Cava na vuna me'u qarava kina na yagoqu me vaka na valetabu?
E a buli na yagoda meda veiucui kei na Kalou. Oqori sa isolisoli mai vua na Tamada Vakalomalagi ka na rawa kina vei keda meda na sotava na veika oqori ena bula oqo meda na qai rawa ni veiucui vakavinaka cake kina kei Koya. Na kila oqo ena vukea na noda qarauna na yagoda kei na veika eda vakila me baleta na Tamada Vakalomalagi kei keda vakaikeda. Ni da qarava na yagoda me vaka na valetabu ni Kalou, eda na rawata na veivakalougatataki vakayago, vakakina na kena vakayalo.
Mo vakarautaki iko vakayalo
Wilika ena yalomasumasu na ivolanikalou eso kei na ivurevure oqo. Na cava e sa vakauqeta vei iko na Yalotabu mo wasea vei ira na goneyalewa?
iVakatekivu 39:1–21; Taniela 1:3–21 (Josefa kei Taniela erau vakaraitaka na nodrau rokova na yagodrau)
1 Korinica 6:19–20; V&V 93:33–35 (Eda sa valetabu ni Kalou)
V&V 88:15–16 (Na yalo kei na yago e sa yalo ni tamata)
V&V 130:22; Mosese6:9 (Eda sa buli meda veiucui kei na Kalou)
Susan W. Tanner, “Na Savasava ni Yago,” Ensign se Liaona, Nove. 2005, 13–15
“iValavala dodonu,” Goneyalewa Torocake Yadudua (2009), 69–72
Vidio: “Chastity: What Are the Limits?”
Vidio: “195 Dresses”
Wasea na veika o sa sotava
Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.
Vakamacalataka na ivunau
Digidigi mai na veivakasama oqo se nomu nanuma ga mo vakamacalataka kina na lesoni ni macawa oqo:
-
Vakaraitaka na vidio “195 Dresses,” ka tarogi ira na goneyalewa se na veivakalougatataki cava ena lako mai ni sa rakorako tu na nodra isulusulu. Na cava era na tukuna kivua e dua ena taroga se cava me rakorako kina na nodra isulusulu?
-
Vakaraitaka e dua na iyaloyalo ni valetabu. Tarogi ira na goneyalewa se cava e rairai vinaka kina na valetabu kei na cava na vuna me tautauvata kina na yagoda kei na valetabu ni Kalou. Sureti ira mera vakaraica na isaunitaro, “Cava na vuna meu qarava kina na yagoqu me vaka na valetabu?” ena lesoni taucoko.
Vulica vata
Na itaviqaravi ka koto qo e ra ena vukei ira na goneyalewa mera kila ni yagodra e ka vakamareqeti. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:
-
Lesia vei ira yadua na goneyalewa na tiki ni ivolanikalou ka tiko qo ena ituvatuva. Sureti koya me vulica na nona tikina ka qai mai vakamacalataka vakalekaleka ena dua ga na iyatu vosa na veika e sa vulica rawa me baleta na bibi ni yagoda. Tukuna vei ira na goneyalewa mera vakasamataka na gaunisala ena muria o Setani mera temaki kina na goneyalewa me baleta na veika dina oqo. Na cava e rawa ni ra cakava mera veitokonitaka kina na nodra sasaga ena vakamareqeti ni yagodra?
-
Dou wilika, sarava, ka rogoca vakalasi e dua na vosa ka tukuni tiko ena ituvatuva oqo. Kerei ira na goneyalewa mera vakasamataka e dua era kila ka na vakacokotaki mai na itukutuku oqo me baleta na kena bibi na yago [me kakua ni veitalanoataki e dua na lewe ni matavuvale). Na tiki ni vosa cava ena yaga vakalevu kivei koya na tamata o ya? Sureti ira mera vakatututaka na sala e rawa ni ra wasea kina na itukutuku oqo kivua na tamata era a vakananuma voli. Vakauqeti ira mera wasea e dua na vosa cavuti mai na vosa oqori kei na veika era sa sotava tiko kei na nodra ivakadinadina.
-
Wilika vata vakalasi na 1 Korinica 6:19–20 kei na Vunau kei na Veiyalayalati 93:33–35. Wasei ira na goneyalewa ki na vica na matailawalawa, qai kerei ira na veilawalawa mera vakarautaka e dua na ituvatuva. Biuta vata ga me dua na lisi kece, ka sureti ira na kalasi mera veivosakitaka e so na bolebole era sa sotava tiko na goneyalewa ena nodra sasaga mera savasava voli me vakataka na valetabu. Na cava e rawa ni ra cakava mera walia kina na bolebole oqo?
-
Veisasataki ira na goneyalewa. Lesia e dua vei rau me wilika na iVakatekivu 39:1–21 kei koya ka dua me wilika na Taniela 1:3–21 (ena iyaloyalo ni italanoa oqo, raica na, Gospel Art Book, 11, 23). Tarogi ira se sala cava rau a vakaraitaka o Josefa kei Taniela ni rau rokova na yagodrau, ka sureti rau me rau veiwaseitaka na ka erau sa kunea. Ena rawa vakacava mera vakamuria na ivakaraitaki nei Josefa kei Taniela?
-
Sureti ira na goneyalewa mera raica na tabana e tiko kina na lewe ni ivola ni Me iSakisaki ni iTabagone ka vakilakila se ivakatagedegede cava e semati ki na maroroi ni yago kei na vakasama. Wasei ira na goneyalewa vakailawalawa, ka tukuna mera vaqara ena iwase oqo na isaunitaro, “Na cava e ka bibi kina na yagoqu?” Sureti ira mera wasea se cava e rawa ni ra cakava mera bulataka kina na ivakatagedegede oqo.
-
Vola na taro oqo ena vava ni volavola ka sureti ira na goneyalewa mera digitaka se taro cava era vinakata mera vaqara na kena isau: Na cava na ivakatagedegede ni Turaga me baleta na bula savasava? Na cava e bibi kina vei au meu muria na ivakatagedegede oqo? Ena tara vakacava na noda sasaga meda bula savasava na maroroi ni tiko savasava? Kerei ira na goneyalewa mera vakayagataka na wase ni “iSulusulu kei na iRairai” ena Me iSakisaki ni iTabagone mera raica kina na isaunitaro era sa digitaka. Sureti ira mera wasea na ka era sa kunea.
Kerei ira na goneyalewa mera wasea na veika era sa vulica nikua. Era sa kila deivaki tiko li na bibi ni ituvaki ni yagodra? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?
Bulataka na ka eda vulica tiko
Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:
-
Vakadeitaka ni ra na cakava na veisautaki ni ivakarau ni nodra dau maroroya na yagodra, ni yavutaki mai na veika era sa vulica nikua.
-
Vakacavara na Veika e sotavi ena buladodonu 1 se 2 ena Torocake Yadudua.