Na cava na ibalebale ni nodra tokoni na noqu iliuliu ni Lotu?

Ni da sa lewe ni Lotu, sa noda madigi meda tokoni ira e sa kaciva na Turaga mera veiqaravi. Eda sa laveliga meda vakaraitaka ni da sa tokoni ira na Vakaitutu Raraba kei ira na vakailesilesi ena Lotu kei ira yadua na iliuliu ena noda dui tabanalevu kei na iteki—oka kina o ira na mataveiliutaki ni kalasi ni Goneyalewa. Na nodra tokoni na iliuliu e oka vakalevu cake mai na noda laveta walega na ligada—sa kena ibalebale ni da sa tu e yasadra, masulaki ira, ciqoma mai vei ira na noda ilesilesi kei na veikacivi, talairawarawa ki na nodra ivakasala, ka kakua ni vosa vakacacani ira.

Mo vakarautaki iko vakayalo

Na cava o na cakava mo tokoni ira kina na iliuliu ni Lotu? O a vakalougatataki beka vakacava ena nomu vakayacora? Ko na vukei ira vakacava na goneyalewa mera vakila na nomu loloma vakailiuliu, kivei ira?

Ena gauna cava o a raici ira kina na goneyalewa ena nomu kalasi ni ra tokoni ira voli na iliuliu ni Lotu—oka kina o ira na lewe ni nodra mataveiliutaki ni kalasi? Na veika cava soti era sa sotava oti e rawa ni ra veiwasei kina vakaiira?

Wilika ena yalomasumasu na ivolanikalou kei na ivurevure eso oqo. Na cava ena vakauqeti ira na goneyalewa mera tokoni ira kina na nodra iliuliu ni Lotu?

Lako Yani 17:8–12 (Nodrau a taura cake tu na ligai Mosese o Eroni kei Uri)

V&V 21:1–6; 124:45–46 (O ira era rogoca na nodra vosa na italai ni Turaga era na vakalougatataki)

1 Nifai 18:8–20; V&V 84:23–25 (iVakaraitaki ni tamata era a besetaki ira na nodra iliuliu)

1 Tui 17:8–16; 2 Tui 5:1–14 (iVakaraitaki ni tamata era muria na nodra ivakasala na italai ni Turaga)

Henry B. Eyring, “Kacivi Mai Vua na Kalou ka Tokoni Mai Vei Ira na Tamata,” Ensign se Liaona, June 2012, 4--5

Russell M. Nelson, “Tokoni Ira na Parofita,” Ensign se Liaona, Nove. 2014, 74--77

James E. Faust, “Kacivi ka Digitaki,” Ensign se Liaona, Nove. 2005, 53–55

Veivakavulici ena ivakarau ni iVakabula

A kacivi ira ka tabaki ira na iliuliu na iVakabula mera dusimaka ka lewa na Nona Lotu (raica na Maciu 10:1–5). O na rawa ni vukei ira vakacava na goneyalewa mera dau vakavinavinakataki ira na sa kacivi mera qaravi ira ka vukei ira?

Vidio: “Let Us Teach”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Vola na ulutaga ni lesoni oqo ena vava ni volavola, ka kerei ira na goneyalewa mera vakasamataka e so tale na vosa ka tautauvata na kena ibalebale kei na tokona. Mo qai sureti ira mera vola ena vava ni volavola na yacadra na iliuliu ena tabanalevu, oka kina o ira na peresitedi ni iSoqosoqo ni Veivukei, Goneyalewa, Lalai, kei na kalasi ni Goneyalewa. Na cava era sa cakava tiko na goneyalewa mera tokoni kina o ira oqo?

• Kerei ira na goneyalewa mera dui wilika yadua na Lako Yani 17:8–12, ka qai sureta e dua vei ira me talanoataka ena nona vosa ga vakaikoya e dua na kena ivakaleka. Eda semati vakacava ki na italanoa oqo ni da tokoni ira tiko na noda iliuliu ni Lotu? Eda sa vakataki rau vakacava o Eroni kei Uri ni da tokoni ira na noda peresitedi ni kalasi kei ira na iliuliu tale eso?

