Meu kilai Koya vakacava na Tamaqu Vakalomalagi?

Eda luvena yalewa na Tamada Vakalomalagi, sa dau lomani keda ka gadreva me da toro voleka yani Vua. Sa solia tu o Koya vei keda na madigi me da masu Vua ka sa yalataka me na rogoca ka sauma mai na noda masu. Eda na rawa ni kilai Koya talega ena noda vulica na ivolanikalou kei na nodra vosa na parofita edaidai ni da sasagataka tiko meda vakataki Koya vakalevu cake ena noda vakamuria na Nona lewa.

Mo vakarautaki iko vakayalo

Vakasamataka na nomu veimaliwai tiko kei Tamamu mai Lomalagi Na gauna cava beka o a vakila ni o sa voleka sara Vua? Na cava o a cakava tiko ka rawa kina mo vakila na nomu voleka Vua?

Na cava era vakila na goneyalewa ena nomu kalasi me baleti ira? E rawa vakacava ni vaqaqacotaka na kedra isema vei Tamada Vakalomalagi na nodra kila na kedra yaga? E rawa vakacava ni o vukei ira na goneyalewa me ra vaqaqacotaka na kedra isema?

Na ivolanikalou kei na ivurevure cava beka tale eso ena vukei ira na goneyalewa me ra kila na Tamada Vakalomalagi?

Joni 17:3 (Na bibi ni noda kilai Tamada Vakalomalagi)

1 Joni 2:3–5; 4:7–8; Inosi 1:1–7; Mosaia 4:9–12; 5:13; V&V 88:63–65; 93:1 (Na sala eda a kila rawa kina na Tamada Vakalomalagi),”

C. Scott Grow, “Ia Sai Koya Oqo na Bula Tawamudu,” Ensign se Liaona, Me 2017, 121–24

D. Todd Christofferson, “Tikoga ena Noqu Loloma,” Ensign se Liaona, Nove. 2016, 48–51

Robert D. Hales, “Vakasaqara mo Kila na Kalou, na Tamada Vakalomalagi, kei na Luvena, ko Jisu Karisito” Ensign se Liaona, Nove. 2009, 29–32

Vidio: “He Knows Me,” “Prayer”

“Sa Bula na Kalou, ” Sere ni Lotu, naba 186; “I Tamaqu, ” Sere ni Lotu, naba 176.

Veivakavulici ena ivakarau ni iVakabula

A vakarautaki koya na iVakabula me veivakavulici ena nona dau tiko duadua voli ena masumasu kei na lolo. A vakasaqara na veituberi ni Tamana Vakalomalagi. Ni o vakavakarau mo vakavulici ira na goneyalewa ena sala me ra kila kina na Tamada Vakalomalagi, muria na nona ivakaraitaki na iVakabula ka dau vakayagataka na nomu gauna ena masumasu kei na lolo, ka vakasaqara na veituberi ni Tamada Vakalomalagi. Ena nomu gauna ni vakavakarau, segata mo toro voleka yani Vua, ka wasea na nomu ivakadinadina ni Tamada Vakalomalagi vei ira na goneyalewa.

Wasea na veika sa sotavi oti

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma ga mo vakamacalataka kina na lesoni ni macawa oqo:

Lagata “Sa Bula na Kalou” (Sere ni Lotu, naba 186) se “I Tamaqu” (Sere ni Lotu, naba 176). Veitalanoataka vata kei ira na goneyalewa na veika e vakavuvulitaka vei keda na sere ni lotu oqo me baleta na Tamada Vakalomalagi kei na sala e rawa ni da qai kilai Koya kina.
Ena veivakadonui nei bisopi, sureta e dua na tama ni dua vei ira na goneyalewa me mai wasea na nona nanuma me baleta na itutu vakatama. Sa rawa vua me tukuna na nona nanuma me baleti luvena yalewa, na veika e nuitaka tiko me na rawata o luvena ena bula oqo, kei na sala e nuitaka me na vukei koya me rawata kina. Kerei ira na goneyalewa me ra veidutaitaka vata na veika e tukuna na tama oqo kei na veika e nanuma o Tamada Vakalomalagi me baleti ira.
Vola na taro eso oqo ena papa ni volavola: Na gauna cava o a vakila kina na nomu volekata sara na Tamada Vakalomalagi? Na cava o a cakava tiko ka rawa kina mo vakila na nomu voleka Vua? Kerei ira na goneyalewa me ra vola na nodra isau ni taro ka wasea kevaka era lomavinaka kina.

