Pasiuna nga Pakigpulong

Tibuok Kalibotan nga Debosyonal alang sa mga Young Adult

Ni Quentin L. Cook

Sa Korum sa Napulog Duha ka Apostoles

Dominggo, Nobiyembre 19, 2023

Salamat, Presidente Reese.

Sa dili pa magsugod sa among mga komento, gusto ko nga molakbit sa pagtaliwan ni Presidente M. Russell Ballard sa miagi nga Dominggo—ang akong presidente sa korum ug minahal nga higala. Ako mopadayag sa akong mga pahasubo ngadto sa iyang pamilya ug sa akong gugma ug pagpasalamat alang sa iyang kinabuhi sa pagsakripisyo ug pagpahinungod sa pagpanalangin sa tanang anak sa atong Langitnong Amahan.

Si Mary ug ako nalipay nga makauban si Elder Clark G. Gilbert ug si Sister Christine Gilbert aron mamulong kaninyo niining tibuok kalibotan nga debosyonal nga naggikan sa campus sa Brigham Young University.

Agig pagpangandam alang niining buluhaton, among gipundok ang mga pangutana nga gikan sa mga young adult sa tibuok Simbahan. Among gisugdan sa atong mga campus sa CES: Dinhi sa BYU, dayon sa BYU–Idaho, BYU–Hawaii, ug sa Ensign College. Dayon among gilugway sa tibuok kalibotan uban sa estudyante sa BYU-Pathway ug niadtong nanambong sa institute sa tibuok Ang Simbahan ni Jesukristo sa mga Santos sa Ulahing mga Adlaw. Ang mga Presidente niining mga institusyon ug ubang mga lider nakighimamat sa mga grupo sa mga estudyante aron matino kon unsa nga mga pangutana ang labing importante alang sa mga young adult niining panahona. Usa kadto ka maanindot nga proseso, ug sa kataposan ang mga pangutana nindot kaayo.

Ang inyong mga hunahuna ug mga pagbati hilabihan ka talagsaon ang pagkasusama; daghan kaayo ninyo ang nakigbahin og komon nga mga pangutana nga espirituhanon ug uban pang mga pangutana sa kinabuhi. Ma-estudyante man kadto sa institute sa Peru, usa ka estudyante sa pagka-enhinyero diha sa campus sa BYU–Idaho, usa ka tawo nga nagtuon pinaagi sa BYU–Pathway sa West Africa, usa ka estudyante sa graphic design dinhi sa BYU campus, o usa ka propesyonal nga mamumuo nga nagtambong og institute sa Europe, sa Pilipinas, o dinhi sa Utah, ang mga young adult sa tibuok Simbahan naghiusa sa ilang pagtuo ni Jesukristo ug nakigbahin og susama nga mga pangandoy, mga tinguha, ug mga kabalaka. Kamo talagsaon ug ingon ka importante nga bahin sa kaugmaon niining Simbahan.

Among gigrupo ang inyong mga pangutana ngadto sa lima ka kategoriya alang sa among presentasyon karon:

1. Pag-atubang sa mga hagit sa kinabuhi ug sa pagtuo

2. Paghigugma ug pagkahisakop

3. Pagplano sa kinabuhi ug pagbalanse sa kinabuhi

4. Pagbarog alang sa kamatuoran

5. Pagdawat og personal nga pagpadayag

6. Propetikanhon nga giya

Karon, kami gustong maghisgot sa matag usa niini nga mga pangutana uban kaninyo sa usa ka paagi nga magamit ang among personal nga mga kasinatian sa kinabuhi ug sa among mga obserbasyon gikan sa pakigdait uban sa mga young adult sa tibuok Simbahan.

Si Sister Cook ug ako motubag sa unang duha ka pangutana bahin sa mga hagit sa kinabuhi ug sa hugot nga pagtuo ug sa gugma ug sa pagkahisakop. Si Elder ug Sister Gilbert mopakigbahin dayon og mga kasinatian kon giunsa pagbalanse ang mga responsibilidad sa kinabuhi. Sila mamulong usab bahin sa unsa ang gipasabot sa pagbarog alang sa kamatuoran niining panahon sa kasamok. Ako mopakigbahin dayon og pipila ka mga kapanaminan ug motambag bahin sa pagdawat og personal nga pagpadayag ug motapos sa mga hunahuna sa propetikanhon nga paggiya.