Meu na vaqaqacotaka vakacava na noqu matavuvale?

“ Ni na qai laki kunei ga na bula marau ena veimatavuvale, ke yavutaki ena ivakavuvuli ni Turaga o Jisu Karisito. Na matavuvale qaqa … e yavutaki ka cicivaki ena veilomani vakavuvale, ka ivakadei ni duavata vakaveiwatini, na nodra tuberi ena vakabauta, masumasu, veivutuni, veivosovosoti, veidokai, veilomani, yalololoma, gugumatua, kei na nodra dau goleva na lasa vinaka eso, me ra vakamarautaki vata kina” (“Na Matavuvale: Ai Vakaro ki Vuravura Raraba, ” Ensign se Liaona, Nove. 2010, 129). Ni da vukei ira na noda itubutubu ena kena rawati na takete eso oqo, e rawa ni da vukea na noda matavuvale me rawati na marau e vinakata ena vukuda na Tamada Vakalomalagi.

Vakarautaki iko vakayalo

Na veika cava soti o sa sotava ena nomu matavuvale sa kauta mai vei iko na marau? Na veivakalougatataki cava beka o sa raica ena nomu matavuvale ni o sa muria tiko na ivakavuvuli ni iVakabula?

Na cava beka o kila me baleta na nodra bula vakamatavuvale na goneyalewa o vakavulica? Na sala cava e rawa ni o vukei ira kina na goneyalewa me ra kila vakamatata ni ra na mamarau cake na matavuvale ni ra segata me ra muria na nona ivakavuvuli na iVakabula?

Ena yalomasumasu wilika na veiivolanikalou kei na ivurevure oqo. Na ivakavuvuli cava e kunei ena ivolanikalou kei na nodra vosa na parofita ena vakauqeti ira na goneyalewa me ra vaqaqacotaka na nodra matavuvale?

1 Nifai 8:12 (E vinakata o Liai me ratou kania na nona matavuvale na vua ni vunikau ni bula)

1 Nifai 16:14–32 (Vaqaqacotaka o Nifai na nona matavuvale)

V&V 88:119 (iVakarau ni vuvale bula dodonu)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129 (raica talega na Tudei ena Vakabauta [2004], 59–61)

Dieter F. Uchtdorf, “Veivakacaucautaki Vei Ira Era Veivakabulai,” Ensign se Liaona, Me 2016, 77-80

Bonnie L. Oscarson, “Ira na Dautaqomaka na iVakaro ni Matavuvale,” Ensign se Liaona, Me 2015, 14–17

David A. Bednar, “Vakavulici Ira Vakavinaka na Nomu Vuvale me ra Gugumatua,” Ensign se na Liaona, Nove. 2009, 17–20

“Na Vuvale,” Me iSakisaki ni iTabagone (2011), 10–11

“Vale Me Vaka mai Lagi,” Sere ni Lotu, naba 181

Vidio: “Through Small Things”

NaN:NaN

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se vakasamataka ga eso na nomu mo vakamacalataka kina na lesoni ni macawa oqo:

Kerei ira na goneyalewa me ra vakasamataka na veika e rawa ni ra cakava e dua na matavuvale me ra taqomaka kina na nodra vuvale mai na ka ni veivakaleqai vakayago (me vaka na kama se butako). Na veika rerevaki vakayalo cava beka e rawa ni vakaleqa na matavuvale? Na cava e rawa ni ra cakava na goneyalewa me ra veivuke kina ena kena taqomaki na nodra matavuvale?
Kerei ira na goneyalewa me ra vola ena vava ni volavola na levu ga ni vosa e rawa ni ra vakasamataka ena dua se rua na miniti ka vakamacalataka na veika ena kauta mai na marau ki na nodra matavuvale.

Vulica vata

Na itaviqaravi yadua e ra e rawa ni vukei ira na goneyalewa me ra vulica na ivakarau me ra vaqaqacotaka kina na nodra matavuvale. Ni muri na veituberi ni Yalotabu, digitaka e dua se sivia ka na ganita na nomu kalasi:

