Cava na vuna eda sotava kina na dredre?

Sa tiki ni yavu ni Tamada Vakalomalagi, na kena dau sotavi na dredre ena bula oqo. Ena so na gauna e dau yaco mai na dredre ena vuku ni digidigi eda cakava se na nodra digidigi tale eso. E so tale na dredre sa tiki ni veika ga e dodonu meda sotava. Dina ni dredre, na veivakatovolei ena vukea noda tubu vakayalo kei na noda laki veiucui kei Jisu Karisito.

Mo vakarautaki iko vakayalo

Na dredre cava soti o sa bau sotava? Na cava o sa bau vulica mai kina? Na cava sa bau vukei iko mo valuta rawa kina? Tiko beka e dua na ka o sa sotava ka rawa ni na vukei ira na goneyalewa?

Vakasamataki ira ka masulaki ira na goneyalewa ena nomu kalasi. Na bolebole cava soti kei na veivakatovolei cava era sa sotava tiko? Era sa walia vakacava tiko na dredre ka ra sotava tiko ena nodra bula?

Ni ko sa vakavakarau tiko, masulaka ka vulica na tikini ivolanikalou oqo. Kei na so tale ka sa vukei iko mo valuta rawa kina na dredre ko sa lako curuma oti mai.

1 Samuela 1; 1 Tui 17; Ruci 1; Esiteri 4 (iVakaraitaki ni marama ena ivolanikalou ka ra sa sotava na dredre)

2 Nifai 2:11 (Na dredre e tiki ni yavu ni Tamada Vakalomalagi baleti keda)

Mosaia 23:21 (Solia vei keda na Kalou na dredre me vakatovolei noda vakabauta)

Ica 12:27 (Solia vei keda na Kalou na malumalumu meda yalomalua kina)

V&V 58:3–4 (Ni oti na dredre qai basika na kalougata)

V&V 121:7–8 (Kevaka meda vosota na dredre, ena vakalougatataki keda na Kalou)

V&V 122:4–9 (Solia vei keda na dredre na vuli ka na vakavinakataki keda cake)

Yoon Hwan Choi, “Kakua ni Veiraiyaki, Rai Cake!” Ensign se Liaona, Me 2017, 90–92

Evan A. Schmutz, “Na Kalou ena Tavoya na Wainimata Kecega,” Ensign se Liaona, Nove. 2016, 116–18

Dallin H. Oaks, “Veibasai ni Ka Kecega,” Ensign se Liaona, Me 2016, 114–17

Neil L. Andersen, “Covulaca Vakayalo,” Ensign se Liaona, Me 2014, 18–21; raica talega na vidio ni nona vosa “Covulaca Vakayalo”

2:25

“Dredre,” Tudei ena Vakabauta (2004), 8–11

Vidio: “God Will Lift Us Up,” “The Priesthood Can Strengthen Our Families in Trials,” “Rebuilding Lives”

4:59

1:25

1:34

Veivakavulici ena ivakarau ni iVakabula

Na iVakabula e kilai ira vinaka o ira e vakavulica—kei na vanua e rawa ni ra na yacova. Ni ra sa oca, e sega ni laivi ira ia e lomani ira tikoga. Na dredre cava era sotava tiko na goneyalewa? Ko na vakaraitaka vakacava ni ko lomani ira ka tokoni ira?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Taleva lesu va-kalasi, na ivakamacala nei Elder Neil L. Andersen me baleta e dua na vunikau ka tubu voli ena dua na vanua cagicagi (ena nona vosa “Covulaca Vakayalo”). Na cava e vakatavulica vei ira na goneyalewa na veivakatauvatani oqo me baleta na veika dredre? Sureti ira mera vakasaqara na vosa, ena raici ni vakasala era nanuma ni na vukei ira mera vorata na covulaca vakayalo.

