7:55

Pagdawat og Personal nga Pagpadayag

Tibuok Kalibotan nga Debosyonal alang sa mga Young Adult

Ni Quentin L. Cook

Sa Korum sa Napulog Duha ka Apostoles

Dominggo, Nobiyembre 19, 2023

Salamat, Elder ug Sister Gilbert, sa inyong nindot kaayo nga tambag.

Ang kataposang pangutana parehong doktrinal ug halawom. Sa unsang paagi nga ako mapanalanginan pinaagi sa personal nga pagpadayag ug propetikanhong giya?

Ang talagsaong pasiuna nga panan-awon diha sa Basahon ni Mormon mao ang propetikanhon nga damgo ni Lehi kalabot sa kahoy sa kinabuhi.¹ Kining panan-awon klarong naghulagway sa mga hagit sa hugot nga pagtuo sa atong panahon ug sa dakong kalainan taliwala niadtong nahigugma, nagsimba, ug mibati nga may tulubagon sa Dios ug niadtong wala. Si Lehi mipasabot sa pipila sa mga batasan nga makaguba sa hugot nga pagtuo. Ang uban mapahitas-on, naghunahuna ra sa kaugalingon, ug buang-buang. Interesado lamang sila sa gitawag nga “kaalam sa kalibotan.”² Ang uban may interes sa Dios apan nawala diha sa kalibotanong mga gabon sa kangitngit ug sala.³ Ang uban nakatilaw sa gugma sa Dios ug sa Iyang pulong apan mibati nga naulaw tungod niadtong nagbiay-biay kanila ug nahulog ngadto sa gidili nga mga dalan.⁴

Kita nahibalo nga may mga miyembro nga dili kaayo interesado ug dili kaayo matinud-anon sa mga pagtulon-an sa Manluluwas. Ang atong tinguha mao nga kini nga mga miyembro mahibalo gayod sa hugot nga pagtuo ug molambo ang ilang kaaktibo, pasalig, ug mga paningkamot nga makabaton og personal nga pagpadayag. Ang Dios nahigugma sa tanan Niyang mga anak. Gusto Niya nga silang tanan makabalik ngadto Kaniya. Iyang tinguha nga ang tanan mahiangay sa sagradong musika sa hugot nga pagtuo. Ang Pag-ula sa Manluluwas usa ka gasa alang sa tanan. Ang personal nga pagpadayag magamit sa tanan.

Ang mensahe, pagpangalagad, ug Pag-ula ni Jesukristo, atong Manluluwas, mao ang atong importante nga kurikulom alang sa pagdawat og personal nga pagpadayag. Walay laing kasulatan nga makahulagway sa tukmang gitinguha alang sa hugot nga pagtuo nga labaw pa kaysa 2 Nephi 25:26: “Ug kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayod sa unsa nga tinubdan sila mahimo nga mangita alang sa kapasayloan sa ilang mga sala.”

Ang Basahon ni Mormon mahinungdanon kaayo.⁵ Aduna kini mahinungdanon nga tahas sa pagdawat og personal nga pagpadayag. Siyempre, adunay mga mopaubos sa kaimportante o gani mosaway niining sagrado nga basahon. Ang uban migamit og pasiaw. Sa wala pa ko magmisyon, usa ka propesor sa unibersidad ang mikutlo sa pamahayag ni Mark Twain nga kon inyong tangtangon ang “ug nahinabo” gikan sa Basahon ni Mormon, kini “usa na lang ka pamphlet.”⁶

Pipila ka bulan ang milabay, samtang nagmisyon sa London, England, usa ka inila nga propesor nga nakaeskwela sa Oxford nga nagtudlo didto sa University of London, usa ka eksperto sa Ehiptohanong Semitic nga mga pinulongan, nagbasa sa Basahon ni Mormon, misulat sa Presidente sa Simbahan nianang higayona nga si David O. McKay, ug nakigkita sa mga misyonaryo. Siya mipahibalo kanila nga siya nakombinser nga ang Basahon ni Mormon sa tinuod usa ka hubad sa kinaadman sa mga Judeo ug sa pinulongan sa mga Ehiptohanon sa mga panahon nga gihulagway diha sa Basahon ni Mormon.⁷ Usa ka ehemplo sa daghan nga iyang gigamit mao ang pangdugtong nga pulongan [phrase] nga “ug nahinabo,” nga nagpakita kon unsaon niya paghubad ang termino sa hugpong sa mga pulong nga gigamit sa kaarang sinulat nga Semitic.⁸ Ang propesor giingnan nga bisan tuod nga ang iyang kahibalo base sa iyang propesyon nakatabang niya, importante gihapon ang pagbaton og espirituwal nga pagpamatuod. Pinaagi sa pagtuon ug pag-ampo, siya nakaangkon og espirituwal nga pagsaksi ug nabunyagan. Busa ang gihimong kataw-anan sa usa ka iladong tigpakatawa, giila sa eskolar nga lig-ong ebidensya sa katinuod sa Basahon ni Mormon, nga gipamatuod kaniya sa Espiritu.

