Propetikanhon nga Giya

Tibuok Kalibotan nga Debosyonal alang sa mga Young Adult

Ni Quentin L. Cook

Sa Korum sa Napulog Duha ka Apostoles

Dominggo, Nobiyembre 19, 2023

Sa pagdangop ngadto sa pagdawat og propetikanhon nga giya, ako mopamatuod nga si Russell M. Nelson mao ang gipili nga propeta sa Ginoo aron mogiya sa Iyang Simbahan karon. Nakapamulong ko mahitungod sa akong paghigugma ug pagdayeg kaniya sa daghang higayon.¹

Si Presidente Spencer W. Kimball, sa paghisgot bahin sa propetikanhon nga giya, namahayag: “Sa tanang mga butang nga … kita kinahanglan nga labing mapasalamaton mao nga ang mga langit sa tinuoray naabli na gayod ug nga ang gipahiuli nga simbahan ni Jesukristo natukod diha sa bato sa pagpadayag. Ang nagpadayon nga pagpadayag sa pagkatinuod mao ang mismong dugo sa kinabuhi sa ebanghelyo sa buhing Ginoo ug Manluluwas, nga si Jesukristo.”²

Si propeta Enoch nakakita nang daan sa panahon diin kita nagpuyo. Iyang nakita ang hilabihan nga kadaotan nga mokuyanap ug nanagna bahin sa “dako nga mga katalagman” nga mahitabo. Bisan pa niana, ang Ginoo misaad, “apan ang akong mga katawhan Ako mopatunhay; Ug pagkamatarong Ako mopakanaog gikan sa langit, ug kamatuoran Ako mopadala gikan sa yuta, aron sa pagpamatuod sa akong Bugtong Anak.³ Ang pag-abot sa Basahon ni Mormon mao ang katumanan sa gisulti sa Ginoo ngadto ni Enoch.

Si Propeta Joseph Smith nakadawat og daghang nagsunod nga mga pagpadayag. Daghan ang gitagana alang kanato diha sa Doktrina ug mga Pakigsaad. Ang tanang sumbanan nga mga basahon sa Simbahan naglangkob sa hunahuna ug kabubut-on sa Ginoo alang kanato niining kataposang dispensasyon.⁴

Agig dugang niining talagsaong sukaranan nga mga kasulatan, napanalanginan kita sa nagpadayon nga pagpadayag diha sa buhi nga mga propeta. Ang mga propeta mao ang “sinugo nga mga tinugyanan sa Ginoo, gitugotan nga mamulong alang Kaniya.”⁵

Sama sa ako nang gisulti sa makadaghang higayon, ako mamahayag sa tumang kaligdong nga ang nagpadayon nga pagpadayag nadawat ug gidawat pa pinaagi sa mga pamaagi nga giestablisar sa Ginoo.

Nagserbisyo ko isip usa ka Apostol ubos sa direksyon sa tulo ka propeta: sila si Presidente Gordon B. Hinckley, Thomas S. Monson, ug Russell M. Nelson. Ako mopamatuod nga silang tanan nakadawat og pagpadayag alang sa atong panahon karon.

Akong iseguro kaninyo nga ang mapadayagong giya mahimong madawat sa matag usa kanato samtang kita maghago diha sa ubasan sa Ginoo. Kadaghanan sa atong giya magagikan sa Espiritu Santo. Usahay ug alang sa pipila ka katuyoan direkta kining magagikan sa Ginoo. Ako personal nga mopamatuod nga tinuod kana. Ang giya alang sa Simbahan, sa kinatibuk-an, moabot lamang diha sa Presidente ug propeta sa Simbahan.

Akong gipahayag ang samang mensahe sa laing mga pulong kaniadto ang unsay giingon ni Wilford Woodruff mahitungod ni Propeta Joseph Smith; nga tinuod usab bahin ni Presidente Russell M. Nelson. Akong nakita ang “mga gibuhat sa Espiritu sa Dios uban kaniya, ug sa mga pagpadayag ni Jesukristo ngadto kaniya ug ang katumanan niadto nga mga pagpadayag.”⁶ Siya ang propeta sa Ginoo.

Isip Apostol ni Ginoong Jesukristo, ako mohatag sa akong segurado nga pagsaksi sa kabalaan sa Manluluwas ug sa katinuod sa Iyang Pag-ula. Siya ang atong Manluluwas ug Manunubos. Sa ngalan ni Jesukristo, amen.