Na sala cava e rawa niu vakavakarau kina ena gauna oqo meu dua na yalewa vakawati ka tina bula dodonu?

Me ra vakavakarau me dua na yalewa vakawati ka tina bula dodonu, sa dodonu vei ira na goneyalewa me ra vakanamata ga vua na iVakabula ka tara cake na itovo ni bula Vakarisito. E tukuni ena ivakaro ni matavuvale ni “yavu ni veilomani vakavuvale, ka ivakadei ni duavata vakaveiwatini, na nodra tuberi ena vakabauta, masumasu, veivutuni, veivosovosoti, veidokai, veilomani, yalololoma, gugumatua, kei na nodra dau goleva na ivakalasa vinaka eso, me ra vakamarautaki vata kina. … Ni sa nodra itavi taumada na tina, me ra veikaroni vei ira na luvedra” (“Na Matavuvale: Ai Vakaro ki Vuravura Raraba, ” Ensign se Liaona, Nove. 2010, 129).

Vakarautaki iko vakayalo

Na cava o sa cakava, kei na cava o sa cakava tiko, mo vakarau kina mo yalewa vakawati ka tina? Sa vakalougatataki vakacava na nomu bula ena nomu vakavakarau?

Na cava era sa cakava tiko na goneyalewa ena nomu kalasi (se cava beka e rawa ni ra sa cakava tiko) me ra vakavakarau kina ki na vakawati kei na bula vakatina? Na taro cava beka e rawa ni tu vei ira me baleta na vakavakarau ki na vakawati kei na bula vakatina?

Wilika ena masumasu na ivolanikalou kei na ivurevure oqo. Na cava o nanuma ni na vukei ira na goneyalewa ena nodra vakavakarau me ra yalewa vakawati ka tina?

Na Vosa Vakaibalebale 31:10–31; Alama 56:47–48; Moronai 7:45–46; V&V 88:123–25 (iTovo ni bula ni marama bula dodonu)

V&V 88:78–80, 118; 90:15 (Segata na vuli)

Joy D. Jones, “Ai Tabatamata Dau Vorata na iValavala Ca,” Ensign se Liaona, Me 2017, 87–90

K. Brett Nattress, “Sega na Reki Levu Cake Ena Kena Kilai ni Ra sa Kila,” Ensign se Liaona, Nove. 2016, 119–21

Jeffrey R. Holland, “Raica na Tinamu,” Ensign se Liaona, Nove. 2015, 47–50

M. Russell Ballard, “Tina kei na Luvedra Yalewa,” Ensign se Liaona, Me 2010, 18–21

“Vuli,” Me iSakisaki ni iTabagone (2011), 9–10

Vidio: “Bula vakatina: E Dua na Veitokani Tawamudu kei na Kalou”; “Lomani Ira na Luve ni Kalou”; “Nona iNuinui e Dua na Tina”; “Marama Tina e Isireli”

3:47

1:35

3:5

2:49

Veivakavulici ena ivakarau ni iVakabula

Ni oti e dua na siga ni veivakavulici, a sureti ira era dau muri Koya na iVakabula me ra lako ki vale ka vakarautaki ira me ra lesu tale mai ka vulica eso tale na ka. Na cava o rawa ni cakava mo vakayaloqaqataki ira kina na goneyalewa me ra lako mai ki na kalasi ka vakarau tu me ra mai vuli vata?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga, ka vukei ira mera vakavakarau ni vulica tale eso.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Vakaraitaka e dua na vidio e vakaturi tiko ena ituvatuva oqo. Taroga vei ira na goneyalewa, “Na cava o sa cakava tiko mo vakavakarau kina mo yaco mo dua na yalewa vakawati bula dodonu ka tina?”
Ni cavuta vata na ibole ni Goneyalewa. Vakauqeti ira e lewe vica na goneyalewa me ra wasea na ibalebale ni malanivosa “vaqaqacotaka na itikotiko kei na matavuvale.”

Vulica vata

Na veiitaviqaravi yadua e ra e rawa ni vukei ira na goneyalewa ena nodra vakavakarau me ra marama vakawati ka tina bula dodonu. Ni muri na veituberi ni Yalo Tabu, digitaka e dua se sivia ka na ganita na nomu kalasi:

