E veitokoni vakacava na nodra itavi na tagane kei na yalewa ena matavuvale?

Ena lewa vakalou, sa solia na Tamada Vakalomalagi vei ira na tagane kei na yalewa na isolisoli kei na kila e duidui me vukea na nodra qarava na itavi veitokoni eso vaka tagane kei na yalewa vakawati. “Ni da yalewa se tagane sa yaga me baleta na keda ivakatakilakila kei na keda inaki ena bula taumada, ena bula oqo kei na tawamudu.” … Me ra veiliutaki na tama ena nodra dui matavuvale ena loloma kei na ivalavala dodonu ka sa nodra itavi talega na kena vakarautaki na veika me ra bula ka taqomaki kina na nodra matavuvale. Sa nodra itavi taumada na tina na nodra susugi cake na gone. Ena vuku ni itavi tabu sara oqo, era sa vauci kina na tama kei na tina, me ra dau veitokoni, ka veivukei ni ra sa vauci vata ena kena icolacola” (“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129).

Vakarautaki iko vakayalo

Na ivakaraitaki cava o sa bau raica vua na tina kei na tama ka rau veicuqeni ena nodrau itavi? Na sala cava sa vakauqeta kina na nomu matavuvale na nomudou kila na itavi tawamudu eso oqo?

E rawa vakacava ni o vukei ira na goneyalewa me ra kila vakamatata na nodra itavi vakalou vakatina ena gauna mai muri? Na cava e rawa ni ra cakava ena gauna oqo me ra vakavakarau kina ki na itavi oqori?

Wilika ena masumasu na ivolanikalou kei na ivurevure oqo. Na ivolanikalou kei na vosa cava ena vukei ira na goneyalewa me ra kila vakamatata na nodra itavi veitokoni na tagane kei na yalewa veiwatini?

Na Vosa Vakaibalebale 22:6; V&V 68:25; 121:41–43; Mosese 5:1 (iTavi vakaitubutubu)

Alama 53:21; 56:47–48 (Era a vakavulici na cauravou yaloqaqa mai vei ira na tinadra)

V&V 25 (iVakasala vei Ema Simici me baleta na nona tokoni watina)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

Linda K. Burton, “Me da Torocake Vata,” Ensign se Liaona, Me 2015, 29–32

L. Tom Perry, “Kunea na Vakacegu e Tudei ka Tara Cake na Matavuvale Tawamudu,” Ensign se Liaona, Nove. 2014, 43–45

D. Todd Christofferson, “Na Kaukauwa Vakasakiti ni Marama,” Ensign se Liaona, Nove. 2013, 29–32

Veika sotavi ena yavunilewa ni Kequ Yaga 4, Torocake Yadudua (2009), 31

Vidio: “The Women in Our Lives”

2:43

Veivakavulici ena ivakarau ni iVakabula

Na iVakabula e vakabauti ira, vakarautaki ira, ka solia na itavi bibi vei ira e dau vakavulica o Koya. Ena rawa vakacava ni o vukei ira na goneyalewa o vakavulica me ra vakila na nomu veivakabauti ena vukudra ni ra vakavakarau ki na nodra itavi bibi vakayalewa vakawati ka tina ena veisiga ni mataka?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

Wasea vei ira na goneyalewa na ulutaga ni lesoni oqo. Na cava na vuna era nanuma kina ni oqo e dua na ulutaga bibi me veitalanoataki?
Kauta mai e rua na iyaya erau dau vakayagataki vata me vakacavari kina e dua na takete (me vaka e dua na penikau kei na pepa se itukituki kei na ivako). Sureti ira na goneyalewa mera vakamacalataka na duidui ni iyaya kei na ivakarau era vakayagataki vata kina. Vakamacalataka ni o ira na tagane kei na yalewa e soli vei ira na itavi duidui ka veitokoni (se “veivakataucokotaki”) me vakayacori kina na inaki ni Kalou. Sureti ira na goneyalewa mera vakamacalataka eso na sala era dau veitokoni kina na tagane kei na yalewa.

