Na cava e bibi kina me muri na ivakatagedegede ni Lotu me baleta na veigadivi?

Era sa solia vei keda na parofita ni gauna oqo na yavu tudei me baleta na vakaitau me taqomaki keda mai na veika rerevaki vakayalo ka vukei keda ni vakavakarau ni kunea ena dua na siga e dua na itokani bula kilikili tawamudu. E okati ena yavu tudei oqo na kena sega ni vakatarai na vakaitau ni se bera na yabaki 16, na tarovi ni veigadivi wasoma kei na dua tikoga na tamata, kei na nodra vakaitau ga o ira ka taukena na ivakarau ni yavu tudei cecere.

Mo vakarautaki iko vakayalo

Vulica ena masumasu na ivolanikalou kei na ivurevure oqo. Na cava o nanuma ni na yaga vakavinaka vei ira na goneyalewa ni sa tekivu me ra veimaliwai kei ira na cauravou?

Na iVakarua 7:3–4 (Kakua ni vakamau ena taudaku ni veiyalayalati)

Vunau kei na Veiyalayalati 46:33 (Dau bula ena ivalavala dodonu ka savasava ena mata ni Turaga)

Yavu ni Vakabauta 1:13 (Na veika e dodonu me da tara cake vei keda ni da vaqara e dua na itokani tawamudu)

Thomas S. Monson, “Na Vakavakarau ena Kauta Mai na Veivakalougatataki,” Ensign se Liaona, Me 2010, 64–67

Elaine S. Dalton, “iVakatawa ni iValavala Dodonu,” Ensign se Liaona, Me 2011, 121–24

“Veigadivi,” Me iSakisaki ni iTabagone (2011), 4–5

Vidio: “Brand New Year 2010: Dating”

12:39

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se vakasamataka ga eso na nomu mo vakamacalataka kina na lesoni ni macawa oqo:

Tarogi ira na goneyalewa ke dua na nodra taro me baleta na vakaitau ka vola ena vava ni volavola. Sureti ira me ra vakasaqara na isau ni nodra taro ena gauna taucoko ni lesoni.
Kerei ira na goneyalewa me ra tuva ena vava ni volavola na veika era kila me baleta na ivakatagedegede vaka-Lotu ni vakaitau. Vakuria na ituvatuva ni ra vulica eso tale na ka me baleta na ivakategedegede ena gauna taucoko ni lesoni.