Ena rawa beka mo vakasamataka e dua na lesoni vakatakarakara ena vukei ira na goneyalewa me ra kila vinaka na ibalebale ni vorata na ivalavala ca? Me ivakaraitaki, mo kauta mai e dua na iviu kei na dua na sipaji ki na kalasi ka vakaraitaka ni dua e tarova na wai kei na kena ikarua e domica na wai. E vakaibalebale vakacava na veivakatauvatani oqo ki na kena vorati na ivalavala ca? Sureti ira na goneyalewa me ra vakasaqara na vosa nei Sister Joy D. Jones “Ai Tabatamata Dau Vorata na iValavala Ca” ka me ra vola na veika me ra na cakava ni ra sa marama tina kina me ra susuga kina na luvedra me ra na vorata na ivalavala ca. Ena rawa vakacava ki na veika era sa vola oqo me vakarautaki ira me ra yalewa vakawati ka tina ivalavala dodonu?
Sureti ira na goneyalewa me ra wilika baleta na tinai Elder K. Brett Nattress ena nona vosa “Sega na Reki Levu Cake Ena Kena Kilai ni Ra sa Kila.” Na ivakaraitaki cava e tiko vei Sisita Nattress ka ra na via vakamuria ena nodra vakavakarau ki na itavi vakatina? Na cava a cakava o koya me susuga cake e dua na matavuvale yalododonu? E rawa ni ra sarava e dua se sivia na vidio ka vakaturi tiko ena ituvatuva oqo ka veitalanoataka eso na taro. Na ivakaraitaki cava ni tubutubu yalododonu oqo era sa raica rawa na goneyalewa? Na cava era vakila na goneyalewa ni rawa ni ra cakava me ra vakamuria na ivakaraitaki oqo ena gauna oqo?
Lesia vei ira na goneyalewa yadua e vica na tikina me ra wilika mai na ivolanikalou eso ka vakaturi tu ena ituvatuva oqo. Sureti ira na goneyalewa yadua me droinitaka e dua na iyaloyalo se ivakatakarakara se vola e dua na iyatuvosa lekaleka me tukuni kina na itovo ni bula ni dua na yalewa vakawati ka tina bula dodonu e kunea ena tikina e lesi vua. Wasea na iyaloyalo se na iyatuvosa kei ira na kalasi, ka veivosakitaka na sala me rawata kina e dua na goneyalewa na itovo ni bula vaqori. Kerei ira na goneyalewa me ra wasea na ivakaraitaki ni tina era vakamacalataki e Na Vosa Vakaibalebale. E vakalougatataki beka vakacava na nodra matavuvale na tina oqo? Na cava na vuna sa rui yaga vakalevu kina vua na Turaga e dua na “marama ivalavala dodonu” (raica Na Vosa Vakaibalebale 31:10)?
Kerei ira na goneyalewa me ra vola ena vava e dua na lisi me baleti ira na marama bula dodonu mai na ivolanikalou (me vakaoqo, Ruci, Esiteri, Ivi, Ana, Ema Simici, kei na so tale). Sureti ira me ra digia e dua na marama mai na lisi ka wilika na veika e baleti koya ena ivolanikalou (me vakayagataka na Topical Guide se Bible Dictionary). Vakauqeti ira na goneyalewa me ra wasea na ivakaraitaki cava soti ni ivalavala dodonu era raica rawa ka qoroya vei ira na marama oqo, kei na sala cava e rawa ni vukei ira kina na ivakaraitaki eso oqori, ena nodra vakavakarau me ra yalewa vakawati ka tina bula dodonu.
Ni raica vata na italanoa baleta na nodra ivakaraitaki na tina ena vosa nei Elder Jeffrey R. Holland “Raica na Tinamu.” Kerei ira na goneyalewa me ra vola na nodra vakasama me baleta na veika era dau qoroya vei tinadra se na veika vinaka e tu vei tinadra era na vinakata me ra vakatotomuria ena nodra vakavakarau me ra tina. Sureta e vica vei ira me ra wasea na veika era vola. Kevaka e rawa, sureti ira na tinadra na goneyalewa me ra mai vakaitavi ena veivosaki oqo.

Kerei ira na goneyalewa me ra wasea na veika era sa vulica nikua. Era sa kila vakamatata beka na sala me ra vakavakarau kina me baleta na nodra itavi mai muri vakayalewa vakawati ka tina? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Vakacavara e dua vei ira oqo mai na Torocake Yadudua:Bula Vakalou cakacaka ni yavunilewa, Kequ Yaga veika sotavi ena yavunilewa 4, Digidigi kei na Vakatulewa Vakataki Au veika sotavi ena yavunilewa 7, Caka Vinaka veika sotavi ena yavunilewa 2.
Vakataroga e dua na marama me baleta na itavi, na bolebole, kei na veivakalougatataki ni yalewa vakawati se na tina. Taroga na maqosa kei na ivakarau ni bula cava beka e raica ni yaga vakalevu. Vola na vakasama se vakanananu cava ga ena dua na ivolaniveisiga.

O na gadreva beka mo na tuvalaka vata kei ira na goneyalewa e dua na itaviqaravi ni Muavata ka na vakadeitaka na veika era sa vulica ena kalasi. Me vakaoqo, e rawa ni ra vulica ka vakatovotovotaka na maqosa ni qaravi vuvale.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.