Na cava na matabete?

Na matabete sai koya na kaukauwa kei na lewa tawamudu i Tamada Vakalomalagi. Mai na matabete oqo, a bulia ka lewa kina na Kalou na lomalagi kei na vuravura. Mai na kaukauwa oqo sa vakabulai ira kina na Luvena o Koya ka vakalagilagi ira vakalou. E solia vei ira na lewe ni matabete bula kilikili na lewa mera qarava na cakacaka vakalotu ni veivakabulai. Sa rawa mera ciqoma kece na luvena na Tamada Vakalomalagi na cakacaka vakalotu ka taura na kaukauwa kei na veivakalougatataki ni matabete.

Mo vakarautaki iko vakayalo

Na cava soti o kila tu me baleta na matabete? Na cava o vakauqeti mo vulica me baleta na matabete?

Era sa raica beka na goneyalewa na inaki ni matabete ki na nodra bula? Na cava o rawa ni vakayacora ni bera na kalasi mo rawa ni kila kina na veika era kila na goneyalewa me baleta na matabete? Ena veivakauqeti vakacava ki na ka o via vakavulica?

Ni ko vakavakarau tiko, vulica ena yalomasumasu na ivolanikalou kei na ivurevure eso oqo. Na ivolanikalou kei na vosa cava soti era na vukei ira na goneyalewa ena nodra kila se cava na matabete?

Iperiu 5:4; V&V 107:1–5 ; Yavu ni Vakabauta 1:5 (E dodonu me kacivi mai vua na Kalou na tamata, ka tabaki mai vua e dua ka tu vua na dodonu ni lewa)

V&V 84:17–22 (Na kaukauwa ni bula vakalou e dau vakatakilai ena cakacaka vakalotu ni matabete)

V&V 121:34–46 (E dau cakacaka ga na dodonu ni lewa ni matabete ni maroroi na ivakavuvuli ni bula dodonu)

Henry B. Eyring, “Lako Vata kei AuEnsignseLiaona,Me 2017, 82–85

M. Russell Ballard, “Oqo na iNaki kei na Lagilagi ni Noqu Cakacaka,” Ensign se Liaona, Me 2013, 18–21

Neil L. Andersen, “Kaukauwa e Tiko ena Matabete,” Ensign se Liaona, Nove. 2013, 92–95

“Matabete,” Tudei ena Vakabauta (2004), 76–83

“Matabete i Eroni,” Tudei ena Vakabauta, 81

“Matabete i Melikiseteki,” Tudei ena Vakabauta, 82

Vidio: “Sa Vakarautaki Tu na Veivakalougatataki ni Matabete Vei Ira Kecega na Tamata”

Veivakavulici ena ivakarau ni iVakabula

A vakayagataka na ivolanikalou na iVakabula me veivakavulici ka vakadinadinataka kina na Nona ilesilesi. E vakavulici ira na Nona tisaipeli mera dau vuki ki na ivolanikalou me baleta na isaunitaro ka vakakina ena ciqomi ni kaukauwa vakayalo. Na sala cava soti sa rawa ni o vakauqeti ira kina na goneyalewa mera vuki ki na ivolanikalou mera kunea kina na isau ni nodra vakatataro kei na ibolebole?

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Tarogi ira na goneyalewa se cava era kila tu me baleta na matabete. Wasea vei ira na parakaravu ena itekitekivu ni itukutuku oqo, ka qai tarogi ira se cava na ikuri ni dina era sa vulica mai kina me baleta na matabete.
Sureti ira na goneyalewa, vakalasi se yarurua, mera matanataka e dua na veivosaki ka taroga kina e dua na itokani mai na duatani tale na matavakabauta se cava na matabete. Era na vakamacalataka vakacava na goneyalewa na matabete? Vakayagataka na itukutuku ena itekitekivu ni lesoni me vukea na nodra kila se cava na matabete se na vidio “Sa Vakarautaki Tu na Veivakalougatataki ni Matabete Vei Ira Kecega na Tamata” ka taroga na ikuri ni dina cava era sa vulica me baleta na matabete.

