Na cava na vu ni noda lolo?

Na lolo sa ikoya na marautaka na noda sega ni kana se gunu ena vica na gauna ni kana. Na lako vata ni lolo kei na masumasu ena yalodina e rawa me vukea nomu vakavakarautaki iko kei ira tale eso ena kena ciqomi na veivakalougatataki ni Kalou. Sa ikoya na ivurevure ni veivaqaqacotaki vakayalo. Ena lolo eda na rawa ni vakila na noda voleka cake yani vua na Tamada Vakalomalagi ka vaqaqacotaka vakakina na noda ivakadinadina. E okati tale ga ena lolo na soli ni isolisoli ni lolo ena yalo savu me vukei ira era gadreva tu na veivuke.

Mo vakarautaki iko vakayalo

Na cava eso na vuna o lolo kina, ka cava so e yaco ena nomu lolo? Na cava mo cakava me vakaibalebale kina vakalevu na lolo?

Na cava na vuna e bibi kina vei ira na goneyalewa me ra kila vinaka na ivakavuvuli ni lolo? Na veivakataotaki cava era sotava na goneyalewa ena kena marautaki na taucoko ni veivakalougatataki ni lolo?

Na ivolanikalou kei na ivurevure cava tale eso ena vukei ira na goneyalewa me ra kila na lolo kei na veivakalougatataki e kauta mai?

Esiteri 4:10–17; Maciu 4:1–11; Alama 17:1–3, 9; V&V 59:12–14 (Na lolo sa ikoya na ivurevure ni vaqaqacotaki vakayalo)

Aisea 58:3–12; Maciu 6:16–18 (Na Turaga e vakamacalataka na ivalavala dodonu ni lolo, ka okati kina na isolisoli ni lolo)

Mosaia 27:18–24; Alama 6:6 (Na lolo e rawa me vukea nodra vakalougatataki eso tale)

Alama 5:45–46; Ilamani 3:35 (Na lolo e vukea na vaqaqacotaki ni ivakadinadina)

Henry B. Eyring, “‘Sa Sega li ni Vakaoqo na Lolo kau sa Vinakata?’” Ensign se Liaona, Me 2015, 22–25

L. Tom Perry, “Na Cava O Vakasaqara?” Ensign se Liaona, Me 2005, 84--87

Dean M. Davies, “Na Lawa ni Lolo: E Dua na iTavi ni Nodra Qaravi na Dravudravua kei na Vakaloloma,” Ensign se Liaona, Nove. 2014, 53–55

“Lolo kei na iSolisoli ni Lolo,” Tudei Ena Vakabauta (2004), 57–60

Veivakavulici ena ivakarau ni iVakabula

E veivakavulici na iVakabula ena inaki me vukei ira na Nona tisaipeli me ra saumaki mai. A sureti ira me ra cakacaka ga ena vakabauta ka bulataka na dina a vakavulica o Koya. O na sureti ira vakacava na goneyalewa me ra cakacakataka ena vakabauta na dina era vulica me baleta na ivalavala dodonu ni lolo?

Vidio: “We Share”

Sarava eso tale

iVAKAMACALA VUA NA QASENIVULI : Eso na goneyalewa e rawa me tu vei ira na ivakaro vakavuniwai ka tarovi ira mai na lolo. Vakatututaka ni rairai tu eso tale na kena sala me ra ciqoma kina na veivakalougatataki ni lolo (kena ivakaraitaki, e se rawa tiko ga vei ira me ra dau lomasoli ena isolisoli ni lolo).

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Wasea vata kei ira na goneyalewa na italanoa ena vosa nei Elder L. Tom Perry me baleta e dua na marama a lolo “Na Cava O Vakasaqara?”Kerei ira me ra rogoca baleta na veivakalougatataki e lako mai ena lolo. Na veivakalougatataki cava tale era kila me baleta oqori ni lako mai ena lolo?

• Sureti ira na goneyalewa me ra raitayaloyalotaka me dua na itokani ni dua tale na vakabauta e via kila se cava na ibalebale ni lolo kei na vuna era cakava kina. Era na vakamacalataka vakacava na ivakavuvuli ni lolo kivei ira nodra itokani? Veivosakitaka na kedrau duidui na lolo kei na sa via kana sara ga (raica na V&V 59:13–14).

