Na cava na vuna eda vakaroti kina meda vakatabuya na Siga ni Vakacecegu?

Na Turaga sa solia mai na Siga ni Vakacecegu me yaga vei iko ka sa vakaroti iko mo vakatabuya. Na dikevi ni Siga ni Vakacecegu e vakaraitaka noda yalodina ena rokova ka qarava na Kalou kei na maroroi ni noda veiyalayalati. Ena vakavolekataki keda sara vua na Turaga kei na noda matavuvale. Ena solia vei keda e dua na rai tawamudu kei na veivaqaqacotaki vakayalo. Na Siga ni Vakacecegu e vakatara tale ga vei keda meda vakacegu mai na noda cakacaka vakayago ka qarava na Turaga.

Mo vakarautaki iko vakayalo

Na veivakalougatataki cava o marautaka baleta na nomu taqomaka ka vakatabuya na Siga ni Vakacecegu? O kila vakacava se cava kei na cava e sega ni veiganiti ena Siga ni Vakacecegu? Na cava na vuna e bibi kina mo dau tiko ena veisoqoni ni Sigatabu?

Na cava na vuna e bibi kina vei ira na goneyalewa me ra kila na vuna ni dua tiko na noda Siga ni Vakacecegu? O na vakavotuya vakacava vei ira na gagadre me rokovi na Siga ni Vakacecegu? E rawa vakacava mo vukei ira na goneyalewa ena nodra vakatulewataka se itaviqaravi cava e veiganiti kei na Siga ni Vakacecegu?

Na ivolanikalou kei na ivurevure cava tale eso ena vukei ira na goneyalewa me ra kila kina na bibi ni Siga ni Vakacecegu kei na kena vakatabui?

Na i Vakatekivu 2:2 (iVakatekivu ni Siga ni Vakacecegu)

Na Lako Yani 20:8–11; 31:13 (Vakatabuya na Siga ni Vakacecegu)

Aisea 58:13–14 (Na veivakalougatataki ni kena rokovi na Siga ni Vakacecegu)

Luke 23:55–24:1 (O iratou na yalewa eratou a lumuta na yagoi Jisu ni oti na Nona Lauvako eratou waraka ni oti na Siga ni Vakacecegu me ratou na qai cakava)

V&V 59:9–13 (Na kena rokovi na Siga ni Vakacecegu e vukea noda sega ni tauvi duka ena veika vakavuravura)

Mosaia 13:16–19 (Eda sa vakaroti meda muria na Siga ni Vakacecegu)

Henry B. Eyring, “Vakavinavinaka ena Siga ni Vakacecegu,” Ensign se Liaona, Nove. 2016, 99–102

Russell M. Nelson, “Me Ka e Rekitaki na Siga ni Vakacecegu,” Ensign se Liaona, Me 2015, 129–32

Kevin S. Hamilton, “Tautauri Matua Tikoga,” Ensign se Liaona, Nove. 2013

“Siga ni Vakacecegu,” Tudei Ena Vakabauta (2004), 117–18

“Vakarokorokotaki Ni Siga Tabu,” Me iSakisaki ni iTabagone (2011), 32–33

Vidio: “He Learned Compassion in His Youth” “Upon My Holy Day—Honoring the Sabbath,” “Upon My Holy Day—Rest and Renewal”

Veivakavulici ena ivakarau ni iVakabula

Na i Vakabula a solia na madigi vei ira a vakavulica o Koya me ra taroga nodra taro vakai ira ka wasea na nodra vakasama. Ena nomu vakavakarau mo veitauri ena lesoni oqo, tugana nomu vakauqeti ira vakacava na goneyalewa me ra wasea nodra rai ka taroga na veitaro vakaibalebale vakalevu sara me baleta na Siga ni Vakacecegu.

Vidio: “We Become”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Tarogi ira na goneyalewa na veivakalougatataki era sa ciqoma ena nodra vakatabuya na Siga ni Vakacecegu. Era vakatabuya vakacava na Siga ni Vakacecegu?

Vulica vata

Raica eso tale na veivakasama ni vuli kei na veivakavulici.

Na veitaviqaravi yadudua e ra ena vukei ira na goneyalewa me ra kila na inaki ni Siga ni Vakacecegu. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kalasi:

• Sureti ira na goneyalewa me ra vakadikeva na vosa nei Peresitedi Henry B. Eyring “Vakavinavinaka ena Siga ni Vakacecegu” ka tuva eso na ka e kaya o Peresitedi Eyring e rawa ni da vakavinavinakataka ena Siga ni Vakacecegu. Me ra vakatauvatana na nodra ituvatuva na goneyalewa ka wasea na veika era sa kunea. Wilika vata na veisureti nei Peresitedi Eyring ena mua ni nona vosa, ka bolei ira na leweni kalasi me ra cakacakataka. 