Ena nona vosa “Veivakacaucautaki Vei Ira Era Veivakabulai,” e vakavulica kina o Peresitedi Dieter F. Uchtdorf na veika ni matavuvale: “Ena tautauvata beka na veika ena noda dra, ia eda sega ni tautauvata. E duidui na yaloda. … Sa rawa ni da digitaka me marautaki na duidui oqori.” Na ituvaki se kaukauwa duatani cava sa tu vei ira na goneyalewa yadua? Me na vakayagataka vakacava na goneyalewa yadua na nona kaukauwa duatani me vakalougatataka kina na nona matavuvale? Sa rawa ki na leweni kalasi me ra vakasaqara vakailawalawa lalai na veitikina eso mai na vosa oqo, ka wasea yani na veika era laveti kina. Sa rawa talega mo sureti ira na lewe ni kalasi me ra sarava e dua na vidio ka vakaturi ena ituvatuva oqo ka vakaraica na veika era cakava na lewe ni matavuvale me vakavinakataka na nodra veimaliwai. Me ra na marautaka vakacava na goneyalewa na duidui e tiko ena nodra matavuvale? Na vakasama cava era rawa ni wasea baleta na nodra rawa ni vaqaqacotaka kina na nodra veimaliwai vakamatavuvale?
Me ra wilika na goneyalewa eso na iwase ni vosa nei Bonnie L. Oscarson “Ira na Dautaqomaka na iVakaro ni Matavuvale.” Ena vosa oqo, e vakavuvulitaka kina o Sista Oscarson ni o “keda kece—yalewa, tagane, itabagone, kei na gonelalai, tawavakawati se vakawati—e rawa ni da dauqaravi vale. E dodonu me da ‘cakava na noda veivale’ me vanua vakaivakarau, ni drodro, tabu, ka veitaqomaki” (Ensign se Liaona, Me 2015, 17). Sureti ira na goneyalewa me ra vakasaqara na vosa nei Sisita Oscarson, ka vakaraica e dua na malanivosa e rawa ni ra vakabira tu ena nodra itikotiko se rumu ena vakauqeti ira mera vaqaqacotaka na nodra matavuvale. Na cava e rawa ni ra cakava ena gauna oqo me vukea na nodra itikotiko me ka-tabu, vakaivakarau, ka veitaqomaki?
Wilika vata vakalasi na ikavitu ni parakaravu ni “Na Matavuvale: Ai Vakaro ki Vuravura Raraba,” ka vakaraica na ivakavuvuli eso e rawa ni vukei ira na goneyalewa me ra rawata na marau ena bula vakamatavuvale. Kerea na goneyalewa yadua me wilika na 1 Nifai 16:14–32 ka wasea na sala eso era tutaka kina na ivakavuvuli oqo na matavuvale nei Liai. Kerei ira mera wasea na veika era a sotakaya ka sa vakatavulica vei ira na bibi ni ivakavuvuli oqo ena bula vakamatavuvale.
Kerei ira na goneyalewa me ra vakarogoca na sala eso me ra vakalevutaka kina na loloma e vale ni ra lagata se vakarorogo ki na “Vale Me Vaka mai Lagi” (Sere ni Lotu, naba 181). Kerei ira me ra wasea na veika era sa raica. Sureti ira me ra wasea e dua na ka era sa sotava era vakila kina na marau baleta ni a vakaraitaki vei ira na loloma se baleta ni ra a veivuke ena vakalevutaki ni loloma ena nodra itikotiko.
Kerei ira na goneyalewa me ra wilika “Na Vuvale” ena Me iSakisaki ni iTabagone se sarava na vidio “Through Small Things” ka vakaraica eso na ka e rawa ni ra cakava me ra vaqaqacotaka kina na nodra matavuvale. Na ivakaraitaki cava era kila tu na goneyalewa me baleta na matavuvale eso ena ivolanikalou era a muria se sega ni muria na ivakavuvuli eso oqo? Sureti ira na goneyalewa me ra raica na ituvatuva ni lewenivola Me iSakisaki ni iTabagone ka veivosakitaka na iwalewale e rawa ni vukea na sureti ni Yalotabu ena nodra itikotiko na bulataki ni ivakatagedegede tale eso ena ivola oqo. Sureti ira me ra digitaka e dua na ka me ra na cakava ena macawa lako mai me vaqaqacotaka na nodra matavuvale.

NaN:NaN
Wasea vakatolu na kalasi, ka kerea na iwasewase yadua me ra wilika e dua na vakatutu nei Elder David A. Bednar ena nona vosa “Vakavulici Ira Vakavinaka na Nomu Vuvale me ra Gugumatua.” Kerea na iwasewase yadua me wasea ki na kalasi na veika era sa vulica, ka vakamacalataka vakatabakidua na veika e rawa ni ra cakava me tutaki kina na vakatutu nei Elder Bednar ena nodra matavuvale. Vakayaloqaqataki ira me ra wasea na ivakaraitaki eso era sa raica ki na lewe ni matavuvale ena caka voli ni veika e vakatura o Elder Bednar.

Kerei ira na goneyalewa mera wasea na veika era sa vulica nikua. Era sa kila vakamatata beka na iwalewale me vaqaqacotaki kina na nodra matavuvale? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me na tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakasaqara eso na sala me ra vaqaqacotaka kina na nodra matavuvale ena nodra dauveiqaravi. E rawarawa sara me vaka na kena vakarautaki na kakana, vukei e dua na tacida ena cakacaka ni vuli, se noda vakarorogo toka mada ga. Kerei ira me ra mai wasea ena macawa mai oqo na veika era sotava.
Vola ena nodra ivolaniveisiga na sala e rawa ni ra veitokoni kina ena nodra matavuvale.
Cakava e dua na itaviqaravi mai na Torocake Yadudua ka na vukei ira me ra vaqaqacotaka na nodra matavuvale, me vaka na Yavunilewa ni Bula Vakalou 3 se 5, Cakacaka ni yavunilewa ni Kequ Yaga, se Yavunilewa ni iValavala Dodonu 2

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.