Meu vulica vakacava meu dauvosota vakalevu cake?

Na vosota sa ikoya na noda rawata me da vosota tu na berabera, na leqaleqa, na veisaqasaqa, se veivakararawataki ka sega ni cudru, vuturi, se lomaleqa. E rawa ni tarai cake na dau vosota ni da segata ga me da cakava na loma ni Kalou ka ciqoma na Nona gauna, ka dei na vakabauta ni na vakayacora o Koya na Nona yalayala kece sara vei keda. Ni da vulica me da vosota na veika lalai, eda sa vakarautaki keda me da sotava na veivakatovolei lelevu ena dauvosota.

Mo vakarautaki iko vakayalo

Na veika cava soti sa vakavulici iko me baleta na vosota (oka kina na veivakatovolei lelevu kei na veika lalai eda sotava)? Na cava sa vukei iko mo dau vosota ena gauna ni veivakatovolei?

Na veivakayarayarataki cava era sotava na goneyalewa ena bula ni gauna oqo ka na rawa ni vakavuna na nodra sega ni dauvosota? Na sala cava e rawa ni o vukei ira kina me ra vulica na vosota ka vakanuinui ki na Nona gauna kei na yalayala na Turaga? Na veivakalougatataki cava ena yaco mai vei ira ni ra vosota?

Na ivolanikalou cava kei na vosa ena vukei ira na goneyalewa me ra taleitaka me ra tara cake na ivakarau va-Karisito ni dauvosota?

Jope 1; 19:25–26 (Na ivakaraitaki nei Jope)

Same 37:7–9; Iperiu 10:35–36; Mosaia 23:21–22; Alama 26:27; V&V 24:8 (Na veivakalougatataki ena yaco mai vei ira era dauvosota)

Roma 5:3; Jemesa 1:3–4 (Na vakatovolei ni noda vakabauta e tara cake na dauvosota)

Mosaia 3:19 (Me kautani na tamata vakayago e oka kina na dauvosota)

Dieter F. Uchtdorf, “Vosota Tikoga,” Ensign se Liaona, Me 2010, 56–59; raica talega na vidio“Continue in Patience”

Robert D. Hales, “Waraka na Turaga: Me Yaco ga na Nomuni Lewa,” Ensign se Liaona, Nove. 2011, 71–74

Robert C. Oaks, “The Power of Patience,” Ensign se Liaona, Nove . 2006, 15–17

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Wilika na parakaravu ena itekivu ni lesoni oqo, ka sureti ira na goneyalewa me ra vakasamataka e dua mai na ivolanikalou ka ivakaraitaki ni dauvosota (me vakataki Jekope kei Rejieli [Na iVakatekivu 29:10–30], Ana [1 Samuela 1:2–20], se na marama ka sotava na dredre me baleta na nona dra[raica naMaciu9:20–22]). Qai kerei ira me ra wasea na veika e vakavuvulitaka vei ira na ivakaraitaki eso oqo me baleta na vosota.
Wilika na parakaravu ena itekivu ni ituvatuva oqo, ka sureti ira na goneyalewa me ra wasea na veika ena nodra bula era na gadreva kina na vosota (me vaka na bula vakamatavuvale, vuli kei na bula vakacakacaka, bula vakawati, se bula vakatina). Vakaraitaka e vica na iyaya ka matataka na veigauna ni nomu bula o vakaraitaka kina na vosota (me kena ivakaraitaki, na diploma mai na vulitorocake, mama ni vakamau, se dua na itokaniyaca ni daukaulotu). Me ra kilakila na goneyalewa se semati vakacava na iyaya oqori ki na dauvosota, qai wasea na veika o sa sotava.

