Cava na vuna e vinakata kina na Turaga me’u tiko bulabula?

Na ituvaki ni bula vinaka esa dua na tiki bibi ni bula rawati koya. Na taqomaki ni noda ituvaki ni bula ena vakatarai keda meda rawata taucoko na noda sasaga tabu ka qaravi ira vakavinaka cake na tani. Na sala eda qarava kina na yagoda e vakayarayarataka na ituvaki ni noda bula vakayalo kei na noda sasaga ni rawata na veituberi mai vua na Yalo Tabu. Me rawa ni da maroroya na ituvaki ni noda bula, sa dodonu meda vakamuria na Vosa ni Vuku, kania na kakana bulabula, vakaukauwa yago wasoma, ka moce ena kena gauna donu.

Mo vakarautaki iko vakayalo

E sa vakatarai iko vakacava mo qarava vakavinaka sara na Turaga na maroroi tiko ni nomu ituvaki ni bula? Na veivakalougatataki cava tale o sa ciqoma ena nomu cuqena voli mo bulataka e dua na ituvaki ni bula vinaka?

Na veitemaki cava era sotava na goneyalewa e rawa ni vakacacana na ituvaki ni nodra bula? Na veivakalougatataki cava soti era na ciqoma ni ra vakamuria na lawa ni tiko bulabula ni Turaga?

Na ivolanikalou kei na ivurevure cava tale ena vukei ira na goneyalewa ni kila deivaki na vuna e vinakata kina vei keda na Turaga meda bulabula?

1 Koronica 6:19 (Na yagoda sa vale ni Kalou)

V&V 88:124 (iDusidusi ni kena vakabulabulataki tiko na yagoda kei na vakasama)

V&V 89 (Na Vosa ni Vuku)

Thomas S. Monson, “Vakavuvuli kei na Yalayala,” Ensign se Liaona, Nove. 2016, 78-79

Boyd K. Packer, “The Word of Wisdom: The Principle and the Promises,” Ensign, Me 1996, 17–19

“Tiko Bulabula ni Yago kei na Vakasama,” Me iSakisaki ni iTabagone (2011), 25–27

Vidio: “A Brand New Year 2010: Physical Health”, “Leave the Party”

7:29

6:26

Veivakavulici ena ivakarau ni iVakabula

E veisureti tiko na iVakabula vei ira era dau muri Koya me ra cakacaka ena vakabauta ka bula voli ena dina e vakavulica o Koya. O na rawa ni sureti ira vakacava na goneyalewa o vakatavulica mera cakacaka ena vakabauta ka maroroya na nodra vakasama kei na yagodra me bulabula? O na rawa ni vakauqeti ira vakacava mera vakasaqara na taukeni ni bula voli vakayalo ka vakayago me vaka e vakarota na Turaga?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Vakaraitaka veitikivi e dua na iyaloyalo ni goneyalewa kei na iyaloyalo ni dua na valetabu. Tarogi ira na goneyalewa se vakataka vakacava na valetabu na yagodra (raica na 1 Korinica 6:19). Sureti ira yadua na goneyalewa mera veivosakitaka vata kei na dua tale ena kalasi na vuna e bibi kina na maroroi ni yagoda kei na vakasama me savasava ka bulabula.
Vola ena vava ni volavola “Cava na vuna e vinakati keda kina na Turaga meda bulabula?” Sureti ira na goneyalewa mera wasea na isaunitaro e rawa ka vakaraica na ikuri ni isaunitaro ena gauna taucoko ni lesoni.

