Cava na vuna e bibi kina na cakacaka me dua na ivakavuvuli ni kosipeli?

Sa vakaroti keda na Turaga meda kakua ni vakawelewele. Na vakatorocaketaki ni igu ni cakacaka e vukea na noda tutaki ki na vuravura eda vakaitikotiko kina. E kauta mai e dua na ivakaraitaki levu ni rawaka yaga. E vakalougatataki keda kei na noda matavuvale, gauna oqo kei na kena mai muri.

Mo vakarautaki iko vakayalo

Na itavi cava esa vakavatukana kina na cakacaka ena nomu bula? E sa vakalougatataki iko vakacava kei na nomu matavuvale, vakayago ka vakayalo talega?

Era nanuma beka na goneyalewa o vakatavulica tiko na cakacaka me dua na madigi se dua na ka era via vakanadakuya? O na rawa ni vukei ira vakacava mera vakila na veivakalougatataki e vuqa ni cakacaka ka vakatorocaketaka e dua na gagadre mera cakacaka?

Na ivolanikalou kei na vosa cava soti ena vukei ira na goneyalewa ni kila deivaki na vuna sa dua kina na ivakavuvuli bibi ni kosipeli na cakacaka?

Na iVakatekivu 3:19; Kalatia 6:3–5; 1 Cesalonaika 4:11; Mosaia 10:4–5 (Eda sa vakaroti meda cakacaka)

Na Vosa Vakaibalebale 31:27; Alama 38:12; V&V 58:27; 60:13; 75:29 (Kakua ni vucesa)

Mosese 1:39 (Na cakacaka kei na lagilagi ni kalou)

Dieter F. Uchtdorf, “Rua na iVakavuvuli Baleta na Draki ni Bula Kecega,” Ensign se Liaona, Nove. 2009, 55–58

“Cakacaka ka Bula Rawati Koya,” Me iSakisaki ni iTabagone (2011), 40–41

Vidio: “Easily Guided”

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Sureti ira na goneyalewa mera sarava na vidio “Easily Guided” ka vakaraica na veivakalougatataki e lako mai ena cakacaka kaukauwa. Kerei ira na goneyalewa mera veivosakitaka na veivakalougatataki era sa ciqoma me baleta na cakacaka kaukauwa.
Sureta e dua na goneyalewa me wasea e dua na taledi ki na kalasi ka vakamacalataka na ka a qai cakava me vakatorocaketaka kina na taledi oya. Na cava e vakayarayarataki koya me cakacakataka vakaukauwa na nona taledi? Sureta eso tale ena kalasi mera wasea na veika era a sota kaya ka ra a cakacakataka me rawata kina e dua na ka. Cava na vuna e vinakata kina na Tamada Vakalomalagi meda vulica na cakacaka?

Vulica vata

Na itaviqaravi kece e koto oqo e ra ena vukei ira na goneyalewa mera vulica na yaga ni cakacaka. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Solia ki na goneyalewa yadua e dua na yavuduri ni ivolanikalou me baleta na cakacaka (me vaka e lisitaki toka ena idusidusi oqo). Kerei koya me wilika na ivolanikalou ka vakasamataka e dua na ivakaraitaki mai na nona bula se na bula ni dua tale ka vakaraitaka na ivakavuvuli e vakatavulici ena nona ivolanikalou. Sureti ira na goneyalewa mera wasea na nodra ivolanikalou kei na ivakaraitaki era a vakasamataka. E vakalougatataka vakacava na noda bula na cakacaka?
Solia ki na goneyalewa yadua e dua na ivolanikalou mai na idusidusi oqo, ka kerei koya me vola e dua na ivakaleka ni wase ni ivolanikalou ena dua na tiki ni pepa. Kerei ira na goneyalewa mera vakabira na nodra ivakaleka ni wase ena vava ni volavola. Lesia ki na goneyalewa yadua e dua na ivolanikalou duidui, ka sureti koya me wilika ka vakaraica na ivakaleka ni wase ena vava ni volavola ka veidonui kei na ivolanikalou. Na cava era vulica na goneyalewa mai na ivolanikalou eso oqo me baleta na bibi ni cakacaka? Era sa vakalougatataki vakacava na goneyalewa baleta na nodra cakacaka vagumatua?
Ena vakayagataki ni wase “Cakacaka ka Bula Rawati Koya” ena Me iSakisaki ni iTabagone digitaka eso na vosa me baleta na cakacaka o nanuma ena vakaibalebale kivei ira na goneyalewa. Solia ki na goneyalewa yadua na ilavelave ni dua vei ira na vosa. Sureti koya me wilika lo na vosa ka solia ki vua e dabe tikivi koya. Mera tomana voli na goneyalewa me yacova ni ra sa wilika taucoko na vosa yadua. Vakabira na vosa kece ena vava ni volavola, ka sureta na goneyalewa yadua me digitaka e dua ka vakaibalebale sara kivua ka wasea na vuna e raica kina ni vakaibalebale. Na cava era vulica mai na vosa eso oqo me baleta na bibi ni cakacaka? Ena rawa ni vakalougatataki ira vakacava kei na nodra matavuvale na vulici ni iwalewale ni cakacaka, ena gauna oqo ka vakakina mai muri?
Solia vei ira na goneyalewa na ilavelave ni iwasewase e gadrevi mai na dua na vosa e vakatututaki ena idusidusi oqo. Sureti ira mera wilika vakaiira na iwasewase ka toqa na veivosa kei na malanivosa e vakamacalataka na veivakalougatataki eso e lako mai ena cakacaka. Kerei ira mera wasea vua tale e dua ena kalasi na veika era sa toqa. Na cava era sa vulica na goneyalewa mai na nodra matavuvale me baleta na cakacaka? Na cakacaka cava e rawa ni ra cakava oqo ka na vakalougatataka na nodra itikotiko? Ena rawa ni vukei ira vakatina vakacava na vulici ni iwalewale ni cakacaka?

Kerei ira na goneyalewa me ra wasea na veika era sa vulica nikua. Era sa kila deivaki li vakavinaka na yaga ni cakacaka? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Veivuke vakalevu cake ena cakacaka ni vale, taura e dua na cakacaka vagauna, se lomasoli mo cakacaka tawasaumi ena dua na mataisoqosoqo dauveiqaravi.
Vakacavara e dua se sivia na ka oqo ena Torocake Yadudua: Kila Ka cakacaka ni yavunilewa 1, Digidigi kei na Vakatulewa Vakataki Au cakacaka ni yavunilewa 5.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.