ការពុះពារដើម្បីប្រែក្លាយ
ការចាក់ផ្សាយការបំពាក់បំប៉នថ្នាក់ ស&វ ប្រចាំឆ្នាំ ២០២០
ថ្ងៃអង្គារ ទី ៩ ខែមិថុនា ឆ្នាំ ២០២០
អែលឌើរ អូលីសេស សូរ៉េ ៖បងប្អូនប្រុសស្រីជាទីស្រឡាញ់ មិនថាបងប្អូនរស់នៅទីណាទេ វាពិតជាមានកិត្តិយសណាស់សម្រាប់ភរិយាខ្ញុំ និងខ្ញុំដែលបាននៅជាមួយបងប្អូននារាត្រីនេះ ។ ខ្ញុំក៏ពាំនាំការសួរសុខទុក្ខ និងសេចក្តីស្រឡាញ់មកពីគណៈប្រធានទីមួយ ហើយនិងកូរ៉ុមនៃពួកសាវកដប់ពីរនាក់មកកាន់បងប្អូនទាំងអស់គ្នាផងដែរ ។ ប្រធាន ណិលសុន ផ្ញើសេចក្តីនឹករឭកដល់បងប្អូនដោយផ្ទាល់ ។ លោកតែងតែសុំឲ្យយើងចែកចាយអារម្មណ៍ និងសេចក្តីស្រឡាញ់ដ៏ជ្រាលជ្រៅរបស់លោកជាមួយបងប្អូនដែលយើងបានជួប ។ លោកពិតជាមានអំណរគុណដល់ការបម្រើរបស់បងប្អូនសម្រាប់បុត្រាបុត្រីរបស់ព្រះខ្លាំងណាស់ ។
សហការីជាទីស្រឡាញ់របស់ខ្ញុំ ពីមុនយើងបន្តទៅមុខទៀត ខ្ញុំសូមបង្ហាញអំណរគុណផ្ទាល់ខ្លួនដ៏ជ្រាលជ្រៅរបស់ខ្ញុំសម្រាប់ការបម្រើដ៏អស្ចារ្យរបស់បងប្អូននៅក្នុងថ្នាក់សិក្ខាសាលា និងថ្នាក់វិទ្យាស្ថាន ។ បងប្អូនមានអភ័យឯកសិទ្ធិដើម្បីបង្រៀន និងជួយដល់ជំនាន់ដែលកំពុងពេញវ័យឲ្យដើរនៅលើស្នាមព្រះបាទារបស់ព្រះអង្គសង្រ្គោះទៅកាន់ភាពអស់កល្បជានិច្ច ។ បងប្អូនបង្រៀនវិញ្ញាណដ៏ខ្ពង់ខ្ពស់បំផុតមួយចំនួនរបស់ព្រះ ដែលបានបម្រុងទុកដើម្បីមកកាន់ផែនដីនេះក្នុងដំណាក់កាលនៃប្រវត្តិសាស្រ្តនេះ ។ ព្យាការីជាទីស្រឡាញ់របស់យើង ប្រធាន ណិលសុន ហៅវិញ្ញាណដ៏ខ្ពង់ខ្ពស់ទាំងនេះថាជាក្រុមដ៏ឆ្នើមរបស់ព្រះ ជាកីឡាករដ៏ឆ្នើមរបស់ព្រះ ជាវីរបុរស គឺអស់អ្នកដែលចូលរួមនៅក្នុងព្រឹត្តិការណ៍ផ្តាច់ព្រ័ត្រដ៏អស្ចារ្យនេះ—ការប្រមូលផ្ដុំអ៊ីស្រាអែល ។១ ក្រុមដ៏អស្ចារ្យនេះអាចសម្រេចអ្វីដែលមិនអាចធ្វើទៅបាន ហើយជួយរៀបចំជីវិតនៃក្រុមគ្រួសារមនុស្សទាំងមូល ។២
រ៉ូសាណាភរិយាជាទីស្រឡាញ់របស់ខ្ញុំចូលរួមជាមួយខ្ញុំក្នុងការប្រជុំដ៏ពិសេសនាថ្ងៃនេះ ។ គាត់គឺជាពន្លឺនៃជីវិតរបស់ខ្ញុំអស់រយៈពេល ៣៩ ឆ្នាំមកហើយ ។ ពីព្រោះតែសេចក្តីល្អ និងគំរូដ៏អស្ចារ្យរបស់គាត់ គាត់គឺជាកាតាលីករនៅក្នុងក្រុមគ្រួសាររបស់យើង ដើម្បីជួយពួកយើងម្នាក់ៗឲ្យប្រែក្លាយកាន់តែដូចព្រះគ្រីស្ទ ។ រ៉ូសាណា និងខ្ញុំគឺជាអ្នកទទួលបានពរជ័យដែលកើតមានក្នុងជីវិតរបស់យើង ពីការអនុវត្តតាមការបង្រៀនដែលទទួលបាននៅអំឡុងពេលយុវវ័យរបស់យើង ពីគ្រូបង្រៀនថ្នាក់សិក្ខាសាលា និងថ្នាក់វិទ្យាស្ថានដ៏លះបង់គ្រប់រូប ។ ការបម្រើដ៏ស្មោះត្រង់របស់ពួកគាត់ជះឥទ្ធិពលដ៏ខ្លាំងលើជីវិតរបស់ពួកយើង កាលដែលយើងបោះជំហានដំបូងនៅក្នុងដំណឹងល្អនៃព្រះយេស៊ូវគ្រីស្ទ ។ គ្រូបង្រៀនដែលមានការលះបង់ខ្ពស់ទាំងនេះបានជួយយើងរៀបចំជីវិតរបស់យើងស្របតាមសេចក្តីពិតនៃដំណឹងល្អនៃព្រះយេស៊ូវគ្រីស្ទ ហើយបានដឹកនាំយើងនៅពេលយើងព្យាយាមដើរនៅលើផ្លូវដើម្បីត្រឡប់ទៅព្រះវរបិតាសួគ៌របស់យើងវិញ ។ ខ្ញុំសូមអញ្ជើញភរិយាជាទីស្រឡាញ់របស់ខ្ញុំឲ្យចែកចាយអារម្មណ៍របស់គាត់អំពីរបៀបដែលថ្នាក់សិក្ខាសាលា និងថ្នាក់វិទ្យាស្ថានបានប្រទានពរដល់ជីវិតរបស់គាត់ក្នុងនាមជាអ្នកប្រែចិត្តជឿថ្មីនៅក្នុងសាសនាចក្រ និងក្នុងកិច្ចខិតខំរបស់គាត់ដើម្បីអភិវឌ្ឍគុណលក្ខណៈដូចជាព្រះគ្រីស្ទ ។ តើអូនចង់ចែកចាយពាក្យពេចន៍របស់អូនឥឡូវនេះទេ ប្រពន្ធសម្លាញ់ ?
ស៊ីស្ទើរ រ៉ូសាណា សូរ៉េស ៖ សូមអរគុណ បងសំឡាញ់ដែល បានអញ្ជើញអូនឲ្យចែកចាយនូវទីបន្ទាល់របស់អូន ។
លើក ដំបូងដែលខ្ញុំបានឮអំពីសាសនាចក្រ គឺខ្ញុំមានអាយុ៩ ឆ្នាំ ។ ហើយអស់រយៈ៨ ឆ្នាំ ដែលខ្ញុំបានសុំ ការអនុញ្ញាតិ ពីឳពុករបស់ខ្ញុំដើម្បីបានជ្រមុជទឹក ហើយគាត់តែង និយាយថាទេជានិច្ច ។ គាត់បាននិយាយថា ខ្ញុំនៅក្មេងពេក នៅក្នុងការសម្រេចចិត្តក្នុងរឿងដ៏សំខាន់បែបនេះ ហើយខ្ញុំត្រូវតែបង្ហាញដល់គាត់ថា ខ្ញុំពិតជាចង់ជ្រមុជទឹកពិតប្រាកដមែន ។
ទោះបីជាកាលនោះ ខ្ញុំពុំមែនជាសមាជិកនៃ សាសនាចក្រក៏ដោយតែខ្ញុំបានបញ្ចប់ការសិក្សាថ្នាក់សិក្ខាសាលាប្រចាំថ្ងៃរយៈពេលបួនឆ្នាំដែរ ។ ថ្នាក់ សិក្ខាសាលាបាន បង្រៀន នៅ សាលាប្រជុំ នៅ ម៉ោង ៦:០០ ព្រឹក ជារៀង រាល់ ថ្ងៃ ។ ឳពុកខ្ញុំអនុញ្ញាតិ ឲ្យខ្ញុំ ទៅរៀនដោយមានលក្ខខណ្ឌថាគ្រូរបស់ខ្ញុំត្រូវតែមកយកខ្ញុំ ។ សំណាងណាស់ដែលខ្ញុំមាន គ្រូដ៏អស្ចារ្យមា្នក់ ដែលតែងតែមកដល់នៅម៉ោង ៥ :៣០ នាទីរាល់ព្រឹក ដើម្បីដឹកខ្ញុំទៅជាមួយ ។ ឳពុករបស់ខ្ញុំតែងដាស់ខ្ញុំរាល់ថ្ងៃ នៅម៉ោង ៥ :០០ ព្រឹក ហើយខ្ញុំបាន ស្លៀកពាក់រួចហើយរង់ចាំគ្រូ ។ ខ្ញុំតែងតែ ងងុយដេកជានិច្ច ហើយតែងតែនិយាយទៅកាន់ខ្លួនឯងថា « សូមកុំមកយកខ្ញុំអី ។ សូមកុំមកអី » ផ្ទុយទៅវិញ គាត់តែងមកជានិច្ច ។ គាត់តែងមកជាមួយនឹង ក្តីសប្បាយរីករាយ ។
ខ្ញុំមានអារម្មណ៍ថា មានពរជ័យ និង មានអំណរគុណណាស់ សម្រាប់គ្រូបង្រៀនថ្នាក់សិក្ខាសាលា ដ៏ឧស្សាហ៍ ដែលគាត់អាចនឹងបោះបង់ខ្ញុំ ដោយងាយបំផុត ។ ប៉ុន្ដែ គាត់ មិន បានបោះបង់ខ្ញុំឡើយ ។
