Meu na vakaitavi vakacava ena kena vakusakusataki na cakacaka ni Turaga?

Eda sa bula tiko oqo ena iotioti ni gauna, ena gauna sa vakayacora tiko kina na Turaga na Nona yalayala: “Io au na kitaka kusarawa na noqu cakacaka e na kena gauna” ( V&V 88:73). Sa tiko na nodra itavi bibi na goneyalewa ena cakacaka oqo. Sa rawa meda vakaitavi ena noda sureti ira na tamata kecega mera lako mai vei Karisito ena noda wasea na kosipeli, vakayacora na veiqaravi sa va-Karisito, vaqaqacotaki ira na lewenilotu vou, vueti ira na lewenilotu ka ra sa luluqa, ka vakayacora na cakacaka vakalotu ni nodra vakabulai na mate.

Mo vakarautaki iko vakayalo

Na ivakadinadina cava o sa raica ni sa vakusakusataka tiko na Turaga na Nona cakacaka ena noda gauna oqo? Na cava soti o sotava o na rawa ni wasea me na vakauqeti ira na goneyalewa mera vakaitavi vagumatua ena cakacaka oqo?

Na taledi kei na isolisoli cava o sa raica voli vei ira na goneyalewa ena rawa ni ra gugumatua kina ni tosoya ki liu na cakacaka ni Turaga? Na cava mada era sa cakava tiko mera vakaitavi ena cakacaka oqo?

Na ivolanikalou kei na ivurevure cava tale eso ena vakauqeti ira na goneyalewa mera vakaitavi ena kena vakusakusataki na cakacaka ni Turaga?

Aisea 11:9; 1 Nifai 13:37; 14:14 (Parofisai eso me baleta na cakacaka ni Turaga)

Mosaia 28:1–3 (E ratou sa gadreva na luvei Mosaia me ratou vunautaka na kosipeli)

Mosese 1:39 (Sa vakamacalataka na Kalou na Nona cakacaka)

V&V 138:56 (Era a vakarautaki tu mai na bula taumada o ira na luve ni Kalou yalodina mera mai cakacaka ena were ni Turaga)

Carol F. McConkie “Na Qaravi ni iNaki Dodonu Eke,” Ensign se Liaona, Nove. 2015, 12–14

Linda K. Burton, “Gadrevi: Liga kei na Yalo me Vakusakusataka na Cakacaka,” Ensign se Liaona, Me 2014, 122–24

Maqusataki na Cakacaka ni Veivakabulai

Vidio: “Our Spiritual Passport”

Veivakavulici ena ivakarau ni iVakabula

A taroga na iVakabula na taro eso ka vakavuna vei ira na dau muri Koya mera vakasamataka ka vakila vakatitobu. Era kila ni lomani ira o Koya, ka ra lomavinaka ni ra wasea na nodra vakasama kei na veika era nanuma. Ni o vakarorogo ena yalodina ka vakaraitaka na nomu kauwai ena nodra isaunitaro kei na vakasama na goneyalewa, o na vukei ira mera vakila na nona loloma na iVakabula.

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Vola na vosa vakusakusa ena vava ni volavola, ka kerea e dua me wilika na Vunau kei na Veiyalayalati 88:73. Kerei ira na goneyalewa mera veivosakitaka na ibalebale ni noda vakusakusataka e dua na ka (ke gadrevi, raica na vosa ena dikiseniri). Tarogi ira na goneyalewa na cava na vuna e gadrevi kina me vakusakusataki na cakacaka ni Turaga ena noda gauna oqo.

• Vola ena vava ni volavola, “Na cava na cakacaka ni Turaga?” Sureti ira na goneyalewa mera gole ki na vava ni volavola ka vola na isau veidonui ki na taro oqo. Vakayaloqaqataki ira mera tomana tiko ena lisi oqo na veika era na vulica tiko ena lesoni oqo.

