivakarau va-Karisito ni loloma cecere?

Nai Vakatekivu 45; Luke 23:33–34; Alama 61:9 (iVakaraitaki ni tamata era dau vakaraitaka na loloma)

Tiko Voli mai na Lekutu 19:18 (Lomana na wekamu me vakataki iko)

1 Samuela 16:7 (Na Turaga e raica na yalo)

Joni 15:9–13 (E vakaraitaka na Karisito na Nona lomani keda ena Nona solia na Nona bula)

1 Joni 4:7–11, 18–21 (E loloma na Kalou)

Mosaia 4:16 (Vukei ira era leqa tu)

3 Nifai 12:44 (Lomani ira na kemu meca)

Moronai 7:45–48 (Na loloma cecere sai koya na loloma savasava i Karisito; masu mo dau vakasinaiti kina ena loloma)

Thomas S. Monson, “Yalovinaka, Loloma Uasivi kei na Loloma,” Ensign se Liaona, Me 2017, 66–67

Dieter F. Uchtdorf, “Sa Biuta Tani na Rere na Loloma Levu Sara,” Ensign se Liaona, Me 2017, 104–7

Thomas S. Monson, “Loloma—na Uto ni Kosipeli,” Ensign se Liaona, Me 2014, 91 - 94

Dallin H. Oaks, “Veilomani ka Bulavata ena Maliwa ni Duidui,” Ensign se Liaona, Nove. 2014, 25--27

“Loloma,” Tudei Ena Vakabauta (2004), 62

Vidio: “Cheering Each Other On,” “For Madison,” “Sharing the Light of Christ” “Bullying—Stop It” “Why Am I Here?” “We Don’t Need to Be the Same to Be One”

Veivakavulici ena ivakarau ni iVakabula

Ena veituvaki kecega, e a dauivakaraitaki ka qasenivuli vei iratou na Nona tisaipeli na iVakabula. Na cava e rawa ni o cakava mo ivakaraitaki kina ni ivakarau va-Karisito ni loloma cecere vei ira na goneyalewa o vakavulica?

Vidio:“Help Us Discover the Gospel”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Ena vica na tikinipepa, vola kina “Au a vakila na loloma levu duadua mai vua e dua ena gauna ___________.” Solia na veitikinipepa oqo vei ira yadua na goneyalewa ni bera ni tekivu na kalasi, ka kerei koya me vakasamataka na sala me na vakalewena kina na vanualala. Sureti ira na goneyalewa me ra wasea na nodra vakasama me tekivu kina na lesoni.

• Sureti ira na goneyalewa me ra lagata na “Dou Veilomani” (Sere ni Lotu, naba 188). Tarogi ira na goneyalewa se cava na kena ibalebale vei ira na qaqa ni sere oqo.

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na goneyalewa me ra vulica na ivakarau me tarai cake kina na loloma va-Karisito. Muria na veivakauqeti ni Yalotabu, ena nomu digitaka e dua se sivia ka na ganita na nomu kalasi:

• Na ka kece a cakava o Jisu Karisito a cakava ena loloma e taucoko—vei keda kei Tamana. Ena rawa vakacava meda talairawarawa ena loloma taucoko me vaka na iVakabula ka me kua nida rere? Wasea na nomu kalasi ena rua na ilawalawa me ra vulica na vosa nei Peresitedi Dieter F. Uchtdorf na “Sa Biuta Tani na Rere na Loloma Levu Sara.” Digitaka e dua na lawalawa me wasea na cava era vulica mai na iwase e kena ulutaga tiko “Na Rere me Veivakayarayarataki Vakailoa” kei “Na ka e Leqa me baleta na Rere” kei na ilawalawa ka tarava me wasea na cava era vulica ena iwase ni ulutaga “Na Sala Vinaka Cake” kei na “Sa Biuta Tani na Rere na Loloma Levu Sara.” Solia na gauna vei ira na goneyalewa me ra vola na nodra isaunitaro ki na veitaro oqo: Ena sala cava au na rawa ni vakaroti meu cakava na ka ena rere? Na cava e rawa niu cakava meu vakatorocaketaka na loloma Vakarisito? Na cava au via veisautaka me baleta na vei ka au vulica?

• Kau tikini pepa kina kalasi (me ra yadua na pepa na goneyalewa) ka dua na pepa me toqai tiko kina na vosa oqo e cake: Yalovinaka, Loloma Uasivi, kei na Loloma. Solia e dua na tikini pepa vei ira kece na goneyalewa, ka sureti ira me ra vaqara ena vosa nei Peresitedi Thomas S. Monson “Loloma—na Uto ni Kosipeli” kei na “Yalovinaka, Loloma Uasivi, kei na Loloma,” ka vaqara eso na vosa se italanoa ka vakavulica na vosa e toqai tiko ena pepa. Kerei ira na goneyalewa me ra wasea na veika era kunea. Na madigi cava e tu ena kalasi oqo meda yalovinaka, loloma ka vakaraitaka talega na loloma uasivi?

