Cava na vuna e bibi kina me’u rawata na vuli ka vakatorocaketaka na kila eso?

Na vuli sa dua na tiki bibi ni ituvatuva ni Tamada Vakalomalagi me vukei keda ni vakataki Koya vakalevu cake. Na rawati ni vuli e vakarautaka na dei ni vakasama kei na kila-ka ka rawa ni vukei keda me da vakatorocaketaka na bula rawati koya. Na vuli ena vakarautaki keda talega ki na veiqaravi levu cake ena noda matavuvale, na Lotu, kei na vuravura.

Mo vakarautaki iko vakayalo

E sa vukei iko vakacava na nomu vuli me vakarautaki iko ki na veika o na sotava ena nomu bula? E sa vukei iko vakacava ni yaco mo bula rawati iko vakalevu cake?

Na cava e bibi kina vei ira na goneyalewa mera rawata na vuli? Na cava era nanuma tu me baleta na vuli? Ena vukei ira vakacava na goneyalewa na vuli kei na vakatorocaketaki ni kila ena nodra itavi taucoko mai muri?

Na ivolanikalou kei na vosa cava ena vukei ira na goneyalewa mera kila deivaki na yaga ni dua na vuli?

Na Vosa Vakaibalebale 4:7; 2 Nifai 9:29; V&V 88:76–80, 118; 90:15; 93:36; 130:18–19 (Meda vakasaqara na vuku kei na kila-ka)

Na Vosa Vakaibalebale 31:10–31 (Na yalewa vinaka sara e vakasaqara na yalomatua kei na cakacaka ni liga me qarava kina na nona itikotiko kei na matavuvale)

Josefa Simici—Ai Tukutuku 1:11–17; 1 Nifai 11:1–6; V&V 138:1–11 (iVakaraitaki ni tamata ena ivolanikalou ka ra vakasaqara na kila-ka)

Mary N. Cook, “Dou Gumatua Sara mo Dou Kila Ka: Dou Cakacaka,” Ensign se Liaona, Me 2012, 120–22

“Vuli,” Me iSakisaki ni iTabagone(2011), 9–10

Veivakavulici ena ivakarau ni iVakabula

A vakayagataka na iVakabula na ivolanikalou me veivakavulici ka vakadinadinataka na Nona ilesilesi. A vakavulici ira na tamata o Koya mera vakanananutaka vakataki ira na ivolanikalou ka mera vakayagataka mera kunea kina na isau ni nodra vakatataro. Na cava o rawa ni cakava mo vakauqeti ira kina na goneyalewa mera vulica ka vakasamataka vagumatua na ivolanikalou?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Wilika vakalasi na Vunau kei na Veiyalayalati 88:118, ka veivosakitaka na vuna e dua kina na ivakavuvuli bibi ni kosipeli na vuli.
Sureti ira na goneyalewa mera raitayaloyalotaka ni dua na nodra itokani vakalotu esa tukuna vei ira ni sa na vakasuka tiko mai koronivuli, ni vakamacalataka, “Au sa na vakamau tiko ena dua na siga, ka na qaravi au na watiqu, ka’u sa sega ni gadreva na lako tiko ki koronivuli.” Era na vakayaloqaqataki koya vakacava na goneyalewa me tomana tikoga na tosoi ni vuli? Kerei ira mera vola na ka era kaya ena dua na tiki ni pepa. Soqoni ira na pepa, ka wilika qai veivosakitaka vata kei na kalasi na veika era tukuna. Ni sa cava na kalasi, solia vei ira na madigi mera kuria na veika era kaya ka yavutaki mai na ka era a vulica ena gauna ni lesoni.

Vulica vata

Na itaviqaravi yadua e ra ena rawa ni vukei ira na goneyalewa me ra kila deivaki na bibi ni vuli. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Wasea na iwasewase ni vosa nei Mary N. Cook “Dou Gumatua Sara mo Dou Kila Ka: Dou Cakacaka” vei ira na goneyalewa, ka sureti ira mera wilika na nodra iwasewase ka vola na veivakanananu e bibi vei ira (sa rawa ni ra sarava talega e dua na vidio ni vosa ka vakavola na vakanananu bibi eso). Sureti ira mera wasea na ka era sa vola vata na kalasi ka vakamacalataka na iwalewale e rawa ni vakalougatataka kina na nodra matavuvale mai muri na nodra vuli-ka.
Lesi ira na goneyalewa mera wilika yadua e dua vei ira na lima na parakaravu mai na iwasewase “Vuli” ena Me iSakisaki ni iTabagone se iyatuvosa mai vei Peresitedi Gordon B. Hinckley kei Peresitedi Thomas S. Monson ena itekivu ni vosa “Seek Learning: You Have a Work to Do.” Kerei ira mera vakamacalataka ki na kalasi na ka era sa wilika, ka veivosakitaka na vuna e bibi kina na cakacaka vagumatua ena gauna oqo me rawati kina e dua na vuli-ka vinaka. Sureti ira na goneyalewa mera vakasamataka ka wasea na nodra nakinaki ni rawati e dua na vuli-ka.
Wasea na kalasi ki na tolu na ilawalawa. Kerea na imatai ni lawalawa mera wilika Na Vosa Vakaibalebale 31:10–31, kerea na ikarua ni lawalawa mera wilika na ivolanikalou eso ena idusidusi oqo ka vakatavulica ni sa dodonu meda vakasaqara na vuku kei na kila-ka, ka kerea na ikatolu ni lawalawa mera wilika na ivolanikalou eso ena idusidusi oqo e vakatakila na ivakaraitaki ni tamata era vakasaqara na kila-ka. Kerea yadua na ilawalawa mera veivosakitaka na ka e vakatavulica vei ira na ivolanikalou ka lesi vei ira me baleta na bibi ni vakayaco vuli-ka kei na vakatorocaketaki ni kila. Kerei ira na ilawalawa yadua mera wasea ki na vo ni kalasi na veika era sa veivosakitaka. Ena vukea vakacava na nodra bula na goneyalewa na rawati ni vuli-ka? Ena rawa ni vukei ira vakacava ni yaco mera marama vakawati ka tina vinaka cake?
Ena veivakadonui nei bisopi, sureta e vica na marama mai na tabanalevu mera wasea na iwalewale era sa vakalougatataki tiko kina kei na nodra matavuvale mai na rawati ni vuli-ka. E sa vukei ira vakacava ni yaco mera lewenilotu lomasoli ena matanitu ni Kalou? Vakayaloqaqataki ira na goneyalewa mera taroga eso na taro e tiko vei ira me baleta na rawati ni vuli-ka.

Kerei ira na goneyalewa me ra wasea na veika era sa vulica nikua. Era sa kila deivaki li na bibi ni kena rawati na vuli? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakacavara e dua se sivia na veika oqo mai na Torocake Yadudua:Kequ Yaga veika sotavi ena yavunilewa 4, Kequ Yaga cakacaka ni yavunilewa 5, Kila Ka veika sotavi ena yavunilewa 1 se 5 cakacaka ni yavunilewa 2
Cakava e dua na lisi ni veika era vinakata me vulici ka caka ituvatuva mera na vulica. Ni ra sa qarava oti na nodra tuvaka, sa rawa ni ra wasea na veika era sota kaya vata kei na vo ni goneyalewa.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina mera vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.