Na cava na ilesilesi ni Yalo Tabu?

Na Yalo Tabu, e dua na Lewetolu Vakalou, e vakadinadinataka na Tamada Vakalomalagi kei Jisu Karisito. Sa ikoya na ivurevure ni ivakadinadina kei na ivakatakila ki na tamata yadua. Ena rawa me dusimaki keda ena noda vakatulewa ka na taqomaki keda mai na veika rerevaki vakayago ka vakayalo. E kilai talega o koya me Dauniveivakacegui, ka na rawa me kauta laivi na noda rere ka vakasinaiti keda ena inuinui. Mai na nona kaukauwa, eda sa vakasavasavataki ni da veivutuni, ciqoma na cakacakatabu vakalotu ni veivakabulai, ka maroroya na noda veiyalayalati. Mai na veivakauqeti ni Yalo Tabu eda sa kila kina na Tamada Vakalomalagi kei Jisu Karisito ka vakila na Nodrau kaukauwa, vinaka, kei na loloma.

Mo vakarautaki iko vakayalo

Na cava o sa sotava oti e vakavulici iko me baleta na itavi ni Yalo Tabu?

Ena sala cava mena veivuke kina na Yalo Tabu ki na nodra bula raraba na goneyalewa? Mo na vukei ira vakacava mera kila na Nona veivakauqeti?

Na ivolanikalou kei na ivurevure cava ena vukei ira na goneyalewa mera kila vakavinaka na nona itavi na Yalo Tabu?

1 Tui 19:11–12; Ilamani 5:30; V&V 85:6 (Na Yalo Tabu e dau vosa ena domo rogo lailai, ka malumu)

Joni 14:26 (Na Dauniveivakacegui sa rawa me vakavulici keda ka tukuna vei keda na veika sa tukuni oti)

Roma 8:16 (E vakadinadinataka na Yalotabu ni da sa luve ni Kalou)

Kalatia 5:22–23 (E vakamacalataka o Paula na vua ni Yalotabu)

2 Nifai 32:5 (Ena vakatakila vei keda na Yalo Tabu na veika meda na cakava)

3 Nifai 27:20 (Eda na vakasavasavataki ni da ciqoma na Yalo Tabu)

Moronai 8:26 (Na Yalo Tabu ena vakasinaiti keda ena inuinui kei na loloma)

Moronai 10:5 (Na Yalo Tabu ena vakavulica na ka dina)

V&V 42:17; Mosese 1:24 (Na Yalo Tabu sa tukuna na Tamana kei na Luvena)

Gary E. Stevenson, “E rawa Vakacava Mena vukei Iko na Yalo Tabu?” Ensign se Liaona, Me 2017, 117–20

Henry B. Eyring, “Au sa Laiva Vei Kemudou na Noqu Vakacegu,” Ensign se Liaona, Me 2017, 15–18

Juan A. Uceda, “Na Turaga o Jisu Karisito sa Vakavulica vei Keda Meda Masu,” Ensign se Liaona Nove. 2016, 30–32

Robert D. Hales, “Na Yalo Tabu,” Ensign se Liaona, Me 2016, 105–7

iTavi ni Yalo Tabu,” Tudei ena Vakabauta (2004), 202-203

Vidio: “Voice of the Spirit”

3:55

Veivakavulici ena ivakarau ni Turaga

E dau lomani ira e vakavulica na iVakabula. E dau masulaki ira ka dau qaravi ira vakawasoma. O na vakalevutaka cake vakacava na nomu lomani ira na goneyalewa o vakavulica?

Wasea na veika sa sotavi oti

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso, era sa sotava oti mai ena nodra bulataka, na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

Sureti ira na goneyalewa mera vola na gauna era a vakila kina na veivakauqeti ni Yalo Tabu ena nodra bula. Na cava beka era a cakava mera ciqoma kina na Nona veivakayarayarataki? Na veisau cava a yaco mai na Nona veivakayarayarataki? Ke veiganiti kaya, mera wasea eso na ka era sa sotava oti.
Sureti ira na goneyalewa mera lagata na “Yalo Tabu Liutaka” ( Sere ni Lotu naba 81) ka wasea na veika e vakavulica vei ira na qaqana me baleta na itavi ni Yalo Tabu.

