Na cava soti na idola ni matabete?

Na idola ni matabete sai koya na kena lewa ka sa solia tu vei ira na iliuliu ni matabete o Tamada Vakalomalagi me dusimaka na vakayagataki ni Nona matabete e vuravura. E tu vei Jisu Karisito na idola taucoko ni matabete. “Na idola ni cakacaka me vakayacori ena gauna oqo,” sa ka bibi sara me muataka na Lotu oqo, a vakatikori taumada vei Parofita Josefa Simici (raica naV&V 110:16). Nikua era sa taura tu na idola oqo o iratou na lewe ni Mataveiliutaki Taumada kei na Kuoramu ni iApositolo Le Tinikarua. Sa soli talega na idola oqo vei iratou na Mataveiliutaki ni Vitusagavulu; peresitedi ni valetabu, kaulotu, iteki, kei na tikina; bisopi; peresitedi ni tabana; kei ira na peresitedi ni kuoramu—oka kina o ira na peresitedi ni kuoramu ni Matabete i Eroni.

Mo vakarautaki iko vakayalo

Vakasamataki ira mada na iliuliu ni matabete ena nomu bula. O a rawata vakacava na ivakadinadina ni nodra a kacivi mai vua na Kalou?

Na cava o rawa ni vakayacora mo vukei ira kina na goneyalewa mera kila na bibi ni idola vakamatabete ena Lotu? Ena veisala cava soti era sa vakalougatataki kina na goneyalewa ena nodra veiqaravi mai vei ira na taura tu na idola vakamatabete? E vakauqeti vakacava na nodra veiqaravi na goneyalewa mai na nodra veiliutaki na matabete e tiko na nodra idola?

Wilika ena yalomasumasu na veiivolanikalou kei na ivurevure oqo. Na cava ena vukei ira na goneyalewa ena nodra kila na veika me baleta na idola ni matabete?

Maciu 16:18–19 (Sa yalataki vei Pita na idola ni matanitu ni Kalou)

Mosaia 25:19 (Sa vakadonui Alama o Mosaia me tauyavutaka na Lotu)

V&V 65:2 (E gadrevi na idola ni matabete me toso kina ki liu na kosipeli)

V&V 124:123, 142–43 (Sa tu vei ira na Peresitedi na idola me liutaki kina na vakayacori ni ilesilesi)

V&V 132:7 (Na Peresitedi ni Lotu sai koya na tamata duadua ga e delai vuravura ka vakadonui me vakayagataka na idola kece ni matabete)

Gary E. Stevenson, “Evei na Ki kei na Lewa ni Matabete?” Ensign se Liaona, Me 2016, 29–32

Boyd K. Packer, “Na Le Tinikarua,” Ensign se Liaona, Me 2008, 83–87.

Dallin H. Oaks, “Na iDola kei na Lewa ni Matabete,” Ensign se Liaona, Me 2014

“iDola ni Matabete,” Tudei ena Vakabauta (2004) 78–79

Vidio:“Na Vakalesui mai ni Idola ni Matabete”

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Taroga vei ira na goneyalewa,“Na cava na idola ni matabete?” Mo qai wilika vei ira na goneyalewa na parakaravu ena itekivu ni ituvatuva oqo, ka taroga na vuna e veivukei kina na vosa idola me vakamacalataka kina na ivakarau tudei e vakayagataki kina na matabete.
Sureti ira na goneyalewa mera vakanananutaka ka sauma na veitaro me vakaiira oqo: Na cava na idola ni matabete? O cei so e taura tu na idola ni matabete ena Lotu? Vakauqeti ira mera vaqara na kena isau ena “iDola ni Matabete,” Tudei ena Vakabauta, 78–79.

Vulica vata

Era na vukei ira na goneyalewa ena nodra kila vakavinaka cake na veika me baleta na idola ni matabete na veitaviqaravi e ra. Muria na veivakauqeti ni Yalotabu, digitaka e dua se sivia ka na ganita vakavinaka na nomu kalasi:

Ena nona vosa “Evei na Ki kei na Lewa ni Matabete?” E vakamacalataka o Elder Gary E. Stevenson na ki ni matabete ena nona vakatauvatana ki na ki ni motoka. Ni ra wilika na goneyalewa na vosa vakatauvata oqo, dusimaki ira me ra raica na ka e matataka tiko na vakatauvata oqo baleta na matabete, ki ni matabete, kei ira na iliuliu ni matabete era taura tu na kena ki. Ena sala cava e vakatura tiko o Elder Stevenson e rawa vei ira na itabagone me ra “kunea na ki”? E rawa vakacava me da muria na nona ivakasala? Sureti ira na goneyalewa me ra vakasamataka na nodra yavu ni veilesoni ka rawa ni ra vakayagataka me ra vakamacalataka kina na ki ni matabete.
Vola ena vava ni volavola na veivolanikalou me raici oqo: Maciu 16:18–19; V&V 124:123, 142–43; V&V 132:7. Sureti ira na goneyalewa mera vola na veiivolanikalou yadua ka vola e dua na yatuvosa ivakaleka ni ka era sa vulica baleta na idola ni matabete mai na veitikina oqori. Kerei ira yadua na goneyalewa mera wilika yadua e cake na nodra ivakaleka, ka kerei koya kadua me vakilakila se ivolanikalou cava e vakalekalekataka tiko oya. Tarogi ira na goneyalewa se cava e bibi kina vei ira mera kila na veika me baleta na idola ni matabete e vuravura nikua.
Kerei ira na goneyalewa mera wilika na imatai ni tolu na parakaravu kei na italanoa ni veisiko ki na dua na lotu mai Denmark mai na vosa nei Peresitedi Boyd K. Packer “Na Le Tinikarua” : (se mera sarava na vidio“Na Vakalesui mai ni Idola ni Matabete“ ). Sureti ira mera veivakavulicitaka vakai ira na ka era vulica me baleta na idola ni matabete mai na veivosa oqo. Na veivakalougatataki cava sa nodra mai na nodra veiqaravi o ira era taura tu na idola ni matabete?
Sureti ira yadua na goneyalewa mera wilika na tikina e III ni vosa nei Elder Dallin H. Oaks “ Na iDola kei na Lewa ni Matabete” ka vola e dua na parakaravu lekaleka, me vakamacalataka kina ena nona vosa ga, na veika sa vulica baleta na idola ni matabete. Solia e dua na gauna vei ira na goneyalewa mera wasea na veika era sa vola ka taroga na veika baleta na idola ni matabete.

Kerei ira na goneyalewa me ra wasea na veika era sa vulica nikua. Era sa kila vakavinaka cake beka na veika me baleta na idola ni matabete? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu cake na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me ivakaraitaki, e rawa ni ra:

Vasaqara na sala eso era sa vakalougatataki kina mai na nodra veiqaravi o ira era vakaidola ni matabete.
Vakavulica e dua na lewe ni matavuvale mai na veika era sa vulica baleta na idola ni matabete.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Tuva e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica ena lesoni oqo.