Na cava na vuna e bibi kina o Jisu Karisito ena noqu bula?

A digitaki ko Jisu Karisito me Noda iVakabula. Na Nona Veisorovaki sa rawa kina na noda vakaturicaketale ka veivutuni ka vosoti me rawa ni da lesu tale ki na iserau ni Tamada Vakalomalagi. Me ikuri ni nona vakabulai keda mai na noda ivalavala ca, sa solia talega mai vei keda o Jisu Karisito, na noda iVakabula, na vakacegu kei na kaukauwa ena gauna ni veivakatovolei. E tu-va o Koya na taucoko ni ivakaraitaki vei keda, kei na Nona ivakavuvuli era sa yavudei ni marau ena bula oqo kei na bula tawamudu ena vuravura sa bera mai.

Mo vakarautaki iko vakayalo

Raica lesu eso na tiki ni nomu ivolanikalou talei me baleta na iVakabula ka vakasamataka vakatitobu na nomu ivakadinadina baleti Koya. O sa mai kilai Koya vakacava? Na cava o sa sotava oti e vakavuna na nomu vakavinavinakataki Jisu Karisito kina kei na Nona solibula ni veisorovaki?

Ena rawa vakacava ni dua na ivakadinadina kaukauwa cake baleti Jisu Karisito me na vakalougatataki ira na goneyalewa? Na cava e rawa ni ra cakava mera vakararavi taucoko kina ki na ivakavuvuli kei na Veisorovaki ni iVakabula?

Na ivolanikalou kei na ivurevure cava ena vukei ira na goneyalewa mera kilai Jisu Karisito deivaki kina kei na Nona veivakauqeti ena nodra bula ni veisiga?

Joni 14:6 (Sai Jisu Karisito na sala, na vunidina, kei na vunibula)

Joni 15:4–5 (Eda na sega ni rawata e dua na ka ke sega o Jisu Karisito)

Mosaia 3:17; Ilamani 14:15–18; V&V 18:11–12; 76:41–42 (Sa qaqa o Karisito mai na ivalavala ca kei na mate)

Aisea 41:10, 13; Maciu 11:28–30; Joni 14:27; Filipai 4:13; Mosaia 24:14–15; Alama 7:11–12; 36:3, 27; Ica 12:27 (Na Veisorovaki nei Karisito e solia na vakacegu kei na qaqa ena gauna ni veivakatovolei kei na veitemaki)

David A. Bednar, “Kevaka Dou sa Kilai Au,” Ensign se Liaona, Nove. 2016, 102–5

“ Se Bula na Karisito: Nodra iVakadinadina na Kuoramu Le Tinikarua ” Ensign, Epe. 2000, 2–3 (raica talega na Tudei ena Vakabauta, 46–49; Torocake Yadudua, 102)

José A. Teixeira, “Vakasaqara na Turaga,” Ensign se Liaona, Me 2015, 96–98

Dallin H. Oaks, “ iVakavuvuli i Jisu,” Ensign se Liaona, Nove. 2011, 90–93

David A. Bednar, “Colata na Nodra iColacola ena Loloma,” Ensign se Liaona, Me 2014, 87-90

Vidio: “Reclaimed,” “The Only True God and Jesus Christ Whom He Has Sent,” “#Aleluya—E Dua na iTukutuku ni Siganimate me baleti Jisu Karisito”

Veivakavulici ena ivakarau ni iVakabula

A sureti ira na daumuri Koya na iVakabula mera ivakadinadina, a qai tara na yalodra na Yalotabu ena gauna era vakayacora tiko kina. Ni ko sureti ira na goneyalewa mera wasea na nodra ivakadinadina me baleti Karisito kei na Nona itavi ki na nodra bula, na Yalotabu ena rawa ni vakadinadinataka vei ira ni sa dina na veika era kaya. Sa rawa me vaqaqacotaki talega na nodra ivakadinadina na goneyalewa ena nodra vakarogoci ira eso (vakabibi na nodra icaba) mera vakadinadinataka na iVakabula.

Wasea na veika sa sotavi oti

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

Vakaraitaka na iyaloyalo ni iVakabula ni vukei ira tiko na tamata (raica na iVola ni iYaloyalo Vakosipeli,36–60). Solia e vica na miniti vei ira na goneyalewa mera vakasamataka vakatitobu ka wasea na veimataqali sala sa vukei ira kina na iVakabula, nodra matavuvale, kei na so tale era kila. Sureti ira mera wasea na nodra nanuma me baleta na iVakabula.
Kerei ira na goneyalewa mera vakasamataka vakatitobu na bula kei na ivakavuvuli ni iVakabula ni ra lagata tiko se rogoca e dua na sere ni lotu baleti Jisu Karisito (me vakataka “Au sa Kila ni Bula Tu,” Sere ni Lotu, naba 76). Sureti ira yadudua mera vola na nodra nanuma ki na taro “Na cava na vuna e bibi kina o Jisu Karisito ki na noqu bula? ”

Vulica vata

Na itaviqaravi yadua e ra ena vukei ira na goneyalewa mera kila deivaki na vuna e bibi kina o Jisu Karisito ena nodra bula. Muria na veivakauqeti ni Yalotabu, digitaka e dua se sivia ka na ganita na nomu kalasi:

Sureti ira na gone yalewa me ra railesuva na vosa nei Elder José A. Teixeira “Vakasaqara na Turaga” ka vakasaqara na veivakalougatataki e yalataka o Elder Teixeira vei ira era vakasaqarai Jisu Karisito. Sureti ira me ra wasea na veika era kunea ena vosa kei na cava era sa dui cakava tiko me yaco kina me tiki bibi ni nodra bula e veisiga na iVakabula. Me tiki ni veivosaki oqo, e rawa talega mo ni railesuva vata na itovo ni bula rawarawa e vakatura tiko o Elder Teixeira ena nona vosa. Sureti ira na goneyalewa me ra vakotora na takete me ra vakayagataka e dua na vakatutu sa veivosakitaki ena kalasi me ra toro voleka yani kina vua na Karisito.
Vakaraitaka e dua na iyaloyalo ni iVakabula. Vola ena vava ni volavola na taro oqo: “O cei o Jisu Karisito?” “Na cava e sa cakava o Koya vei keda?” “Eda kila vakacava ni bula tiko o Koya nikua?” Sureti ira na goneyalewa mera vakasaqara na “The Living Christ: The Testimony of the Apostles” me ra raica kina na isau ni veitaro oqo. Kerei ira me ra wasea na veika era sa raica. Sureta e vica vei ira me ra vakamacalataka na sala era a rawata kina na nodra ivakadinadina baleti Jisu Karisito. E veirawai vakacava na nodra ivakadinadina ki na nodra bula ena veisiga? Sa rawa ni o vakaraitaka talega na vidio “#Hallelujah—An Easter Message me baleti Jisu Karisito.”
Lesia na goneyalewa yadua me wilika e dua na ivolanikalou sa vakaturi tiko ena ituvatuva oqo se dua na tikina veisemati mai na vosa nei Elder David A. Bednar “Colata na Nodra iColacola ena Loloma.” Kerei koya me vakamacalataka ena nona vosa ga na veivuke cava e dau cakava o Jisu Karisito kivei ira era muri Koya. Sureti ira na goneyalewa mera wasea na ivakaraitaki era sa vakadinadinataka kina na veivakacegui se kaukauwa ni iVakabula ki na nodra bula se ena nodra bula tale eso.
Vakabira e lalaga na nodratou ivakadinadina na Mataveiliutaki Taumada me baleti Jisu Karisito mai na ilavelave ni Ensign se Liaona ni koniferedi sa qai oti ga (na ivakadinadina oqo era dau toqai toka ena icavacava ni vosa). Taroga ira se cava era vakila ni ra rogoca se wilika na nodra ivakadinadina na daunivakadinadina digitaki ni iVakabula. Taroga ira se a rawai vakacava na nodra ivakarau ni veisiga mai na nodra ivakadinadina i Karisito. Solia e dua na gauna vei ira na lewe ni kalasi mera vakaraitaka na nodra loloma kei na ivakadinadina me baleti Jisu Karisito.
Wilika na parakaravu ena ulutaga “Na Veika sa Cakava vei Keda” ena vosa nei Elder Dallin H. Oaks “iVakavuvuli i Jisu.” Na cava era na rawa ni kaya na goneyalewa me isau ni taro nei koya na marama “Na cava beka sa cakava vei au o Koya?” Vola ena papa ni volavola na ciwa na ulutaga e tarava mai na vosa. Sureti ira na goneyalewa mera digitaka e dua se sivia na ulutaga oqo ka vakarautaka e dua se rua na yatuvosa mera na vakayagataka me vakavulici kina na marama oqo me baleta na veika sa cakava vua o Jisu Karisito. Sa rawa mera vakayagataka na vosa nei Elder Oaks, na ivolanikalou e veiganiti (me vakataka na kena era sa vakaturi tiko ena ituvatuva oqo), vakakina na veika era sa sotava oti kei na ivakadinadina. Sureti ira mera wasea na veika era sa vakarautaka.
Vakaraitaka na vidio “Reclaimed.” Na cava era sa vulica na goneyalewa mai na vidio me baleta na veika e rawa ni cakava o Jisu Karisito vei ira? Na sala cava mera na vakayagataka kina na itukutuku ni vidio oqo mera vukea kina na tamata era sotava tiko na dredre mera vosoti ira vakaiira se nanuma ni ra sa yawaka mai na kena yacovi ira yani na veivuke ni iVakabula? Na ivolanikalou cava era na wasea? (raica, me ivakaraitaki, Aisea 1:18; Alama 36:3, 27; Ica 12:27; V&V 58:42–43).

Kerei ira na goneyalewa me ra wasea na veika era sa vulica nikua. Na cava era sa bau vakila se vakanananu kina? Era sa kila deivaki beka na vuna e bibi kina o Jisu Karisito ki na nodra bula? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakacavara na Vakabauta veika e sotavi ena yavunilewa 5 ena Torocake Yadudua
Saga mera bula vakataka saraga na iVakabula ka wasea na veika era sa sotava oti ena kalasi e tarava.
Vakasamataka e dua ka rawa ni na kune ka vinaka mai na nona kila na cava e sa cakava vei keda na iVakabula ka tuvanaka na sala me wasei kina na nodra ivakadinadina ki vua.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.