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena vukei ira na goneyalewa mera raica na sala mera vakaitavi kina ena Nona sa vakusakusataka na Turaga na Nona cakacaka. Mai na veivakauqeti ni Yalotabu, digitaka e dua se sivia ka na mana vinaka ki na nomu kalasi:

• Ni vo toka e vica na siga, kerei ira na goneyalewa mera raica na wase ni Vakusakusataka na Cakacaka ni Veivakabulai ena LDS.org ka raica kina eso na ivurevure. Sureti ira mera vakavakarau mai ki na kalasi mera mai wasea na veivakauqeti mai na initaneti ka vakaitavi vakalevu ena cakacaka ni Turaga.

• Sureti ira na goneyalewa mera wilika (yadua se ena ilawalawa lalai) e dua na italanoa ena vosa nei McConkie “Na Qaravi ni iNaki Dodonu Eke.” E rawa talega ni o sureta e dua na lewe ni tabanalevu se qai curuvou mai se, se qai lesu tiko mai na lotu me wasea na veika sa sotava. Kevaka era sa na wilika na vosa na goneyalewa, kerea mera talanoataka vakalekaleka ki na vo ni kalasi ka veivosakitaka na veika era sa vulica baleta na vakaitavi ena cakacaka ni Turaga. Na cava era vakavuvulitaki ena italanoa me baleta na ivakarau me da vakaitavi kina ena cakacaka ni veivakabulai? Na sala cava eda sa vakaitavi rawa tiko kina?

• Vola na taro eso vaqo ena papa: Na cava e rawa ni ra cakava na goneyalewa me ra vakaitavi ena cakacaka ni Turaga? Na cava e vukei iko mo vakila nomu marautaka ka vakusakusataka na cakacaka oqo? Sa vukei iko tiko vakacava na veika o sotava ni ko vakavakarau mo vakaitavi ena cakacaka oqo? Kerei ira na goneyalewa me ra wilika na ivolanikalou era vakaturi tu ena ituvatuva oqo se sarava na vidio “Our Spiritual Passport” me vukea nodra sauma e dua se levu na taro oqo. Sureti ira mera wasea na veika era sa raica.

• Me wiliki vata na lisi ni ivakatakilakila ena “gadrevi na veivuke” ena vosa nei Sisita Linda Burton “Gadrevi: Na Liga kei na Yalo me Vakusakusataka na Cakacaka.” Sureti ira na goneyalewa mera digitaka e dua na ka mai na lisi ka cakava na ivakatakilakila ni nodra sureti na tamata mera vakaitavi ena ituvaki oqori ena cakacaka ni Turaga. Vakayaloqaqataki ira mera okata ena nodra ivakatakilakila eso na veika lavaki mo vakayacora ena cakacaka oqo kei na veivakalougatataki e lako mai kina. Sureta mera wasea na nodra ivakatakilakila ka wasea na veika era sa sotava ni ra vakaitavi ena cakacaka ni Turaga.

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila deivaki beka na sala mera vakaitavi kina ena vakusakusataki ni cakacaka ni Turaga? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“O rawa ni vakaraitaka ni o vakarorogo tiko ena nomu vakamacalataka na veika bibi vei ira. Mo na raici koya e vosa tiko ka kakua ni raica na nomu ivola ni lesoni se dua tale na ka ena loma ni rumu. E rawa talega ni o vakauqeti koya e vosa tiko me vakaotia na nona vakasama se na ka e tukuna tiko ka me kakua ni takosovi na nona vosa. E rawa talega ni o tovolea mo kakua ni siova yani na veivosaki tale eso mo solia kina na nomu vakasama se na nomu lewa” (Veituberi, Me iLutua ni Noda Bula [1999], 76).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa mera vakasamataka na sala mera bulataka kina na veika era sa vulica nikua. Me ivakaraitaki, e rawa ni ra:

• Sureta e dua na itokani ki na itaviqaravi ni Muavata se dua tale na soqo ni Lotu.

• Wasea na nodra ivakadinadina ni kosipeli ki na dua na itokani se lewe ni matavuvale.

Wasea vei ira na goneyalewa na veika era na vulica tiko ena macawa mai oqo. Na cava na nodra vakanananu kei na nodra taro ena ulutaga oqo? Na cava e rawa ni ra cakava mera vakavakarau ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ni macawa mai oqo.