សាមសិបឆ្នាំ ក្រោយមក ខ្ញុំមាន ឱកាសបង្រៀនថ្នាក់សិក្ខាសាលាដល់កូនស្រីរបស់ខ្ញុំ មួយរយៈនៅផ្ទះ ។ ព្រោះនាងមិនអាចចូលរួម ថ្នាក់សិក្ខាសាលានៅឯសាលាប្រជុំ នៅឆ្នាំនោះបានឡើយ ព្រោះតែកាលវិភាគនៅសាលារបស់នាង ។ នាងជាក្មេងស្រីដែលមានថាមពលច្រើនហើយមិនរំភើបក្នុងការអង្គុយនៅស្ងៀមរយៈពេល ៤៥ នាទីបានឡើយ ហើយជាពិសេសនោះជាមួយខ្ញុំដែលជាគ្រូរបស់នាង ។ ដូច្នេះខ្ញុំបានសម្រេចចិត្តរៀបចំថ្នាក់ជាពិសេសនិងប្រព្រឹត្តិចំពោះ កូនស្រីដូចជានាង ជាសិស្សដ៏ពិសេសបំផុតក្នុងថ្នាក់សិក្ខាសាលា ទោះបីនាងជាសិស្ស តែម្នាក់ក៏ដោយ ។ នៅចុងឆ្នាំសិក្សាឆ្នាំ នោះនាង រីករាយហើយនាងទទួលអារម្មណ៍នៃ សេចក្តីស្រឡាញ់ ពីព្រះវរបិតារបស់យើងសម្រាប់នាង ហើយខ្ញុំក៏ទទួលអារម្មណ៍បែបនោះដែរ ។
បងប្អូនប្រុសស្រីទាំងឡាយ គឺដូចជា កូនស្រីរបស់ខ្ញុំដែរ ខ្ញុំដឹងថាព្រះបន្ទូលរបស់ព្រះគឺអាចធ្វើឲ្យយើងគ្រប់គ្នាមានភាពខុសប្លែក នៅក្នុងគំនិតយើងក្នុង អាកប្បកិរិយារបស់យើង និងនៅក្នុង របៀបដែលយើងមើលឃើញខ្លួនរបស់យើង និងអ្នកដ៏ទៃ ។
សូមបញ្ចាប់ជាមួយនឹង ៖ ពាក្យដកស្រង់ដ៏អស្ចារ្យមកពីប្រធាន ហិនរី ប៊ី អាវរិង ថា ៖
« បងប្អូន គឺជាគ្រូបង្រៀនដ៏អស្ចារ្យដែលបានដាក់ការខិតខំនិង ការលះបង់នៅក្នុង ការរៀបចំរបស់បងប្អូន ដើម្បីបង្រៀនព្រះបន្ទូលនៅក្នុងការបង្រៀននិង នៅក្នុងការយកចិត្តទុកដាក់ ចំពោះសិស្សរបស់បងប្អូន ។… ឥឡូវនេះបងប្អូនអាចបន្ថែមសេចក្តីជំនឿរបស់បងប្អូនថា ភាគច្រើនសិស្ស របស់យើងនឹងធ្វើការជ្រើសរើសដែលដឹកនាំទៅរកការផ្លាស់ប្រែចិត្តជឿពិត »៣
ខ្ញុំសូមថ្លែងទីបន្ទាល់យ៉ាងដូច្នេះ នៅ ក្នុងព្រះនាមព្រះយេស៊ូវគ្រីស្ទ អាម៉ែន ។
អែលឌើរសូរ៉េស ៖:អរគុណអូនសម្លាញ់ចំពោះពាក្យដ៏ផ្អែមល្ហែមរបស់អូន ។ គាត់អស្ចារ្យណាស់មែនទេ ?
ខ្ញុំសង្ឃឹមថា បងប្អូនមិនមើលស្រាលលើសមត្ថភាពរបស់បងប្អូនក្នុងការមានឥទ្ធិពល និងបញ្ចុះបញ្ចូលយុវវ័យរបស់បងប្អូនឲ្យស្វែងរកសេចក្តីសុចរិតនៅក្នុងជីវិតរបស់ពួកគេឡើយ ។ ដូចជាប្រធានផាកកឺ ធ្លាប់បានមានប្រសាសន៍ថា ពួកគេធំលូតលាស់ឡើងក្នុងទឹកដីសត្រូវ ។ តាមរយៈការបម្រើដ៏លះបង់របស់បងប្អូនក្នុងការបង្រៀនពួកគេ នោះពួកគេអាចរីកលូតលាស់ក្នុងសេចក្តីជំនឿ និងការគោរពប្រតិបត្តិ ហើយនឹងរឹងមាំខាងវិញ្ញាណ ។ ពួកគេនឹងរៀនអំពីរបៀបទប់ទល់ និងយកឈ្នះលើការល្បួង ។
បងប្អូនប្រុសស្រីជាទីស្រឡាញ់របស់ខ្ញុំ កម្មវិធីថ្នាក់សិក្ខាសាលា និងថ្នាក់វិទ្យាស្ថានគឺជាការចូលរួមពីរដ៏សំខាន់បំផុតចំពោះស្ថេរភាព និងភាពរឹងមាំរបស់សាសនាចក្រ ។ ខ្ញុំអាចធានាដល់បងប្អូនថា ព្រះអម្ចាស់កំពុងបំពេញកិច្ចការ[ របស់ទ្រង់ ] និងសិរីល្អ របស់ទ្រង់ ]—គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ។៤—តាមរយៈការបម្រើដ៏មានតម្លៃរបស់បងប្អូនចំពោះទ្រង់ នឹងកូនចៅរបស់ទ្រង់ ។ ហេតុដូច្នោះហើយ គោលដៅរបស់បងប្អូន និងខ្ញុំត្រូវតែជាសេចក្តីសង្រ្គោះ និងភាពតម្កើងឡើងនៃបុត្រាបុត្រីរបស់ព្រះវរបិតាសួគ៌យើងជានិច្ច ។
នៅក្នុងក្បួខ្នាតដ៏អស្ចារ្យនេះសម្រាប់គ្រូបង្រៀន និងថ្នាក់ដឹកនាំនៅក្នុងថ្នាក់សិក្ខាសាលា និងថ្នាក់វិទ្យាស្ថានសាសនា ការបង្រៀន និងការរៀនសូត្រដំណឹងល្អយើងរកឃើញសេចក្តីថ្លែងដ៏គួរឲ្យចាប់អារម្មណ៍នេះ ៖ « គោលបំណងរបស់យើង គឺដើម្បីជួយដល់យុវវ័យ និងយុវមជ្ឈិមវ័យឲ្យយល់ និងពឹងផ្អែកទៅលើការបង្រៀន និងដង្វាយធួនរបស់ព្រះយេស៊ូវគ្រីស្ទ មានលក្ខណៈសម្បត្តិនឹងទទួលពរជ័យនៃព្រះវិហារបរិសុទ្ធ ហើយរៀបចំខ្លួនពួកគេផ្ទាល់ ក្រុមគ្រួសាររបស់ពួកគេ និងអ្នកដទៃទៀត សម្រាប់ជីវិតដ៏នៅអស់កល្បជានិច្ច ជាមួយនឹងព្រះវរបិតារបស់ពួកគេដែលគង់នៅស្ថានសួគ៌ » ។៥
ការទទួលខុសត្រូវនេះទាក់ទងនឹងអ្វីដែលបានថ្លែងនៅក្នុង ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៖« ថ្នាក់សិក្ខាសាលា និងថ្នាក់វិទ្យាស្ថានសាសនា ( ស.&វ. ) ជួយឪពុកម្តាយ និងថ្នាក់ដឹកនាំសាសនាចក្រក្នុងការជួយយុវវ័យ និងយុវមជ្ឈិមវ័យឲ្យបង្កើនសេចក្តីជំនឿរបស់ពួកគេលើព្រះយេស៊ូវគ្រីស្ទ និងដំណឹងល្អរបស់ទ្រង់ដែលបានស្តារឡើងវិញ » ។៦
ឧបសគ្គដ៏ធំបំផុតមួយសម្រាប់យើង ដែលជាអ្នកចូលរួមចំណែកនៅក្នុងកិច្ចការដ៏អស្ចារ្យនៃការសង្រ្គោះដល់ព្រលឹងនេះគឺការខិតខំដើម្បី ក្លាយជា មានន័យថា ដើម្បីរីកលូតលាស់ ឬ ដើម្បីប្រែទៅជាប្រភេទនៃសិស្សដែលព្រះអម្ចាស់រំពឹងទុកពីយើង ។ បន្ទាប់មក ព្រះអម្ចាស់នឹងធ្វើឲ្យយើងមានឥទ្ធិពលលើជីវិតបងប្អូនទាំងឡាយណាដែលយើងបង្រៀន កាលណាពួកគេដើរនៅលើផ្លូវនៃជីវិតដ៏នៅអស់កល្បជានិច្ចនេះ ។ គំនិតនៃការក្លាយជា នេះទាក់ទងទាំងយ៉ាងទៅនឹងចំណុចមួយ នៃចំណុចទាំងបីអំពីរបៀបដើម្បីសម្រេចបានគោលបំណងរបស់ទ្រង់ ដូចដែលបានពិពណ៌នាក្នុងការបង្រៀន និងការរៀនសូត្រដំណឹងល្អនៅក្នុងក្បួនខ្នាត ៖ « យើងរស់នៅតាមដំណឹងល្អនៃព្រះយេស៊ូវគ្រីស្ទ ហើយព្យាយាមដើម្បីទទួលបានភាពជាដៃគូនៃព្រះវិញ្ញាណបរិសុទ្ធ ។ ឥរិយាបថ និង ទំនាក់ទំនង របស់ យើង គឺ ជា គំរូ នៅ ក្នុង គេហដ្ឋាន នៅ ក្នុង ថ្នាក់រៀន និង នៅ ក្នុង សហគមន៍ ។ យើងបន្ដខិតខំអភិវឌ្ឍសមត្ថភាព ចំណេះដឹង ឥរិយាបថ និងចរិតលក្ខណៈរបស់យើង » ។៧
