Me'u na ciqoma vakacava na kaukauwa kei na veivakalougatataki ni matabete ki na noqu bula?

Ena matabete, sa rawa me da taura kina na cakacaka vakalotu ni veivakabulai, ka okati kina na papitaiso kei na veivakadeitaki kei na veicakacaka vakalotu ni valetabu ka vauca vata me tawamudu na noda veimatavuvale. Ni maroroi na veiyalayalati e sema ki na veicakacaka vakalotu oqo ena kauta mai na kaukauwa ni matabete— na kaukauwa ni Kalou—ki na noda bula. Sa rawa meda kila ni sa vakayaco-ka tiko na kaukauwa oqo ki na noda bula ni da sa veivutuni vakaidina ka ciqoma na veivosoti, ka yaco meda kidava tiko na veivakauqeti kei na veidusimaki ni Yalo Tabu, ka vakaukauwataki mai na cakacaka vakalotu ni kosipeli. Mai na matabete sa rawa talega vei keda meda ciqoma na veivakalougatataki duatani ni veikaroni kei na veivakabulai, okati kina na veivakalougatataki ni tama kei na veivakalougatataki vakapeteriaki. Na yalayala ena veivakalougatataki oqo eda na kila ga ena noda vakabauta tiko.

Mo vakarautaki iko vakayalo

O sa raica vakacava na kaukauwa ni matabete ena nomu bula ni ko maroroya tiko na nomu veiyalayalati? E tiko beka e so na ka a yaco ko na via wasea kei ira na goneyalewa?

Era sa vakalougatataki oti beka vakacava mai vei ira na matabete na goneyalewa ena nomu kalasi? Na cava o rawa ni cakava me vukea mera kila na kaukauwa ni matabete ki na nodra bula?

Vakadeitaka vei ira na goneyalewa ni rawa vei ira mera rawata na veivakalougatataki ni matabete veitalia ga se cava e yaco. E rawa ni yaco mai vei ira na lewe ni matavuvale, iliuliu ni matabete, kei ira na dauveituberi vakavuvale na veivakalougatataki oqo.

Ni ko vakavakarau tiko, vulica ena yalomasumasu na veiivolanikalou kei na ivurevure oqo. Na cava o vakila ni na rawa me vakaibalebale vei ira na goneyalewa?

Maciu 3:1–6, 13–17; Cakacaka 3:1–10; Mosaia 18:7–18; 3 Nifai 18:1–5 ( Na sala e vakalougatataki keda kina na matabete)

Russell M. Nelson, “Na Vua ni Kaukauwa Vakamatabete,” Ensign se Liaona, Me 2016, 66–69

Dallin H. Oaks, “Na Dodonu ni Matabete ena Matavuvale kei na Lotu, ” Ensign se Liaona, Nove. 2005, 24–27

Neil L. Andersen, “Kaukauwa e Tiko ena Matabete,,” Ensign se Liaona, Nove. 2013, 92–95

Carole M. Stephens, “Eda Kila Beka na Ka sa Tu Vei Keda?” Ensign se Liaona, Nove. 2013, 12–14.

“Veivakalougatataki ni Matabete Vei Keda Kece: iSema Sega ni Cavuka Rawa kei na Matabete,” Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 141–61

Vidio: “Blessings of the Priesthood”

Veivakavulici ena ivakarau ni Turaga

Sa sureti ira tu na daumuri Koya na iVakabula mera vakadinadinataka, ia ni ra vakayacora, a tara na yalodra na Yalotabu. Na veika cava soti era sa sotava oti na goneyalewa ena matabete e rawa ni ra veiwaseitaka vakaiira?

Vidio: “Vakayagataka na iVolanikalou”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Ke rawa, kauta mai ki na kalasi e dua na terea lala ni sakaramede. Sureti ira na goneyalewa mera wasea na nodra vakasama ena sala e vukei ira kina na yalayala era vakayacora ena sakaramede ena kau mai ni kaukauwa ni matabete ki na nodra bula kei na nodra vale.

• Sureti ira na goneyalewa mera lako mai ki na vava ni volavola ka droinitaka se vola e dua na malanivosa ka vakaraitaka e dua na sala ka vakalougatataki koya kina na matabete. Ena loma ni lesoni, mera droinitaka se vola na goneyalewa e so na malanivosa ena gauna vata era vulica tiko kina eso tale na veivakalougatataki ka na yaco mai ena vuku ni matabete.

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na goneyalewa mera kila deivaki na iwalewale e vakalougatataki ira kina na matabete. Muria na veivakauqeti ni Yalotabu, digitaka e dua se sivia e ganita vinaka na nomu kalasi:

• Lesi ira yadua na goneyalewa mera wilika e dua na italanoa vakaivolanikalou ka vakaraitaka na sala e vakalougatataki keda kina na matabete (me ivakaraitaki, raica na ivolanikalou era tuvai tu ena ituvatuva oqo). Sa rawa talega vei ira na goneyalewa me ra raica na italanoa ni rua na goneyalewa lalai ena vosa nei Peresitedi Russell M. Nelson “Na Vua ni Kaukauwa Vakamatabete.”  Kerei ira na goneyalewa mera talanoataka tale na italanoa ena nodra vosa ga vakataki ira ka vakamacalataka na veivakalougatataki e lako mai ena matabete. Vakayaloqaqataki ira talega mera wasea na nodra ivakaraitaki ni veivakalougatataki era sa ciqoma mai na matabete. Vakayaloqaqataki ira na goneyalewa yadua mera vola, ena nodra ivolaniveisiga se ki na ivolalailai Noqu Matavuvale na italanoa ni kena a vakalougatataka nona matavuvale na matabete. Sa rawa vei ira na goneyalewa mera tarogi ira nodra itubutubu se dua tale ena matavuvale me veivuke.

