Pagplano sa Kinabuhi ug Balanse nga Kinabuhi
Tibuok Kalibotan nga Debosyonal alang sa mga Young Adult
Dominggo, Nobiyembre 19, 2023
Elder Clark G. Gilbert: Salamat, Elder ug Sister Cook. Si Christine ug ako madasigon kaayo nga maghisgot niining unang pangutana kalabot sa pagplano sa kinabuhi ug balanse nga kinabuhi.
Sister Christine Gilbert: Kami adunay bisi nga pamilya. Ang akong bana kanunayng dakong gilaoman gikan kaniya sa trabaho—isip usa ka propesor sa Harvard, ang CEO sa usa ka kompanya sa media, ug ang presidente sa duha ka organisasyon sa unibersidad. Atol niining tanan, kami miserbisyo diha sa bisi nga mga calling sa Simbahan. Apan ang among labing importanteng mga responsibilidad kanunayng anaa sa among kaminyoon ug sa among mga anak.
Elder Gilbert: Ako nakahinumdom niini sa dihang ako nangulo sa Deseret News. Pila man kaninyo mga young adult ang nakabasa gayod og usa ka giprinta nga pamantalaan sa kada adlaw? Ipataas ang inyong mga kamot. Eksakto gyod akong gihunahuna—hapit walay usa. Gihatagan ko og responsibilidad nga motabang sa pag-usab sa Deseret News gikan sa tradisyonal nga giprinta nga pamantalaan ngadto sa digital nga umaabot niini. Hilabihan kadto ka lisod nga panahon. Atol niadtong higayona, kami aduna nay pito sa walo namo ka anak, ug ako nagserbisyo isip bishop.
Usa ka adlaw, sa kalit lang, si Presidente Boyd K. Packer mitawag ug nangutanan nako, “Brother Gilbert, nagpakisayod ko mahitungod sa imong pamilya. Gihatagan ba nimo og igong pagtagad ang imong asawa?” Mihunong ko ug mitubag, “Tingali wala.” Miingon dayon siya kanako, “Brother Gilbert, ikaw mangulo niining grupo sa media sulod sa usa ka panahon, apan ikaw mahimong usa ka bana ug usa ka amahan sulod sa kahangtoran.” Gihatagan dayon ko niya og usa ka buluhaton sa paghimo og sinemana nga pakig-date uban ni Christine.
Gisundan dayon niya sa pagpangutana nako kon unsa kong orasa nga matulog, diin ako mitubag 1:00 o 2:00 sa buntag sa kada gabii. Ang iyang tubag nakapahinoktok kanako. Miingon siya, “Sa imong hunahuna kining tanan nagdepende sa tanan nimong paningkamot. Ikaw wala mosalig sa Ginoo.” Si Presidente Packer mihatag dayon nako og usa ka apostolikanhon nga curfew, nga akong gipaningkamotan nga matuman sukad niana.
Sister Gilbert: Mao nga kon ikaw adunay curfew ug usa ka nakaeskedyul sinemana nga gabii sa pakigdate, unsaon man nimo sa pagdumala ang uban pang dagko nimo nga mga responsibilidad?
Kini magsugod sa pagplano. Sukad sa sayo nga bahin sa among kaminyoon, ang akong bana ug ako migahin og sinemana nga sesyon sa pag-eskedyul sa kalendaryo matag Dominggo sa gabii. Alang namo, kini usa ka pasalig nga dili gayod namo sipyaton bisan unsa pa kami ka bisi.
Ikaduha, ang pagbalanse sa mga responsibilidad sa kinabuhi nagkinahanglan usab og gisaw-an nga mga tumong. Bisan kon kami kinahanglan nga magkalagyo, gibati gihapon namo nga nahiusa kon kami adunay managsama nga katuyoan. Mao nga kon ang akong bana nagbiyahe sa trabaho o ako nagtudlo sa sayo sa buntag nga klase sa seminary o siya tua sa responsibilidad sa stake, kon naeskedyul namo kadto nga mga buluhaton ug nauyon sa among tumong, kami nagkauban bisan tuod og kami nagkalagyo.
Elder Gilbert: Sama gihapon, adunay mga panahon kon kinahanglan ka nga magbutang og klaro nga mga utlanan libot sa piho nga mga pagpili.
Si Clay Christensen, usa ka minahal nga higala gikan sa Boston sa makausa mipakigbahin kon sa unsang paagi ang iyang superbisor nangutana kon ang miting sa Dominggo sa buntag ba o Sabado sa buntag nga miting ang mas maayo alang sa sinemana, regular nga eskedyul nga miting sa team. Si Clay mitubag, “Mga tuig ang milabay, mihukom ko nga ihatag nako ang Sabado ngadto sa akong asawa ug ang Dominggo ngadto sa Dios, ug kon ganahan ka nga kuhaon og balik, ikaw kinahanglan mohangyo og direkta kanila alang sa ilang pagtugot.”
Piho nga mga pasalig kinahanglan nga dili mahimong mahangyo-hangyo diha sa imong kinabuhi. Alang sa among pamilya, kini naglakip sa Dominggo nga pagtambong sa simbahan, sinemana nga family home evening, buntag ug gabii nga mga debosyonal sa pamilya, ug panahon nga magkauban isip magtiayon matag semana.