Meu qarauna vakacava na noqu ivalavala dodonu?

Na ivalavala dodonu sa iwalewale ni vakasama kei na itovo ka vakayavutaki ena ivakatagedegede savasava cecere. E okati kina na tiko savasava. Eda bula ena dua na vuravura e sa vakalailaitaki kina ka saqati vakaukauwa kina na ivalavala dodonu. E rawa meda taqomaka noda ivalavala dodonu ena noda levea na vakanananu, ivosavosa kei na ivakarau dukadukali.Sa rui vakarerevaki na iyaloyalo vakasisila. Ena noda “vakaiyaragi ena iyaragi kece ga ni Kalou” (raica na Efeso 6:11–17) ka vakararavi ena kaukauwa ni Turaga, e rawa meda taqomaki keda mai na valuti ni meca ni ivalavala dodonu ka maroroya me savasava na noda vakasama kei na noda ivalavala.

Mo vakarautaki iko vakayalo

Vakasamataka na kena kauta mai vei iko na vakacegu na bulataki ni ivalavala dodonu. Na revurevu cava e kauta mai ki vuravura kei na matavuvale na iyaloyalo vakasisila? O sa ivakatawa vakacava tiko mai ni ivalavala dodonu?

Ena tarai ira vakacava tale eso na nodra ivosavosa, ivakarau, kei na kedra irairai na goneyalewa? Ena rawa beka vakacava ni ra na raica na goneyalewa na iyaloyalo vakasisila? Na ivakavuvuli ni kosipeli kei na ivakarau ni tataqomaki cava e rawa me vukei ira ena nodra taqomaka na savasava ni nodra vakasama kei na nodra ivalavala?

Na ivolanikalou kei na vosa cava ena vukei ira na goneyalewa me ra taqomaka na savasava ni nodra vakasama kei na nodra ivalavala?

Nai Vakatekivu 39:1–12; Roma 12:21; 2 Timoci 2:22; Moronai 10:30; V&V 27:15–18; 121:45–46 (E dodonu meda sa vuki tani vakatotolo sara mai na veivakatovolei ni dodomo ca ka dodonu meda vakasinaita noda vakasama ena vakanananu savasava)

Aisea 1:18; Ilamani 12:23; V&V 58:42–43 (E rawa ni da vosoti kevaka eda veivutuni)

Maciu 5:27–28; Roma 6:12; Alama 39:3–9; V&V 42:23 (Na dodomo ca sa ikoya e dua na ivalavala ca ka bibi na kena isau)

1 Nifai 17:3; Mosaia 24:14; Alama 26:12 (Ena vaqaqacotaki keda na Kalou ena noda sasaga meda taqomaka na ivakaro)

Jeffrey R. Holland, “Au sa Sega ni Soli Au vei Noqu Meca,” Ensign se Liaona, Me 2010, 44–46; raica tale ga na vidio “Watch Your Step”

Elder Quentin L. Cook, “A Cava Dou sa Nanuma Ena Gauna Oqo?” Ensign se Liaona, Nove. 2012, 6–9

Elaine S. Dalton, “iVakatawa ni iValavala Dodonu,” Ensign se Liaona, Me 2011, 121–24; raica tale ga na vidio“Guardians of Virtue”

Linda S. Reeves, “Taqomaki mai na iYaloyalo Vakasisila—Matavuvale Vakaliuci Karisito,” Ensign se Liaona, Me 2014

“Veivakamarautaki kei na iTukutuku Raraba” kei na “Bula Savasava ni Veiyacovi,” Me iSakisaki ni iTabagone (2011), 11–13, 35–37

“Tiko Savasava,” Me iSakisaki ni iTabagone (2011), 26–28

“Tiko Savasava,” Tudei Ena Vakabauta (2004), 123–128

“iYaloyalo Vakasisila,” Tudei Ena Vakabauta (2004), 45–46

Vidio: “Chastity: What Are the Limits?”; “Pornography Addiction: Is There Hope?”

Veivakavulici ena ivakarau ni iVakabula

Ena nomu veivakavulici me vaka na veivakavulici ni Turaga, o ira na goneyalewa era na vakarautaka e dua na vanua e lomadra me teivaki kina na sore ni kosipeli, me buroro, ka tubu. Na cava e rawa mo cakava me vukei ira na goneyalewa ena nodra vakayagataka na ivolanikalou me ra kila kina na kaukauwa kei na totoka ni bulataki na ivalavala dodonu?