• Kauta mai ki na kalasi e dua na ivakatakarakara e matataka e dua na veivakalougatataki ka lako mai ena matabete, me vakataka e dua na iviu me matataka na kaukauwa ni sasabai. Tarogi ira na goneyalewa se ivakatakarakara cava tale e rawa ni matataka na veivakalougatataki tale eso ni matabete. Wilika vakalasi na veisiko nei Sisita Carole M. Stephens kivei ira na marama e Honduras ka semati ena nona vosa “Eda Kila Beka na Ka sa Tu Vei Keda?” Na veivakalougatataki cava soti era sa marautaka rawa o ira na marama oqo kei na nodra matavuvale? Na ikuri ni veivakalougatataki cava tale e rawa ni ra ciqoma mai na matabete? Na cava e rawa ni ra cakava na goneyalewa mera rawata kina na veivakalougatataki ni matabete ena nodra matavuvale ena gauna oqo kei na nodra matavuvale mai muri?

• Wasewasea na iwase “Veivakalougatataki ni Matabete Vei Keda Kece: iSema Sega ni Cavuka Rawa kei na Matabete” ena Luvequ Yalewa ena Noqu Matanitu ka sureti ira na goneyalewa mera vakaraica na italanoa eso ka tiko kina na tamata era a vakalougatataki ena kaukauwa ni matabete. Sureti ira na goneyalewa mera wasea ki na vo ni kalasi e dua na italanoa ka vakaibalebale vakalevu vei ira.

• Sureti ira na goneyalewa mera sarava na “Blessings of the Priesthood” ka vola na veivakalougatataki e vakamacalataka tiko o Elder Hales ni lako mai ena cakacaka vakalotu ni matabete. Kerea mera wasea na veika era sa vola ka veivosakitaka na ka era rawa ni cakava mera marautaka kina na veivakalougatataki oqo ena veisiga. Na veika cava era rawa ni wasea baleta na kena sa vaqaqacotaki ira tikoga na kaukauwa ni matabete?

• Kerei ira na goneyalewa mera wilika na itukutuku oqo ka vakaraica na sala e vakalougatataki ira kina na matabete: “Kemuni na marama, eso era na tovolea mera rawai iko baleta ni o sega ni tabaki ki na matabete, mo lailai sobu. Era cala o ira oqori, ka ra sega ni kila na kosipeli i Jisu Karisito. Na veivakalougatataki ni matabete e vakarautaki tu me baleti ira na tagane kei na yalewa buladodonu. Eda na ciqoma kece na Yalo Tabu, rawata na ivakatakila yadua, ka ciqoma na edaumeni ena valetabu, eda na curu mai kina ka ‘vakaiyaragi’ tu ena kaukauwa. Na kaukauwa ni matabete e veivakabulai, veitaqomaki, ka vakaukauwataka na veika dodonu kecega me vorata na kaukauwa ni butobuto. Na ka bibi duadua, ni rau na ciqoma ga na taucoko ni matabete ka lewe tu ni cakacaka vakalotu cecere duadua ena vale ni Turaga na tagane kei na yalewa erau sa duavata” (Sheri Dew,ena Luvequ Yalewa ena Noqu Matanitu, 144). Kerei ira na goneyalewa mera wasea na ivakaraitaki ni veivakalougatataki oqo ena nodra bula se ena nodra bula o ira era kilai ira.

Kerei ira na goneyalewa me ra wasea na veika era sa vulica nikua. Era sa kila deivakicake na sala e vakalougatataki ira kina na matabete? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Kua ni rerevaka na vakanomodi. Era dau gadreva na noda itokani na gauna mera vakasamataka kina na isau ni nodra taro se mera dau vakamacalataka kina na veika era vakila. E rawa ni o cegu vakalailai ni oti na nomu taroga e dua na taro, ni oti na kena wasei mai e dua na ka eda sotava vakayalo, se ena gauna e dredre tiko kina na nona vakamacalataki koya e dua” (Na Veituberi, Me iLutua ni Noda Bula, [1999], 77).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me ivakaraitaki, e rawa ni ra:

• Kerei ira nodra matavuvale se itokani mera wasea nodra ivakadinadina ni matabete kei na kena a vakalougatataka nodra matavuvale ka vakayaco-ka ki na nodra digidigi ena veisiga.

• Vakasaqara na ivakaraitaki ena loma ni macawa ena kena cakacaka na kaukauwa ni matabete ki na nodra bula.

• Vakavinavinakataki ira na lewe ni matabete ka ra sa vakayaco-ka vinaka oti ki na nodra bula.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ni macawa mai oqo.