Vulica vata

Na itaviqaravi yadua e ra e rawa ni vukei ira na goneyalewa mera vulica na veika me baleta na nodra itavi veicuqeni na tagane kei na yalewa ena veimatavuvale. Ni muri na veituberi ni Yalotabu, digitaka e dua se sivia ka na ganita na nomu kalasi:

Sureta e dua na veiwatini ena veivakadonui nei bisopi me rau sikova na nomu kalasi. Wilika vata na iwasewase ka kena i ulutaga “Veilaveti ka Veivukei ena Noda iLesilesi Veivakataucokotaki” mai na vosa nei Linda K. Burton “Me da Torocake Vata.” Na cava era vulica na goneyalewa me baleta na ivakarau era dau veitokoni kina na tagane kei na yalewa ena matavuvale? Kerei rau na veiwatini ka veisiko tiko me rau vosa me baleta na iwalewale erau veivukei kina vakairau ena vakayacori ni nodrau itavi. Navuca ni wasea na iwalewale e sa vukei iko kina se lewe ni nomu matavuvale na bula vakawati mo vinaka cake.
Kerei ira na goneyalewa me ra tuva na itavi ena namaka na Turaga me ra qarava na tama kei na tina. Me vukea nodra vakarautaka na lisi oqo, sureti ira me ra vakasaqaqara ena ikavitu ni parakaravu ni “Na Matavuvale: Ai Vakaro ki Vuravura Raraba” kei na iwase veiganiti eso ni vosa nei Elder L. Tom Perry “Kunea na Vakacegu e Tudei ka Tara Cake na Matavuvale e Tawamudu” kei na vosa nei Elder D. Todd Christofferson “Na Kaukauwa Vakasakiti ni Marama.” Na cava e rawa ni ra vulica mai na ivurevure eso oqo me baleta na nodra itavi vakalou na tama kei na tina? Era veicuqeni vakacava na itavi eso oqo? E duidui vakacava oqo mai na veika e vakavuvulitaka o vuravura? Sureti ira na goneyalewa mera wasea na ivakaraitaki ni gauna era a vakadinadinataka kina ni ra vakayacora tiko na itubutubu na nodra itavi vakaveicuqeni.
Raica eso na ivolanikalou e vakavuvulitaka na nodra itavi na itubutubu, me vaka na kena e dusi tiko ena lesoni oqo, ka veiwaseaka kivei ira na goneyalewa. Sureti ira yadua na goneyalewa me ra wasea na nodra ivolanikalou ka vakamacalataka na itavi e tukuni kina. Sureti ira me ra wasea na sala era veitokoni kina na tagane kei na yalewa veiwatini ena nodra qarava vakavinaka na itavi kei na ivakaraitaki oqo era sa raica vei ira na itubutubu ni ra qarava na itavi veitokoni eso.
Kerei ira na goneyalewa me ra vakasamataka na ibalebale ni vosa na kena yasa ruarua ni ra sarava na vidio “The Women in Our Lives.” Kerei ira me ra tuva na sala eso e rawa me ra “dauveivuke” kina vua na watina mai muri (raica Nai Vakatekivu 2:18). Kerei ira na goneyalewa me ra cakacaka yadua se vakalasi ena veika sotavi ni yavunilewa 4 ni Kequ Yaga ena Torocake Yadudua ka me ra vola ena nodra ivolaniveisiga na nodra nanuma me baleta na nodra itavi vakayalewa vakawati ena nona tokona na watina mai muri.

2:43
Sureti ira na goneyalewa me ra wilika na Vunau kei na Veiyalayalati 25 ka raica na veika a kerei o Emma Smith me cakava me tokona kina na watina kei na veika e kaya na Turaga me cakava na watina me tokoni koya ka vakalougatataki koya kina. Na ivakaraitaki cava soti o rawa ni wasea se o ira na goneyalewa me baleti ira na tamata era muria na ivakasala oqo ena nodra bula vakawati? Vakayaloqaqataki ira na goneyalewa me ra vola na mataqali bula vakawati era na vinakata me ra taukena ena dua na siga kei na veika e rawa ni ra cakava ena gauna oqo me ra vakavakarau kina. Sureta e vica vei ira me ra wasea na veika era vola.

Kerei ira na goneyalewa me ra wasea na veika era sa vulica nikua. Era sa kila vakamatata beka na nodra itavi veicuqeni na tagane kei na yalewa ena veimatavuvale? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Vakavinavinakataka na tamadra kei na tinadra me baleta na veisala eso era sa vakalougatataki kina ni ra a qarava vakavinaka na nodra itubutubu na nodra itavi vakalou.
Digitaka na veimalanivosa mai “Na Matavuvale: Ai Vakaro ki Vuravura Raraba” ka na vakananuma vei ira na nodra itavi vakalou ni ra sa tina.
Vakacavara na veika oqo ena Torocake Yadudua:Veika sotavi ena yavunilewa ni Vakabauta 2, Veika sotavi ena yavunilewa ni Bula Vakalou 2, Veika sotavi ena yavunilewa ni Kequ Yaga 4

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.