Na cava beka na noqu itavi ena cakacaka ni matabete?

Na cakacaka ni matabete e oka vakalevu cake mai na nodra itavi na lewe ni matabete. Oqo na cakacaka ni Kalou—na cakacaka ni nodra vakalougatataki ka bula vakacerecerei na Luvena— era vakayacora o ira na Luvena daumaroroya na veiyalayalati. Era sa ka bibi na yalewa ena kena vakayacori na cakacaka ni matabete. Eda sa qaravi ira era vakaleqai tu, vakavulica na kosipeli, ka sureti ira na tamata kecega mera lako mai vei Karisito.

Mo vakarautaki iko vakayalo

O dau vakaitavi vakacava ena cakacaka ni matabete? Na cava o rawa ni wasea ena vukei ira kina na goneyalewa mera kila vinaka na nodra ilesilesi ena cakacaka ni Turaga?

Era raici ira tiko beka na goneyalewa ena nomu kalasi ni ra sa tiki yaga ni vakaitavi ena cakacaka ni matabete? Na veika cava era sa sotava ena cakacaka ni Turaga— ena nodra itikotiko, ena lotu, vata kei ira na itokani— era rawa ni veiwasei kina vakai ira?

Ni ko vakavakarau,vulica ena masumasu na ivolanikalou kei na ivurevure oqo. Na cava o vakila ni vakauqeti iko mo wasea vei ira na goneyalewa?

V&V 20:38–67 (Nodra itavi na lewe ni matabete)

Luke 8:1–3; Cakacaka 9:36–40; Roma 16:1–2 (iVakaraitaki ni veiqaravi vei ira na tamata)

Alama 56:47–48; 57:21; V&V 25:6–8; Mosese 5:11–12 (iVakaraitaki ni vunautaki ni kosipeli)

Luke 2:36–38; Joni 20:11–18; Alama 19:16–17 (iVakaraitaki ni nodra sureti na tamata mera lako mai vei Karisito)

Henry B. Eyring, “Na Dauveivakacegui,” Ensign se Liaona, Me 2015, 17–21

Dallin H. Oaks, “Na iDola kei na Lewa ni Matabete,” Ensign se Liaona, Me 2014

“iSoqosoqo ni Veivukei: Na Vakalesui Mai ni Dua na iVakarau Makawa,” Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 3–7

Vidio:“Sweet Is the Work”

Veivakavulici ena ivakarau ni iVakabula

A sureti ira na daumuri Koya na iVakabula mera vakadinadinataka, a qai tara na yalodra na Yalotabu ena gauna era vakayacora tiko kina. Na veika cava soti sa yaco vata vei iko kei ira na matabete ka rawa mo wasea vei ira na goneyalewa?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Vola ena vava ni volavola, “Na cava na nodra itavi na lewe ni matabete?” Kerei ira na goneyalewa mera vola na itavi e vuqa era rawa ni nanuma ka vola ena nodra lisi na itavi era raica mai na Vunau kei na Veiyalayalati 20:46–60. Sureti ira mera raica na itavi cava mai na lisi oqo era na wasea vata kei ira na cauravou.

• Na kalasi, me wilika na parakaravu ena itekivu ni ituvatuva oqo, ka sureti ira na goneyalewa mera vola ena vava ni volavola na vosa kei na malanivosa e vukea mera kila vinaka kina na cava na cakacaka ni matabete. Na isema cava era raica ena itoko ni Goneyalewa kei na nodra itavi na lewe ni matabete e tiko ena Vunau kei na Veiyalayalati 20:46–60?

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena vukea mera vakauqeti na goneyalewa mera vakaitavi ena cakacaka ni matabete. Mai na veivakauqeti ni Yalotabu, digitaka e dua se sivia ka na mana vinaka kina nomu kalasi:

• Ena Vunau kei na Veiyalayalati 20:53 kei na 59, eda vulica kina ni itavi ni matabete e okati kina na veitokani kei na veivaqaqacotaki vei ira na lewe ni Lotu ka sureti na tamata kecega me lako mai vei Karisito. Sureti ira na goneyalewa me ra railesuva eso na iwase ni vosa nei Peresitedi Henry B. Eyring “Na Dauveivakacegui.” Na cava e vakavuvulitaka o koya me baleta na ivakarau e rawa ni vukei keda kina na Yalo Tabu me da rokova tiko na noda veiyalayalati ka vakaitavi ena cakacaka ni matabete?