Vulica vata

Raica eso tale na vakasama ni vuli kei na veivakavulici.

Na veitaviqaravi yadua e ra ena vukei ira na goneyalewa me ra kila na cava na ibalebale ni lolo. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

• Sureti ira na goneyalewa me ra wilika se sarava na vosa nei Peresitedi Henry B. Eyring “‘Sa Sega li ni Vakaoqo na Lolo kau sa Vinakata?’” vakailawalawa. Ni ra wilika se sarava, kerei ira me ra vaqara na isau ni taro vakaoqo, “Na cava na kena ibalebale me da lolo?” “Na cava na inaki ni lolo?” kei “Na cava na veivakalougatataki ni lolo?” Sureti ira na goneyalewa me ra wasea na sala sa vakalougatataka kina na nodra bula na lolo, kei na ka era na cakava me vakavinakataka cake na nodra lolo.

• Me vaka e dua na kalasi, cakava e dua na ivola ni bolebole kilai vinaka e rawa ni ra sotava na goneyalewa. Sureti ira na goneyalewa me ra wilika na ivolanikalou e vakamacalataka na veivakalougatataki ni lolo, me vaka eso era sa volai tu ena ituvatuva oqo. Kerei ira me ra vola ena papa ni volavola na veivakalougatataki ni lolo ena kena ivakarau dodonu. E rawa vakacava na veivakalougatataki oqo me vukei ira na goneyalewa ena nodra vorata na veibolebole ni bula? E rawa me vukei ira vakacava ena nodra itavi ni bula e se bera mai, okati kina na marama vakawati kei na tinanigone? Wasea na ivakadinadina ni veivakalougatataki ni lolo.

• Kerei ira na goneyalewa me ra vola e tolu na iyatu ena dua na draunipepa ka vola ena iyatu, “Na Cava e Dodonu Meda Cakava?” “Na Cava me da Levea ni Cakava?” kei “Na Veivakalougatataki Cava e Yalataka na Kalou?” Sureti ira me ra vola na isaunitaro me baleta na lolo era kunea ena Aisea 58:3–12. (Kevaka e ganita, vakamacalataka ni isolisoli ni lolo ena dua na kena sala meda “soli [keda] madrai vua sa viakana,” ka sa ka marautaki vei ira na goneyalewa me ra sauma na isolisoli ni lolo.) Vakauqeti ira me ra wasea nodra isaunitaro kei na veivakalougatataki era sa ciqoma ena nodra lolo ena Nona ivakarau ni lolo na Turaga.

• Sureta e dua na lewe ni matabisopi me vakamacalataka ki na kalasi na kena veivuke na isolisoli ni lolo baleti ira na dravudravua kei ira era gadreva tu na veivuke. Me tiki ni veivosaki oqo, e rawa ni ra railesuva na goneyalewa na veika e vakavuvulitaka o Bisopi Dean M. Davies ena nona vosa me baleta na lawa ni lolo “Na Lawa ni Lolo: e Dua na iTavi ni Tamata Yadua me ra Qaravi na Dravudravua kei na Vakaleqai.” Tarogi ira na goneyalewa se vakacava na nodra nanuma me baleta na madigi ni lolo mai na itukutuku oqo.

Kerei ira na goneyalewa me ra wasea na veika era sa vulica nikua. Era kila deivaki beka na kena ibalebale me ra veivutuni? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ena yaco beka … ena so na gauna o na sega ni kila na isau ni dua na taro. Kevaka e yaco oqo, kaya ga ni o sega ni kila. O na vinakata beka mo kaya ni o na tovolea mo vaqara na kena isau. Se o na vinakata beka mo sureti ira na gonevuli me ra vaqara na kena isau, ena nomu solia vei ira na gauna ena dua tale na lesoni me ra tukuna kina na veika era sa vulica” (Veituberi, Me iLutua ni Noda Bula [1999], 73).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vola e dua na ituvatuva ni kena ivakarau kei na vakasama me caka kina na lolo ena kena ivalavala dodonu ka vakayagataka ena Sigatabu ni lolo ka tarava se ena dua ga na lolo vakaikoya.

• Wasea eso na ka era vulica me baleta na lolo ena lotu vakamatavuvale se kalasi ni semineri.

Wasea vata kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.