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, sa rawa ni ra:

Vakarautaka ka vakavulica na veika e baleta na matabete ena dua na lesoni ni lotu vakamatavuvale.
Vola ena nodra ivolaniveisiga e dua na ka era sa vulica me baleta na matabete.

Vulica vata

Na veitaviqaravi kece e ra ena vukei ira na goneyalewa ena nodra kila deivaki na veika me baleta na matabete. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Ena nona vosa “‘Lako Vata kei Au’,” a wasea kina o Peresitedi Henry B. Eyring e vica na ivolanikalou e kaya o koya ni rawa “ni vakatitobutaka na noda qoroya na matabete tabu” (Ensign se Liaona, Me 2017, 82–83). Kerei ira yadua na goneyalewa mera vulica e dua na ivolanikalou oqo ka qai tukuna ki na kalasi na ka sa vulica me baleta na matabete. Solia e vica na miniti vei ira na goneyalewa me ra vakasamataka vakatitobu na taro nei Peresitedi Eyring ena parakaravu e tekivu tiko ena “E dua na ivakarau me da bokaca kina na ivakamacala vakaoqo.” Ena vakauqeti ira vakacava na taro oqo?
Wasei ira vakailawalawa na goneyalewa. Lesia ki na ilawalawa yadua mera raica e dua se rua na ivolanikalou e vakaturi tiko ena ituvatuva oqo se dua na tiki ni vosa nei M. Russell Ballard “Oqo na Noqu iNaki kei na Lagilagi ni Noqu Cakacaka,” ena veika era sa vulica me baleta na matabete. Sureti ira mera wasea na veika era sa vakauqeti kina. Na cava soti era sa sotava oti vata kei ira na matabete na goneyalewa?
Kerei ira na goneyalewa mera tuva na sala eso era rawa kaukauwa kina na tamata e vuravura (ilavo, vuli, irogorogo, irairai totoka, kei na so tale). Wilika vata na Vunau kei na Veiyalayalati 121:36–46, ka kerei ira na goneyalewa mera tuva na ivakavuvuli era yavutaki kina na kaukauwa ni matabete. Veidutaitaka na sala e rawata kina o vuravura na kaukauwa mai na kena ena sala ni Turaga. Na sala cava ni kena kilai na ivakavuvuli oqo e sa tara na nodra raica vakacava na goneyalewa na matabete kei ira na lewe ni matabete?
Sureta e so vei ira na goneyalewa mera wilika na veika e baleta na Matabete i Eroni ena Tudei ena Vakabauta (tabana e 81–82), ka sureta eso tale mera wilika na veika e baleta na Matabete i Melikiseteki (tabana e 82–83). Kerei ira yadua na goneyalewa mera wasea e dua na ka era sa vulica mai na ka era sa wilika. Na cava era nanuma ni sa rui bibi kina vei ira na goneyalewa mera kila na veika e baleta na matabete?
Sureti ira yadua na goneyalewa mera wilika e dua na tiki ni vosa nei Elder Neil L. Andersen “ Kaukauwa ena Matabete.” Mo qai kerei ira yadua na goneyalewa me wasea ki na vo ni kalasi na veika e sa vulica me baleta na matabete kei na kena ibalebale vua.
Kerei ira na goneyalewa mera wilika na wase ka kena ulutaga tiko na “Kuoramu ni Matabete” ena draunipepa 77 ni Tudei ena Vakabauta. Na cava soti e rau tautauvata kina na ituvatuva ni kuoramu ni Matabete i Eroni kei na kalasi ni goneyalewa? Na cava soti na kedrau duidui? Vukei ira na goneyalewa mera raica ni ra sa tuvai tu me vaka na ivakarau ni matabete na marama ena Lotu (raica na Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei [2011], 138).

Kerei ira na goneyalewa mera wasea na veika era sa vulica nikua. Era sa kila deivaki beka na veika e baleta na matabete? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?