សាវកប៉ុលបានណែនាំយើងអំពីសារៈសំខាន់នៃការទទួលបានកម្ពស់ដូចគ្នានឹងព្រះគ្រីស្ទដែរ ។ សំបុត្ររបស់គាត់ចំពោះសាសន៍អេភេសូរ គាត់បាននិយាយថា ៖
ហើយទ្រង់បានប្រទានឲ្យអ្នកខ្លះបានធ្វើជាសាវ័ក ខ្លះ ជាគ្រូអធិប្បាយ ខ្លះជាគ្រូផ្សាយដំណឹងល្អ ខ្លះជាគ្រូគង្វាល ហើយខ្លះជាគ្រូបង្រៀន
ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើងសម្រាប់ធ្វើការជំនួយ ហើយនឹងស្អាងរូបកាយព្រះគ្រីស្ទឡើង
« ទាល់តែយើងរាល់គ្នាបានរួបរួមខាងឯសេចក្ដីជំនឿរួចជាស្រេច ហើយបានស្គាល់ព្រះរាជបុត្រានៃព្រះដូចគ្នាទាំងអស់ គឺបានដល់ពេញជាមនុស្ស ហើយដល់ខ្នាតកម្ពស់នៃសេចក្ដីពោរពេញផងព្រះគ្រីស្ទ » ។៨
សំណួរដ៏សំខាន់របស់យើងអាចបង្ហាញពីរបៀបដែលយើងអាចសម្រេចបានខ្នាតកម្ពស់នៃសេចក្ដីពោរពេញនៃព្រះគ្រីស្ទ តាមរយៈការបម្រើរបស់យើង កាលណាយើងព្យាយាមដើម្បីជួយអ្នកដទៃឲ្យធ្វើដូច្នោះ ។ ដំណឹងល្អនៃព្រះយេស៊ូវគ្រីស្ទអាចផ្តល់ជំនួយដល់យើងនៅក្នុងរឿងនោះ ។ សូមយើងពិចារណាជាមួយគ្នានូវគោលការណ៍មួយចំនួននៅក្នុងការព្យាយាមឆ្លើយនឹងសំណួរនេះ ។
គោលការណ៍ទីមួយ និងជាមូលដ្ឋានគ្រឹះគឺត្រូវធ្វើតាមលោកគ្រូដ៏ចំណាន គឺព្រះយេស៊ូវគ្រីស្ទជានិច្ច ។ ការបង្ហាញដោយស្មោះត្រង់ពីព្រះយេស៊ូវគ្រីស្ទ តាមរយៈបុគ្គលិកលក្ខណៈ ពាក្យសំដី និងទង្វើរបស់យើងបង្កើនសមត្ថភាពរបស់យើងដើម្បីមានឥទ្ធិពល និងបញ្ចុះបញ្ចូលអ្នកដទៃឲ្យរៀបចំ និងមានគុណសម្បត្តិគ្រប់គ្រាន់ដើម្បីទទួលបានជីវិតដ៏នៅអស់កល្បជានិច្ចជាមួយព្រះវរបិតារបស់ពួកគេដែលគង់នៅស្ថានសួគ៌ ។ ក្នុងការធ្វើដូច្នោះ យើងអាចជួយយុវវ័យរបស់យើងឲ្យស្រឡាញ់ព្រះអម្ចាស់ ដោយសារអ្វីដែលពួកគេស្រឡាញ់ នឹងកំណត់អ្វីដែលពួកគេនឹងស្វែងរក ។ អ្វីដែលពួកគេនឹងស្វែងរក នឹងកំណត់អ្វីដែលពួកគេនឹងគិត ហើយធ្វើ ។ អ្វីដែលពួកគេនឹងគិត ហើយអ្វី នឹងកំណត់ថាពួកគេនឹងក្លាយទៅជាមនុស្សបែបណា ។
បងប្អូន និងខ្ញុំតំណាងឲ្យសាសនាចក្រនៃព្រះយេស៊ូគ្រីស្ទនៃពួកបរិសុទ្ធថ្ងៃចុងក្រោយចំពោះពិភពលោកនេះ ។ អ្វីៗដែលយើងធ្វើ និងនិយាយឆ្លុះបញ្ចាំងពីរូបភាពនៃសាសនាចក្រ សេចក្តីពិតរបស់សាសនាចក្រ និងចុងក្រោយ គឺព្រះអង្គសង្រ្គោះ ។ នៅពេលយើងព្យាយាមយល់កាន់តែច្បាស់ និងធ្វើឲ្យជីវិតរបស់យើងកាន់តែសុខដុមនឹងដំណឹងល្អ នោះយើងគួរតែខិតខំកាន់តែខ្លាំង ដើម្បីប្រែក្លាយដូចជាព្រះយេស៊ូវគ្រីស្ទ ។ មានគ្រាមួយនោះ ប្រធាន ដាល្លិន អេក អូក បានបង្រៀនថា ៖
« ដំណឹងល្អនៃព្រះយេស៊ូវគ្រីស្ទ គឺជាផែនការដែលយើងអាចប្រែក្លាយទៅជាកូនចៅនៃព្រះ ដែលយើងគួរតែប្រែក្លាយ ។ ស្ថានភាពគ្មានស្នាមប្រឡាក់ និងឥតខ្ចោះនេះ នឹងជាលទ្ធផលចេញមកពីតំណរនៃសេចក្ដីសញ្ញា ពិធីបរិសុទ្ធ និងទង្វើនានា បូករួមទាំងការជ្រើសរើសត្រឹមត្រូវ ហើយនឹងចេញមកពីការប្រែចិត្តឥតឈប់ឈរ » ។៩
ថ្មីៗនេះខ្ញុំបាននិយាយជាមួយនឹងមិត្តរួមថ្នាក់សិក្ខាសាលា និងថ្នាក់វិទ្យាស្ថានរបស់ខ្ញុំមួយចំនួនមកពីប្រទេសប្រេស៊ីល ជាកន្លែងដែលខ្ញុំបានធំឡើង ។ ខ្ញុំបានចាប់អារម្មណ៍នឹងអ្វីដែលពួកគេបាននិយាយអំពីឥទ្ធិពលដូចជាព្រះគ្រីស្ទរបស់គ្រូបង្រៀនពួកគេដែលមានមកលើពួកគេ នៅក្នុងពេលធ្វើការសម្រេចចិត្តដ៏សំខាន់ៗក្នុងជីវិតរបស់ពួកគេ ។ សូមពួកយើងស្តាប់ពីអ្វីដែលពួកគេបាននិយាយ ។
ស៊ីស្ទើរ បារីតូ ៖ច៎ាស សូមត្រឡប់ទៅនិយាយពីយុវវ័យរបស់ខ្ញុំសិន ។ ខ្ញុំគិតថា—អឺ ខ្ញុំមិនគិតថា ខ្ញុំប្រាកដ—ថាការសម្រេចចិត្តទាំងអស់ និងអ្វីៗដែលខ្ញុំសង្ឃឹមចង់បាន ខ្ញុំសុបិន្តចង់បាន មានមូលដ្ឋានដ៏រឹងមាំ នៅពេលខ្ញុំសិក្សាដំណឹងល្អនេះទេ ។ ហើយជាពិសេស ខ្ញុំចងចាំយ៉ាងច្បាស់បំផុតពីថ្នាក់សិក្ខាសាលារបស់ខ្ញុំ ។ ខ្ញុំនៅក្មេងណាស់ពេលនោះ—ថ្នាក់សិក្ខាសាលាកំពុងតែចាប់ផ្តើមនៅប្រទេសប្រេស៊ីល—ហើយខ្ញុំនៅចាំពីគ្រូបង្រៀនដ៏ល្អ ដ៏លះបង់របស់ខ្ញុំ ហើយខ្ញុំក៏បានចាប់ផ្តើមស្រឡាញ់ព្រះអង្គសង្រ្គោះ ។ ហើយខ្ញុំគិតថា ទីបន្ទាល់ដែលខ្ញុំបានទទួល នៅពេលខ្ញុំនៅជាសិស្សថ្នាក់សិក្ខាសាលាបានរីកចម្រើនឡើង និងលូតលាស់ បានរីកលូតលាស់យ៉ាងខ្លាំង ដែលខ្ញុំជាខ្ញុំពេលនេះ ដោយសារតែពេលវេលាទាំងនោះ ដោយសារតែការបង្រៀនទាំងនោះ ដោយសារគ្រូបង្រៀនទាំងនោះ ហើយនឹងការសម្រេចចិត្តដែលខ្ញុំបានធ្វើ ។
ស៊ីស្ទើរ ស៊ីលវ៉ា ៖សម្រាប់ខ្ញុំ ខ្ញុំគិតថាវាជាគ្រូរបស់ខ្ញុំដែលមានសារៈសំខាន់ខ្លាំងណាស់នៅពេលនោះ ព្រោះខ្ញុំជាអ្នកផ្លាស់ប្តូរថ្មីនៅពេលនោះ ហើយគាត់បានជួយខ្ញុំច្រើនក្នុងការយល់ពីគោលការណ៍ទាំងនោះនិងវិធីអនុវត្តវានៅក្នុងជីវិតរបស់ខ្ញុំនិងស្វែងរកគុណសម្បត្ដិដែលព្រះយេស៊ូ ព្រះគ្រីស្ទមាន—ដូចជាការអត់ធ្មត់ ការបង្កើនចំណេះដឹង ការគោរពប្រតិបត្តិ ដល់ពួកព្យាការីដែលរស់នៅ ។ ទាំងអស់នេះបានជួយខ្ញុំនៅពេលអភិវឌ្ឍសមត្ថភាពដើម្បីស្ដាប់តាមសំឡេង ព្រះវិញ្ញាណបរិសុទ្ធដែលជាការខ្សឹបប្រាប់របស់ព្រះវិញ្ញាណ ។ ដូច្នេះនេះគឺជាគន្លឹះសម្រាប់ខ្ញុំព្រោះខ្ញុំជាអ្នកផ្លាស់ប្រែចិត្តជឿថ្មី ។ គឺជាគ្រូបង្រៀន ។ គាត់មានចំណេះដឹងដ៏អស្ចារ្យ ហើយគាត់ក៏បានជួយដល់សិស្សជាច្រើនឲ្យអភិវឌ្ឍការយល់ដឹងនោះផងដែរ ។ គាត់ក៏ឆ្លើយចំពោះសំណួររបស់យើងហើយនឹងផ្សេងៗទៀត ។ រឿងនេះបានជួយខ្ញុំឲ្យទទួលបាននូវទីបន្ទាល់មួយ ហើយឈរយ៉ាងរឹងមាំក្នុងដំណឹងល្អ ។