Vidio: “We Learn”

Sarava eso tale

iVAKAMACALA VUA NA QASENIVULI : E vuqa na goneyalewa era sa raica ka vakaleqai ena iyaloyalo vakasisila ke sega ni vakataki ira vakaiira se mai vua e dua na lewe ni matavuvale se itokani. Me kakua ni veivosakitaki ena kalasi na veika e sotavi se vakatutusa me baleta na iyaloyalo vakasisila. Sa na rawa mo vakaraitaka vei ira na itubutubu ni o na vakavulica tiko na lesoni oqo ka sureti ira me ra tomana tiko ga na kena veivosakitaki ena nodra veivale. Kevaka e gadreva na veivuke e dua na goneyalewa, sureti koya me vosa kivei rau nona itubutubu se bisopi se peresitedi ni tabana.

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Vola ena vava ni volavola, “E rawa meda qarauna noda ivalavala dodonu ena noda levea na vakasama, ivosavosa, kei na ivalavala dukadukali.” Na ivakasala cava era na solia na goneyalewa me vukea e dua me tudei nona bula dodonu ena dua na vuravura e sega ni taucoko kina na veivakayarayarataki vinaka?

• Wilika vata na italanoa me baleta na goneyalewa ka soli ivakasala ki na dua na Maqusa vou ena vosa nei Sisita Ann M. Dibb “Mo Dau Yalodei Vinaka.” Tarogi ira na goneyalewa se cava era cakava ena nodra sa vakavolivoliti tu mai ena veivakayarayarataki e sega ni taucoko.

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra e rawa me vukei ira na goneyalewa me ra vulica na kena maroroi vakacava na nodra vakasama kei na ivakarau me savasava. Ena veivakauqeti ni Yalotabu, digitaka e dua se sivia ka na ganita na nomu kalasi:

• Wasei ira na goneyalewa ki na iwasewase lalai, ka solia ki na iwasewase yadua e dua na tiki ni ivolanikalou e vakatututaki ena ituvatuva oqo. Kerei ira me ra wilika na nodra ilesilesi ni ivolanikalou ka wasea vata kei na vo ni kalasi na veika era vulica mai na ivolanikalou oqo me baleta na tudei ni taukeni na itagede cecere ni ivalavala dodonu.

• Sureti ira na goneyalewa me ra sarava na vidio “iVakatawa ni iValavala Dodonu” se wilika na vosa ena iulutaga vata ga. Taumada, wasei ira na goneyalewa ki na tolu na iwasewase. Vakarota na imatai ni iwasewase me ra vakasaqara na cava na kena ibalebale me dua na ivakatawa ni ivalavala dodonu, na ikarua ni iwasewase me vakasaqara na ivakasala mai vei Sisita Dalton, kei na ikatolu ni iwasewase me vakasaqara na veivakalougatataki e lako mai ena ivakatawa ni ivalavala dodonu. Sureta e dua na goneyalewa mai na iwasewase yadua me vola ena vava na cava e sa kunea na nona iwasewase, ka me wasea na iwasewase na cava e kena ibalebale kivei ira. Na cava era vulica mai na itukutuku nei Sisita Dalton ka na vukei ira me ra taqomaka ka vakasavasavataka na nodra vakasama kei na ivakarau? Na cava na kena ibalebale ni “maqosa e sega wale ga ni nomu isulusulu, ia ena nomu vosa, nomu ivakarau, kei na nomu vakayagataka na sala ni itukutuku veikauyaki”?

• Tarogi ira na goneyalewa se cava na vuna era nanuma kina ni vakacacana na yalo na iyaloyalo vakasisila. Me vaka e dua na kalasi, wilika na iwase me baleta na iyaloyalo vakasisila ena Tudei Ena Vakabauta. Ni oti na veiparakaravu yadua, taura na gauna me veivosakitaki kina na bibi ni veika sa mai wiliki. (Me kena ivakaraitaki, e rawa mo veivosakitaka vata kei ira na goneyalewa na duidui ni veivanua se ituvaki e rawa me ra sotava kina na iyaloyalo vakasisila. Na cava e rawa me ra cakava me taqomaki tani kina na iyaloyalo vakasisila? Sureti ira me ra tuvalaka na veika me ra na cakava ena gauna era sotava kina ena vakacalaka.) Ni oti na ikatolu ni parakaravu, veivosakitaka na kaukauwa ni Veisorovaki kei na nona vakaitavi vakacava na bisopi se peresitedi ni tabana ena kena cakacakataki na veivutuni. Sureti ira na goneyalewa me ra raici bisopi kevaka era sa mai cokoti vata ena iyaloyalo vakasisila.