Vulica vata

Ena vukei ira na goneyalewa na itaviqaravi yadua e ra mera kila deivaki kina na sala cava e rawa ni ra kila vinaka kina na Tamadra Vakalomalagi. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Sureti ira na goneyalewa me ra vulica na sala eda rawa ni mai kila kina na Tamada Vakalomalagi me vaka e vakavulica o Elder C. Scott Grow “Ia Sai Koya Oqo na Bula Tawamudu.” Na cava era rawa ni wasea na goneyalewa mai na veika era sa sotava, ka qai vukei ira kina e dua vei ira na ivakatutu oqori me ra vakila ni ra voleka tu vei Tamada Vakalomalagi? Na cava e bibi kina me da kila vakavinaka cake na Tamada Vakalomalagi?
Sureti ira na goneyalewa me ra raitayaloyalotaka ni tukuna vei ira e dua nodra itokani, “E sega ni vakabuina na nona lomani keda na Kalou, e sega ni dua na ka na ka eda cakava—eda na vakabulai.” Era na tukuna vakacava ki na nodra itokani? Sureti ira na goneyalewa me ra railesuva na iwasewase eso ni vosa nei Elder D. Todd Christofferson “Tikoga ena Noqu Loloma,” ka vaqara na ivakasala e rawa ni ra vakayagataka me vukea na nodra itokani me ra kila na loloma ni Kalou.
Vakaraitaka eso na ka me matataka na masu, na Yalo Tabu, kei na nodra vosa na parofita (me vaka e dua na talevoni, dua na cinalivaliva, kei na dua na mape). Tukuna vei ira na gone yalewa ni iyaya yadua oqori e matataka e dua na ka sa solia mai vei keda o Tamada Vakalomalagi me vukea na noda kilai Koya vakavinaka cake. Sureti ira me ra vakatura se cava na veika e matataki ena veiyaya oqori. Ni wilika vakalasi, na vosa nei Elder Robert D. Hales “Vakasaqara mo Kila na Kalou na Tamada Vakalomalagi, kei na Luvena, ko Jisu Karisito.” (Vakasamataka mo sureti ira na goneyalewa me ra wilika na vosa oqo ni bera na kalasi.) Sureti ira na goneyalewa me ra vakasaqara na veiyatuvosa e vakavulici ira ena masu, na Yalo Tabu, kei na nodra vosa na parofita e rawa ni vukei ira me ra kila na Tamada Vakalomalagi. Na cava tale beka era kunea ena vosa oqo ka na vakauqeti ira me ra vinakata me ra kila vakavinaka cake na Tamada Vakalomalagi? Sureti ira me ra wasea na veika era vakila me baleta na Tamada Vakalomalagi.
Mo lesia vei ira yadua na goneyalewa e dua na ivolanikalou oqo: 1 Joni 2:3–5; 4:7–8; Inosi 1:1–7; Mosaia 4:9–12; 5:13; V&V 88:63–65; 93:1. Kerei ira na goneyalewa me ra vulica na nodra veimalanivosa ni ivolanikalou ka vakasaqara na sala eso e rawa ni ra kila kina na Tamada Vakalomalagi. Sureti ira me ra wasea na veika era sa vulica kei na veika era sa sotava oti mai ena nodra qai mai kilai Tamadra Vakalomalagi ena veisala eso oqo.
Sureti ira na goneyalewa me ra wilika na Joni 17:3, ka kerei ira me ra vakamacalataka na kedrau duidui na noda kila na veika me baleta e dua kei na noda kila e dua. Sureti ira me ra vakasamataka e dua era kila vakavinaka. Na cava beka era sa cakava mera kilai koya kina na tamata oya? Vola ena papa ni volavola na veika era tukuna mai. E rawa vakacava ni da vakayagataka na veiwalewale eso vaka oqori me da kila kina na Tamada Vakalomalagi? Sureta na kalasi me ra wilika na Inosi 1:1–7ka vakasaqara na sala eso e rawa ni ra vakavinakataka kina na nodra veitaratara kei Tamada Vakalomalagi. Ni ra sa veivosakitaka oti na veika era sa raica rawa, sureti ira me ra vakananuma mada na kedra isema vei Tamada Vakalomalagi me vica na miniti ka vakasamataka na cava e rawa ni ra cakava me ra vakavinakataka kina.
Vola ena papa ni volavola: “E lomani keda na Tamada Vakalomalagi ka gadreva me da toro voleka yani Vua. Sa solia vei keda na madigi me da masuti Koya.” Kerea e dua na goneyalewa me wilika i cake na iyatuvosa oqo, ka sureti ira ena kalasi me ra wasea na veika era sotava me baleta na masu. Vakaraitaka na vidio “Prayer.” Na cava e vakauqeti ira na goneyalewa me baleta na ivakadinadina nei Peresitedi Monson? Na cava era raica rawa na goneyalewa me baleta na isema i Sisita Ogando vei Tamada Vakalomalagi? Na cava na itavi ni masu ena isema ni veiwekani oqori? Solia e vica na miniti vei ira na goneyalewa me ra vakananuma kina na kedra isema vua na Tamada Vakalomalagi kei na sala e rawa ni ra vakavinakataka kina na isema oqori.

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila deivaki beka na sala cava e rawa ni ra qai mai kila vinaka kina na Tamadra Vakalomalagi? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vola ena nodra ivolaniveisiga e dua na ka era sa tuva me ra cakava me vakavinakataki kina na kedra isema kei Tamada Vakalomalagi ka vakavotukanataka sara na nodra inakinaki.
Vakacavara na Yavunilewa ni Keda Yaga Yadua 1 mai na Torocake Yadudua.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.