Ena tarai au vakacava kei ira era vakavolivoliti au na veika au kaya?

Na noda ivosavosa e vakaraitaka na noda kila se o cei o keda me vaka ni da luve ni Kalou. Na ivosavosa eda tauca e rawa me veilaveti cake ka vakayaloqaqataki ira eso tale, se rawa me veivakararawataki ka vakacudrui ira. Ena noda tauca na veivosa veilaveti, eda sa sureta na Yalo Tabu me tiko vata kei keda.

Mo vakarautaki iko vakayalo

Vakasamataka na kaukauwa ni vosa. Ena nomu bula, o a sa vakayagataka vakacava na vosa me veiuqeti, veivakavulici, veivakacegui, ka sala ni veitaratara? E sa veisau vakacava na itagede veiganiti ni ivosavosa e vuravura ena gauna ni nomu bula?

Vakasamataka na sala ni nodra veitaratara na goneyalewa o sa raica rawa. E rawa vakacava mo vukei ira me ra kila na bibi ni kena vakayagataki na ivosavosa vinaka ka veilaveti?

Na tiki ni ivolanikalou kei na vosa cava e rawa me vukei ira kina na goneyalewa ena nodra vakila na bibi ni vosa era vakayagataka me ra veitaratara kina vata kei ira eso tale?

Vosa Vakaibalebale 15:1–4; 16:24; 1 Timoci 4:12; Jemesa 3:2–10; Alama 31:5; V&V 25:12; 108:7 (Na noda vosa e rawa me mana vakaukauwa sara vei ira tale eso)

Lako Yani 20:7; Maciu 12:34-37; 15:11; Luke 12:2–3; 1 Timoci 5:13; V&V 42:27 (Na veivakacacani, kakase, vosavosa ca, kei na vosa beci era sa vakacudruya na Kalou kei ira tale eso)

Efeso 4:29–32; 2 Nifai 32:2–3; V&V 63:61–64 (Na ivosavosa au vakayagataka e rawa me tatara ki na noqu rawa ni ciqoma na veidusimaki ni Yalo Tabu)

Mosaia 4:30 (E dodonu meda qarauna vinaka sara na vosa eda cavuta)

Jean B. Bingham, “Au na Kauta Mai na Rarama ni Kosipeli ki na Noqu Vale,” Ensign se Liaona, Nove. 2016, 6–9

Jeffrey R. Holland, “Na Vosa ni Agilosi,”Ensign se Liaona, Me 2007, 16–18

W. Craig Zwick, “ Na Cava Nomu Nanuma?” Ensign se Liaona, Me 2014

“iVosavosa,” Me iSakisaki ni iTabagone (2011), 20–21

“Veivakacacani, ” Tudei Ena Vakabauta (2004), 184

Vidio: “No Cussing Club”; “Bullying—Stop It”; “Texting Truths”

Veivakavulici ena ivakarau ni iVakabula

A taroga na taro na iVakabula ka vakavuna vei ira eso me ra vakasamataka ka vakila vakatitobu. O Koya e dau via kila sara ga na isaunitaro era dau kaya. E solia vei ira na madigi me ra taro ka wasea na nodra raiyawa, ka sauma o Koya na veika era taroga ka vakarorogo ki na veika era sa sotava tiko. E rawa vakacava mo muria na ivakaraitaki ni iVakabula ena nomu vakavulici ira na goneyalewa me baleta na bibi ni veika era kaya?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti.Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Ni se vo toka e vica na siga, kerea e dua na goneyalewa me vakarau mai ki kalasi me wasea na italanoa ni bavelo kei na gonetagane e dau vakalialiai gauna ni nona cauravou ena vosa nei Sisita Jean B. Bingham “Au na Kauta Mai na Rarama ni Kosipeli ki na Noqu Vale.” Na cava era sa vulica rawa na goneyalewa mai na italanoa oqo ena kena rawa ni dau veilauti na noda vosa?
Vola na veimalanivosa oqo ena vava ni volavola: Vosa eda wilika. Vosa eda rogoca. Vosa eda vola. Vosa eda cavuta. Kerea e dua na goneyalewa me wilika na Efeso 4:29–32 ka vakamacalataka na kena semati vakacava ki na va na malanivosa ena vava ni volavola. Sureti ira na goneyalewa me ra tugana na veitaro oqo: Na cava o vakila me baleta na mataqali ivosavosa o wilika, rogoca, ka vakayagataka? E veisureti vakacava na vosa se vakayalolailaitaka na veidusimaki mai na Yalo Tabu?