អែលឌើរ ហ្គុងខាល ៖ មែនហើយ ដរាបណាខ្ញុំបានទទួលបុណ្យជ្រមុជទឹក នៅពេលខ្ញុំបានចូលក្នុងសាលាជំនុំនៅគ្រាដំបូង ខ្ញុំបានចូលរួមភ្លាមដោយយុវវ័យ និងគ្រូបង្រៀនថ្នាក់សិក្ខាសាលា ។ គាត់បានអញ្ជើញខ្ញុំឲ្យមកថ្នាក់រៀន ។ មុខវិជ្ជាដែលបានចាប់ផ្ដើមរួចហើយ ដូច្នេះខ្ញុំត្រូវប្រញាប់បំពេញកញ្ចប់មួយចំនួនដើម្បីអាចទទួលបានវិញ្ញាបនបត្រសម្រាប់ឆ្នាំនោះ ។ ខ្ញុំមិនដឹងថាត្រូវបំពេញកញ្ចប់ទាំងនោះយ៉ាងណាទេ ប៉ុន្តែខ្ញុំរៀនដើម្បីចូលរួមខ្លួនឯង ហើយការចូលរួមនោះសំខាន់ ។ ការចូលរួមនោះគឺសំខាន់ដើម្បីខ្ញុំអាចមានអារម្មណ៍បំណងប្រាថ្នាដើម្បីរៀនបន្ថែមអំពីបទគម្ពីរ ដែលខ្ញុំពុំធ្លាប់គិតអំពីវាពីមុន ហើយដែលខ្ញុំមិនទាន់យល់នៅឡើយ ។ បន្ទាប់ពីរំភើបដំបូងនោះ អំណរក្នុងការចូលរួមបានចាប់ផ្ដើមធ្វើជាផ្នែកមួយនៃជីវិតរបស់ខ្ញុំ ។ វាធម្មតា ហើយខ្ញុំទទួលអារម្មណ៍ដឹងអំពីបំណងប្រាថ្នាដើម្បីដឹងបន្ថែមអំពីបទគម្ពីរ និងអនុវត្តនូវអ្វីៗទាំងឡាយដែលហាក់ដូចជាពិត និងមានពរជ័យយ៉ាងខ្លាំងចំពោះជីវិតនៃយុវវ័យទាំងឡាយ ដែលអ្នកអាចមើលឃើញនៅក្នុងសកម្មភាពរបស់ពួកគេ ។ ការមើលបកក្រោយវិញខ្ញុំអាចចងចាំរឿងនេះ ៖ សកម្មភាពនៃយុវវ័យទាំងនេះ បានធ្វើឲ្យខ្ញុំមើលឃើញអ្វីមួយដែលជាការពិត ។
អែលឌើរ សូរ៉េស ៖សំបុត្ររបស់សាវក ប៉ុល ទៅកាន់ ធីម៉ូថេ រំឭកយើងពីការប្រឹក្សាដ៏សំខាន់ដែលយើងអាចស្តាប់តាម ដើម្បីអាចមានឥទ្ធិពលលើអ្នកដទៃឲ្យធ្វើល្អពិតប្រាកដ ៖ « ចូរធ្វើជាគំរូដល់ពួកអ្នកជឿ ដោយពាក្យសម្ដី កិរិយាប្រព្រឹត្ត សេចក្ដីស្រឡាញ់ សេចក្ដីជំនឿ និងសេចក្ដីបរិសុទ្ធ » ។១០
គោលការណ៍ទីពីរ ដែលខ្ញុំចង់លើកឡើងគឺការបង្រៀនដំណឹងល្អដោយក្លាហាន និងច្បាស់លាស់ ។ បងប្អូន និងខ្ញុំគឺត្រូវបានហៅឲ្យបង្រៀនដំណឹងល្អរបស់ព្រះយេស៊ូវគ្រីស្ទ ។ យើងមិនត្រូវបង្រៀនគំនិតរបស់យើង ឬ ទស្សនវិជ្ជារបស់យើងនោះទេ សូម្បីតែយើងបញ្ចូលជាមួយបទគម្ពីរក៏ដោយ ។ ដំណឹងល្អគឺជាព្រះចេស្ដានៃព្រះដល់សេចក្ដីសង្គ្រោះ ១១ហើយមានតែតាមរយៈព្រះយេស៊ូវគ្រីស្ទ និងដំណឹងល្អរបស់ទ្រង់ប៉ុណ្ណោះ ទើបយើងត្រូវបានសង្គ្រោះ ។ ដោយមានការណែនាំ និងដឹកនាំពីព្រះវិញ្ញាណបរិសុទ្ធ នោះយើងគឺត្រូវបង្រៀនគោលការណ៍នានានៃដំណឹងល្អ ដូចមាននៅក្នុងកចិ្ចការក្បួនខ្នាតនៃសាសនាចក្រ និងនៅក្នុងពាក្យសម្ដីរបស់ពួកសាវក និងពួកព្យាការីសម័យទំនើបដែលពួកលោកបានបង្រៀននាសព្វថ្ងៃនេះ ។ យើងត្រូវតែធ្វើជាឧបករណ៍នៃសេចក្តីពិត ហើយបង្រៀនសេចក្តីពិតដោយច្បាស់លាស់ ទើបវាមិនច្រឡំជាមួយទស្សនវិជ្ជានៃពិភពលោក ។ វាល្អណាស់ដើម្បីអានអំពីរបៀបដែលអាលម៉ា ពិពណ៌នាពីព្រះចេស្តានៃព្រះបន្ទូលរបស់ព្រះនៅក្នុងដួងចិត្តរបស់មនុស្ស និងរបៀបដែលវាពង្រឹងសេចក្តីជំនឿយ៉ាងពិតប្រាកដ ។ សូមអាន អាលម៉ា ៣២:៤២ ជាមួយគ្នា ។
« ហើយដោយសារសេចក្ដីព្យាយាមរបស់អ្នក និងសេចក្ដីជំនឿរបស់អ្នក និងសេចក្ដីអត់ធន់របស់អ្នកទៅលើព្រះបន្ទូល ដោយថែទាំព្រះបន្ទូលនោះ ដើម្បីឲ្យវាចាក់ឫសនៅក្នុងខ្លួនអ្នក មើលចុះ នៅមិនយូរមិនឆាប់ អ្នករាល់គ្នានឹងបេះបានផ្លែឈើនោះ ដែលពិសេសបំផុត ដែលផ្អែមជាងអ្វីៗដែលផ្អែមទាំងអស់ ហើយដែលសជាងអ្វីៗដែលសទាំងអស់ មែនហើយ ហើយសុទ្ធជាងអ្វីៗដែលសុទ្ធទាំងអស់ ហើយអ្នករាល់គ្នានឹងទទួលទានផ្លែនេះ រហូតដល់អ្នករាល់គ្នាបានឆ្អែតឆ្អន់ ដើម្បីកុំឲ្យអ្នករាល់គ្នាឃ្លាន ហើយកុំឲ្យអ្នករាល់គ្នាស្រេកទៀតឡើយ » ។
បងប្អូនប្រុសស្រីទាំងឡាយខគម្ពីរដ៏អស្ចារ្យនេះបង្ហាញពីអំណាចនៃសេចក្តីពិតដែលអាចទទួលចូលទៅក្នុងដួងចិត្តរបស់ក្រុមយុវវ័យយើង ហើយបញ្ចុះបញ្ចូលពួកគេឲ្យធ្វើល្អនៅក្នុងជីវិតរបស់ពួកគេ ។ សូមចងចាំថា ការបង្រៀនដ៏មានប្រសិទ្ធភាពគឺសំខាន់ខ្លាំងណាស់ក្នុងភាពជាអ្នកដឹកនាំនៅក្នុងសាសនាចក្រ ។ ជីវិតដ៏នៅអស់កល្បជានិច្ចនឹងកើតមានតែនៅពេលបុរស និងស្ត្រីទាំងឡាយត្រូវបានបង្រៀនជាមួយនឹងប្រសិទ្ធភាពបែបនេះប៉ុណ្ណោះ ទើបពួកគេផ្លាស់ប្ដូរ ហើយគ្រប់គ្រងជីវិតរបស់ពួកគេបាន ។ ពួកគេមិនអាចត្រូវបានបង្ខំឲ្យចូលទៅក្នុងសេចក្តីសុចរិត ឬស្ថានសួគ៌បានឡើយ ។ ការបង្រៀនត្រូវតែបានដឹកនាំ ហើយនោះមានន័យថាការបង្រៀនដែលមានប្រសិទ្ធភាព ។១២
នៅអំឡុងសន្និសីទទូទៅកាលពីខែមេសាឆ្នាំមុន ប្រធាន រ័សុល អិម ណិលសុន បានបង្រៀន« ការស្ដារឡើងវិញនៃភាពពេញលេញនៃដំណឹងល្អនៃព្រះយេស៊ូវគ្រីស្ទ ៖ ការប្រកាសដល់ពិភពលោក » ។ នៅចុងបញ្ចប់នៃសារលិខិតរបស់លោក លោកបានផ្តល់កិច្ចការមួយដល់សាសនាចក្រទាំងមូលឲ្យសិក្សាអំពីវា ហើយសញ្ជឹងគិតពីសេចក្តីពិត និងគិតពីឥទ្ធិពលដែលសេចក្តីពិតទាំងនោះមាននៅក្នុងជីវិតរបស់យើង ។ ខ្ញុំជឿថា ការទទួលខុសត្រូវរបស់យើងមានហួសពីកិច្ចការនោះទៅទៀត ។ បងប្អូន និងរូបខ្ញុំគឺជាផ្នែកមួយនៃក្រុមមនុស្សដែលបានចាត់ឲ្យយកសេចក្តីពិតដែលបានបំផុសពីការប្រកាសនេះចូលទៅក្នុងដួងចិត្តរបស់យុវវ័យ និងយុវមជ្ឈិមវ័យរបស់យើង ។ ក្នុងន័យមួយ គ្រូបង្រៀនថ្នាក់សិក្ខាសាលា