• Solia vei ira yadua na goneyalewa e dua na ilavelave ni vosa nei Elder Jeffrey R. Holland “Au sa Sega ni Soli Au Vei Noqu Meca” se vosa nei Sister Linda S. Reeves “Taqomaki mai na iYaloyalo Vakasisila—Matavuvale Vakaliuci Karisito,” ka me ra raitayaloyalotaka ni ra sa veivosaki vata tiko kei na luvedra goneyalewa yabaki 12 ena gauna se bera mai me baleta na vuna e veivakarusai kina na iyaloyalo vakasisila ka na rawa ni levei vakacava. (E rawa talega ni ra sarava e dua na iyaloyalo mai na ituvatuva oqo.) Me ra vakasaqara na itukutuku ka na vukei ira ena veivosaki oqo. Sureti ira me ra veisa ka wasea na isaunitaro era sa kunea. Sureti ira me ra vola na veika era na cakava me ra levea kina na iyaloyalo vakasisila ena vo ni nodra bula taucoko.

• Sureti ira na goneyalewa me ra raitayaloyalotaka na nodra madigi me ra tukuna vua e dua na lewe ni Kuoramu ni iApositolo Le Tinikarua me baleta na bolebole era sotava tiko na itabagone nikua me baleta na iyaloyalo vakasisila. Na cava beka era na kaya vua? Solia vei ira yadua na goneyalewa e dua na ilavelave ni ono na parakaravu ni vosa nei Elder Quentin L. Cook “ E Rawa Mo Vakila Ena Gauna Oqo?” tekivu vata kei na malanivosa “iValavala ca ni veiyacovi kei na vakanananu dukadukali.” Kerea na veimama ni kalasi me ra vakasaqara ka wasea na veika a vulica o Elder Cook mai na gonetagane yabaki 15, ka kerea na veimama ni kalasi tale ka dua me ra vakasaqara ka wasea na ivakasala a solia o Elder Cook. Na cava e rawa me ra cakava na goneyalewa me vukea na kena caka na nodra veivale me “vanua ni vakaruru” mai na iyaloyalo vakasisila?

• Sureti ira na goneyalewa me ra raitayaloyalotaka ni dua tiko na nodra itokani ka sa vakaleqai tiko ena iyaloyalo vakasisila. Na cava era na kaya me vukei koya? Kerei ira yadua na goneyalewa me ra wilika na “Veivakamarautaki kei na iTukutuku Raraba” ena Me iSakisaki ni iTabagone se tiki ni iwase ena ulutaga “Rawata na Kaukauwa Mo Biuta Tani Kina na iValavala Ca” mai na ivolalailai Me Savasava Tikoga na Nomu Vakanananu. Na cava era na wasea na goneyalewa vata kei ira nodra itokani mai na iwase oqo? Na tiki ni ivolanikalou cava soti e rawa me vukea e dua e vakaleqai tiko ena iyaloyalo vakasisila? (Me kena ivakaraitaki, raica na ivolanikalou e vakatututaki ena ituvatuva oqo.)

Kerei ira na goneyalewa me ra wasea na veika era sa vulica nikua. Era kila beka na kena taqomaki vakacava me savasava kina na nodra vakanananu kei na nodra ivalavala? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Na nomu itavi bibi mo vukei ira eso me ra vulica na kosipeli, e sega ni vaka mo solia e dua na vunau levu. E okati kina na nodra vakaitavitaki na lewenikalasi me ra veivakavulici vakataki ira” (Veituberi, Me iLutua ni Noda Bula [1999], 73).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vakacavari ni iValavala Dodonu ena veika sotavi ena yavunilewa 2 kei 4 na Torocake Yadudua.

• Tuvalaka na ka era na cakava kevaka era sotava e dua na ka e rawa me veiliutaki ki na vakasama dukadukali.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.