Na cava so eda kila baleta na ituvaki ni Lewetolu Vakalou?

Na Lewetolu Vakalou sa ikoya na Kalou na Tamada Tawamudu, na iVakabula o Jisu Karisito, kei na Yalo Tabu. E dina ga ni ratou duidui tamata na Lewetolu Vakalou vata na nodratou dui itavi, e sa duabau ga na Nodratou inaki. Sa taucoko sara na nodratou duabau ena kena vakayacori na yavu ni veivakabulai ni Tamada Vakalomalagi.

Mo vakarautaki iko vakayalo

Na nomu kila deivaki na Lewe Tolu Vakalou ena vukei iko vakacava mo kila o cei o iko? E duidui vakacava na noda kila na Lewe Tolu Vakalou mai na nodra vakabauta na veimata lotu tale eso?

Era sa kila deivaki tiko beka na goneyalewa na sala e ratou cakacaka vata tiko kina na Lewe Tolu Vakalou? Ena veivuke vakacava vei ira na goneyalewa na kena kilai deivaki na ituvaki ni Lewe Tolu Vakalou?

Na ivolanikalou kei na vosa cava ena vukei ira na goneyalewa mera kila deivaki na kedratou ituvaki na Lewe Tolu Vakalou kei na Nodratou ilesilesi ki na nodra bula?

Nai Vakatekivu 1:27 (E buli na tamata me ucuya na Kalou)

Maciu 3:16–17; Joni 14:16; Cakacaka 7:55–56; 3 Nifai 11:4–11; Josefa Simici—Ai Tukutuku 1:17; Yavu ni Vakabauta 1:1( E ratou lewe tolu na Lewe Tolu Vakalou)

Luke 24:39; Joni 1:14; V&V 130:22 (E rua na lewe ni Lewe Tolu Vakalou e rau vakayago)

Joni 17:21; 1 Joni 5:7; Alama 11:44; V&V 20:28 (E ratou sa duabau ga na Lewe Tolu Vakalou)

“ Lewe Tolu Vakalou, ” Tudei ena Vakabauta (2004), 56–57

Dallin H. Oaks, “Na Lewe Tolu Vakalou kei na iTuvatuva ni Veivakabulai,” Ensign se Liaona, Me 2017, 100–103

Boyd K. Packer, “Na iVakadinadina,” Ensign se Liaona, Me 2014, 94-97.

Robert D. Hales, “Na Bula Tawamudu-Meda Kila na Kalou, na Tamada Vakalomalagi, kei na Luvena, ko Jisu Karisito” Ensign se Liaona, Nove. 2014, 80-82

Vidio: “The Restoration”

19:13

Wasea na veikasa sotavi oti

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma ga mo vakamacalataka kina na lesoni ni macawa oqo:

Vola ena papa ni volavola, “Na cava eda kila me baleta na ituvaki ni Lewetolu Vakalou? Sureti ira na goneyalewa mera wilika na Yavu ni Vakabauta 1:1 se Vunau kei na Veiyalayalati 130:22 mera raica kina na isau ni taro oqo.
Vola ena papa ni volavola na vosa mai na Vunau kei na Veiyalayalati 130:22 ka vakalala toka na veitikina ni vica na vosa bibi. Sureti ira na goneyalewa mera vakasamataka na vosa bibi era sa lala toka, ka mera qai vakalewena vakalasi.
Sureti ira na goneyalewa mera dramataka na nodra rawa ni vakavulica e dua e sega ni vakabauta vata kei keda me baleti iratou yadua na Lewetolu Vakalou. Na ivolanikalou cava beka era na vakayagataka? Na cava era nanuma kina ni sa rui ka bibi na kila-ka oqo?