Vulica vata

Na itaviqaravi yadua e ra ena vukei ira na goneyalewa ni kila deivaki na vuna e vinakati ira kina na Turaga mera bulabula. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Na veivakalougatataki e na veika e sotavi ni vakamuri na iVunau ni Vosa ni Vuku e rawa ni vakauqeti ira na cauravou me ra gumatua e na iyalayala ni bulataki ni lawa oqo. E rawa ni o wasea e dua na ka e sotavi ena nomu bula se mai na vosa nei Peresitedi Thomas S. Monson “Principles and Promises.” E rawa tale ga ni o vakaraitaka na vidio ni “Leave the Party.” Na goneyalewa e rawa ni ra wasea na veika e sotavi e na nodra bula se mai na nodra bula na lewe ni nodra matavuvale.
Sureti ira na goneyalewa mera cakava eso na lisi ni veika era sa qarava tiko ena maroroi ni nodra vakasama kei na yagodra me bulabula. Wasea vakailawalawa na kalasi, ka lesia na ilawalawa yadua me vakasaqara e dua vei ira na ivolanikalou oqo, vakaraici ni ivakasala me vukei ira ena maroroi ni nodra vakasama kei na yagodra me bulabula: V&V 88:124; V&V 89:5–9; kei na V&V 89:10–16 (kevaka era gadreva na veivuke ena kilai deivaki ni ivakasala ena V&V 89, raica na Tudei ena Vakabauta,tabana 94–96). Mera qai ripotetaka na ilawalawa yadua na veika era sa kunea. Kerei ira na goneyalewa mera railesuva na nodra lisi ka vakadeuca ke tiko eso tale na ka e rawa ni ra cakava me maroroya na ituvaki ni nodra bula. Sureti ira na goneyalewa e lomavinaka mera cakava me wasea eso na veisau era sa nanuma mera cakava ka na vakalougatataki ira oqo kei na gauna mai muri.
Ke vinakati, railesuva vakalekaleka na Vosa ni Vuku me vakadeitaki kina ni ra sa kila deivaki na goneyalewa na ivakasala ni Turaga me baleta na ituvaki ni bula vakayago. Vola ena vava ni volavola, “Cava na vuna e solia kina vei keda na Turaga na Vosa ni Vuku?” Kerei ira na goneyalewa mera vakatututaka eso na isaunitaro. Sureti ira na goneyalewa mera wilika na V&V 89:18–21 mera raica kina na yalayala e cakava na Turaga kivei ira era muria na Vosa ni Vuku. Era sa vakataucokotaki vakacava na yalayala yadua oqo ki na noda bula? (Kevaka era gadreva na veivuke ni kila deivaki na veiyalayala oqo, vakatututaka mera vagolei ki na ivakamacala nei Peresitedi Boyd K. Packer ena nona vosa “The Word of Wisdom: The Principle and the Promises”). Sureti ira mera wasea na nodra ivakadinadina ni ivunau oqo se na veivakalougatataki era sa ciqoma ena bulataki ni Vosa ni Vuku.
Vakaraitaka na vidio “Physical Health,” ka sureti ira na goneyalewa mera vakaraica na inaki eso meda maroroya kina na yagoda me bulabula—oka kina na inaki vakayago kei na kena vakayalo talega. Kerei ira mera wasea na veika era sa raica. Me tiki ni veivosaki oqo, navuca mo wasea na vosa oqo mai vei Peresitedi Boyd K. Packer: “Sa inaki dina ni kena soli mai na Vosa ni Vuku me tudei tikoga vei iko na kemu ituvaki vakamareqeti, maroroi, ka vakayalo ni ko vakavukui tiko kina. Vulica mo rogoca na nomu lewa e loma. O na tuberi ka vakasalataki ka vakavulici ka vakalougatataki” (“The Word of Wisdom: The Principle and the Promises,” Ensign, Me 1996). E sa vakayacori oti vakacava na yalayala nei Peresitedi Packer ena nodra bula na goneyalewa?

7:29
Sureti ira na goneyalewa mera wilika na “Tiko Bulabula ni Yago kei na Vakasama” ena Me iSakisaki ni iTabagone. Kerea eso na goneyalewa mera vola ena vava ni volavola eso na vosa ni ivakasala era raica, ka kerea eso tale mera vola na veivakalougatataki e yalataki kivei ira era muria na ivakasala oqo. Kerei ira mera veivosakitaka na iwalewale e vakayarayarataki kina na yalodra mai na ivakarau ni nodra qarava na yagodra. E rawa ni ra vakayagataka vakacava na lisi ena vava ni volavola me vakamacalataki kina na nodra yavu kivei ira na itokani ena so tale na vakabauta?

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila deivaki li na vuna e vinakati ira kina na Turaga mera tiko bulabula? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Wanonova matua na ka era kania ena dua na macawa ka veidutaitaka ke ra sa muria tiko na ivakasala ni Turaga me baleta na ituvaki ni yago.
Vakacavara na Kila Ka cakacaka ni yavunilewa 3 ena Torocake Yadudua.
Tuvakataka e dua na itaviqaravi ni Muavata e okati kina na vakaukauwa yago kei na kakana bulabula.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.