Matabete kei na iDola ni Matabete

“Raica sa soli na lewa ni matanitu ni Kalou e vuravura vua na tamata” (Vunau kei na Veiyalayalati 65:2).

Na ituvatuva ena tabana oqo ena vukea na nodra kila vakavinaka na matabete na goneyalewa kei na sala e rawa ni vukei ira kina ena gauna oqo ka vakakina ena nodra veitavi kece tale mai muri vakaluvena yalewa na Kalou. Sa rawa mera vaqaqacotaki vakalevu na goneyalewa ka rawata na veivakalougatataki ni bula vakacerecerei ni ra vakabauti Jisu Karisito tikoga ka taura na kaukauwa ni Kalou mai na cakacaka vakalotu ni matabete era sa ciqoma kei na veiyalayalati era sa maroroya. Vukei ira mera kila ni matabete sai koya na kaukauwa ni Kalou ka vakayagataki me vakalougatataki ira kece vakatautauvata na Luvena, na tagane kei na yalewa. Vukei ira mera kila vakavinaka ni gauna era veiqaravi kina ena Lotu, era na cakacaka tiko ena nodra veidusimaki na iliuliu e tiko na nodra idola ni matabete. Ena vuku ni ka oqo, era sa vakaitavi kina ena cakacaka ni matabete.

iTuvatuva mo Digidigi mai kina ena Vula Oqo

• Na cava na matabete?

• Na cava beka na noqu itavi ena cakacaka ni matabete?

• Na cava soti na idola ni matabete?

• Meu na ciqoma vakacava na kaukauwa kei na veivakalougatataki ni matabete ki na noqu bula?

• Na cava e kena ibalebale meu tokoni ira tiko na noqu iliuliu ni Lotu?

iTukutuku vei Qasenivuli

Dau nanumi ira na goneyalewa era sega ni tiko kei na matabete ena nodra itikotiko se e sega soti ni dau na ivakaraitaki vinaka ena nodra bula. Sa ka bibi me vakavulici na ka yaga sara, ia ena vakanananu ni veituvaki kece vakaoqo.

Muavata

Vakasamataka na navuci ni so na itaviqaravi ka salavata kei na veika era sa vulica tiko na itabagone. Na mataveilawa ni iTaviqaravi ni iTabagone sa vakarautaki tu me vukei iko. E vuqa na itaviqaravi ni vuli ena ituvatuva oqo e rawa talega me itaviqaravi vinaka ni Muavata. Cakacaka vata kei ira na mataveiliutaki ni kalasi me digitaki ka tuvai na itaviqaravi ena vaqaqacotaka na veika era a vulica na goneyalewa ena Sigatabu.