Meu kunea vakacava na vakacegu ni sa mate e dua au dau vakamareqeta?

Na mate sa dua na tiki yaga ni yavu ni veivakabulai. Meda rawa ni vakataka na Tamada Vakalomalagi, sa dodonu meda sotava na mate ka da na qai rawa ni vinaka sara ni sa tucaketale na yagoda. Ni da sa kila na mate e sa tiki ni nona yavu na Tamada Vakalomalagi, ka sa ra-wa oti na mate o Jisu Karisito ena Nona Veisorovaki, eda sa na vakanuinui ka vakacegui ni dua na wekada e sa mate.

Mo vakarautaki iko vakayalo

Sa vakalougatataki iko vakacava na nomu kila na ka ni bula ni oti na mate? Na ivolanikalou cava soti e sa vukei iko mo kila deivaki na cava ena yaco ni ko sa mate oti?

Eso na goneyalewa e sa sotava oti na takali ni dua na dau lomani. Era na sotava taucoko ena dua na siga. Na cava o na vinakata mera kila me na vukei ira?

Vulica ena yalomasumasu na ivolanikalou kei na ivurevure eso oqo. Na cava o vakila ena veivuke vei ira na goneyalewa o vakavulica tiko?

1 Korinica 15:22 (Na tucaketale sa dua na isolisoli mai vei Karisito ki na mata tamata taucoko)

Mosaia 16:7–8 (Na Tucaketale i Jisu Karisito e kauta laivi na batigaga ni mate)

Mosaia 18:8–10 (Eda vakacegui ira era gadreva na vakacegu)

Alama 11:42–45 (Eda na taukena tale na yagoda baleta na Tucaketale ni iVakabula)

Alama 28:12; V&V 42:45–46 (Eda lolositaki ira na mate, ia na mate ena kamikamica kivei ira era mate vua na Turaga)

Alama 40:11–14 (Ena bula tikoga na yaloda ni cava na noda mate)

V&V 137:5–10 (O Josefa Simici a raici Alvin na tacina, ira na gonelalai, kei na so tale ena matanitu vakasilesitieli)

V&V 138 (Veika a raica ena vuravura ni yalo o Peresitedi Joseph F. Smith)

Thomas S. Monson, “Mrs. Patton—Tomani na iTalanoa,” Ensign se Liaona, Nove. 2007, 21–24; raica talega na vidio “Until We Meet Again”

Shayne M. Bowen, “‘Niu sa Bula, Dou na Bula Talega,’” Ensign se Liaona, Nove. 2012

Vidio: “We’re Still a Family,” “He Will Give You Help”

Veivakavulici ena ivakarau ni Turaga

A taroga na iVakabula na taro eso ka vakavuna vei ira na dau muri Koya mera vakasamataka ka vakila vakatitobu. Ko na sureti ira vakacava na goneyalewa mera vakasamataka ka vaqara na veivakauqeti? Ko na vukei ira vakacava mera na yalodei ni wasea na nodra nanuma eso vakatakiira?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

Wasea e dua na ka o sa sotava oti se dua mai vua e duatani tale, me baleta na sotavi ni vakacegu ni sa mai takali e dua na nomu daulomani. Sureti ira na goneyalewa mera cakava talega vakakina.
Kerei ira na goneyalewa mera wasea na ka era sa sotava ni mai yali e dua na nodra daulomani. Era kunea vakacava na veivakacegui ni sa tu vei ira na kila ni Veisorovaki kei na yavu ni veivakabulai?