និងថ្នាក់វិទ្យាស្ថានគឺ ជាការបន្ថែមមួយដល់ព្យាការីទាំង ១៥ រូប ដែលជាអ្នកមើលឆុត និងអ្នកទទួលវិវរណៈ ក្នុងតួនាទីរបស់ពួកលោកដើម្បីប្រកាសពីសេចក្តីពិតទាំងនេះទៅកាន់ពួកយុវវ័យក្នុងការរៀបចំសម្រាប់ការធ្វើដំណើររបស់ពួកគេនៅក្នុងពិភពលោកដ៏ច្របូកច្របល់នេះ ។ បងប្អូន និងរូបខ្ញុំមានទំនួលខុសត្រូវដ៏សំខាន់ដើម្បីធ្វើឲ្យពរជ័យនៃសេចក្តីប្រកាសនេះកើតមានពិតនៅក្នុងជីវិតរបស់ពួកគេ ។ យើងទាំងអស់គ្នាដឹងថា យើងកំពុងរស់នៅក្នុងគ្រាដ៏លំបាក ។ ពិភពលោកនេះកំពុងភ្លេចពីសារៈសំខាន់ និងតួនាទីនៃព្រះវរបិតាសួគ៌ និងព្រះយេស៊ូវគ្រីស្ទ នៅក្នុងជីវិតរបស់ពួកគេ ហើយបាត់បង់ចក្ខុវិស័យនៃនិស្ស័យជាព្រះរបស់ពួកគេ ។ ទស្សនវិជ្ជារបស់ពិភពលោកកាន់តែច្រើនឡើងៗកំពុងជំនួសឲ្យសេចក្ដីពិតដ៏ពិតបរិសុទ្ធនៃដំណឹងល្អនៃព្រះយេស៊ូវគ្រីស្ទនៅក្នុងដួងចិត្តរបស់មនុស្ស ។ បងប្អូន និងខ្ញុំមានឱកាសដ៏អស្ចារ្យដើម្បីធ្វើជាឧបករណ៍នៅក្នុងព្រះហស្ដរបស់ព្រះអម្ចាស់ដើម្បីផ្ដល់ពរជ័យដល់យុវវ័យរបស់យើង ហើយនាំយកសេចក្ដីពិតដែលត្រូវបានប្រកាសយ៉ាងច្បាស់ ហើយពោរពេញដោយអំណាចនៅក្នុងការប្រកាសនេះចូលទៅក្នុងដួងចិត្តរបស់ពួកគេ ។
ខ្ញុំចែកចាយជាមួយបងប្អូននូវមតិយោបល់ផ្សេងទៀតមួយចំនួនដែលមិត្តសំឡាញ់របស់ខ្ញុំបានលើកឡើងអំពីរបៀបដែលសេចក្ដីពិត ដែលបានបង្រៀនដោយភាពច្បាស់លាស់ និងភាពក្លាហាន ពិតជាបានធ្វើឲ្យពួកគេចាក់ឬសយ៉ាងជ្រៅនៅក្នុងដំណឹងល្អនៃព្រះយេស៊ូវគ្រីស្ទ ។
អែលឌើរ ស៊ីលវ៉ា ៖សម្រាប់ខ្ញុំ រឿងដំបូងដែលកើតមានក្នុងចិត្ត គឺជាគំរូរបស់គ្រូបង្រៀន ដោយសារតែនេះគឺជាធនធាន ដែលយើងមើលតាម ហើយចង់ចង់ប្រែក្លាយដូចជាពួកគាត់ ។ ខ្ញុំតែងតែគិតជានិច្ច « វាអាចទៅរួចទេ ដែលថ្ងៃមួយ ខ្ញុំនឹងមានគ្រួសារមួយដូចនោះ ? តើវាអាចទៅរួចទេ ដែលថ្ងៃមួយ ខ្ញុំនឹងត្រៀមខ្លួនជាស្រេចដើម្បីធ្វើរឿងទាំងនោះ ? » ដូច្នេះ ឥទ្ធិពលនៃគោលលទ្ធិ នៃអ្វីដែលត្រូវបានបង្រៀនជាដំបូងតាមគំរូ ដូចគេនិយាយថា—យើងចាំបាច់ត្រូវសម្របគោលលទ្ធិ និងសម្រួលវាទៅតាមស្ថានភាព និងកាលៈទេសៈរបស់យើង ។ ហើយខ្ញុំព្យាយាមធ្វើដូចនេះអស់ពិសមត្ថភាព ស្របទៅតាមលទ្ធភាព និងសមត្ថភាពរបស់ខ្ញុំ ដូច្នោះដែលពិតប្រាកដគឺ ដើម្បីខ្ញុំអាចជាមនុស្សល្អប្រសើរជារៀងរាល់ថ្ងៃ ហើយអាចធ្វើការជ្រើសរើសល្អបំផុត—ដូចជាខ្ញុំបានធ្វើនៅទីនេះជាមួយនឹងជម្រើសល្អបំផុតរបស់ខ្ញុំគឺការជ្រើសរើសប្រពន្ធរបស់ខ្ញុំដែលជារឿងមួយដែលជួយខ្ញុំផងដែរ ។
ស៊ីស្ទើរ បារីតូ ៖ខ្ញុំតែងតែងមើលទៅគំរូរបស់គ្រូបង្រៀនខ្ញុំជានិច្ច ។ ខ្ញុំនៅតែចាំពីគ្រូបង្រៀនម្នាក់ជាពិសេស ។ គាត់នៅក្មេង ហើយនៅលីវ ។ គាត់គឺជាស៊ីស្ទើរដែលត្រឡប់ពីបេសកកម្មវិញ ពេលខ្ញុំមើលទៅគាត់ពេលគាត់បង្រៀនយើង ខ្ញុំបានគិតថា « ខ្ញុំចង់ក្លាយដូចជាគាត់ ។ ខ្ញុំចង់ក្លាយដូចជាគាត់ខ្លាំងណាស់ » ដោយសារគាត់ដូចគ្នានឹងព្រះអង្គសង្គ្រោះ ។ គាត់ស្រឡាញ់ពួកយើងខ្លាំងណាស់ ហើយគ្រប់ពេលដែលគាត់បង្រៀនដល់យើង ខ្ញុំបានទទួលអារម្មណ៍ពី សេចក្ដីស្រឡាញ់របស់គាត់ ការលះបង់របស់គាត់ចំពោះអ្វីដែលគាត់កំពុងធ្វើ ។ រឿងមួយដែលខ្ញុំគិតថាជារឿងដ៏សំខាន់ក្នុងជីវិតខ្ញុំគឺ—ខ្ញុំមិនមែនជាអ្នកផ្លាស់ប្រែចិត្តជឿទេ ប៉ុន្តែខ្ញុំមានពេលវេលានៃការប្រែចិត្តជឿរបស់ខ្ញុំ ។ ខ្ញុំបានកើតក្នុងសាសនាចក្រ ដូច្នេះពេលយើងនិយាយពីដំណើររឿងរបស់ខ្ញុំ ដំណើររឿងខ្ញុំរៀងខុសគេបន្តិច ដោយសារខ្ញុំមិនចាំថាធ្លាប់មានការសង្ស័យ ឬមិនជឿលើសាសនាចក្រ និងដំណឹងល្អឡើយ ។ អ្វីគ្រប់យ៉ាងគឺវាកើតឡើងដោយឯកឯងចំពោះខ្ញុំ។ ប៉ុន្តែ ខ្ញុំគិតថា—ខ្ញុំប្រាកដថា នឹងមានគ្រាមួយពេលបងប្អូនដឹងដោយខ្លួនឯង ហើយវាគឺពិតប្រាកដ—នោះគឺនៅក្នុងថ្នាក់សិក្ខាសាលា និងថ្នាក់វិទ្យាស្ថានរបស់ខ្ញុំ ជាពិសេសម៉ោងថ្នាក់សិក្ខាសាលា ។ ពេលខ្ញុំគិតពីរឿងនោះឡើងវិញ នោះគឺជាពេលដ៏សំខាន់មួយដែលខ្ញុំត្រូវសម្រេចចិត្តថា តើហេតុអ្វីខ្ញុំស្ថិតនៅក្នុងសាសនាចក្រនេះ—តើសាសនាចក្រនេះពិតមែនចំពោះខ្ញុំឬទេ តើខ្ញុំមានទីបន្ទាល់មួយអំពីដំណឹងល្អ និងទីបន្ទាល់មួយអំពីព្រះយេស៊វគ្រីស្ទឬអត់ ។ ដូច្នេះខ្ញុំអាចក្លាយជាខ្លួនខ្ញុំសព្វថ្ងៃនេះ ដោយសារតែពេលទាំងនោះប៉ុណ្ណោះ ។
ស៊ីស្ទើរ ហ្គុងខាល ៖ ដំបូង នៅពេលយើងមានគ្រូបង្រៀន និងថ្នាក់ដឹកនាំរបស់យើង វាមិនពុំមែនថា ពួកគេល្អឥតខ្ចោះនោះទេ ប៉ុន្តែយើងមើលខ្លួនយើងប្រែក្លាយដូចជាពួកគេ ដោយមានគ្រួសារមួយដូចជាពួកគេ ហើយធ្វើតាមគំរូពួកគេ មានការយល់ដឹងដូចគ្នា ការទទួលបានចំណេះដឹងនោះ ។ មានថ្នាក់ដឹកនាំជាច្រើនដែលមានឥទ្ធិពលមកលើខ្ញុំ ហើយបានផ្ដល់គំរូមួយដល់ខ្ញុំ ដើម្បីខ្ញុំអាចនិយាយថា « ខ្ញុំចង់ប្រែក្លាយដូចជាពួកគេ នៅពេលខ្ញុំធំឡើង » ។ រឿងនោះបានធ្វើឲ្យខ្ញុំព្យាយាមធ្វើការជ្រើសរើសដោយឆ្លាតវៃនៅក្នុងជីវិតរបស់ខ្ញុំជានិច្ច ។ ហើយខ្ញុំបានធ្វើតាម មួយជំហានម្ដងៗ ។ ដូចអែលឌើរ បែតណាបានមានប្រសាសន៍អំពីការផ្លាស់ប្រែចិត្តជឿ វាពុំកើតឡើងភ្លាមៗទេ វាធ្វើឡើងមួយជំហានម្ដងៗ ការផ្លាស់ប្ដូរដួងចិត្ត ការផ្លាស់ប្ដូរគំនិត ការផ្លាស់ប្ដូរឥរិយាបទ ហើយតែងតែផ្ដោតទៅលើព្រះឆន្ទៈរបស់ព្រះ ។ ដូច្នេះព្រះឆន្ទៈរបស់ព្រះ គឺជារឿងទីមួយ ហើយគ្រូបង្រៀនទាំងនេះបានជួយខ្ញុំឲ្យយល់អំពីបទគម្ពីរ រៀនស្រឡាញ់បទគម្ពីរ ។ ដូច្នេះ រឿងនេះក្លាយជាផ្នែកមួយនៃជីវិតខ្ញុំ ។ ខ្ញុំបានព្យាយាមធ្វើការជ្រើសរើសឆ្លាតវៃស្របតាមព្រះឆន្ទៈរបស់ព្រះ ។
