Na cava na vuna e bibi kina me da dau vakavinavinaka?

E vinakata na Turaga me tiko vei keda na yalo ni dauvakavinavinaka ena veika kece eda vakayacora ka kaya. Ni da dau vakavinavinaka, eda na marau vakalevu cake ka vakacegu ena noda bula. Eda na raica ka kila na veivakauqeti kei na veivakalougatataki ni Turaga.

Mo vakarautaki iko vakayalo

Na cava eso na ka o dau vakavinavinakataka vakalevu? Sa vakalevutaka beka vakacava na nomu mamarau na nomu dau vakavinavinaka?

Na cava eso na ka e rawa ni ra cakava na goneyalewa me ra tara cake kina e dua na ivakarau ni vakavinavinaka? Ena veivakalougatataki vakacava ki na nodra bula ena gauna oqo kei na veisiga ni mataka na kena tu vei ira na ivakarau ni bula ni vakavinavinaka?

Na ivolanikalou kei na ivurevure cava tale beka ena vukei ira na goneyalewa me ra kila deivaki na bibi ni dau vakavinavinaka kei na veivakalougatataki e dau yaco mai ni da bula tiko ena vakavinavinaka?

Same 92:1; 100; Alama 26:8 (Vakaraitaki ni vakacaucau kei na vakavinavinaka)

Luke 17:11–19 (Na le tini na vukavuka)

Alama 37:37; V&V 46:32 (Eda sa vakaroti me da vakavinavinaka)

V&V 59:15–21 (E dau vakacudruya na Kalou na sega ni vakavinavinaka)

V&V 78:19 (Veivakalougatataki ni vakavinavinaka)

Dieter F. Uchtdorf, “Vakavinavinaka ena iTuvaki Kecega,” Ensign se Liaona, Me 2014, 70-77

Russell M. Nelson, “Me Vakavinavinakataki ga na Kalou,” Ensign se Liaona, Me 2012, 77–79; raica talega na vidio “Give Thanks”

“Vakavinavinaka,” Me iSakisaki ni iTabagone (2011), 18

“Noqu Kalou Au Kurabui ka Galu,” Sere ni Lotu, naba 44; “Wilika Nomu Kalougata,” Sere ni Lotu, naba 144

Veivakavulici ena ivakarau ni iVakabula

Na iVakabula e kilai ira era dau muri Koya, ka kila na vanua e rawa ni ra yacova. Na kila oqori e vakauqeta na ivakarau e vakavulici ira kina. Ena rawa vakacava mo yaco mo kilai ira na goneyalewa ni nomu kalasi? Ena vakauqeta vakacava na ivakarau era na vakavulici kina na noda kila na veika era dau taleitaka, nodra gagadre, kei na dredre era sotava?

Wasea na veika sa sotavi

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Lesia vei ira yadua na goneyalewa e dua na matanivola, ka solia vei ira na kalasi e dua na miniti me ra vola kina na veivakalougatataki kece sara e rawa ni ra vakasamataka ka tekivu ena nodra matanivola. Na cava na vuna eda dau raibaleta kina ena so na gauna na veivakalougatataki lalai e dau solia mai na Turaga? Kerea e dua na lewe ni kalasi me wilika na Vunau kei na Veiyalayalati 46:32 se 59:21. E rawa vakacava ni da vakaraitaka na vakavinavinaka levu cake me baleta na “veivakalougatataki kecega [eda] sa vakalougatataki kina”?
Vola ena vava ni volavola, “Na ivakatagedegede ni __________ sai vakarau ni noda lomani Koya.” Vakayaloqaqataki ira na goneyalewa me ra vakarogoca na vosa me na vakacavari kina na iyatuvosa ni ra sarava na vidio lekaleka “Give Thanks.” Sureti ira na goneyalewa me ra wasea na ivakaraitaki eso ni tamata ena nodra bula era dau vakaraitaka na nodra loloma vua na iVakabula ena nodra vakavinavinaka.

Vulica vata

Na itaviqaravi yadua e ra ena rawa ni vukei ira na goneyalewa me ra kila na bibi ni vakavinavinaka. Muria na veivakauqeti ni Yalotabu, digitaka e dua se sivia ka na mana vinaka kina nomu kalasi:

Sureti ira na goneyalewa yadua me ra wilika na Luke 17:11–19 ka wasea na vuna era nanuma kina ni ratou lewe ciwa na vukavuka eratou a sega ni vakavinavinaka vua na iVakabula. Na cava eso na ka e rawa ni tarovi keda mai na noda vakavinavinaka? Sureti ira na goneyalewa me ra vakasamataka e dua na veivakalougatataki era sa ciqoma e sega beka ni veiganiti sara na vakavinavinaka era vakaraitaka kina. Na cava sa rui bibi kina me da dau vakaraitaka na vakavinavinaka? Na cava era na cakava me ra vakaraitaka kina na vakavinavinaka?
Ni wilika vakalasi na ivolanikalou ka lagata na serenilotu ni vakacaucau kei na vakavinavinaka, me vaka era tuvai tiko ena ituvatuva oqo. Sureti ira na goneyalewa me ra vaqara na malanivosa me baleta na veika era vakavinavinakataka ka vakacaucautaka talega. Sureti ira me ra wasea na veimalanivosa era digia, vakamacalataka na vuna era digitaka kina, ka vakaraitaka na nodra dui vakavinavinaka.
Tukuna se wilika na italanoa ni ika mai na vosa nei Elder Russell M. Nelson “Me Vakavinavinakataki Ga na Kalou.” Tarogi ira na goneyalewa kevaka era sa bau vukei ira mada na tani (me vakataki koya na dau veiqaravi ena italanoa oqo) sega ni bau vakavinavinakataki. Wasewasea na vo ni italanoa ena ulutaga ni veiwasewase, ka lesi ira na goneyalewa me ra wilika e dua na iwasewase. Kerei ira na goneyalewa me ra vola e dua na ka era sa vulica me baleta na vakavinavinaka kei na dua na ivolanikalou e semati ki na veika era vulica (e rawa ni ra vakayagataka na iDusidusi Vakaivolanikalou). Solia vei ira na goneyalewa me ra wasea na veika era sa vola ka tukuna e dua na gauna era a vakavinavinaka kina me baleta e dua na isolisoli ni Kalou.
Lesia ki na goneyalewa yadua me vulica e dua na tiki ni vosa nei Peresitedi Dieter F. Uchtdorf “ Vakavinavinaka ena iTuvaki Kecega,” ka mo kakua ni solia na ulutaga ni nodra tikina. Kerei ira mera vola ga na nodra dui ulutaga—malanivosa se yatuvosa era nanuma ni sa ivakaleka ni veika era sa vulica. Sureti ira mera wasea na nodra ulutaga kei na veika era sa vulica mai na ivakasala nei Peresitedi Uchtdorf me baleta na vakavinavinaka. Na cava era rawa ni cakava me vakatorocaketaka na nodra ivakarau ni vakavinavinaka e vakamacalataka tiko o Peresitedi Uchtdorf?

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila deivaki li na bibi ni vakavinavinaka? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Cabora e dua na masu ga ni vakavinavinaka, ka vakavinavinakata vei Tamada Vakalomalagi na veivakalougatataki ka kakua ni kerea e dua tale na ka.
Vakaraica na madigi eso mo vakaraitaka kina na vakavinavinaka ena loma taucoko ni macawa.

Wasea vata kei ira na goneyalewa na veika era na vulica tiko ena macawa mai oqo. Na cava na nodra vakasama kei na taro ena ulutaga oqo? Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.