Ang mahinungdanong doktrina bahin sa kabubut-on nagkinahanglan nga ang pagpamatuod bahin sa gipahiuli nga ebanghelyo ibase gayod sa hugot nga pagtuo kaysa gawas o sa siyentipikanhong ebidensya. Sa kataposan, ang tambag ni Moroni sa pagbasa ug pagpamalandong ug dayon kinasingkasing nga mangutana sa Dios uban sa tinuod nga katuyoan sa pagseguro sa mga kamatuoran sa kasulatan pinaagi sa pagsaksi sa Espiritu mao ang tubag.⁹ Klaro lang, ang kalainan niadtong naminaw sa musika sa hugot nga pagtuo ug sa nagpabungol-bungol o wala sa tono mao ang aktibong pagtuon sa mga kasulatan ug ang pagsunod sa tambag sa propeta sa Ginoo.

Ang personal nga pagpadayag mao ang dakong panalangin nga madawat human sa bunyag sa dihang kita “pagasantoson pinaagi sa pagdawat sa Espiritu Santo.”¹⁰ Ang Espiritu Santo mao ang tigpadayag ug tigpamatuod sa tanang kamatuoran, ilabi na sa Manluluwas. Sa atong panahon karon, kanang giya sa pagpadayag mahinungdanon. Si Presidente Nelson mitudlo, “Sa umaabot nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensya sa Espiritu Santo.”¹¹

Palihog sabta nga ang hugot nga pagtuo ngadto ni Ginoong Jesukristo ug ang pagsunod sa Iyang mga sugo sa karon ug sa kanunay mao ang makapamatuod nga pagsulay sa mortalidad. Labaw sa tanan, matag usa nato kinahanglang makaamgo nga kon ang tawo magpabungol-bungol sa musika sa hugot nga pagtuo, siya dili mahiangay sa Espiritu. Sama sa gitudlo ni propetang Nephi, “Kamo nakadungog sa iyang tingog; … ug siya nakapamulong nganha kaninyo sa usa ka hinay nga hinagawhaw nga tingog, apan kamo ingon sa walay pagbati, mao nga kamo dili makabati sa iyang mga pulong.”¹² Ang mga kasulatan miklaro niini nga ang Espiritu Santo makakomunikar sa daghang paagi. Usahay Siya mamulong og kalinaw nganha sa inyong hunahuna.¹³ Usahay moaghat Siya og mga panghunahuna o mga ideya nga mosantop sa inyong hunahuna.¹⁴ Usahay Siya mohatag og kahayag sa inyong hunahuna.¹⁵ Usahay Siya mohimo sa inyong mga kasingkasing nga mapuno sa hingpit nga kalipay.¹⁶

Nakadayeg ko sa mga tubag sa social media nga akong nadawat sa akong post kon sa unsang paagi nga kamo makadawat og pagpadayag. Ang usa mipasabot nga kita kinahanglan nga magpaubos ug modawat sa espirituwal nga mga pagbati nga atong nadawat. Dayon kinahanglan kita nga mopatalinghog ngadto sa mga pagbati imbes sa kalibotan.

Si Presidente Russell M. Nelson mitudlo, “Dili na kamo kinahanglang maghunahuna kon unsa ang kamatuoran. Dili na kamo maghunahuna kinsa ang inyong luwas nga masaligan. Pinaagi sa personal nga pagpadayag, makadawat kamo sa inyong kaugalingon nga pagsaksi nga ang Basahon ni Mormon mao ang pulong sa Dios, nga si Propeta Joseph Smith usa ka propeta, ug nga kini ang Simbahan sa Ginoo.”¹⁷

Ang atong doktrina klaro; kita kinahanglang positibo ug magmaya. Ganahan ko nianang gihatagan og gibug-aton ni Presidente Dallin H. Oaks ug ni Sister Kristen M. Oaks bahin sa pagmaya atol sa ilang talagsaon nga tibuok kalibotan nga debosyonal niadtong Mayo. Atong hatagan og gibug-aton kanunay ang atong hugot nga pagtuo, dili ang atong mga kahadlok. Kita nagmaya sa pasalig sa Ginoo nga dili kita Niya pasagdan ug mohatag kanato og giya ug direksyon.¹⁸ Ang Espiritu Santo mopamatuod sa atong kasingkasing nga kita adunay mahigugmaong Amahan sa Langit, kansang maluluy-ong plano sa pagtubos matuman sa matag aspeto tungod sa maulaong sakripisyo ni Jesukristo.