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na goneyalewa mera kila deivaki na cava na ibalebale ni tokona na iLiuliu ni Lotu. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

• Ni se bera na kalasi, sureti ira na goneyalewa me ra wilika na vosa nei Peresitedi Russell M. Nelson “Tokoni Ira na Parofita” ka vakavakarau mai mera wasea e dua na ka mai na vosa ka vakauqeti ira me ra tokoni Peresitedi Thomas S. Monson.

• Wasei ira vakailawalawa na lewe ni kalasi, ka lesia vei ira na ilawalawa yadua e dua na iwase mai na vosa nei Peresitedi James E. Faust “Kacivi ka Digitaki” se Vunau kei na Veiyalayalati 124:45–46. Kerei ira mera vakasaqara na veivakalougatataki sa yalataki tu kivei ira era tokoni ira na nodra iliuliu kei na veivunauci kivei ira era sega. Sureti ira mera wasea na veika era sa raica rawa. Kevaka era railesuva na vosa, kerea mera wasea na italanoa mai na vosa e vakaraitaka tiko na veivakalougatataki kei na veivunauci oqo.

• Sureta eso vei ira na goneyalewa mera vakaraica e dua na ivakaraitaki ni so na tamata ena ivolanikalou era a vakanadakui ira na nodra iliuliu ni matabete, me vakataki Leimani kei Lemueli (raica na 1 Nifai 18:9–14) kei ira na luvei Isireli (raica na V&V 84:23–25). Kerei ira na vo ni goneyalewa mera vakasaqara na tamata era a muri ira na italai ni Turaga, me vakataka na yada mai Sarifaci (raica na 1 Tui 17:8–16) kei Neamani (raica na 2 Tui 5:8–14). Kerei ira mera wasea na italanoa oqo ka vakamacalataka na ka era vakavulica na italanoa oqo me baleta na isau ni nodra vakanadakui se nodra rokovi na iLiuliu ni Lotu.

• Sureti ira na goneyalewa mera wilika na itukutuku nei Peresitedi Henry B. Eyring “Kacivi mai vua na Kalou ka Tokoni mai vei ira na Tamata,” mera raica kina na ivakaraitaki ni sala eda tokoni ira kina na noda iliuliu ni Lotu. Kauta mai na ilavelave ni mekasini ni Lotu, ka kerei ira na goneyalewa mera vakasaqara ka wasea na iyaloyalo ena mekasini e tukuna tiko na sala era tokoni kina na iLiuliu ni Lotu. Na cava era rawa ni kaya na goneyalewa kera rogoca e dua ni vosa vakacacana e dua na nodra iliuliu? Na cava era dau cakava mera tokoni ira kina na nodra iliuliu, oka kina na nodra mataveiliutaki ni kalasi? Sureta na peresitedi ni kalasi me wasea na nona nanuma me baleta na nona veikacivi kivei ira na goneyalewa e qarava.

Kerei ira na goneyalewa mera wasea na veika era sa vulica nikua. Era sa kila deivaki beka na ibalebale ni nodra tokoni na iliuliu ni Lotu? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ni o vakarautaki ira na lewenikalasi me ra saumi taro, o na vinakata mo tukuna vei ira ni bera ni wiliki se vakavulici e dua na ka ni o na kerea tiko na nodra vakasama ni oti na nomu vakamacala. ... Me kena ivakaraitaki oqo, e rawa ni o kaya, ‘Ni vakarorogo mai niu wilika na tikina oqo mo ni qai solia mai na nomuni dui vakasama e na veika e vakauqeti kemuni’ se ‘Ni sa wiliki tiko na tiki ni ivolanikalou oqo, raica mada ke sa matata vei iko na ka e tukuna tiko na Turaga me baleta na vakabauta’” (Veituberi, Me iLutua ni Noda Bula, [1999], 80).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa mera vakasamataka na sala mera bulataka kina na veika era sa vulica nikua. Me ivakaraitaki, sa rawa ni ra:

• Masulaki ira na nodra iliuliu ni Lotu.

• Vakavinavinakataka e dua na iliuliu ni Lotu era nanuma ni sa vakarabailevutaka na nodra veikacivi.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ni macawa mai oqo.