Vulica vata

Na itaviqaravi yadua e ra ena vukei ira na goneyalewa mera kila deivaki na ituvaki ni Lewe Tolu Vakalou. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa me ra vakasamataka e dua na ibolebole era sotava na goneyalewa edaidai. Na cava era rawa ni kunea na goneyalewa ena wase IV ni nona vosa o Elder Dallin H. Oak’s “Na Lewe Tolu Vakalou kei na iTuvatuva ni Veivakabulai” ena rawa ni vukei ira ena veibolebole oqo? Me vukei ira me ra vulica vakalevu cake na veika me baleta na leweni Le Tolu Vakalou, wasei ira ena tolu na ilawalawa, ka qai solia vei ira na ilawalawa yadua e dua na pepa, ka me iulutaga ena pepa yadua e dua vei ira oqo: “Kalou na Tamada,” “Na Luvena,” kei “Na Yalo Tabu.” Sureti ira na ilawalawa yadua me ra vakasaqara na itoma ni wase ni vosa nei Elder Oaks ka vakaraica na ivolanikalou e wasea o koya. Kerei ira na goneyalewa me ra vola na veika era sa vulica ena nodra pepa ka qai wasea na nodra vakasama kina kalasi. Ena rawa beka ni vukei keda vakacava na veika dina eda vulica me baleta na Lewe Tolu Vakalou ena veibolebole eda sa dusia?
Vola ena papa ni volavola na “Kalou na Tamada,” “Jisu Karisito,” kei “Na Yalo Tabu.” Digitaka na tiki eso ni vosa nei Peresitedi Boyd K. Packer “ Na iVakadinadina” ena vukea mera kila deivaki kina na goneyalewa na Lewe Tolu Vakalou. Solia e dua na iwase kivei ira yadua na goneyalewa mera wilika lo toka ka wasea vakatikina ena nona vosa ga ki na vo ni kalasi. Ni sa vakamacala tiko, me na vola sara ena papa ni volavola na ulutaga a vulica mai kina na veika e baleta e dua vei iratou na Lewe Tolu Vakalou. Na cava era vakila kina na goneyalewa ni sa rui bibi na kena kilai deivaki na dina oqo baleta na Lewe Tolu Vakalou? Era na vakamacalataka vakacava na nodra vakabauta kivei ira e duidui na nodra nanuma me baleta na Lewe Tolu Vakalou?
Sureti ira yadua na goneyalewa mera wilika na ”Lewe Tolu Vakalou“ enaTudei ena Vakabauta. Kerea e dua na goneyalewa me wasea na ka sa vulica mai na veika sa wilika. Mo qai kerea e dua tale na goneyalewa me tukuna tale na veika sa tukuna oti na imatai ni goneyalewa ka wasea na veika e vulica mai kina o koya. Tomana tiko me yacova ni ra sa vakaitavi yadua na goneyalewa ena veiwasei oqo. Kerei ira na goneyalewa mera vakamacalataka se duidui vakacava na noda nanuma me baleta na Lewe Tolu Vakalou mai na nodra nanuma na matalotu tale eso. Ena rawa vakacava ni na vakalougatataki ira na goneyalewa na kena mai rawati e dua na rai makare me baleta na Lewe Tolu Vakalou?
Vola e tolu na ulutaga ena vava ni volavola: “E ratou lewetolu na Lewe Tolu Vakalou,” “E ratou sa duabau ga na Lewe Tolu Vakalou,” kei na “E rau vakayago na Tamada Vakalomalagi kei Jisu Karisito.” Vola ena kadi lalai na veitiki ni ivolanikalou me baleta na Lewe Tolu Vakalou (me vakataka era sa volai tiko ena ituvatuva oqo). Sureti ira na goneyalewa mera mai taura e dua na kadi, ka wilika e cake na tiki ni ivolanikalou, ka vola na veitikina ena ruku ni ulutaga donu sa toka ena vava ni volavola (eso na ivolanikalou ena rawa me volai ena vica na ulutaga). Ena rawa vakacava ni vakalougatataki ira na goneyalewa na kilai ni dina oqo me baleta na Lewe Tolu Vakalou? Vakayaloqaqataki ira na goneyalewa mera maroroya e dua na lisi ni veitikina oqo ena nodra ivolanikalou me rawa ni ra vakayagataka ena nodra vakavulica eso me baleta na Lewe Tolu Vakalou.
Solia vei ira na goneyalewa e dua na pepa e tiko kina na taro oqo: O na vakamacalataka vakacava na nodrau veimaliwai na iVakabula kei Tamana? Ena ituvaki cava e rau sa duabau kina na Tamana kei na Luvena? Na cava-so na itavi ni Yalo Tabu? Sureti ira mera vakasamataka vakatitobu na taro oqo ni ra sarava, rogoca, se wilika na vosa nei Elder Robert D. Hales “Na Bula Tawamudu—Meda Kila na Kalou, na Tamada Vakalomalagi, kei na Luvena, ko Jisu Karisito.” Solia vei ira na gauna mera vola na nodra isau ni taro, ka sureti ira mera wasea na veika era sa vola.

Kerei ira na goneyalewa me ra wasea na veika era sa vulica nikua. Era sa kila deivaki tiko beka na ituvaki ni Lewe Tolu Vakalou? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

Sa rawa mo vakayagataka na itaviqaravi ni veivakavulici ena iwase oqo me raici kina na cava era sa kila tu na goneyalewa me baleta na ivunau kei na veika e se dodonu mera na vulica. Mo tu vakarau mo moica na ituvatuva ni nomu lesoni me ganita na nodra gagadre ke vinakati vakakina.

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Cavuqaqataka ka vakasamataka vakatitobu na imatai ni yavu ni vakabauta ka wasea vua e dua tale.
Vakacavara na Veika e Sotavi ena Yavunilewa ni Bula Vakalou 2 ena Torocake Yadudua.
Vakavulica ena lotu vakamatavuvale na lesoni me baleta na Lewetolu Vakalou, ena nodra vakayagataka na ivolanikalou era a vulica ena gauna ni lesoni.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.