អែលឌើរ សូរ៉េស ៖ គោលការណ៍មួយទៀតដែលខ្ញុំចង់លើកឡើងនៅថ្ងៃនេះគឺជាកិច្ចបញ្ជារបស់យើងដើម្បីបង្រៀនសិស្សរបស់យើងដោយព្រះវិញ្ញាណ ។ អ្នក និងខ្ញុំ—ពួកយើង យើងកំពុងធ្វើការរបស់ព្រះអម្ចាស់ ។ យើងគឺជាភ្នាក់ងាររបស់ទ្រង់ ហើយបងប្អូនមានសិទ្ធិអំណាច និងអំណាចដើម្បីធ្វើជាតំណាងទ្រង់ ហើយធ្វើកិច្ចការជំនួសទ្រង់ ។ ក្នុងនាមជាភ្នាក់ងាររបស់ទ្រង់ យើងមានសិទ្ធិទទួលជំនួយរបស់ទ្រង់ ។ ពិតណាស់ យើងត្រូវបានរំពឹងទុកឲ្យរៀបចំមេរៀននីមួយៗដោយឧស្សាហ៍ ចេះស្ទាត់នូវបច្ចេកទេសបង្រៀនខុសៗគ្នា ហើយរៀនពីរបៀបជួយសិស្សរបស់យើងឲ្យអនុវត្តសិទ្ធិជ្រើសរើសរបស់ពួកគេនៅក្នុងសេចក្ដី សុចរិត ។ ទោះជាយ៉ាងណា វាបង្ហាញថា ដើម្បីមានជំនួយរបស់ព្រះអម្ចាស់តាមរយៈព្រះវិញ្ញាណបរិសុទ្ធនៅក្នុងមេរៀនដែលយើងបង្រៀន វាចាំបាច់ថាយើងត្រូវរស់នៅក្នុងជីវិតមួយដែលស័ក្ដិសមនឹងជំនួយនោះ ។
គណៈប្រធានទីមួយ បានថ្លែងទៅកាន់គ្រូបង្រៀនរបស់សាសនាចក្រ ៖ « ចំណែកដ៏សំខាន់នៃការបម្រើរបស់អ្នក នឹងជាការរៀបចំខាងវិញ្ញាណប្រចាំថ្ងៃរបស់អ្នក រួមមានការអធិស្ឋាន ការសិក្សាគម្ពីរ និងការគោរពបញ្ញត្តិ ។ យើងលើកទឹកចិត្តអ្នកឲ្យបូជាខ្លួនអ្នកក្នុងការរស់នៅតាមដំណឹងល្អ ដោយមានគោលបំណងកាន់តែខ្លាំងជាងមុន » ។១៣ បន្ទាប់មក យើងសូមជំនួយរបស់ព្រះអម្ចាស់ ហើយទ្រង់នឹងប្រទានព្រះវិញ្ញាណរបស់ទ្រង់ដល់យើងឲ្យដឹងពីអ្វីដែលត្រូវធ្វើ ។ សូមចងចាំជានិច្ចថា ការបង្រៀនដោយព្រះវិញ្ញាណជួយយើងឲ្យបង្រៀនសិស្សតាមរបៀបមួយដែលពួកគេអាចយល់កាន់តែច្បាស់ពីគោលការណ៍នៃដំណឹងល្អ រួចហើយត្រូវបានលើកទឹកចិត្តឲ្យអនុវត្តគោលការណ៍ទាំងនោះនៅក្នុងជីវិតរបស់ពួកគេ ៖ « ហេតុដូច្នោះហើយ អ្នកដែលផ្សាយ ហើយអ្នកដែលទទួល យល់គ្នាទៅវិញទៅមក ហើយទាំងពីរនាក់ត្រូវបានស្អាងឡើង ហើយត្រេកអរជាមួយគ្នា » ។១៤ រឿងនេះប្រហែលជាមិនចាំបាច់ទេ ប៉ុន្តែខ្ញុំអាចធានាដល់បងប្អូនថា សិស្សរបស់យើងអាចទទួលបានសេចក្តីពិតដ៏នៅអស់កល្បជានិច្ចបានតាមរយៈព្រះវិញ្ញាណ តែនៅពេលវាត្រូវបានបង្រៀនដោយព្រះវិញ្ញាណនោះប៉ុណ្ណោះ ។
ដូចជានីហ្វៃដែរ ខ្ញុំសូមពន្យល់ពីគំនិតដ៏ស្រស់ស្អាតនេះ ៖ « ហើយឥឡូវនេះ ខ្ញុំ នីហ្វៃ មិនអាចសរសេរឲ្យអស់នូវអ្វីដែលបានបង្រៀននៅក្នុងចំណោមប្រជាជនខ្ញុំ ហើយខ្ញុំក៏មិនសូវពូកែខាងការសរសេរដូចជាខាងការនិយាយនោះដែរ ត្បិតកាលណាមនុស្សមួយនិយាយដោយព្រះចេស្ដានៃព្រះវិញ្ញាណបរិសុទ្ធ នោះព្រះចេស្ដានៃព្រះវិញ្ញាណបរិសុទ្ធ នឹងនាំពាក្យទាំងនោះចូលទៅក្នុងចិត្តនៃកូនចៅមនុស្ស » ។១៥ ឱ នោះគឺជាតួនាទីដ៏សំខាន់ដែលព្រះវិញ្ញាណមាននៅក្នុងការបង្រៀនរបស់យើង ដើម្បីនាំសេចក្ដីពិតចូលទៅក្នុងចិត្តនៃកូនចៅមនុស្ស !
បងប្អូនប្រុសស្រីជាទីស្រឡាញ់របស់ខ្ញុំ យើងអាចជាមនុស្សពូកែខាងវោហា និងពូកែនិយាយនៅទីសាធារណៈ ប៉ុន្តែបើគ្មានព្រះវិញ្ញាណទេ នោះសមត្ថភាពរបស់យើងនឹងមិនធ្វើឲ្យអ្វីៗខុសប្លែកនោះឡើយ ។ ប្រធាន រ័សុល អិម ណិលសុន ថ្មីៗនេះបានបង្រៀនថា « វាគ្មានអ្វីចាំបាច់ជាងការស្គាល់ពីរបៀបដែលព្រះវិញ្ញាណមានបន្ទូលមកកាន់[ បងប្អូន ]នាពេលនេះទេ » ។ លោកបានបន្ថែមថា« នៅក្នុងក្រុមព្រះ ព្រះវិញ្ញាណបរិសុទ្ធគឺជាអ្នកនាំសារ ។ ទ្រង់នឹងនាំគំនិតនានាចូលទៅក្នុងចិត្ត[ របស់បងប្អូន ]ដែលព្រះបិតា និងព្រះរាជបុត្រាចង់ឲ្យ[ បងប្អូន ]ទទួល ។ ទ្រង់ ជា អង្គ លួងលោម ចិត្ត ។ ទ្រង់នឹងនាំអារម្មណ៍នៃភាពសុខសាន្ដមកកាន់ដួងចិត្ត[ របស់បងប្អូន ] ។ លោកថ្លែងទីបន្ទាល់អំពីសេចក្ដីពិត ហើយនឹងបញ្ជាក់នូវអ្វីជាការពិត នៅពេលក្មួយស្ដាប់ ហើយអានព្រះបន្ទូលរបស់ព្រះអម្ចាស់ » ។១៦
គោលការណ៍ទីបួនដែលខ្ញុំចង់លើកឡើងគឺការបង្រៀនចេញពីបេះដូង ។ មានគ្រូបង្រៀនដែលពូកែខាងវោហា ហើយមានជំនាញយ៉ាងប្រសព្វ ចេះកែប្រែឃ្លោងឃ្លាឲ្យទាក់ទាញចំណាប់អារម្មណ៍ និងគួរឲ្យចង់ស្តាប់ ។ ប៉ុន្តែគ្រូបង្រៀនដែលមានគំនិតគួរឲ្យចាប់អារម្មណ៍ ដែលអាចនិយាយចេញពីបេះដូងទៅកាន់បេះដូង គឺជាគ្រូបង្រៀនដែលអាចបំផុសយើងឲ្យធ្វើតាមអ្វីដែលយើងរៀន ។ គ្រូបង្រៀនមួយចំនួនទាំងនេះអាចមិនពូកែនិយាយនៅទីសាធារណៈទេ ប៉ុន្តែនៅពេលសិស្សស្តាប់ពួកគាត់ ពួកគេបើកភ្នែករបស់ពួកគេដើម្បីឲ្យយល់ដឹងកាន់តែច្បាស់ ។ គ្រូបង្រៀនទាំងនេះអាចបណ្តុះបំណងប្រាថ្នានៅក្នុងដួងចិត្ត និងគំនិតរបស់ពួកគេ ដែលនឹងមានឥទ្ធិពល និងបញ្ចុះបញ្ចូលសិស្សឲ្យស្វែងរកសេចក្តីល្អ និងទទួលបានភាពលើកតម្កើងឡើង ។ គ្រូបង្រៀនដែលមានឥទ្ធិពលបំផុតដល់ជិវិតរបស់ខ្ញុំគឺជាអ្នកដែលបានបង្រៀនខ្ញុំចេញពីបេះដូងរបស់ពួកគាត់ ។ ពួកគាត់ពុំមានជំនាញក្នុងការបង្រៀនទេ ប៉ុន្តែពួកគាត់អាចនិយាយចេញពីដួងចិត្តទៅកាន់ដួងចិត្ត ។ ឥទ្ធិពលដ៏អស្ចារ្យរបស់ពួកគាត់គ្មានអ្វីទាក់ទងទៅនឹងយន្ដការធ្វើតាមផែនការមេរៀន ឬទ្រឹស្តីអប់រំដែលត្រូវបានកំណត់នោះទេ ប៉ុន្តែទាក់ទងទៅនឹងការយកចិត្តទុកដាក់ពិតប្រាកដ ស្មោះស ចំណង់ចំណូលចិត្ត និងការជឿជាក់ទៅវិញ ។ ដូចដែលបានថ្លែងដោយអ្នកនិពន្ធ និងអ្នកអប់រំជនជាតិអាមេរិកកាំងឈ្មោះ ផាកកឺ ផាលម័រ ថា « គ្រូបង្រៀនល្អមានសមត្ថភាពដើម្បីផ្សារភ្ជាប់ទំនាក់ទំនង ។… ទំនាក់ទំនងដែលបានផ្សារភ្ជាប់ដោយគ្រូបង្រៀនល្អ គឺមិនត្រឹមតែនៅក្នុងទ្រឹស្តីបង្រៀនរបស់ពួកគាត់នោះទេ ប៉ុន្តែថែមទាំងនៅក្នុងដួងចិត្តរបស់ពួកគាត់—ក្នុងន័យពីបុរាណ បេះដូងមានន័យថាជាកន្លែងដែលបញ្ញា និងសតិអារម្មណ៍ និងស្មារតី ហើយនិងឆន្ទៈនឹងចូលមកក្នុងខ្លួនមនុស្ស » ។១៧
