Na cava na ivakarau ni Turaga ena nodra vukei na dravudravua kei na vakaleqai?

Ni a lako mai vuravura o Jisu Karisito, a vakayagataka vakalevu o Koya na Nona veivunauci ena qaravi ni dravudravua kei na vakaleqai. Sa vakarautaka na Turaga ena loma ni Nona Lotu e dua na sala meda qaravi ira kina na vakaleqai. E sa kerei keda o Koya meda solia vakalevu me veiraurau ki na veika eda sa rawata mai Vua. “Na ivakarau ni Turaga ena qaravi ni vakaleqai e duidui mai na ivakarau ni vuravura. E sa tukuna na Turaga, ‘[Na qaravi ni dravudravua] sa dodonu me caka ena noqu ivalavala.’ O Koya e sega ni kauwai walega ena noda gagadre vakatabakidua; e kauwaitaka talega o Koya na noda toso cake tawamudu. Na vuna oqo, sa dau okati kina na ivakarau ni Turaga ki na bula rawati koya kei na veiqaravi vei ira eda tiko veitikivi me ikuri ni nodra qaravi na dravudravua” (Dieter F. Uchtdorf, “Soli-ka ena iVakarau ni Turaga,” Ensign se Liaona, Nove. 2011, 54).

Mo vakarautaki iko vakayalo

O sa saga vakacava mo muria na ivakaraitaki ni iVakabula ena nodra vukei tale eso? Na cava o rawa ni wasea vei ira na goneyalewa me baleta na veika o sa sotava oti?

Na ivakavuvuli cava ni solika ena ivakarau ni Turaga e gadrevi mera na kila deivaki na goneyalewa? Ena rawa vakacava ni vukei ira ni yaco mera tisaipeli vinaka cake i Karisito na kilai deivaki ni ivakavuvuli oqo?

Na ivolanikalou kei na ivurevure cava tale ena vukei ira na goneyalewa ni kila deivaki na iwalewale e dau veivuke kina na Turaga kivei ira na dravudravua kei na vakaleqai?

Aisea 58:6–11; Malakai 3:8–10; Maciu 25:35–40; V&V 82:18–19 (Sala eso ni nodra qaravi na dravudravua)

Jemesa 1:27; Mosaia 18:27–28; V&V 42:29–30 (Na bibi ni nodra qaravi na dravudravua kei na vakaloloma)

Alama 34:27–28; Momani 8:35–37: V&V 56:16–18; 70:14 (Na ivakasala ni Turaga kivei ira ka sega ni dau qaravi ira na dravudravua)

V&V 104:15–18 (Qaravi ira na dravudravua ena ivakarau ni Turaga)

Patrick Kearon, “Nai Vakaruru Mai na Cava,” Ensign se Liaona, Me 2016, 111–14

Linda K. Burton, “Au a Vulagi,” Ensign se Liaona, Me 2016, 13–15

Jeffrey R. Holland, “Eda Sega Li ni Dravudravua Kecega?” Ensign se Liaona, Nove. 2014, 40--42

“Sasaga ni Lewenilotu mera Qaravi Ira na Dravudravua kei na Vakaleqai, ka Dau Veiqaravi,” iVoladusidusi 2: Veiliutaki ena Lotu (2010), 6.1.2

Vidio: “I Was a Stranger: Love One Another,” “When We Were Strangers,”, “Nai Vakaruru Mai na Cava”

Veivakavulici ena ivakarau ni iVakabula

A ivakaraitaki ka daunivakasala na iVakabula. A vakavulici ira na Nona tisaipeli ena masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina. A vakavulica vei ira na sala me vakavulici kina na Nona kosipeli ena ivakarau a veivakavulici kina o Koya. O na rawa ni muria vakacava na Nona ivakaraitaki?

Vidio:“Let Us Teach”

Sarava eso tale

Wasea na veika o sa sotava oti

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Vakaraitaka e dua na vidio ni veivuke raraba ni Lotu, ka tarogi ira na goneyalewa ena cava era vulica me baleta na vukei ni dravudravua kei na vakaleqai mai na ivakaraitaki ni Lotu. Sureti ira mera wasea na veika era a sotakaya ena nodra vukei ira tale eso.

• Kerei ira na goneyalewa mera lisitaka eso na gagadre vakayago ka vakayalo ka rawa ni tiko vua e dua na tamata. Vola ena vava ni volavola, “Na cava na ivakarau ni Turaga ena nodra vukei na dravudravua kei na vakaleqai?” Wasea vata kei ira na goneyalewa na malanivosa nei Peresitedi Dieter F. Uchtdorf ena itekivu ni idusidusi oqo, ka kerei ira na goneyalewa mera vakarogoca na isau ni taro. Sureti ira mera wasea na veika era sa raica rawa. Eda na rawa ni vukei ira vakacava na dravudravua kei na vakaleqai me yaco mera bula rawati ira vakalevu cake?