Vulica vata

Na veiitaviqaravi yadudua e ra ena rawa ni vukei ira na goneyalewa me ra kila vakavinaka na bibi ni kena vakayagataki na ivosavosa vinaka. Na kena vakamuri na veivakauqeti ni Yalotabu, digitaka e dua se sivia ka na ganita na nomu kalasi:

Ena vica na siga ki liu, sureti ira na goneyalewa me ra kauta mai ki na kalasi e dua na vosa cavuti veivakauqeti ka taleitaki. Kerei ira vakayadua na goneyalewa me wasea na nona vosa cavuti ka vakamacalataka na veivakayarayataki e sa vakayacora ena nona bula. Sureta na kalasi me ra vakasaqara na ivakaraitaki ena ivolanikalou ka vakaraitaka na kaukauwa dina ni kena vakayarayarataki na noda vosa kivei ira eso tale (kena ivakaraitaki, o Kavetani Moronai kei na iulutaga ni galala [raica na Alama 46:11–22], na i Vakabula kei na yalewa sa kune ni dautagane [raica na Joni 8:1–11], se Apinatai kei Alama [raica na Alama 5:9–12]). Na cava e vakavulica vei ira na goneyalewa ena ivakaraitaki oqo me baleta na kaukauwa ni nodra vosa e rawa me tarai ira eso tale?
Me vaka e dua na kalasi, wilika na vosa nei Elder Jeffrey R. Holland “Nodra Vosa na Agilosi.” Sureti ira na goneyalewa me ra vola na veika e vakasakiti vei ira se na nodra via veisautaka na sala me baleta na nodra veitaratara vata kei ira eso tale. Me veiganiti, kerea e lewe vica na goneyalewa me ra wasea na veika era vakasakita.
Vola ena vava “Kevaka e dua na tamata e rawa me tarova na nona ivosavosa, e rawa me tarova________.” Sureti ira na goneyalewa me ra vakasaqara na Jemesa 3:2–10 ka vakalewena na vanua lala. Lesi ira yadua na goneyalewa me wilika e dua na vosa vakatautauvata a vakayagataka o Jemesa (tarovi na ose, tikina e 2–3; waqa, tikina e 4; buka waqa, tikina e 5–6; ka gaga, tikina e 7–8; mata-ni-wai dranu, tikina e 10–11). Sureti ira yadua na goneyalewa me ra vakavakarau me ra vakavulica na vo ni kalasi na cava e vakavulica na nona vosa vakatautauvata me baleta noda lewa na noda vosa. Sureti ira na goneyalewa me ra wasea na cava e rawa me ra cakava me ra lewa kina na nodra vosa.
Lesi ira yadua na goneyalewa ena dua na malanivosa mai na ivolanikalou ka duidui mai na imatai ni iwase ni ivolanikalou ena kena ituvaki oqo. Sureti koya me droinitaka e dua na iyaloyalo rawarawa se daikaramu ka matataka na itukutuku mai na malanivosa. Me vakaraitaka na nona iyaloyalo, ka sureti ira na lewe ni kalasi tale eso me ra kilakila se cava e vakatavulica me baleta na veitaratara vata kei ira tale eso. E rawa vakacava me ra wasea na goneyalewa na veika era sotava ni vakaraitaka na dina e vakavulici ena veitiki ni ivolanikalou oqo?
Vakaraitaka e dua na vidio mai na ituvatuva oqo, ka sureti ira na goneyalewa mera wasea na veika era sa vulica mai na vidio. Sureta mera vakasamataka vakatitobu na veika era rawa ni vakauqeta kina eso mera veivosaki ena sala ena sureta na Yalo ni Turaga. Me vakataka, na sala era rawa ni vukea kina e dua na itokani e dau vosavosa ca? Se na sala mera vakayagataka kina na veivosaki ena gacagaca vakalivaliva mera veilaveti ka vakayaloqaqataki ira eso? Sureti ira me ra vaqara na kena isau ni ra wilika na “Vosa” ena Me iSakisaki ni iTabagone. Kerea mera wasea na nodra nanuma.
Sureti ira na goneyalewa mera wilika na 1 Nifai 5:1–7 ka wasea na veika era sa vulica mai na ivakaraitaki nei Seraia kei Liai me baleta na noda vosa ni sa rawa me vakayaco-ka kivei keda kei ira na tamata. Kerei ira mera wilika na ivakamacala nei Elder W. Craig Zwick me baleta na itukutuku oqo ena nona vosa “ Na Cava Nomu Nanuma?” Na veivakararamataki cava tale era sa taura na goneyalewa mai na vosa oqo? Vakayaloqaqataki ira mera wasea na sala era rawa ni muria kina na ivakaraitaki nei Liai ni ra veimaliwai kei ira nodra matavuvale kei ira na tamata.

Kerei ira na goneyalewa me ra wasea na veika era sa vulica nikua. Era kila tiko beka na bibi ni kena vakayagataki na ivosavosa savasava, veivueti? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakacavara na Yalodina ena veika sotavi ena yavunilewa 2 ena Torocake Yadudua.
Muduka na kakase ka kauta laivi na vosa ca ena ivosavosa era dau tauca kei na vakanananu. Vakasamataka na vagigitaki ni dua na serenilotu taleitaki ni yaco mai na veivakatovolei.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.