ព្រះអម្ចាស់របស់យើង ព្រះយេស៊ូវគ្រីស្ទគឺជាគំរូដ៏ឥតខ្ចោះនៃគោលការណ៍នោះ ។ ទ្រង់បានបន្សល់ទុកស្នាមព្រះបាទាលើដីខ្សាច់នៅឆ្នេរសមុទ្រ ប៉ុន្តែទ្រង់បានបន្សល់ទុកស្នាមខាងវិញ្ញាណនៃការបង្រៀនរបស់ទ្រង់នៅក្នុងដួងចិត្ត និងជីវិតនៃអស់អ្នកដែលទ្រង់បានបង្រៀនដែរ ។ ទ្រង់បានណែនាំពួកសិស្សរបស់ទ្រង់នៅជំនាន់នោះហើយទ្រង់បានមានបន្ទូលមកកាន់យើងដូចគ្នា ៖ « ចូរឲ្យអ្នកមកតាមខ្ញុំចុះ » ។១៨
សូមយើងស្តាប់ពាក្យពេចន៍ចុងក្រោយរបស់មិត្តរួមថ្នាក់ និងមិត្តភក្តិរបស់ខ្ញុំ ។ ខ្ញុំគិតថា ខ្ញុំពុំទាន់បានណែនាំពួកគាត់ឲ្យបងប្អូនបានស្គាល់ឡើយ ។ គូស្វាមីភរិយាទាំងបីគូនេះមានឈ្មោះថា គ្លូសៀ និង រ៉េនណាល់ដូ បារេតូ , លូសេលៀ និង ម៉ារ៉ូ ហ្គូសាល់វែលស៍, និង សាលី ម៉ារៀ និង រ៉ាមីហ្វូ ស៊ីលវ៉ា ។ ខ្ញុំបានស្គាល់ពួកគាត់ភាគច្រើនចាប់តាំងពីកុមារភាពមកម្ល៉េះ ។ ខ្ញុំបានមើលខ្សែជីវិតរបស់ពួកគាត់ ហើយបានរៀនពីគំរូដ៏សុចរិតរបស់ពួកគាត់ ។ ពួកគាត់មានភាពស្មោះត្រង់ តស៊ូ ហើយជាសមាជិកដ៏លះបង់ខ្ពស់របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានធំឡើងក្នុងក្រុមគ្រួសាររបស់ពួកគាត់នៅក្នុងដំណឹងល្អ ហើយបានបម្រើដោយអស់ពីចិត្តក្នុងទំនួលខុសត្រូវរបស់ពួកគាត់ ដែលព្រះអម្ចាស់បានហៅឲ្យបម្រើ ។
អែលឌើរ បារីតូ ៖ខ្ញុំមានគំរូដ៏ល្អនៅក្នុងជីវិតរបស់ខ្ញុំចេញពីសាស្រ្តាចារ្យ គ្រូបង្រៀនថ្នាក់សិក្ខាសាលា និងថ្នាក់វិទ្យាស្ថាន ហើយក៏ចេញពីអ្នកសម្របសម្រួល និងនាយកថ្នាក់សិក្ខាសាលា និងថ្នាក់វិទ្យាស្ថានផងដែរ ។ យើងមានចំណងមិត្តភាពល្អជាមួយពួកគាត់ចាប់តាំងពីពេលនោះមក ។ ខ្ញុំមិនអាចរៀបរាប់ពីអំណរគុណបានគ្រប់គ្រាន់ចំពោះពួកគាត់ និងគំរូរបស់ពួកគាត់នៅក្នុងជីវិតរបស់ខ្ញុំនោះទេ ។ ពួកគាត់គឺជាមិត្តភក្តិល្អរបស់ខ្ញុំផងដែរ ។ ខ្ញុំតែងមានអារម្មណ៍ពេញដោយទំនុកចិត្តដែលខ្ញុំអាចនិយាយអំពីអ្វីៗគ្រប់យ៉ាង ។ ដែលពួកគាត់បានណែនាំ បានបង្រៀនខ្ញុំ ពួកគាត់បានបង្រៀនដំណឹងល្អ ប៉ុន្តែគំរូរបស់ពួកគាត់គឺ អស្ចារ្យណាស់ ។ ពួកគាត់មានឥទ្ធិពលលើខ្ញុំខ្លាំងណាស់ ។
ស៊ីស្ទើរ ហ្គុងខាល ៖ខ្ញុំមានអំណរគុណខ្លាំងណាស់ដើម្បីមានដំណឹងល្អ ហើយអាចមានគ្រួសារនៅក្នុងដំណឹងល្អ ហើយមើលឃើញសព្វថ្ងៃនេះនូវផលផ្លែនៃកិច្ចការទាំងអស់នោះ កាលពីយើងនៅក្មេង ។ ខ្ញុំចងចាំគ្រាមួយដែលខ្ញុំនៅខាងមុខព្រះវិហារបរិសុទ្ធ ជាពេលដែលវាឧទ្ទិសឆ្លង ហើយខ្ញុំមានឯកសិទ្ធិច្រៀងនៅទីនោះ ជាមួយនឹងប្រធាន ឃឹមបឹល ។ ដែល ស៊ីស្ទើរ ឡូបូ គឺជាអ្នកដឹកនាំភ្លេងរបស់យើង ។ មានមនុស្សពីរបីនាក់ដែលអាចទៅក្នុងបន្ទប់សេឡេស្ទាល ហើយអាចមានអារម្មណ៍ដឹងនៅក្នុងព្រះវិហារបរិសុទ្ធថាអ្វីៗដែលខ្ញុំកំពុងរៀននៅទីនោះ ដែលខ្ញុំបានរៀននៅយុវវ័យ គឺមានតម្លៃ ហើយខ្ញុំពិតជាចង់បន្ដដល់អស់កល្បជានិច្ច ។ ដូច្នេះអ្វីៗគ្រប់យ៉ាងក្នុងជីវិតមានគោលបំណងមួយ ហើយគោលបំណងរបស់ខ្ញុំគឺអាចត្រឡប់ទៅកាន់វត្តមានរបស់ព្រះវរបិតាសួគ៌ជាមួយគ្នានឹងគ្រួសារ និងមិត្តភក្ដិរបស់ខ្ញុំ ។
អែលឌើរ ស៊ីលវ៉ា ៖ជាដំបូងគំនិតរបស់ខ្ញុំគឺការថ្លែងអំណរគុណដល់គ្រូបង្រៀនដ៏អង់អាចក្លាហានទាំងនោះ ជាមនុស្សដែលបានលះបង់និងស្ម័គ្រចិត្តបន្តលះបង់ពេលវេលា រៀបចំខ្លួនដើម្បីបង្រៀន ។ ខ្ញុំពុំអាចវាស់វែងពីឥទ្ធិពលដ៏មហិមាដែលគ្រូបង្រៀនអាចមានមកលើសិស្សរបស់ពួកគាត់បានទេ ។ ពេលខ្លះយើងពុំគ្រាន់តែរកឃើញនៅជាច្រើនឆ្នាំក្រោយតែប៉ុណ្ណោះនោះទេ ។ ប៉ុន្តែពួកគេជ្រើសរើសធ្វើអ្វីដែលត្រូវ ហើយបន្ដនៅលើផ្លូវដោយពិតមែន ។ ហើយខ្ញុំពិតជាមានអំណរគុណចំពោះរឿងនេះ ។ ហើយខ្ញុំមានទីបន្ទាល់ថា យ៉ូសែប ស៊្មីធ គឺជាព្យាការីនៃព្រះ ។ ខ្ញុំមានបទពិសោធន៍ខ្លះៗដែលខ្ញុំពុំអាចបដិសេធថា យ៉ូសែប ស្ម៊ីធ ពុំមែនជាព្យាការីរបស់ព្រះបានទេ ។ ព្រះគម្ពីរមរមនគឺជាព្រះបន្ទូលនៃព្រះ ។ សព្វថ្ងៃនេះ យើងមានព្យាការីដែលដឹកនាំយើង ហើយទទួលវិវរណៈ ហើយខ្ញុំដឹងថាព្រះយេស៊ូវគ្រីស្ទ សកម្មនៅក្នុងការដឹកនាំសាសនាចក្រទ្រង់ ។ ទាំងនេះជាគំនិតរបស់ខ្ញុំ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។
អែលឌើរ សូរ៉េ ៖អរគុណមិត្តជាទីស្រឡាញ់របស់ខ្ញុំ ។ សូមព្រះអម្ចាស់ប្រទានពរដល់បងប្អូនទាំងអស់គ្នានៅពេលបងប្អូនបន្តធ្វើជាគំរូល្អនៃអ្វីដែលអ្នកបានរៀននៅពេលបងប្អូននៅក្មេងហើយបន្តកំណត់ពីដំណឹងល្អរបស់ព្រះយេស៊ូវគ្រីស្ទនៅក្នុងចិត្តអ្នកដទៃ ។
