Meu na kila vakacava ni'u sa saumaki vou tiko?

Na saumaki vou sa ka ni bula taucoko meda sa bula va-Karisito vakalevu cake ena Veisorovaki i Jisu Karisito. Oqo e oka kina e dua na veisau sega walega ena noda itovo ia ena noda gagadre, noda vakasama, kei na keda ituvaki sara ga. Oqo e dua na veisau cecere sara e vakatoka na Turaga me dua na sucuvou kei na veisau levu ni yalo (raica na Mosaia 27:25; Alama 5:14). Eda na rawa ni kila ni da sa saumaki vou tiko vua na Turaga ena gauna eda sa sega tale ni gadreva na ivalavala ca, eda sa vakasinaiti ena loloma, ka da sa vakasaqara meda wasea na kosipeli vei ira na tamata.

Mo vakarautaki iko vakayalo

Na veika sotavi cava sa vakatitobutaka na nomu saumaki vou? Na veisau cava o sa raica ena nomu bula ena nomu cakacakataka tiko vagumatua mo bulataka na kosipeli?

Na ivakadinadina cava o sa raica tiko ena nodra sa saumaki vou tiko na goneyalewa? Na cava era gadreva mera kila vinaka baleta na saumaki vou?

Na ivolanikalou kei na ivurevure cava tale eso ena vukei ira na goneyalewa mera kila na nodra sa saumaki vou tiko vua na Turaga?

Inosi 1:1–19, 26–27; Mosaia 5:1–5; 27:23–37; Alama 23:6–7; Ilamani 3:35; 4 Nifai 1:1–4, 15 (iVakaraitaki ni saumaki vou)

Linda K. Burton, “Ira na Yalewa Yalodei,” Ensign se Liaona, Me 2017, 12-15

Bonnie L. Oscarson, “Au Vakabauta Li?” Ensign se Liaona, Me 2016, 87–89

David A. Bednar, “Saumaki vua na Turaga,” Ensign se Liaona, Nove. 2012, 106–9

“ Saumaki mai,” Tudei ena Vakabauta (2004), 112–16

Vidio:“Waiting on the Road to Damascus”, “A Mighty Change: Conversion”

3:45

2:48

Veivakavulici ena ivakarau ni iVakabula

Sa nuitaki iratou tiko na Nona tisaipeli na iVakabula ena ilesilesi bibi mera veivakavulici, veiqaravi, ka vakalougatataki ira na tamata. Sa Nona inaki me vukea na nodratou saumaki mai ena nodratou veiqaravi vei ira na tamata. Na madigi cava ni veiqaravi kei na tubu o rawa ni vakarautaka baleti ira na goneyalewa ko vakavulica tiko?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Sureti ira na goneyalewa mera vola na veika eso e dau curuma na veisau ni toso na gauna (me vakataka na sorenikau me yaco me vunikau se dua na luveni boto me boto levu. Era na vakayagataka vakacava na veika oqo mera vakavulica eso me baleta na saumaki vou?
Vola na vosa saumaki ena vava ni volavola, ka sureti ira na goneyalewa mera raica na veivosa kei na malanivosa eso enaMosaia 27:25–26 e vukei ira mera kila vinaka na cava na saumaki vou. Sureti ira mera veivosakitaka na veika era sa vulica baleta na saumaki vou mai na veivosa kei na malanivosa oqo.

Vulica vata

Na itaviqaravi yadua oqo e ra ena vukei ira na goneyalewa mera vulica na veika baleta na saumaki vou ka kila na ivakadinadina ni ra sa saumaki vou tiko vakai ira. Mai na veivakauqeti ni Yalotabu, digitaka e dua se sivia ka na mana vinaka kina nomu kalasi:

Sureti ira na goneyalewa me ra vaqara na nona vosa o Sister Linda K. Burton “Ira na Yalewa Yalodei” me ra vaqara na ibalebale ni “yalewa yalodei,” ka vola na cava era kunea ena papa ni volavola. Na cava eda rawa ni da vulica me baleta noda rawa nida tisaipeli vinaka ni Vakabula mai na vakaraitaki nodra na marama ena vosa nei Sister Burton? Kerei ira na gone me ra vakaotia na “Vakaraitaki ni iTaviqaravi” ena Vunautakai noqu Kosipeli, daruni pepa 126, ka raica vakatitobu na kena sa vakatotocaketaki vakavinaka na ivakarau Vakarisito. Na cava beka era rawa ni cakava me ra “yalewa yalodei” era taura na ilesilesi bibi me ra tisaipeli i Jisu Karisito?
Ni se vo e vica na siga, sureta e dua na goneyalewa me vakarau mai ki na kalasi me mai wasea na gauna a tauvimate bibi kina o Ethan na luvei Michele Carnesecca, e tiko ena vosa nei Sister Bonnie L. Oscarson “Au Vakabauta Li?” Sa rawa mo vola na taro “Au vakabauta li se sega?” ena vava ni volavola. Sureti ira na goneyalewa me ra vakasamataka vakatitobu na taro oqo ni ra wilika tiko na kalasi na ivakamacala nei Sister Oscarson baleta na veika eda vakabauta. Ni sa vakarau cava na kalasi, solia vei ira na goneyalewa na gauna me ra cavuta na nodra ivakadinadina baleta na ivakavuvuli ni kosipeli era vakabauta e tiko ena vosa oqo. Era sa vakabauta vakacava vakai ira na veika oqo?
Sureti ira na goneyalewa mera digitaka e dua na vosa e vakarautaki tu ena ituvatuva oqo, wilika e dua na kena iwase, ka vakayagataka na kena itukutuku me caka kina e vica na posita ena sauma na taro “Au na kila vakacava niu sa saumaki vou tiko?” Kerei ira na goneyalewa mera vakayagataka na nodra posita kei na vosa era sa vulica mera veivakavulici vakai ira baleta na saumaki vou.
Sureti ira na goneyalewa mera vulica na “Saumaki mai” ena Tudei ena Vakabauta se na ivolanikalou ena ituvatuva oqo ka vola na taro eso era na tarogi ira kina mera veidutaitaka ni sa gumatua tiko na nodra saumaki vou. Solia e dua na gauna mera wasea na kalasi na veika era rawa ni okata ena nodra lisi kei na vuna. Vakayaloqaqataki ira mera vakasamataka vakatitobu na nodra isau ni taro.
Vakaraitaka e dua na vidio mai na ituvatuva oqo, ka sureti ira na goneyalewa mera wasea na veika era sa vulica mai na vidio baleta na saumaki vou. Tukuna vei ira na goneyalewa na veika o sotava ka a vukei iko mo saumaki vagumatua cake, ka sureti ira mera wasea na veika era a sotava.

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila vinaka beka na sala mera kila ni sa saumaki vou tiko na nodra bula? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me ivakaraitaki, e rawa ni ra:

Digitaka e dua na ka dina mera na cakava mera toro cake ena nodra sasaga mera saumaki vou vakatitobu sara.
Vola ena nodra volaniveisiga na nodra nanuma ni vanua era sa yacova toka nikua ena ilakolako ni saumaki vou. Me vaka ni ra sa sotava na veika sa mai vakatitobutaka na nodra saumaki vou, era sa rawa talega ni ra vola oqo ena nodra ivolaniveisiga.

Wasea vata kei ira na goneyalewa na veika era na vulica tiko ena macawa mai oqo. Na cava na nodra vakanananu kei na nodra taro ena ulutaga oqo? Na cava e rawa ni ra cakava me ra vakavakarau ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ni macawa mai oqo.