• Vida na vosa “Me Ka e Rekitaki na Siga ni Vakacecegu” ki na tolu se va na iwase lalai. Sureti ira na goneyalewa mera wilika na veiwase oqo, vakailawalawa lalai se vakai ira yadua. Na kila cava soti era kunea ena iwalewale ni kena caka na Siga ni Vakacecegu me ka e rekitaki? Era na vakadeitaka vakacava na goneyalewa ni na muataki ki na reki kei na marau na nodra itovo ena Siga ni Vakacecegu? 

• Veisasataki ira na goneyalewa. Sureta e dua na goneyalewa mai na veiisa yadua me wilika na V&V 59:9–15 ka vola na veika eda kerei meda cakava ena Siga ni Vakacecegu. Kerei ira eso tale na goneyalewa me ra vakasaqara ena tikina e 16–19 baleta na veivakalougatataki yalataki ena noda taqomaka ka vakatabuya na Siga ni Vakacecegu. Kerei ira me ra veiwaseitaka vakai ira na veika era kunea ka veivosakitaka na vuna e sa rui bibi kina na kena rokovi na Siga ni Vakacecegu. Sureta na kalasi me ra veivosakitaka na vuna e solia kina vei keda na Turaga na Siga ni Vakacecegu. Kerei ira vakayadua na goneyalewa me ra vakasamataka eso na ka e rawa ni ra cakava me vakadeitaka na inaki ni Turaga me baleta na Siga ni Vakacecegu ena nona bula vakai koya.

• Tarogi ira na goneyalewa me ra vakadeitaka vakacava kevaka e dua na itaviqaravi e ganita na Siga ni Vakacecegu. Sureti ira me ra raica na V&V 59:9–13 kei na Me iSakisaki ni iTabagone (tabana e 30–31) baleta na ivakavuvuli ka rawa me vukei ira. Sureti ira na goneyalewa me ra vakasamataka na nodra itaviqaravi ni Sigatabu ka vakadeitaka vakaiira kevaka e salavata kei na ivakavuvuli oqo. Vakauqeti ira na goneyalewa me ra cakava na veiveisau cava ga era vakila ni yaga.

• Vakarautaka vei ira na goneyalewa na ilavelave ni Me iSakisaki ni iTabagone, ka kerei ira me ra vakasaqara na iwase ka kena iulutaga na “Vakarokorokotaki Ni Siga Tabu” na vuna kei sala ni nodra vakarokorokotaka na Siga ni Vakacecegu. Kerei ira me ra vakasamataka ka veiwaseitaka na sala ni kedra vakayagataki na veika oqo ena nodra bula. Sureti ira me ra wasea na veika era sotava ena kena vakarokorokotaki na Siga ni Vakacecegu. Vakauqeti ira me ra raitayaloyalotaka ni sureti ira e dua na itokani me ra vakaitavi ena dua na itaviqaravi sega ni veiganiti ena Sigatabu. Era na vukei ira vakacava na nodra itokani me ra kila na ibalebale ni Siga ni Vakacecegu kei na vuna era digia kina me ra vakarokorokotaka?

• Vakaraitaka se wasea na italanoa me baleta na tamai Elder Kevin S. Hamilton ena imatai ni rua na parakaravu ni nona vosa “Tautauri Matua Tikoga.” Na cava era vulica na goneyalewa me baleta na bibi ni rokovi ni Siga ni Vakacecegu mai na italanoa oqo? Solia vei ira na goneyalewa na ilavelave eso ni parakaravu ni vosa nei Elder Hamilton ka tekivu ena malanivosa “E tiko vei keda yadua e vuqa na digidigi meda cakava.” Kerei ira mera wilika na parakaravu ka cakacaka vata vakaveisa ni cakava e dua na lisi ni “vinaka,” “vinaka cake,” ka “vinaka sara” ena itaviqaravi ni Siga ni Vakacecegu. Sureti ira mera wasea ena kalasi na nodra nanuma.

Kerei ira na goneyalewa me ra wasea na veika era sa vulica nikua. Era kila tiko beka na veivakalougatataki ni kena vakarokorokotaki na Siga ni Vakacecegu? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ni o sa veivakavulici tiko mai na ivolanikalou, e dau yaga sara vakalevu vei ira na vuli tiko me ra raica se vakarogoca vakatabakidua e dua na ka” (Veituberi, Me iLutua Ni Noda Bula [1999], 63).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Me ra vola ena nodra ivola ni veisiga e dua na veisau era gadreva me ra cakava me rawa ni vinaka cake kina na kena taqomaki ka vakatabui na Siga ni Vakacecegu.

• Vola na vosa “Na itaviqaravi oqo ena kauti au vakavoleka cake kivei Tamada Vakalomalagi?” ena dua na tiki ni pepa ka biuta ena dua na vanua bibi ena nodra vale me vakananumi lesu kina na itaviqaravi ena Siga ni Vakacecegu.

Wasea vata kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai qo.