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na goneyalewa ni vulica na ivakarau ni Turaga ena nodra vukei na dravudravua kei na vakaleqai. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

• Ena nona vosa “Nai Vakaruru Mai na Cava,” a kaya kina o Elder Patrick Kearon, “E rauta ni 60 na milioni vakacaca na isenivalu e tiko e vuravura nikua. … E veivakidacalataki ni da vakasamataka na iwiliwili oqo ka vakasamataka na ka ena kauta mai ki na bula vakayadua.” Me vukei ira na goneyalewa me ra kila na nodra vakacacani tiko na isenivalu kei na sala mera veivuke kina, vakaraitaka vei ira e dua se rua na vidio e tiko ena ituvatuva oqo.   Na cava na nodra nanuma baleta na veika dredre era sotava tiko na isenivalu? Sa rawa mo sureta na lewe ni kalasi vakailawalawa lalai me ra raica na vosa nei Elder Kearon se nei Sister Linda K. Burton “Au a Vulagi,” ka vakaraica na veika era rawa ni cakava mera vukei ira na isenivalu. Vukei ira goneyalewa me ra cakava na ituvatuva eso mera cakacakataka na vakatutu oqo.  

• Veisasataki ira na goneyalewa. Lesia e dua mai na veisa yadua me wilika na ivolanikalou me baleta na bibi ni nodra qaravi na dravudravua kei na vakaleqai, ka lesi koya kadua me wilika na ivolanikalou ka veivakasalataki kivei ira era sega ni dau qaravi ira na dravudravua kei na vakaleqai (me baleta na kena vakasama, raica na ivolanikalou eso ka vakatututaki ena idusidusi oqo). Sureti ira na goneyalewa mera vulica na veitikina ni nodra ivolanikalou ka qai wasea vata kei na nodra isa na ka era a vulica. Tarogi ira se cava na vuna e sa rui bibi kina vua na Tamada Vakalomalagi na nodra qaravi na dravudravua kei na vakaleqai. Sureti ira na goneyalewa mera veivosakitaka na sala eso e rawa ni ra vukei kina na vakaleqai ena nodra matavuvale, tabanalevu, kei na vanua vakaitikotiko.

• Solia vei ira na lewe ni kalasi na ilavelave ni vosa nei Elder Jeffrey R. Holland “Eda Sega Li ni Dravudravua Kecega?” Kerei ira na goneyalewa yadua me ra digia e dua na malanivosa ni ivolanikalou a cavuta o Elder Holland me baleta nodra vukei na dravudravua kei na vakaleqai tu. Sureti ira na goneyalewa yadua me wasea na ivolanikalou sa digitaka kei na kena ibalebale vua. Ni railesuva vata vakalasi na ivakasala nei Elder Holland: “au sega mada ni kila na sala cava sara mada e dodonu mo ni cakava nomuni itavi vei ira era sega ni rawa mera vukei ira vakai ira. Ia au kila ni sa kila tiko na Kalou, ka na dusimaki iko ena cakacaka ni loloma vakatisaipeli.” Solia vei ira na lewe ni kalasi na gauna me ra vakasamataka na sala eso era nanuma ni vinakata vei ira na Kalou me ra qaravi ira kina na dravudravua kei na vakaleqai. Sureti ira mera wasea ena kalasi na veika era vakila.

• Sureta e dua na lewe ni matabisopi me wasea vata kei ira na goneyalewa na veika e vakila me baleta na nodra vukei na dravudravua kei na vakaleqai kei na madigi e tu vei ira na goneyalewa mera vukea na lewe ni tabanalevu se vanua vakaitikotiko e vakaleqai tu. Sa rawa ni veivosakitaka talega o koya na iwalewale ni kena vakayagataki na ilavo tabu ni Lotu, oka kina na isolisoli ni lolo, cau ki na veivuke raraba ni matatamata, kei na cau ki na iLavo Vure ni Vuli (raica na iVoladusidusi 1: Peresitedi ni iTeki kei na Bisopi [2010], 14.4). Navuca na vakayagataki ni gauna ni kalasi me tuvakataki kina vakatabakidua na itavi vakaveiqaravi ka cauraki ena veivosaki oqo.

Kerei ira na goneyalewa me ra wasea na veika era sa vulica nikua. Na cava era sa bau vakila se vakanananu kina? Era sa kila deivaki li na cava sa ibalebale ni nodra qaravi na vakaloloma ena ivakarau ni Turaga? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Ni sa tarogi e dua na taro, raica mada ke o rawa ni sureta mai e dua me sauma ka me kua ni sauma o qasenivuli. Me kena ivakaraitaki oqo, o rawa ni kaya, ‘Oqori e dua na taro vinaka. Na cava o ni vakasamataka na vo ni kalasi?’ se “E rawa ni dua e veivuke mai me baleta na taro oqo?” (Na Veituberi, Me iLutua ni Noda Bula (1999), 73).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vakacavara e dua vei ira oqo ena Torocake Yadudua: Kequ Yaga cakacaka ni yavunilewa 3 se Caka Vinaka veika sotavi ena yavunilewa 6.

• Vakayacora e dua na cakacaka ni veiqaravi kivua e dua na tamata ka tiko leqa.

• Vakamuria na ivakasala nei Peresitedi Thomas S. Monson me “da qai masuta na veivakauqeti meda kila na nodra gagadre o ira era tu wavoliti keda, oti qai ... toro yani ka veivuke” (“Me sa Tikoga kei Kemuni na Kalou,” Ensign se Liaona, Nove. 2012, 110).

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.