Yaco me va-Karisito Vakalevu Cake

“Sa Kaya vua ko Jisu, Oi au na sala, kei na vu-ni-dina, kei na vu-ni-bula” (Joni 14:6).

Na ituvatuva ena tabana oqo ena vukei ira na goneyalewa me ra vulica ka tara cake na ivakarau va-Karisito. E vakaroti keda kece o Jisu Karisito, “O koya mo dou qai vinaka sara me vakataki au, se me vaka na Tamamudou sa tiko mai Lomalagi” (3 Nifai 12:48). Ni ra tara cake na ivakarau nei Karisito ena vukei ira na goneyalewa me ra vakataucokotaka na nodra yalayala vakalou ni ra luvena yalewa na Kalou. Era na gadreva na ivakarau oqo ni ra sotava na bolebole ena nodra bula tiko ena veigauna dredre kei na nodra vakavakarau me ra susuga cake na matavuvale bula dodonu ena veisiga ni mataka.

iTuvatuva mo Digidigi mai Kina ena Vula Oqo

• E rawa vakacava meu yaco me va-Karisito vakalevu cake?

• Meu tara cake vakacava na loloma va-Karisito?

• Meu na va-Karisito vakalevu cake vakacava niu qaravi ira na tani?

• Meu vulica beka vakacava meu dauvosota vakalevu cake?

• Na cava na vuna e bibi kina me da dau vakavinavinaka?

Muavata

Vakasamataka na navuci ni so na itaviqaravi ka salavata kei na veika era sa vulica tiko na itabagone. Na mataveilawa ni itaviqaravi ni itabagone ni lotu sa vakarautaki tu me vukei iko. E vuqa na itaviqaravi ni vuli ena ituvatuva oqo e rawa talega me itaviqaravi vinaka ni Muavata. Cakacaka vata kei ira na mataveiliutaki ni kalasi me digitaki ka tuvai na itaviqaravi ena vaqaqacotaka na veika era a vulica na goneyalewa ena Sigatabu.