• Sureti ira na goneyalewa me ra wilika na Joni 15:9–13; 1 Joni 4:7–11, 18–21; kei na Moronai 7:47–48 Na cava era vulica na goneyalewa mai na veitikina me baleta na ivakarau ni kena tarai cake na loloma va-Karisito? Na cava na kena ibalebale vei ira na malanivosa “na loloma savasava i Karisito”? Sureti ira na goneyalewa me ra vakaraica na italanoa ena ivolanikalou ka vakaraitaka na nona loloma na iVakabula, ka kerei ira me ra veiwaseitaka vakataki ira na italanoa oqo. E rawa vakacava ni da vakamuria na iVakabula? Era na rawa talega ni ra wilika ka veiwaseitaka eso na vosa ka tuva tu ena tuvatuva qo se wasea na veivakaraitaki ni gauna o ira se eso na tamata era kila era vakalougatataki ena nodra vakayacora eso na cakacaka ni loloma sa va-Karisito.

• Vola ena papa ni volavola na idusidusi vakaivolanikalou oqo: Mosaia 4:16 kei na Tiko Voli mai na Lekutu 19:18. Wasea vakarua na kalasi, ka lesia vei rau na iwasewase e yadua na ivolanikalou. Dusimaki ira na goneyalewa me ra raica na ivakaro e soli tiko ena nodra ivolanikalou ka vola na ivakalekaleka ni ivakaro ena vava ni volavola tarava na idusidusi vakaivolanikalou. Na madigi cava soti e tu vei ira me ra muria kina na ivakaro oqo e vale, mai koronivuli, vakakina ena itikotiko? Na itatarabe cava e tu e rawa ni tarovi keda mai na noda talairawarawa ki na ivakaro eso oqo? Eda na vorata rawa vakacava na itatarabe oqo? Sureti ira na goneyalewa mera sarava na “Bullying—Stop It” ka veivosakitaka na veika era rawa ni cakava mera bulataka na ivakaro oqo ni ra sotava na veika vata oqo.

• Wilika, sarava, se rogoca vakalasi na vosa nei Elder Dallin H. Oaks “Veilomani ka Bulavata ena Maliwa ni Duidui.” Kerei ira na goneyalewa me ra vaqara vakasala ena vukei ira me ra lomani ira na tani ena gauna ni dredre. Na cava tale era rawa ni vulica o ira na goneyalewa ena nodra vulica vosanikalou vei ira na tamata era vakaraitaka na loloma vei ira era vosa vakacacataki ka beci koya? Eso na vakaraitaki e oka kina na Vakabula(raica na Luke 23:34), Josefa mai Ijipita (raica na Vakatekivu 45), se o Paorani (raica na Alama 61:9). Sureti ira na goneyalewa me ra vakasamataka vakabibi ena vakanomodi e dua ena nodra bula era sega ni taleitaka ka vakasamataka eso na sala me ra na rawa ni vakaraitaka na loloma Vakarisito vua na tamata qo.

• Vakaraitaka e dua na vidio e vakaturi tiko ena ituvatuva oqo. Na cava era vulica na goneyalewa me baleta na loloma va-Karisito mai na vidio eso oqori? Kerei ira na goneyalewa me ra wasea eso na ka era sa sotava ka vukei kina na nodra vakila na loloma ni iVakabula ena nona veiqaravi e dua. Na cava e vakavulica vei koya na ka e sotava oqori baleti Jisu Karisito? Sureti ira na goneyalewa me ra vakasamataka e dua era kila ena gadreva me vakila na loloma ni Turaga. Na cava e rawa ni ra cakava me ra vukea na tamata oqori?

Kerei ira na goneyalewa me ra wasea na veika era sa vulica nikua. Na cava era sa bau vakila se vakanananu kina? Era kila tiko li na kena vakatorocaketaki na loloma Vakarisito? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Na vakarorogo e ivakaraitaki ni loloma. E na so na gauna e dau gadrevi kina na soli bula. Ni da vinakata meda vakarorogo vei ira eso, eda dau sega ni tukuna na veika eda via tukuna ka solia na gauna vei koya e vosa tiko me vakamacalataki koya” ( Veituberi, Me iLutua ni Noda Bula [1999], 76).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Masulaka se vakaraitaka na loloma vua e dua era a dau yaloca tu vua.

• Vakaraitaka na loloma vua e dua ena gadreva tu beka vakalevu na noda vakarorogo se noda veivuke (raica na veika sotavi ena yavunilewa ni Caka Vinaka 3, 5, kei na 6, Torocake Yadudua, 54–55).

Wasea vata kei ira na goneyalewa na veika era na vulica tiko ena macawa mai oqo. Na cava na nodra vakasama kei na nodra taro ena ulutaga oqo? Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.