Na cava na ibalebale ni noqu taura na yaca i Jisu Karisito?

Ena gauna eda sa papitaiso kina, eda sa veiyalayalati meda taura na yaca i Jisu Karisito. Eda na vakavouya na veiyalayalati oqo ena gauna eda kania kina na sakaramede (raica naV&V 20:77). Eda na vakayacora na veiyalayalati oqo ena noda vakaliuca tiko na Turaga ena noda bula, ena noda sasagataka tiko meda vakanananu ka vakaitovo vakataki Koya, ka tudei tu meda sa “vakadinadinataka na Kalou ena veigauna kecega, ena veika kecega kei na veivanua kecega” ( Mosaia 18:9).

Mo vakarautaki iko vakayalo

Na ivolanikalou kei na ivurevure cava ena vukei ira na goneyalewa mera kila na yalayala era sa cakava mera taura na yaca i Karisito ena nodra bula?

Mosaia 5 (Na cava e bibi kina meda taura na yaca i Karisito ena noda bula)

3 Nifai 27:27 (Meda sa tovolea meda veiucui kei Jisu Karisito)

V&V 20:37, 77 (Tauri ni yaca i Karisito ena noda bula e tikini noda yalayala ni papitaiso kei na cakacaka vakalotu)

Robert D. Hales, “Na Lotu Vakarisito sa Vakarisito Dina,” Ensign se Liaona, Nove. 2012, 90–92

Mervyn B. Arnold, “Na Cava o Sa Bau Cakava me Baleta na Yacaqu?” Ensign se Liaona, Nove. 2010, 105 –7

Vidio: “Dare to Stand Alone”

4:20

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se digitaka ga na nomu mo vakamacalataka kina na lesoni ni macawa oqo:

Sureti e dua na goneyalewa me wilika na masu ni madrai ni sakaramede ena V&V 20:77. Na cava era vakabauta ni ibalebale ni “taura na yaca i [Jisu Karisito]”?
Tarogi ira na goneyalewa se ra kila na vuna e rau digataka kina na yacana o rau na nona itubutubu. Sa vakatulewataka vakacava na nodra bula na yacadra kei na ivakarau ni nodra bula? Tarogi ira se cava era nanuma ni ibalebale ni nodra taura na yaca i Jisu Karisito (raica na V&V 20:77). E vakatulewataka vakacava na noda bula kei na noda bulataka na noda sa taura na Yacana ?

Vulica vata

Na veitaviqaravi ka koto oqo e ra ena vukei ira na goneyalewa mera kila na ibalebale ni nodra sa taura na yaca i Jisu Karisito. Ena vakamuri ni Yalotabu, digitaka e dua se sivia ka na ganita na nomu kalasi:

Vakaraitaka na vidio “Dare to Stand Alone.”; Na cava era vakila na goneyalewa ni ulu ni itukutuku nei Peresitedi Monson ena vidio oqo? Era vakaraitaka vakacava na itabagone ena vidio ni ra sa taura na yaca ni iVakabula? Sureti ira na goneyalewa mera wasea na veika era dui sotava.

4:20
Wasea na iyatuvosa oqo nei Peresitedi Henry B. Eyring, “Eda yalataka meda na taura na yaca ni Turaga. Kena ibalebale meda sa wiliki keda meda sa Nona. Eda na vakaliuci Koya ena noda bula. Eda na vinakata na ka e vinakata o Koya, ka sega ni ka eda vinakata se na ka e vakavulica o vuravura meda na vinakata” (“Meda Duabau Ga,” Ensign se Liaona, Me 1998). Wasea vakatolu na kalasi, ka kerei iratou na tolu na ilawawa me ratou veivosakitaka e dua na taro oqo: Na cava na ibalebale ni da sa raici keda meda nei Karisito? Eda na vakaliuca vakacava na iVakabula ena noda bula? Na cava na kena ibalebale meda vinakata na ka e vinakata na iVakabula? Kerea e dua na lewe ni ilawalawa me wasea na veika eratou sa veivosakitaka na nona ilawalawa.
Sureti ira na goneyalewa mera wilika na Mosaia 5, ka vakaraica na isau ni taro me vaka na “Na cava na ibalebale ni noda sa taura na yaca i Karisito?” kei “Na cava e bibi kina meda taura na yaca i Karisito? Kerei ira mera wasea na veika era sa kunea ka vola na veika saraga era na cakava me vakaraitaka ni ra sa taura na yaca ni iVakabula.
Kerea e so vei ira na goneyalewa mera wilika na Ilamani 5:6–8, ka sureti ira na kena vo mera wilika na imatai ni tolu na parakaravu ni vosa nei Elder Mervyn B. Arnold “Na Cava o Sa Bau Cakava me Baleta na Yacaqu?” Kerei ira mera vakalekalekataka ga na ivakamacala ni veika era sa wilika. E vakauqeti ira vakacava na tamata oqo mera buladodonu na yaca i Nifai, Liai, kei George Albert Smith? E vakauqeti keda vakacava na noda veiyalayalati meda sa taura na yaca i Jisu Karisito? Dou wilika vakalasi na iotioti ni rua na parakaravu ni vosa, ka sureti ira na goneyalewa se me ra na bulataka vakaevei na bolebole nei Elder Arnold.
Wasea na vakasama oqo mai vei Elder Robert D. Hales: “Na vosa va-Karisito e kena ibalebale meda sa taura na yaca i Karisito.” Veivotayaka na vosa nei Elder Hales “Mo Lotu Vakarisito sa Vakarisito Dina” vei ira na goneyalewa. Kerei ira na goneyalewa mera wilika na nodra ivotavota, ka vakaraica na isaunitaro oqo “Na cava na kena ibalebale mo va-Karisito?” Kerei koya me vakamacalataka na ka e sa kunea, ka wasea e dua na kena ivakaraitaki ni tamata e kila ka nanuma ni sa va-Karisito dina.

Kerei ira na goneyalewa me ra wasea na veika era sa vulica nikua. Era sa kila tiko li na ibalebale ni ra sa taura na yaca i Jisu Karisito? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa mera vakasamataka e so na salae rawa ni vakaraitaka ena ka era cakavani ra sa taura na yaca i Jisu Karisito. Ena dua na kalasi e muri, qai sureti ira mera wasea na veika era sa sotava.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.