Vulica vata

Ena vukei ira na goneyalewa mera kila na inaki ni dredre e sotavi mai na itaviqaravi ka koto oqo e ra. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Kauta mai e dua na sinucodo se iyaloyalo ni sinucodo kina kalasi. Na cava ena yaco kevaka e dua na isema ni sinucodo e ramusu? Eda na rawa ni vakadeitaka vakacava ni o keda na isema kaukauwa ni noda vuvale tawamudu? Sureti ira na cauravou me ra vakaraica e a sauma vakacava o Elder Yoon Hwan Choi na taro oqo ena nona vosa “Kua ni Veiraiyaki, Rai Cake!” tekivu mai na parakaravu e tekivu ena, “O keda kece eda oka tu ena dua na maliwa ni dua na matavuvale tawamudu.” Eratou rai vakacava vei Karisito o Elder Choi kei na nona matavuvale ena talanoa e wasea o koya? Na cava eso na gauna “e sega ni rawarawa na noda rai cake”? Na cava eso na vakaitutu ena iotioti ni parakaravu ni nona vosa o Elder Choi e rawa ni vukei keda “meda dau rai cake tu ga vei [Karisito]” ena gauna ni dredre?
Wasea kei ira na goneyalewa na italanoa e wasea o Elder Evan A.Schmutz baleti Braca Daniel Apilado (ena nona vosa “Na Kalou ena Tavoya na Wainimata Kecega”). Na cava era vulica na goneyalewa me baleta na veika dredre mai na italanoa oqo? Na ivakasala cava e solia o Elder Schmutz vei ira era sotava na dredre?
Wilika vata na veitiki ni ivolanikalou ka sotava kina na iVakabula na dredre (me vaka na Maciu 4:1–11; 26:38–39; Luke 23:33–34). Na cava e rawa ni ra vulica na goneyalewa baleta na dredre mai na bula ni iVakabula? E a sotava vakacava o Koya na Nona veivakatovolei? Sureti ira na goneyalewa yadudua mera vola na veivakatovolei era sotava tiko se dua na nodra itokani lomani. Vakayarayarataki ira na goneyalewa mera vakasamataka na veika e rawa ni ra vulica mai na ivakaraitaki ni iVakabula ka rawa ni vukei ira ena leqa vata vakaoqori.
Sureti ira na goneyalewa mera nanuma na ivakaraitaki ni dua na marama ka tiko ena ivolanikalou ka ra a sotava na veivakatovolei (raica na ivakaraitaki e volai tu ena ituvatuva oqo). Kerei ira mera wilika na kedra itukutuku na marama oqo ena ivolanikalou ka vola vakalekaleka na italanoa me baleti ira na vo ni lewe ni kalasi. Na cava era sa vulica mai na italanoa oqo ka rawa ni vukei ira mera walia kina na dredre era sa sotava tiko.
Wasea vakarua na kalasi. Sureta e dua na ilawalawa mera raica na ivakaraitaki yadudua se vakailawalawa ka ra sotava na veivakatovolei ena iVola i Momani (raica me kena ivakaraitaki na, Mosaia 24:8 – 17 ; 3 Nifai 1:4–21; Moronai 1). Sureta e dua tale na ilawalawa me vakaraica ena ivolanisere, na sere ka na kune kina na nodra rawa ni sotava na veivakatovolei. Kerei ira na ilawalawa mera wasea na ka era sa vulica me rawa ni ra walia na veivakatovolei.
Droinitaka vakadodonu ki ra e dua na laini ena lomadonu ni papa ni volavola, ka vola e cake ena dua vei rau na kolomu na “Cava na vuna eda sotava tiko ga kina na veika dredre?” ka vola “Meda na vorata rawa vakacava na ibolebole eda sotava ena noda bula?” ena dela ni ikarua ni kolomu. Wasea vakatikina na vosa nei Elder Dallin H. Oaks“Veibasai ni Ka Kecega” ka solia vei ira na goneyalewa me ra yadua na iwasewase qo me ra wilika. Kerei ira na goneyalewa me ra vakaraica na isaunitaro ki na veitaro oqo ka vola na nodra isaunitaro ena papa ni volavola ena kolomu veiganiti. Na cava eso na vakasama titobu era sa rawata na goneyalewa mai na vosa oqo? E rawa ni o vakaraitaka e dua vei ira na vidio e vakaturi tiko ena idusidusi oqo me vukei ira na cauravou me ra kunea eso na ikuri ni saunitaro ki na taro ena papa.

Kerei ira na goneyalewa me ra wasea na veika era sa vulica nikua. Era sa kila beka na vuna eda vakatovolei kina? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vaqara e dua na sala mo vakalomavinakataka kina e dua na wekamu voleka ka sotava tiko e dua na leqa, ena nomu wasea vei koya na ka era sotava na goneyalewa
Veitalanoa kei ira na matavuvale baleti ira na lewe ni matavuvale ka ra sa walia rawa na dredre.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakarau kina ni ra sa lako i vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.