Vulica vata

Na veiitaviqaravi yadua e ra e rawa ni vukei ira na goneyalewa me ra vulica na veika me baleta na ivakatagedegede ni Lotu me baleta na vakaitau. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira yadua na goneyalewa me ra vola na nodra dui yavunibula e gadreva o koya me tiko vei koya ena laki watina. Sureti ira na goneyalewa me ra wasea ki na kalasi, na veika era sa vola, ni sa gadrevi. Kerea e dua na goneyalewa me wilika na itukutuku oqo nei Elder Robert D. Hales: “Kevaka o gadreva mo vakamautaka e dua ka vinaka sara, totoka, caka dodonu, mamarau, daucakacaka, tamata bula vakayalo, ia mo vaka na tamata o ya” (“Sotavi na iBolebole ni Vuravura Oqo,” Ensign se Liaona, Nove. 2015, 46). Kerei ira na goneyalewa me ra taleva na veika era sa vola, ka rawa mo taroga se na vakacava na nodra nanuma ke sa vola tiko mai o koya me na watidra na veika tautauvata vakaoqo baleti ira. Na cava era sa cakava tiko ena gauna oqo me ra na vakataka na tamata sa vinakata tiko mai o koya me na watidra mena vakamautaka? Sureti ira na goneyalewa me ra veivosakitaka na sala me ra na tauyavutaka kina na yavunibula vakaoqo ena gauna oqo kei na sala ena mana kina vei ira era sa nodra itau.
Kerei ira yadua na goneyalewa me ra digitaka e dua na vosa se malanivosa mai na ikatinikatolu ni yavu ni vakabauta ka vakamacalataka se veiwekani vakacava na nona vosa se malanivosa ki na ivakatagedegede eso ena iwasewase ni “Veigadivi” ena Me iSakisaki ni iTabagone. Kerei ira na goneyalewa me ra wasea na ivakarau e dodonu me vakauqeta kina na nodra veimaliwai vata kei ira na cauravou na ivakavuvuli eso ena ikatinikatolu ni yavu ni vakabauta.
Wilika na parakaravu ni vosa nei Sister Elaine S. Dalton “Vakatawa ni iValavala Dodonu” e tekivu ena taro “Na cava o ni rawa ni cakava yadua mo ni ivakatawa ni ivalavala dodonu?” Kerei ira na goneyalewa me ra veivosakitaka se veiwekani vakacava ki na veigadivi na ivakasala nei Sisita Dalton. Sureti ira na goneyalewa me ra wilika na Alama 46:11–14, ka veivosakitaka na sala a veivuke kina na ulutaga ni bula galala vei ira na Nifai me ra taqomaka na nodra bula galala. Ni gadrevi me muri na bolebole nei Sister Dalton, sureti ira na goneyalewa mera vola na veika me ra cakava kei na veika me ra kakua ni cakava mera taqomaka kina na nodra ivalavala dodonu. Sa rawa mera vola talega na goneyalewa na veika mera na cakava me ra taqomaka kina na nodra ivalavala dodonu ni ra veigadivi (raica na “Veigadivi” ena Me iSakisaki ni iTabagone, draunipepa 4–5).
Vakaraitaka vakalailai na “Brand New Year 2010: Dating,” ka me cegu mada na vidio mera raica rawa na goneyalewa na ivakatagedegede ni veigadivi era vakamacalataka tiko na tamata ena vidio. Kerei ira na goneyalewa me ra raicalesu na “Veigadivi” ena Me iSakisaki ni iTabagone ka vakasaqara na ikuri ni ivakatagedegede a sega ni veivosakitaki ena vidio. Sureti ira me ra sauma na taro me vaka na kena oqo: “Na cava na ivakatagedegede ni Lotu me baleta na veigadivi?” “Na cava e bibi kina vei iko mo vakamuria na ivakatagedegede oqo?” kei “Na cava na inaki ni veigadivi?” Sureti ira na goneyalewa me ra veivosakitaka na sala eso e rawa ni ra tukuna kina na lomadra ni ra yavalati me ra cakava e dua na ka e veisaqasaqa kina na ivakatagedegede ni Lotu me baleta na veigadivi. Vakasamataka mo wasea na ivakaraitaki ni sala eso o sa vakalougatataki kina ena nomu rokova tiko na ivakatagedegede ni veigadivi ena Lotu, ka sureti ira eso tale me ra wasea na veika tautauvata era sa sotava.
Sureti ira na goneyalewa me ra railesuva na iwasewase ni “Veigadivi” ena Me iSakisaki ni iTabagone ka vola na nodra taro me baleta na vakaitau. Sureta e dua na mataveivosaki ni cauravou kei na goneyalewa itabaqase me ra sauma na nodra taro ka veivosakitaka na ivakatagedegede ni vakaitau. Vakayaloqaqataki ira na lewe ni mataveivosaki me ra okata eso na ivakaraitaki ni ivakarau era bulataka kina na ivakatagedegede ni ra gadi vakaveitau, me vaka na vakaisulu rakorako, digitaka na itaviqaravi veiganiti, ka vakaitau vata kei ira e cecere na nodra ivakatagedegede.

Kerei ira na goneyalewa me ra wasea na veika era sa vulica nikua. Era sa kila tiko beka na ivakatagedegede ni Lotu me baleta na vakaitau? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Veitalanoa kei na dua e sa biuta tu e dua na ivakaraitaki vinaka ena nona muria na nona ivakatagedegede na Turaga me baleta na vakaitau, ka raica na veika a vakayacora me vorata kina na veitemaki ni muria na ivakatagedegede ni vakaitau vakavuravura.
Biuta e dua na takete mo talairawarawa ki na nona ivakatagedegede na Turaga me baleta na vakaitau.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.