Vulica vata

Na veitaviqaravi ka koto oqo e ra ena vukei ira na goneyalewa mera vulica na veika me baleta na bula ni oti na mate. Salamuria na veivakauqeti ni Yalotabu, digitaka e dua se sivia ka na ganita na nomu kalasi:

Sureti ira na goneyalewa mera vola na nodra taro, vakasama, se na nodra lomaleqataka na mate, ka ra qai vakaraica na kena isau mai na ivolanikalou ka sa volai tu ena ituvatuva oqo. Vakayaloqaqataki ira mera vola, vakatabakidua, na ivolanikalou se na vosa eso ka vakabibitaka na itavi ni iVakabula ena noda vukei ena vakamalumalumutaki nei mate. Sureti ira mera wasea na veika era sa vulica. Sureti ira mera wasea na ka era vakila me baleta na veika e sa cakava oti na iVakabula me baleti keda.
Vakaraitaka na vidio “He Will Give You Help,” ka sureti ira na goneyalewa mera wasea na veika era sa vakila. Kerei ira na goneyalewa mera vakasamataka mada se na duidui vakacava na vuravura kevaka era kila taucoko na tamata na ka e a kunea rawa na cauravou ena vidio. Na cava ena vakayacora ki na noda bula ena veisiga na kilaka oqo? Sureta e dua na goneyalewa me wasea na nona ivakadinadina me baleta na bula ni oti na mate kei na cava e solia vua na vakanuinui.
Wasea na italanoa me baleti Mrs. Patton mai na vosa nei Peresitedi Thomas S. Monson “Mrs. Patton—Tomani na iTalanoa,” se vakaraitaka na vidio “Until We Meet Again.” Tarogi ira na goneyalewa se ra na sauma vakacava na taro a taroga o Mrs. Patton kivei Thomas Monson lailai. Mera wilika vata vakalasi na Mosaia 18:8–10. Veivosakitaka ni sa noda itavi meda dau veivakacegui, dau veivukei, vakakina na veiqaravi cava ga e rawa ni da solia kivei ira na matavuvale era sa vakayalia e dua na wekadra daulomani. Nanuma me sureti e dua na lewe ni mataveiliutaki ni iSoqosoqo ni Veivukei me na mai vakaitavi ena veitalanoa.
Sureta na veimama ni kalasi mera wilika na italanoa me baleti Sisita Ramírez ena vosa nei Elder Shayne M. Bowen “Niu sa Bula, Dou na Bula Talega,” ka qai sureta na kena veimama tale kadua mera wilika na italanoa kei Tyson na luvei Elder Bowen. Kerei ira mera wasea na ka era sa vulica me baleta na iwalewale ni kena vaqarai na vakacegu ni sa yali e dua na itokani voleka kei na nodra vakacegui eso tale. Sureti ira na goneyalewa mera wasea e dua na ka era a sotakaya ena nona takali e dua ka ra lomana. E vukei ira vakacava mera kunea na vakacegu na nodra kila na Veisorovaki kei na yavu ni veivakabulai? Kevaka e ganita, wasea e dua na ka o sa sotava oti mai.
Wasea na kalasi ki na rua na ilawalawa. Dua na ilawalawa me wilika na Vunau kei na Veiyalayalati 137:5–10 kei na ilawalawa kadua me wilika na Vunau kei na Veiyalayalati 138:57–58. Sureti ira na goneyalewa mera veivosakitaka ena nodra dui ilawalawa na ka e vakatavulica na ivolanikalou eso oqo me baleta na ka ena yaco ni oti na noda mate. Oti ni qai veivosakitaka vakalasi na iwalewale e rawa kina ki na kilaka oqo me vukea e dua tale ka sa takali e dua na nona daulomani. E semati cakacava na kilaka oqo ki na noda itavi ni caka ivola ni kawa kei na cakacaka ni valetabu?

Kerei ira na goneyalewa mera wasea na veika era sa vulica nikua. Era sa kila deivaki li na sala mera kune vakacegu kina ni sa takali e dua era dau lomana? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Tarogi ira na goneyalewa se ra na vakaraitaka vakacava na loloma kivua e dua e sa takali e dua na wekana voleka. Tiko beka e dua na dawai se so tale ena tabanalevu se itikotiko ka na gadreva tiko na veivuke?

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.