• Ni bera na kalasi, sureti ira na goneyalewa mera vulica mai e dua na marama— mai na ivolanikalou (me vakataki ira era vakaturi tiko ena ituvatuva oqo), ena itukutuku makawa ni Lotu, se mai na nodra dui matavuvale—era sa ivakaraitaki ni dauveiqaravi, vakavulica na kosipeli, se sureti ira na tamata mera lako mai vei Karisito. Ena itekivu ni kalasi, sureti ira mera wasea na veika era sa vulica mai. Ena sala cava era a vakaitavi tiko kina na marama oqo ena cakacaka ni matabete? Na cava era vakauqeti kina na goneyalewa ena italanoa oqo? Era raici ira vakacava ena cakacaka ni matabete?

• Na kalasi, me wilika na “iSoqosoqo ni Veivukei: Na Vakalesui Mai ni Dua na iVakarau Makawa.” Sureti ira na goneyalewa mera wasea na nodra nanuma me baleta na nodra itavi na yalewa ena cakacaka ni matabete. Ena veivakauqeti vakacava vei ira na goneyalewa mera vakaitavi ena cakacaka oqo nikua mai na nodra wilika na kedra itukutuku ni veika era sa cakava na yalewa ena itukutuku ni veigauna? Vakayaloqaqataki ira na goneyalewa mera dui wilika na vo ni Luvequ Yalewa ena Noqu Matanitu. Ke rawa, mo vakarautaka vei ira na kena ilavelave.

• Me wiliki vata na wase IV ni vosa nei Elder Dallin H. Oaks “Na iDola kei na Lewa ni Matabete,” ka kerei ira na goneyalewa mera wasea na tikina e vakauqeti ira. Ena veivakadonui nei bisopi, sureta e dua na sisita ena tabanalevu me vosa ki na kalasi ena kena a vagumatuataki koya cake na lewa ni matabete me vakayacora na nona veikacivi. Sa rawa mo sureta na sisita oqo ni se vo tu e vica na siga.

• Vakaraitaka e dua vei ira na vidio e vakaturi tiko ena ituvatuva oqo ka sureti ira na goneyalewa mera raica na sala era vakatavi tiko kina na marama ena vidio ena cakacaka ni matabete. E vakauqeti ira vakacava mera vakaitavi vakalevu cake ena cakacaka oqo na ivakaraitaki kei na nodra ivakasala na iliuliu ni Lotu ena vidio oqo? 

Kerei ira na goneyalewa me ra wasea na veika era sa vulica nikua. Era sa kila vinaka beka na sala mera vakaitavi ena cakacaka ni matabete? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ena nomu vakavakarau tiko mo veivakavulici ena yalomasumasu, o na tuberi beka mo vakabibitaka eso na ivakavuvuli. O sa na rawata beka na kila ni kedra vakaraitaki eso na vakasama. O na rawa ni kunea eso na ivakaraitaki, lesoni ivakaraitaki, kei na italanoa veivakauqeti ena veika rawarawa ni noda bula. Ena vakurabuitaki beka nomu vakila mo sureta e dua na tamata kilai tani me veivuke ena lesoni. E na rairai votu tale mai vei iko e so na veika o sa sotava oti mai ka rawa ni wasea vei ira na lewenikalasi” (Veituberi, Me iLutua Ni Noda Bula [1999], 54).

Vidio: “Using Visual Aids”

Sarava eso tale

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me ivakaraitaki, e rawa ni ra:

• Cakava e dua na ituvatuva mera vakayacora kina na nodra ilesilesi ena cakacaka ni matabete.

• Wasea vei ira nodra matavuvale na veika era sa vulica nikua baleta na cakacaka ni matabete.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ni macawa mai oqo.