Vulica vata

Na itaviqaravi yadua e ra ena rawa ni vukei ira na goneyalewa me ra kila na bibi ni yalodina. Ena kena vakamuri na veivakauqeti ni Yalotabu, digitaka e dua se sivia ka na mana vinaka kina nomu kalasi:

Vola ena vava ni volavola e vica na taro me baleti Jope (E mataqali tamata vakacava o Jope? A vakatovolei vakacava na nona dau vosota? Na cava beka e vakatavuvulitaka vei keda o koya me baleta na vosota?) Wilika vata vakalasi na Jope 1; 19:25–26, ka veivosakitaka na isau ni veitaro oqo. Na cava beka era sa vulica na goneyalewa mai na ivakaraitaki nei Jope ena vukei ira me ra dauvosota cake vakalevu? A vukei koya vakacava me sotava na nona veivakatovolei na nona vakabauta na iVakabula?
Wasea na italanoa ni nona vosota e dua na tama mai na vosa nei Elder Robert C. Oaks “The Power of Patience,” ka sureti ira na goneyalewa me ra wasea e dua ga na italanoa e tu vei ira me baleta na vosota. Solia vei ira yadua na goneyalewa e dua na iwasewase lailai ni vosa oqo o nanuma ni na veivuke. Sureti koya me wilika ka umana vata vei ira na kalasi. Na cava beka era vulica mai na vosa oqo na goneyalewa ka na vakauqeti ira me ra nuitaka ga na Turaga kei na Nona gauna? Na cava beka eso na vuna eda dau sega kina ni vosota? E rawa beka vakacava me da lakosivita na itovo oqo?
Ni wilika vata vakalasi na parakaravu 9 ki na 17 ni vosa nei Elder Robert D. Hales “Waiting upon the Lord: Thy Will Be Done,” ka vaqara na isau ni taro “Na cava na kena ibalebale me da waraka na Turaga?” Me baleta na ikuri eso ni vakasama, sureti ira na goneyalewa me ra vakaraica na ivolanikalou e cavuta tiko o Elder Hales ka wasea na veika tale eso e vakavuvulitaka na ivolanikalou oqo me baleta na vosota. E rawa vakacava me ra vakayagataka na goneyalewa na vosa nei Elder Hales se na ivolanikalou eso oqo me ra vukea e dua sa yali tiko mai na nona inuinui?
Vola ena vava ni volavola na ulutaga “Vosota” kei na “Sega ni Vosota.” Solia vei ira yadua na goneyalewa e dua na ivolanikalou me baleta na vosota ka vakaturi tiko ena ituvatuva oqo. Sureta na kalasi me ra veivukevuke ena wiliki ni nodra ivolanikalou e lesi vei ira, ka veivosakitaka na kena itukutuku, ka vola ena vava ni volavola na veivakalougatataki ni vosota se na revurevu ni sega ni vosota e vakavuvulitaki ena ivolanikalou. Na ikuri cava tale ni veivakalougatataki kei na revurevu ca e rawa ni ra vakuria ena nodra lisi? Sureti ira yadua na goneyalewa me ra vola ena dua na tikinipepa e dua na ituvaki ka na gadrevi kina na vosota (vakayaloqaqataki ira me ra kakua ni vola walega na veika lelevu ia na veika vakatuburarawa dau yaco e veisiga se na malumalumu eso). Me ra qai veisau tikinipepa kei na dua tale na goneyalewa, vola e dua na kena isau ka na vakaraitaka na vosota, me qai wasea vei ira ena kalasi na veika era sa vola.
Vakaraitaka na vidio “Continue in Patience,” ka sureti ira na goneyalewa me ra veivosakitaka na veika era vulica mai na vidio. Na cava eso na gauna era dau sega kina ni vosota na goneyalewa? Sureti ira yadua na goneyalewa me ra wilika e dua na iwasewase mai na vosa nei Peresitedi Dieter F. Uchtdorf “Continue in Patience,” ka kerei koya me uamana vata vei ira na vo ni kalasi na veika e vulica mai na iwasewase e wilika. Ena vukei ira beka vakacava na goneyalewa na ivakasala nei Peresitedi Uchtdorf me ra dau vosota?

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila beka na sala me ra dauvosota vakalevu cake kina? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakaraitaka na vosota levu cake ena macawa ka lako mai.
Cakava e dua na lisi ni veisala totolo eso e rawa ni vukea na nodra lewa na nodra dau sega ni vosota ena dua na gauna dredre, me vaka na wili vakatini se lagata e dua na serenilotu.

Wasea vata kei ira na goneyalewa na veika era na vulica tiko ena macawa mai oqo. Na cava beka na nodra nanuma kei na nodra taro ena ulutaga oqo? Na cava e rawa ni ra cakava me ra vakavakarau ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.