Vulica vata

Na itaviqaravi yadua e ra ena vukei ira na goneyalewa mera kila deivaki na ilesilesi ni Yalo Tabu. Mai na veivakauqeti ni Yalotabu, digitaka e dua se sivia ka na ganita na nomu kalasi:

Vola eso na taro oqo ena papa: Na cava eda gadreva kina na Yalo Tabu? E rawa vakacava mena vukei keda na Yalo Tabu? Sureti ira na goneyalewa me ra vakasaqara na vosa nei Elder Gary E. Stevenson “E Vukei Iko Vakacava na Yalo Tabu?” se sarava na yaloyalo na “Voice of the Spirit,” ni vakasaqarai tiko na isau ni taro ena papa. Wasea na veika rakorako o sa sotava oti ni ko a vakarorogo ki na Yalo Tabu, ka sureti ira na goneyalewa me ra wasea eso na veika sa yaco vakakina vei ira. Era na wasea na veika era na cakava me rawa ni ra na vakarorogo vakavinaka cake ka vakamuria na veidusimaki ni Yalo Tabu.

3:55
Wasei ira vakailawalawa na goneyalewa, ka sureta na ilawalawa yadua me vulica e dua na iwase ni vosa nei Peresitedi Henry B. Eyring “Na Yalo Tabu me Nomu iTokani ” se na vosa nei Elder Robert D. Hales “Na Yalo Tabu.” Sureta na ilawalawa yadua me wasea vei ira na kalasi na ka era sa vulica me baleta na Yalo Tabu. Sureti ira na goneyalewa me ra wasea na veika era sa sotava ena kena vukei ira na Yalo Tabu se na gauna era a vakavinavinakataka kina na Nona veitokani.
Sureti ira na goneyalewa mera raica na ivolanisere ena “Ulutaga” ena ituvatuva vakaivola ena “Yalo Tabu” me baleta e dua na sere ka vakavulica se na rawa vakacava ni vukei keda na Yalo Tabu. Kerei ira mera wasea na qaqa ni serenilotu era sa digitaka. Raica me lagati vakalasi e dua vei ira na sere oqo.
Wasei ira na goneyalewa vaka-ilawalawa lalai. Kerea na ilawalawa yadua mera wilika e vica na ivolanikalou me baleta na Yalo Tabu (me vakataka na kena sa vakaturi ena ituvatuva oqo). Sureta e dua na goneyalewa mai na ilawalawa yadua me wasea ki na vo ni kalasi na ka e tukuna tiko na nodratou ivolanikalou me baleta na ilesilesi ni Yalo Tabu. Sureti ira na goneyalewa mera wasea na veika era sotava ena gauna a vukei ira kina na Yalo Tabu ena veigauna eso vakaoqo.
Sureti ira na goneyalewa mera wilika na “iTavi ni Yalo Tabu” ena Tudei ena Vakabauta (tabana e 202). Kerei ira yadua na goneyalewa mera digitaka e dua na itavi ni Yalo Tabu ka raica na ivolanikalou se italanoa vakaivolanikalou e vakavulica na itavi oya. Sureti ira na goneyalewa mera wasea vakai ira na veika era sa kunea. Vakayaloqaqataki ira mera wasea na veika era sa sotava oti ena gauna a vukei ira kina na Yalo Tabu ena sala oqo. Na cava eso na ituvaki ni veisiga ni mataka era na gadreva kina na veivuke ni Yalo Tabu?
Vakaraica eso na italanoa mai na vosa eso ni koniferedi raraba se qai oti ka vakaraitaka na itavi eso ni Yalo Tabu. Navuca mo okata talega kina na veika e a sotava o Peresitedi Henry B. Eyring kei luvena tagane se o ira na Yalododonu mai Austria “Na Noqu Vakacegu Me Tikoga Kei Iko” se na veika e sotava ni a daukalotu voli mai Peru, ena nona vosa o Elder Juan A. Uceda nE Vakavulici Keda Meda Masu Na Gone Turaga o Jisu Karisito.” Sureti ira yadua na goneyalewa me ra wilika e dua vei ira na italanoa oqo, ka me qai talanoataka tale vei ira na kalasi ena nona vosa ga, ka vakatakila na itavi cava e vakayacora na Yalo Tabu ena italanoa oya. Vakayaloqaqataki ira na goneyalewa me ra wasea na veika era sa sotava oti ena gauna a vukei ira kina na Yalo Tabu ena dua vei ira na sala oqo.

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila deivaki beka na itavi ni Yalo Tabu? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Saga e dua na sala mera vakarautaki ira vakavinaka kina mera rogoca na domo rogo lailai ka malumu ni Yalo Tabu.
Vola ka cakava na veivakauqeti era ciqoma mai vua na Yalo Tabu ena loma ni macawa.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.