គោលការណ៍ចុងក្រោយ និងសំខាន់បំផុត ដែលខ្ញុំចង់ចែកចាយគឺជាទីបន្ទាល់ពីអ្វីដែលខ្ញុំដឹងថាជាការពិត ។ ដៃគូក្នុងដំណឹងល្អជាទីស្រឡាញ់របស់ខ្ញុំអើយ អំណាចនៃទីបន្ទាល់ដ៏រឹងមាំរបស់បងប្អូននឹងផ្លាស់ប្តូរជីវិតសិស្សរបស់បងប្អូនជារៀងរហូត ។ នោះជាអ្វីពិតប្រាកដបានកើតឡើងចំពោះយើងម្នាក់ៗ ឬបុព្វការីជនរបស់យើង ពេលបានស្តាប់ពួកអ្នកផ្សព្វផ្សាយសាសនាចែកចាយទីបន្ទាល់របស់ពួកគេ ។ ទីបន្ទាល់រឹងមាំមួយតាមរយៈព្រះចេស្ដានៃព្រះវិញ្ញាណបរិសុទ្ធ គឺការគាំទ្រដល់អំណាចនៃជីវិតជោគជ័យ និងផ្ដល់សេចក្ដីសុខសាន្ដ ការលួងលោមចិត្ត និងការអះអាង ។ វា បង្កើត ឲ្យ មាន ជំនឿ ថា នៅ ពេល ការបង្រៀន របស់ ព្រះអង្គសង្គ្រោះ ត្រូវ បាន គោរព ដោយ ខ្ជាប់ខ្ជួន នោះ ជីវិត នឹង ស្រស់ស្អាត អនាគត នឹង សុវត្ថិភាព ហើយ នឹង មាន សមត្ថភាព ដើម្បី យក ឈ្នះ លើ ឧបសគ្គ ទាំងឡាយ ដែល កើត ឡើង នៅ លើ ផ្លូវ របស់យើង ។ ទីបន្ទាល់ដ៏ រឹងមាំរបស់ បងប្អូននឹងគាំទ្រដល់សេចក្តីជំនឿរបស់សិស្សរបស់បងប្អូន ហើយនឹងជួយពួកគេឲ្យអភិវឌ្ឍទីបន្ទាល់របស់ពួកគេផ្ទាល់អំពីដំណឹងល្អ ។ ទីបន្ទាល់របស់ពួកគនឹងក្លាយជាបង្គោលសរសរមួយដែលនឹងជួយពួកគេឲ្យស្គាល់ព្រះចេស្តានៃពលិកម្មដ៏ធួននៃភាពជាព្រះរបស់ព្រះគ្រីស្ទ នៅក្នុងជីវិតរបស់ពួកគេផ្ទាល់ ។ នៅពេលពួកគេប្រព្រឹត្តតាមទីបន្ទាល់របស់ពួកគេក្នុងសេចក្តីសុចរិត នោះខ្ញុំអាចធានាដល់បងប្អូនថា ទីបន្ទាល់របស់ពួកគេអាចក្លាយជាខែលការពារពួកគេប្រឆាំងនឹងការល្បួងរបស់មារសត្រូវដែលចង់ធ្វើឲ្យសេចក្តីជំនឿរបស់ពួកគេចុះទន់ខ្សោយ ហើយបណ្តុះការមិនជឿនៅក្នុងគំនិតរបស់ពួកគេពេញមួយជីវិតរបស់ពួកគេ ។ មូលដ្ឋានគ្រឹះនេះនឹងផ្តល់ឲ្យពួកគេនូវសេចក្តីក្លាហានដើម្បីប្រកាសយ៉ាងក្លាហាននូវសេចក្តីពិតនៃដំណឹងល្អទៅកាន់ពិភពលោក ។
ចម្រៀងកុមារច្រៀងថា ៖« ខ្ញុំដឹងព្រះវរបិតារស់ ហើយស្រឡាញ់ខ្ញុំ ។ / ព្រះវិញ្ញាណទ្រង់ខ្សឹបប្រាប់ឲ្យខ្ញុំដឹងថារឿងនេះពិតមែន / ប្រាប់ខ្ញុំថាពិតមែន » ។១៩
ក្នុងស្មារតីនេះ ខ្ញុំសូមបញ្ចប់សុន្ទរកថារបស់ខ្ញុំនៅថ្ងៃនេះដោយការចែកចាយទីបន្ទាល់របស់ខ្ញុំជាមួយបងប្អូន ជាទីបន្ទាល់មួយដែលបានកើតឡើងមួយបន្ទាត់ម្តងៗ ហើយដែលបន្តរីកលូតលាស់នៅពេលខ្ញុំបន្តស្វែងរកដោយដួងចិត្តស្មោះស ដើម្បីកាន់តែយល់ពីព្រះបន្ទូលនៃព្រះថែមទៀត ។ គ្រាប់ពូជនៃទីបន្ទាល់នោះ ដំបូងឡើងបានដាំនៅក្នុងដួងចិត្តខ្ញុំដោយពួកអ្នកផ្សព្វផ្សាយសាសនាដ៏អស្ចារ្យដែលបានបង្រៀនក្រុមគ្រួសាររបស់ខ្ញុំកាលពីកុមារភាព ។ បន្ទាប់ពីនោះ ទីបន្ទាល់នេះបានចិញ្ចឹមបីបាច់ដោយឪពុកម្តាយដ៏ស្មោះត្រង់ ដែលបានបង្រៀនខ្ញុំតាមរយៈគំរូរបស់ពួកលោក និងការលះបង់ចំពោះព្រះអម្ចាស់ ។ នៅទីបំផុត គ្រាប់ពូជនៃទីបន្ទាល់នោះបានរីកឡើងកាលដែលខ្ញុំបានស្តាប់ការបង្រៀននៃគ្រូបង្រៀនដ៏អស្ចារ្យក្នុងថ្នាក់សិក្ខាសលា ហើយមានចំណាប់អារម្មណ៍ដើម្បីធ្វើតាមការបង្រៀននោះក្នុងជីវិតរបស់ខ្ញុំកាលពីនៅវ័យក្មេង ។
ខ្ញុំដឹងថា ព្រះយេស៊ូវគឺជាព្រះគ្រីស្ទ ។ ខ្ញុំដឹងថា ទ្រង់មានព្រះជន្មរស់ ។ ខ្ញុំដឹងថា ទ្រង់បានរងទុក្ខដោយសារអំពើបាបរបស់ខ្ញុំ ហើយបានរស់ឡើងវិញ ហើយបានប្រទានឱកាសឲ្យខ្ញុំផ្លាស់ប្តូរឥរិយាបទរបស់ខ្ញុំ ។ ខ្ញុំដឹងថា ទ្រង់មិនខ្វល់នឹងព្រះអង្គទ្រង់ ព្រោះតែរូបខ្ញុំ ទ្រង់បានបោះបង់ចោលបំណងប្រាថ្នារបស់ទ្រង់ ហើយធ្វើអ្វីដូចដែលព្រះវរបិតាសួគ៌បានប្រាប់ឲ្យទ្រង់ធ្វើ ។ សូម្បីតែនៅក្នុងពេលដែលកំពុងរងទុក្ខវេទនានោះ ទ្រង់បានបដិសេធព្រះអង្គផ្ទាល់ ហើយបានធ្វើអ្វីដែលព្រះវរបិតាសួគ៌ប្រាប់ឲ្យទ្រង់ធ្វើ ។
ខ្ញុំដឹងថា ព្រះវរបិតាសួគ៌នៅមានព្រះជន្មរស់ ហើយស្តាប់ការអធិស្ឋានរបស់យើង ។ ខ្ញុំសូមថ្លែងទីបន្ទាល់ទៅកាន់បងប្អូនថា ទ្រង់យល់ពីការឈឺចាប់របស់យើង ។ ខ្ញុំដឹងថា នេះគឺជាសាសនាចក្រនៃព្រះយេស៊ូវគ្រីស្ទនៅលើផែនដី ។ ព្រះអម្ចាស់ពិតជាចាប់ផ្ដើមការស្ដារឡើងវិញនៃដំណឹងល្អ និងបព្វជិតភាពរបស់ទ្រង់តាមរយៈព្យាការីយ៉ូសែប ស្ម៊ីធ ។ ខ្ញុំស្រឡាញ់ព្រះអង្គសង្រ្គោះ និងព្រះវរបិតាសួគ៌របស់ខ្ញុំ ហើយខ្ញុំចូលចិត្តបម្រើទ្រង់ ។ ខ្ញុំព្យាយាមបង្ហាញសេចក្តីស្រឡាញ់របស់ខ្ញុំចំពោះព្រះអម្ចាស់ជាទីស្រឡាញ់ខ្ញុំ នៅពេញមួយជីវិតរបស់ខ្ញុំ តាមរយៈការបម្រើដល់បុត្រាបុត្រីរបស់ព្រះ ។ បងប្អូនប្រុសស្រីរបស់ខ្ញុំអើយយ ខ្ញុំមានអំណរគុណខ្លាំងណាស់ចំពោះគ្រូបង្រៀនថ្នាក់សិក្ខាសាលា និងថ្នាក់វិទ្យាស្ថានរបស់ខ្ញុំ ដែលមានឥទ្ធិពលលើខ្ញុំជានិច្ចតាមរយៈការលះបង់ និងការបម្រើពេញដោយក្ដីស្រឡាញ់ចំពោះព្រះអម្ចាស់ ។ អ្វីគ្រប់យ៉ាងបានចាប់ផ្តើមនៅពេលនោះហើយខ្ញុំមានអំណរគុណណាស់ចំពោះរឿងនោះ ។
ខ្ញុំស្រឡាញ់បងប្អូនប្រុសស្រីទាំងអស់គ្នា ។ ខ្ញុំពេញចិត្តឱកាសដែលបាននៅជាមួយបងប្អូននាថ្ងៃនេះ ។ សូមអរគុណម្តងទៀតចំពោះអ្វីទាំងអស់ដែលបងប្អូនបានធ្វើសម្រាប់ព្រះអម្ចាស់ និងរាស្ដ្ររបស់ទ្រង់នៅលើផែនដី ។ ខ្ញុំសូមថ្លែងរឿងទាំងនេះនៅក្នុងព្រះនាមនៃព្រះយេស៊ូវគ្រីស្ទ អាម៉ែន ។